Electronic Thilri Cu Zeitindah Ruahnak Cungah Huham A Ngeih?
Sianginn, rian asiloah a dang ruang hna ah mi nih thil tampi an cawn a hau. Mah cawnnak ah electronic thilri nih a bawmh khawh hna. Atu ahcun inn in chuah hau loin le ṭhutdan cungin thawh hmanh hau loin a konglam tampi kha fawi tein hmuh khawh a si cang.
Asinain electronic thilri luan tuk in a hmangmi cu a tanglei buaibainak hna an tong kho:
-
Ca an rel tikah lungthin pek an i harh.
-
Rian pakhat cung lawngah lungthin pek an i harh.
-
Anmah lawngin an um tikah an um a har colh.
HNGALH AWK A SIMI
CARELNAK
Electronic thilri a hmang tukmi hna cu cauk ningin rel dih awkah an lung a sau lo, cucaah a biapimi kong hngalhnak ca men ah khulrang in an rel.
Cu bantukin ca rel cu a phi zokzok tein hmuh na herh tikah a ṭha. Asinain a konglam thuk deuh in hngalhthiam na herh tikah mah cu a ṭhami lam a si lo.
RUAH DINGMI: Capar saupipi kha ṭha tein na rel kho maw? Cutin tuahnak nih na cawnnak kha zeitindah a ṭhanchoter khawh?—PHUNGTHLUKBIA 18:15.
LUNGTHIN PEKNAK
Mi cheukhat nih caankhat te ah rian pakhat nak tam ṭuan khawh awkah, tahchunhnak ah, ca zoh buin hawile he ca i kuat awkah electronic thilri kha an hman. Asinain an lungthin aa ṭhencheu caah an rian kha ṭha tein an ṭuan kho men lai lo. A hleiin rian a pahnih ningin lungthin pek a herh tikah a si.
Lungthin pek khawh awkah mahle mah i uk khawhnak a herh, asinain cutin tuah i zuam cu a phu tuk. Kumhra fai a simi Grace nih “na palhnak le na lungretheihnak a tlawm deuh lai. Caankhat chungah thil pakhat lawng lungthin pek le rian tampi ṭuannak in lungvaivuanhnak hrial cu a ṭha deuh tuk ti kha ka hun hngalh” tiah a ti.
RUAH DINGMI: Electronic thilri hmannak nih na cawnmi thil cungah lungthin pek awk le i cinken awkah a harter deuh maw? —PHUNGTHLUKBIA 17:24.
MAH LAWNGIN UM TIKAH
Mi cheukhat cu anmah lawngin um kha an duh lo i umhar phen ah electronic thilri kha an hman. Olivia timi nu nih “phone, tablet asiloah TV zoh loin minit 15 hrawng ka um ahcun ka um a har” tiah a ti.
Asinain kanmah lawngin kan um caan ah thukpi in ruahnak caanṭha kan hmu. Mah cu mino ca lawngah si loin upa ca zongah cawnnak ah a biapi tukmi a si.
RUAH DINGMI: Nangmah lawngin na um caan kha khuaruahnak caah na hmang maw? —1 TIMOTE 4:15.
TUAH KHAWHMI
ELECTRONIC THILRI NA HMAN NING KHA I DOTHLAT
Na khuaruah khawhnak ṭhanchoter awkah electronic thilri kha zeiti lam in dah na hman khawh? Lungthin peknak le cawnnak kha electronic thilri nih zeitindah a hnorsuan khawh?
BAIBAL PHUNGLAM: “Fimnak ṭha le ruahthiamnak cu i ken hna.”—PHUNGTHLUKBIA 3:21.
