“Kan i umnak in kum 39 leng a rauh hnuah ka nupi Sophia * cu caan saupi zawtnak in a thi. Ka hawile sinin thazaang peknak tampi ka hmuh lengah keimahle keimah zong ka rian kaa tamter. Asinain kumkhat chung cu ka celh bak lo. Ka lung a dongh chel, a ṭhat chel ti in lung hmaan loin ka um. Ka nupi a thihnak hi kum 3 hrawng a si cang nain a caan ah ruahlopi in ka ngaih a chia lengmang rih.”—Kostas.

Dawtmi pakhatkhat nih thihtaknak na tong bal maw? Na ton bal ahcun Kostas bantukin na intuar ve ko lai. Innchunghawi, rualchan le hawikom nih thihtak tluk in a fakmi a um lai lo. Thihnak ruangah a chuakmi ngaihchiatnak kong hlathlaitu hna zong nih mah cu an hna a tla ve. “Thihnak cu zungzal sunghnak, a fak bikmi sunghnak” a si tiah The American Journal of Psychiatry nih a ti. Thihnak ruangah a ngaih a chiami pakhat nih ‘Zei can tiang dah hitin ka tuar rih lai? Kaa nuam ṭhan kho ti hnga maw? Hnemhnak zeitindah ka hmuh khawh lai?’ ti kha hngalh a duh ko lai.

Mah biahalnak hna i a phi kha mah I Hlau! cauk nih a langhter. Nai ah na dawtmi pakhatkhat nih aan thihtak ahcun ton khawhmi zuamcawhnak kong kha a changtu capar nih a langhter. A hnu capar pawl zong nih ngaihchiatnak a zorter khomi lam hna a langhter.

Mah nih ngaihchiatnak a tongmi kha a hnemh hna lai i an herhmi thazaang a pek hna lai tiah kan i ruahchan.