Electronic Thilri Cu Zeitindah Hawikomhnak Ah Huham A Ngeih?
Cakuat, email, videoconference call le social media hna hmangin mi pahnih cu vawlei ṭhen dangdang i an um hmanhah fawi tein an i pehtlaih khawh caah lunglawmh awk ngai a si. Electronic thilri kha man a ngeimi lam in an hman.
Asinain mi cheukhat nih an hawile chawnhnak le pehtlaihnak ah electronic thilri lawng kha an hman. Cutin a hmangmi hna nih a tanglei i buaibainak hna hi an tong kho:
-
An hawile cungah zawnruahnak an langhter kho lo.
-
An li a leng i pakhatkhat a baumi bantukin an intuar.
-
Midang kong nakin anmah kong kha biapi deuh in an ruat.
HNGALH AWK A SIMI
ZAWNRUAHNAK
Midang cung zawnruahnak langhter khawh awkah an kong ruahnak caah a caan pek a hau. Cakuat relnak le kuatnak, social media zohnak ti bantuk caah kan rian a tam tuk ahcun cutin tuah awkah a har lai.
Cakuat tam tuk a phanh ahcun na hawi pakhat i a cakuat leh ding hmanh kha naa harh lai. Bawmh a herhmi na hawi pakhat bawmh nakin na cakuat a phanmi vialte rel dih ding tu kha na hun i tim lai.
RUAH DINGMI: Na hawile he pehtlaihnak ah electronic thilri na hman tikah “zawnruahnak” zeitindah na langhter khawh?—1 PETER 3:8, NW.
LILENNAK
Mi tampi cu social media an hman tikah an intuarnak a zual chin ti kha hlathlaitu cheukhat nih an hmuh. Midang taarmi hmanthlak le hmanung bik thawngpang hna zohnak nih mi pakhat kha “a caan ka sawksam timi ruahnak” a ngeihter khawh tiah hlathlaitu hna nih biachahnak an tuah.
Mah lengah midang taarmi, lungthawh awk ngai a simi hmanthlak hna zohnak nih a chiatnaklei in i tahchunhnak hna a chuahter khawh. Cun mah nih midang nunning kha a nuam tukmi a lawhter i kanmah nunning cu a chia tukmi bantuk a lawhter men lai.
RUAH DINGMI: Social media hman tikah a chiatnaklei in midang he i tahchunh kha zeitindah kan hrial khawh?—GALATI 6:4.
BIAPI AH I CHIAHNAK
Sayamah pakhat nih a siangngakchia cheukhat cu anmah zawn lawng an i ruat i an caah thil a tuah dingmi hawikom lawng an duh hna tiah a ṭial. Cu bantuk hawikom nih i pehtlaihnak in an hmuh dingmi thil lawng kha lungthin an pek. An hawile kha a herh tik paohah awn le phih a ngahmi phone bantukin an hun hmuh hna.
RUAH DINGMI: Online i na taarmi nih midang zuam a duhmi asiloah mahle mah biapi tuk ah aa chiami na si kha a langhter maw?—GALATI 5:26.
TUAH KHAWHMI
ELECTRONIC THILRI NA HMAN NING KHA I DOTHLAT
Electronic thilri cu na bawi si loin na sal a si ahcun na hawile he i pehtlaih khawh peng awk le i naih deuh awkah aan bawmh lai.
BAIBAL PHUNGLAM: “Dawtnak cu . . . amah zawn lawng aa ruat lo.”—1 KORIN 13:4, 5.
Tuah na duhmi ruahnak cheuhnak kha thim asiloah nangmah na ruahnak kha ṭial.
-
Electronic thilri hmangin cakuat lawng si loin pumpak in bia ruah awkah i zuam
-
Midang he bia nan i ruah tikah na phone kha kaadang ah chia (asiloah silence tuah)
-
Social media na hman caan kha rikhiak
-
Mi bia ṭha tein a ngaimi si
-
Harnak a tongmi na hawi kha pehtlaihnak tuah
