A chiatnak in kan hmuhmi hna kha kan hrial hna ahcun thleidannak kan ngeihmi cu a zual chin lai. Kanmah bantuk a simi hna he lawng hawikom kan ser ahcun kan ruahnak, kan intuarnak le kan tuahsernak hna lawng hi cohlan awk tlak an si tiah kan ruah men lai.

“Nan lung cu kaupi in kan hunpiak u.”—2 KORIN 6:13.

Mah cu zei sullam dah a si? Kan “lung” nih kan intuarmi le kan tlaihchanmi kha a chimduhmi a si. Kanmah he sining aa khatmi lawng kha kan dawt hna ahcun kan lung kan kharmi a si. Mah kha hrial khawh awkah kanmah he sining aa dangmi hna komh kha kan duh a hau.

Midang kha pumpak in kan hngalh hna tikah thleidang ngaiin thil an tuahnak a ruang kha kan hun hngalhthiam. Anmah he kan i naih deuh tikah kanmah bantukin kan hun hmuh hna. Kan hun sunsak deuhdeuh hna i an i lawmhnak le an ngaihchiatnak zong kan hrawm hna.

Nazaré kong hi ruathmanh. Anih cu mipem pawl cungah thleidannak a rak ngei. Zeinihdah a rak bawmh ti kha hitin a chim: “Anmah he caan kan hmangṭi i rian kan ṭuanṭi. Mah tikah an kong he aa tlaiin midang nih an chimmi ningin a si lo ti kha ka hun hngalh. Nangmah he nunphung aa dangmi kha na komh hna tikah mi tampi nih an ruah ningin  an si lo ti kha na hngalh lai i na hun dawt hna lai, cun pakhat cio kha na hun sunsak hna lai.”

Nangmah he ram, miphun le holh aa dangmi hna kha chawnhbiak awkah caanṭha kawl. Hitin na tuah khawh

• An kong an in chimh nakhnga bia hal hna.

• Rawl ei sawm hna.

• An kong an in chimh tikah ṭha tein ngai law an caah a biapimi cu zeidah a si ti kha hngalh i zuam.

An hmuhtonnak nih an sining a iap ning kha hngalhthiam naa zuam ahcun an cungah a ṭhami hmuhnak na hun ngei lai.