Dawtnak Langhter
Buaibainak
Thleidannak lungput cu khulrang in a tlau lo. Zawtnak hrik a tlau nakhnga a caan le zuamnak a herh bantukin thleidannak lungput tlauter awkah a caan le zuamnak a hau. Na ngeihmi thleidannak lungput hloh awkah zeidah na tuah khawh?
Baibal Phunglam
“Dawtnak kha chap u law dawtnak cu zeizong vialte, i rem ṭhipṭhep tein a funtomtu a si.”—KOLOSE 3:14.
Mah cu zei sullam dah a si? Midang caah thilṭha tuahnak nih mi kha a funtom. Midang cungah dawtnak na langhter deuhdeuh tikah thleidannak na ngeihmi cu a tlau deuhdeuh ve lai. Dawtnak na ngeih deuhdeuh tikah na lungthin chungah huatnak le nautatnak caah hmun a tlawm deuhdeuh ve lai.
Na Tuah Khawhmi
A chiatnak in na hmuhmi hna cungah dawtnak langhter khawhnak lam kha ruat. Cutin tuah awkah thazaang chuah in i timhtuah a hau lo. A tanglei i langhtermi lakin pakhat asiloah mahnak tam tuah i zuam:
Dawtnak in thil hmete na tuahmi nih thleidannak na ngeihmi a tlauter deuh lai
An caah aa hungmi innka tlaihpiak asiloah zapi citmi mawṭaw le tlanglawng cungah ṭhutdan hoih ti bantuk a ṭhami tuahsernak langhter.
Nan holh ṭha tein an chim khawh lo hmanhah a sawhsawh tein biaruahnak thawk i zuam.
An tuahser ning na hngalhthiam lo tikah lungsaunak langhter.
An tonmi buaibainak kong an chim tikah zaangfahnak langhter.
