Van le vawlei cu a um zungzalmi a si maw?

Genesis 1:1 ah hitin a ti: “Pathian nih van le vawlei ser hram aa thawk.”

1950 hlan tiang a min a thangmi scientist tampi nih van le vawlei cu a um zungzalmi a si tiah an zumh. Asinain nai i hlathlainak an tuahmi ningin scientist tam deuh nih van le vawlei cu hramthawknak a ngei ti kha cohlan hram an thawk.

A hramthawknak ah vawlei cu zei he dah aa lawh?

Genesis 1:2, 9 ah vawlei cu ti nih a khuh dih i “mui zong a ngei lo, pungsan zong a ngei lo” tiah a langhter.

Mah bia kha scientist pawl nih an cohlan. Biology lei mifim a simi Patrick Shih nih vawlei cu a hramthawk lioah “oxygen a um lo caah dawp awk thli a um lo, . . . A pungsan zong aa thleidang tuk” tiah a ti. Astronomy mekazin nih hitin a ti: “An hmuh tharmi hlathlainak ningin hlanlio vawlei cu ti nih a khuh dih i a romi vawlei a um lo ti awk tluk a si.”

 Caan a rauh tikah kan vawlei tuamtu thli cu zeitindah aa thlen?

Genesis 1:3-5 ah ceunak a chuahka ah vawlei tuamtu thli cu a chah tuk caah vawlei ah ceunak a phan kho lo tiah a langhter. A hnu lawngah vawleicung in nika le thlapa kha fiang tein hmuh khawh a si.—Genesis 1:14-18.

A hmasa ahcun kan vawlei tuamtu thli ruangah vawlei ah ceunak tlawmpal lawng a phan tiah Smithsonian Environmental Research Center nih a ti. Hiti zongin a ti: “Methane gas nih Vawlei pumpi kha a khuh dih. A hnuah methane gas cu a ṭian i van cu a hung dum.”

Vawleicung ah thilnung pawl zeitindah ningcang tein an hun um?

Genesis 1:20-27 ah nga, va le vawlei ah a tlongmi saram pawl cu ser an si i a donghnak ah minung ser an si tiah a ti. A hmasa bik hnuk dingmi saram pawl an um hlanah nga pawl an um hmasa i caan sau nawn a rauh hnuah minung an um tiah scientist pawl nih an zumh.

Baibal cu scientist pawl nih hmanung bik an hmuhmi kong he aa tlak lo tiah mi cheukhat nih an ti. Mah cu Baibal nih a chimmi an theihthiam ning a palh caah a si.

Baibal nih van asiloah vawlei cu kum 6,000 lawng a si rih tiah a chim lo. Van le vawlei cu “ser hram aa thawk” tiah a sawhsawh tein a chim. (Genesis 1:1) Baibal nih ser hram aa thawknak cu zei can dah a rauh cang ti kha a langhter lo.

Baibal nih vawleicung i thilnung hna cu suimilam 24 a ummi, ni ruk chungah ser an si tiah a chim lo. Baibal ah a hmanmi “ni” timi biafang nih caan caankhat kha a langhter duhmi a si. Tahchunhnak ah, sernak “ni” ni ruk i telin van le vawlei sernak caan kha “vawlei le van i a ummi thil vialte Jehovah * Pathian nih a ser ni” tiah Genesis dal 1 ah a langhter. (Genesis 2:4, NW) Pathian nih sernak “ni” ni ruk chungah thilnung pawl an nun khawh nakhnga vawlei kha a timhtuah i thilnung pawl kha a ser hna. Mah ni nikhat cio cu caan saupi a raumi a si.

Baibal nih thilnung pawl cu caan a rauh deuh tikah an i thleng lo tiah a chim lo. Genesis Baibal ah saram pawl kha anmahle an “phunphun” cio in ser an si tiah a ti. (Genesis 1:24, 25) A “phunphun” tiah Baibal ah hmanmi biafang cu science lei biafang a si lo. Thilnung phun tampi kha a chim duhmi a si kho men. Cucaah “phun” pakhat ah phun aa ṭhenmi aa tel kho men. Caan a rauh tikah hmun pakhat ah a ummi “phun” pakhat in phun aa ṭhenmi a hung um kho.

 Zeitindah na ruah?

A cunglei ah langhtermi ningin Baibal nih van le vawlei aa thawk ning, vawlei hramthawk a sining le nunnak aa thawk ning kong kha a sawhsawh tein le a hmaan ning tein a langhter. Cutin a si ah mah thil vialte a Sertu kong kha Baibal ah a hmaan ning tein a langhter lai a si ko lo maw? Encyclopædia Britannica cauk nih “kokek ṭhawnnak a lonhmi thil sining ruangah nunnak aa thawk timi cu tuchan i science lei hngalhnak he aa tlak” tiah a ti. *