Mi nih ram, miphun le holh aa dangmi hna cung lawngah si loin biaknak, nunning le nupa sinak aa dangmi hna cung zongah thleidannak an ngei kho. Mi cheukhat nih cun kum, fimcawnnak, pum tlamtlin lonak asiloah muisam cungah i hngat in a chiatnaklei in midang kha bia an khiah hna. Asinain thleidannak kan ngei lo tiah an i ruat.

Thleidannak na ngei kho maw? Midang nih thleidannak an ngeihmi kha kan hmuh. Asinain kanmah nih kan ngeihmi tu cu kan i hngal men lai lo. A tak ti ahcun kan dihlak in lam khatkhat in thleidannak kan ngei. Mi nih phu pakhat kha a chiatnaklei in an hmuh ahcun mah phu i pakhatkhat he an i ton tikah “phungdang ngaiin an pehtlaih lai nain cutin an tuahmi kha an i hngal lo” tiah zatlang nun kong cawnnaklei mifim David Williams nih a ti.

Tahchunhnak ah, Jovica a umnak Balkan ram ah mi tampi nih an nautatmi phu pakhat a um. Jovica nih hitin a ti: “Mah phu ah aa telmi paoh cu miṭha an um lai lo tiah ka ruah. Asinain thleidannak ka ngei tiah kaa ruat lo. Zeicahtiah an kong ka hngalhmi cu a hmaan tiah ka rak ruah caah a si.”

Cozah tampi nih miphun thleidannak le a dang thleidannak hna kha doh awkah upadi tampi an ser. Asinain thleidannak a um ṭhiamṭhiam. Zeicahtiah mah upadi hna nih mi pakhat i a tuahsernak lawng kha a khenkham khawh. Asinain a ruahnak le a intuarnak hna kha cu an uk kho lo. Thleidannak cu mi pakhat ruahnak le lungthin in aa thawkmi a si. Thleidannak dohnak ah teinak hmuh khawh a si maw? Thleidannak a tlauter khotu a um maw?