Electronic Thilri Cu Zeitindah Fale Cungah Huham A Ngeih?
Upa caah electronic thilri thar asiloah program thar pawl hman cu a har tuk men lai. Asinain mino caah cun electronic thilri cu an nunnak cheubang pakhat bantuk a si i an caah a fawi tuk.
Asinain online ah a caan tam tuk a hmangmi mino pawl cu a tanglei buaibainak hna an tong ti kha mi cheukhat nih an hmuh:
-
Electronic thilri hman nih a hun lem hna.
-
Online in nehsawhnak ah an hun i tel.
-
An i tinh zong, tinh lo zongah a thurhnawmmi hmanthlak hna an hmuh.
HNGALH AWK A SIMI
LEMNAK
Online ah tuahmi thil hna le game hna cu mi a lemmi phun in ser an si. “Kan phone ah a ummi app pawl cu kanmah kha phone zohter peng dingin sermi an si,” tiah cauk pakhat (Reclaiming Conversation) nih a ti. Chawlehnak he aa tlaimi app pawl kha sau deuh kan zoh tikah faakthanh a tuahmi hna kha a miak tam deuh kan hmuhter hna.
RUAH DINGMI: Na fale cu electronic thilri a duh tukmi an lo maw? An caan kha fimkhur tein an hman khawh nakhnga zeitindah na bawmh khawh hna?—EFESA 5:15, 16.
ONLINE IN NEHSAWHNAK
Mi cheukhat cu online an hman tikah an puarhrang, an thurhnawm i midang intuarnak kha an hngalthiam lo, mah nih midang nehsawhnak a chuahter.
Mi cheukhat nih like le follow tampi hmuh an duh caah ningcang loin social media kha an hman. Asiloah mi pakhat nih midang nih party an tuah i mah ah sawm a si lomi kha a hngalh tikah a ding loin pehtlaih ka si, nehsawh ka si tiah a ruah lai i a lung a fak men lai.
RUAH DINGMI: Na fale nih online ah ziaza ṭha an lanhgter maw? (Efesa 4:31) Pheo kan si ti kha an hngalh tikah an lung a fak tuk maw?
A THURHNAWMMI HMANTHLAK
Internet ah a thiang lomi thil hna fawi tein hmuh khawh a si. Software cheukhat nih nulepa kha an fale zohmi uk khawh awkah a bawmh hna nain a caan ah fale nih a ṭha lomi thil kha an hmuh khawh rih ko.
Ziaza rawhralnak he aa tlaimi ca (sexting) hna phone in i kuatnak le cohlannak cu upadi he aa ralkah kho men. Thil sining cheukhat ahcun hmunhma upadi le aa telmi hna i an kumkhua cungah i hngat in cu bantuk thil a tuahmi hna cu a thurhnawmmi ngakchia hmanthlak karhternak in taza cuai khawh an si.
RUAH DINGMI: Online in a thurhnawmmi hmanthlak zoh ding le kuat dingin lemsoinak kha na fale nih an doh khawh nakhnga zeitindah na bawmh khawh hna?—EFESA 5:3, 4.
TUAH KHAWHMI
NA FALE KHA CAWNPIAK HNA
Na fale nih electronic thilri kha fawi tein an hman thiam hmanhah bawmh an hau rih. Cauk pakhat nih fale kha a himmi lam in phone asiloah Internet hman ning cawnpiak loin hmanter cu ṭih a nung tuk tiah a ti.
BAIBAL PHUNGLAM: “A zulh awk a simi lam kha ngakchia cu cawnpiak law, a upat tikah mah cucu a pialtak ti lai lo.” —PHUNGTHLUKBIA 22:6.
Tuah na duhmi ruahnak cheuhnak kha thim asiloah nangmah na ruahnak kha ṭial.
-
Na fale kha online ah ziaza ṭha langhter dingin cawnpiak hna
-
Pheo ka si timi intuarnak kha tei awkah bawm hna
-
Online i a ṭha lomi thil in na fale huhphenh awkah na tuah khawhmi paoh tuah
-
Na fale an phone kha check lengmang
-
Phone an hman caan kha rikhiahnak tuahpiak hna
-
Zan ah ihkhaan i electronic thilri hman kha thlauh hna
-
Rawl ei caan ah electronic thilri hman kha thlauh hna
Mah Kong Hna Zong Hi Na Duh Khawh Men
ṬHITUMNAK & CHUNGKHAR
Phone Ka Hmanter Hna Awk A Si Maw?
Nangmah le na fale cu ṭuanvo a la kho cangmi nan si maw ti hngalh awkah mah biahalnak hna hi ruat.
ṬHITUMNAK & CHUNGKHAR
Na Fale Kha Fimkhur Tein Phone Hman Awkah Cawnpiak Hna
Fale nih phone kong he aa tlaiin zeitluk in an hngalh hmanhah fimkhur tein hman awkah lamhruai an hau.
