Sertu A Um Ti Hngalh Cu A Biapi
Sertu pakhat a um ti hngalh cu zeicah a biapit? A liannganmi Pathian a um ti a langhtermi thil kha na zumh ahcun Baibal cu Pathian sinin a rami a si ti a langhtermi thil kha hlathlai na duh ko lai. Cun Baibal chimmi kha na zumh ahcun a tanglei i langhtermi ṭhatnak hna kha na hmuh lai.
Na nunnak ah naa nuam deuh lai
BAIBAL CHIMMI: “Sihmanhsehlaw amah [Pathian] a um kha thil ṭha a tuahmi in a langhter zungzal ko: van in ruah aan pek hna i a caan hmaante ah thlaiti aan pek hna; rawl kha aan pek hna i lunglawmhnak in aan khahter hna tiah a ti.”—Lamkaltu 14:17.
A SULLAM: Vawlei ah kan hmuhmi thil vialte cu Sertu sinin kan hmuhmi laksawng an si. Laksawng a kan Petu nih zeitlukin dah na zawn aan ruah ti kha na hngalh ahcun mah laksawng hna kha na sunsak chin lai.
Nifa nunnak ah zulhawk a tlakmi lamhruainak na hmuh lai
BAIBAL CHIMMI: “Khi tikah dinnak le biading cu na hngalh lai i miṭha mi hna lam kha na zulh lai.”—Phungthlukbia 2:9.
A SULLAM: Aan Sertu Pathian nih naa nuamh nakhnga zeidah a herh ti kha a hngalh. Baibal na hlathlai ahcun atu ah ṭhathnemhnak aan pe khomi lamhruainak kha na hmuh lai.
Na biahalnak hna i a phi kha na hmuh lai
BAIBAL CHIMMI: “Pathian hngalhnak cu na hmuh lai.”—Phungthlukbia 2:5.
A SULLAM: Sertu a um ti kha na hngalh ahcun a biapimi mah biahalnak hna i a phi hi na hmuh lai: Nunnak sullam cu zeidah a si? Zeicah sifah harnak mah tlukin a tam? Kan thih tikah zei ah dah kan can? Baibal ah lungsi hnangamnak a pemi a phi kha na hmuh khawh.
Hmailei ruahchannak na ngei lai
BAIBAL CHIMMI: “Nan ca i ka tinhmi cu keimah lawnglawng nih ka hngalh tiah BAWIPA nih a ti. Cucu vanchiatnak si loin thluachuahnak a si lai i nan hnu i a rung um ding tefa tampi kong a si lai.”—Jeremiah 29:11.
A SULLAM: Hmailei ah ṭhatlonak, sifah harnak le thihnak hmanh kha ka hloh dih lai tiah Pathian nih bia aa kam. Pathian biakam kha na zumh i hmailei ruahchannak na ngeih ahcun atu ah na tonmi buaibainak hna kha ralṭha tein na tawnghtham khawh lai.