A NGAIH A CHIAMI HNA CAAH BAWMHNAK
A Ngaih A Chiami Caah A Ṭha Bikmi Bawmhnak
DAWTMI NIH THIHTAK RUANGAH NGAIHCHIAT-LUNGKUAINAK KONG KHA NAI KUM HNA AH HLATHLAINAK TAMPI AN TUAH. Asinain a thawknaklei ah langhtermi bantukin a ṭha bikmi ruahnak cheuhnak hna cu Baibal ah kan hmuhmi hlanlio mifim hna bia he aa khat. Baibal ruahnak cheuhnak hna cu atu tiang man a ngei rih. A tak ti ahcun Baibal ah bochan awk a tlak deuhmi ruahnak cheuhnak hna a um. Kaa dang hmun hna ah hmuh khawh lomi a konglam hna ruangah a ngaih a chiami kha hnemhnak tampi a pek khawh hna.
-
Kan dawtmi a thimi hna nih fahnak an ing lo timi aamahkhaan
“A thimi nih cun zeihmanh an hngal lo,” tiah Phungchimtu 9:5 nih a ti. “An khuakhannak vialte cu an dong.” (Salm 146:4) Cucaah Baibal nih thihnak kha i hngilhnak he a tahchunh.—Johan 11:11.
-
Dawtnak a ngeimi Pathian zumhnak nih hnemhnak a pek
Salm 34:15 nih “A dingmi cu BAWIPA [Jehovah, * NW] nih a zohkhenh hna i an aunak kha a theih” tiah a ti. Pathian sinah thlacamnak in kan lungthli bia phuan cu intuarnak i sum nakin a ṭha deuh. Mah cu a ṭha deuh tukmi i thlop ning zong a si. Mah nih hnemhnak a kan pe khotu Sertu he zong pehtlaihnak ṭha ngeih awkah a kan bawmh.
-
A ṭha deuhmi hmailei ruahchannak
Mithi pawl vawlei ah an nun ṭhan te lai caan kha na mitthlam ah cuanter hmanh. Mah caan kong kha Baibal nih atu le atu a langhter. Mah tikah zeidah a cang lai ti kha Baibal nih hitin a chim: “An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.”—Biathlam 21:3, 4.
Jehovah Pathian a zummi mi tampi cu an dawtmi a thimi hna he kan i tong ṭhan lai timi ruahchannak nih ngaihchiatnak kha inkhawh awkah a bawmh hna. Tahchunhnak ah, kum 65 a simi, a vapa nih a thihtakmi Ann nih hitin a ti: “A thimi nih cun fahnak an tuar lo, Pathian nih aa cinkenmi hna cu a thawhter ṭhan hna lai tiah Baibal nih bia a kan kamh. Ka tonmi thil kong ka ruah fatin mah kong kha ka hun hngalh ṭhan. Cucaah ka ton balmi lakah a har bikmi thil sining kha ka tawnghtham khawh.”
A hmasa capar ah langhtermi Tiina nih hitin a ti: “Timo a thih ni thawkin Pathian bawmhnak ka hmuh peng. Ka lungre a theih fatin Jehovah bawmhnak ka hmu ti kha fiang tein ka hun hngalh. Baibal nih bia a kan kamhmi thawhṭhannak cu ka caah a um taktakmi a si. Mah nih Timo he kan i ton ṭhan hlan tiang thazaang ṭhawng in um peng awkah a ka bawmh.”
Mah bia cu Baibal a zummi mi nuai tampi zong nih an cohlan. Baibal chimmi hna cu zumh awk a tlak lo, saduh thah men an si tiah na ruah ahcun Baibal ruahnak cheuhnak hna le biakam hna kha nangmah theng nih ṭha tein hlathlai. Baibal cu ngaihchia-lungkuai in a ummi hna caah a ṭha bikmi bawmtu a si ti kha na hmuh ko lai.
MITHI CAAH RUAHCHANNAK KONG KHA TAM DEUH IN HLATHLAI
Mah he aa tlaimi video kha jw.org website
Kan dawtmi a thimi hna an thawh ṭhan tikah kan don hna lai tiah Baibal nih bia a kan kamh
KAN THIH TIKAH ZEI AH DAH KAN CAN?
Kan thih tikah zei ah dah kan can? A fiangmi Baibal lehnak nih hnemhnak a pek
THAWNGṬHA THEIH NA DUH MAW?
Hmun kip ah thawngchia lawngte theih a si caah thawngṭha cu khoika ah dah kan hmuh khawh?
BAIBAL CAWNPIAKNAK > DAIHNAK & LAWMHNAK timi tangah zoh
^ cat. 7 Jehovah cu Baibal ah langhtermi Pathian i pumpak min a si.