Asinain innchunghawi cheukhat nih electronic thilri kha ningcang loin an hman caah a tanglei buaibainak hna an tong kho:

• Hmunkhat ah caan an hmangṭi kho ti lo.

• A herh loin inn ah rian an i ṭinpi.

• Lunghrinhnak le zumhawk tlak loin umnak hmanh a chuak kho.

CAAN HMANṬINAK

Michael timi pa pakhat nih hitin a ti: “A caan ahcun ka nupi he hmunkhat ah kan umṭi ko nain ka pawngah a um taktak lo. A phone lawng kha a zoh i ‘atu tiang ka zoh dih rih lo’ tiah a ka ti.” Cu bantuk thil sining he aa tlaiin Jonathan timi pa zong nih “nuva hna cu pumsalei in hmunkhat ah an umṭi ko nain meng tampi aa hlatmi an lo” tiah a ti.

RUAH DINGMI: Na innchunghawi he caan nan hmanṭi lioah phone a rami le cakuat a lutmi nih voi zeizat dah hnahnawhnak aan pek cang?—EFESA 5:33.

RIAN

Mi cheukhat cu an rian ruangah zan hmanhah phone chawnh le email kuat a hau men lai. Asinain cu bantukin rian ṭuan a hau lomi hna hmanh nih inn an ṭin hnuah an rian caah caan tampi kha an hman. Lee timi pa nih “ka nupi he hmanṭi dingin ka chiahmi caan chungah rian he aa tlaiin phone chawnhmi le cakuat vialte zoh loin um cu a har tuk” tiah a ti. Joy timi nu pakhat zong nih hitin a ti: “Inn in rian ka ṭuan caah rian ṭuan ding ka ngei zungzal. Cucaah a tlarimi si awkah i zuam a hau.”

RUAH DINGMI: Na innchunghawi nih bia aan ruah tikah ṭha tein na ngai maw?—LUKA 8:18.

ZUMHAWK TLAKMI SINAK

Mi tampi nih social media hman ruangah a chuakmi lunghrinnak cu a bik in nuleva i siknak a ruang pakhat a si tiah an ti. An innchunghawi hngalhter an duh lomi kong kha online ah a thli tein kan taar ti hmanhin mi cheukhat nih an ti.

Mi tampi nih social media cu nuva hna caah ṭih a nung tukmi a si i mah nih zuanzamnak hmanh a chuahter khawh tiah an zumh. Sihni pawl nih social media cu nuva i ṭhennak a chuahter bikmi a ruang ah aa tel ve tiah an chimmi cu khuaruahhar awk a si lo.

RUAH DINGMI: Nangmah he nupa sinak aa dangmi pakhat he nan i chawnhmi kha na innchunghawi sinah na thup maw? —PHUNGTHLUKBIA 4:23.

BIAPI DEUHMI KHA HNGAL

Rawl ei a daithlangmi pakhat cu a ngan a dam lai lo. Cu bantukin a innchunghawi he caan hmanṭi awkah a daithlangmi nih cun a ngan a dammi le a nuammi chungkhar a ngei kho lai lo.—Efesa 5:28, 29.

Electronic thilri nih na chungkhar a hnorsuan nakhnga lo tuah na duhmi ruahnak cheuhnak kha thim asiloah nangmah na ruahnak kha ṭial.

• Nikhat ah a tlawm bik voikhat tal rawl eiṭi u

• Electronic thilri hman lo ding caan kha ser u

• A hleikhunmi thil pakhatkhat tuahṭi dingin timtuah u

• Zan ah electronic thilri kha phit u law ihnak he aa hlatnak ah chia u

• Nan pawngah electronic thilri chia loin nifatin minit 15 chung bia i ruah u

• A caan kha rikhiak u law Internet kha phit u