A hmasa capar hna nih an langhtermi phunglam hna kha mi tampi nih an zulh i an lungthin ah hram aa sihmi thleidannak kha a hram in phawi awkah an i zuam. Asinain kan ngeihmi thleidannak lungput cu kan hlo kho dih taktak lo. Cu a si ah ruahchannak a um ti lo maw?

Minung cozah nih thleidannak lungput kha an hlo kho dih lo. Asinain mah cu thleidannak a hlo khomi cozah a um lo tinak a si maw?

Thleidannak a tlauter khomi cozah pakhat nih cun hitin a tuah a hau lai:

1. 1. Midang cungah an ngeihmi hmuhnak le intuarnak thlen an duh nakhnga mi kha forh a hau.

2. 2. Ding tein midang pehtlaih awkah a hartermi an hma kha thlop a hau.

3. 3. Zei bantuk thleidannak hmanh a ngei lomi hruaitu ṭha ngeih a hau.

4. 4. Miphun dihlak a funtomtu si a hau.

Pathian nih cu bantuk cozah pakhat a ser tiah Baibal nih bia a kan kamh. Mah cu “Pathian Pennak” tiah auh a si.—Luka 4:43.

Mah cozah nih a tuah dingmi hi ruathmanh.

“Vawlei le a cung i a ummi [nih]  . . . dinnak hi zeidah a si ti kha an hngalh lai.”—ISAIAH 26:9.

“Mikip nih a dingmi thil kha an tuah cio caah daihnak le himnak zungzal in a um lai.”—ISAIAH 32:17.

Mah cu zei sullam dah a si? Pathian Pennak nih mi kha a hmaanmi thil a cawnpiak hna lai. Mi nih a hmaan lomi in a hmaanmi—dinlonak in dinnak—an hmuh tikah pakhat le pakhat cung i an lungput cu aa thleng. Mi vialte cungah dawtnak ngeih cu a hmaanmi thil tuah a si ti kha mikip nih an hngalh lai.

Pathian nih “an mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.”—BIATHLAM 21:4.

Mah cu zei sullam dah a si? Pathian Pennak nih dinlonak ruangah a chuakmi harnak vialte a donghter cang lai. A ding loin pehtlaihnak a rak tongmi hna nih huatnak a chuahtermi a ruang an ngei ti lai lo.

“Leng lang men le mi chim chin bia men in bia a khiak lai lo; Sifakmi kha an bia ṭha tein a ceihpiak hna lai i nauta pawl kha a ṭanh hna lai.”—ISAIAH 11:3, 4.

Mah cu zei sullam dah a si? Pathian Pennak Siangpahrang Jesuh Khrih nih vawlei pumpi kha ding tein le duhdanhnak ngei loin a uk lai. Jesuh nih miphun pakhat kha a dang nakin mithmai ṭha a pe deuh hna lai lo i a dingmi a upadi cu vawlei pumpi i mikip nih an zulh lai ti kha a zumh.

Pathian Pennak nih mi kha “lungthin ah i khat u, pakhat le pakhat i daw u, lungrual tein um u” tiah a cawnpiak hna.—FILIPI 2:2.

Mah cu zei sullam dah a si? Pathian Pennak rammi hna lakah a ummi lungrualnak cu a parpavuan men lawng a si lo. Annih cu pakhat le pakhat aa daw taktakmi an si caah ‘an lung aa rual’ taktak lai.