Zeitindah Biakhiahnak Na Tuah Khawh?
“Van le vawlei cu zeihmanh loin a hung um khomi le a hung um dingmi a si.”—Stephen Hawking le Leonard Mlodinow, physic lei mifim, 2010.
“Pathian nih van le vawlei ser hram aa thawk.”—Baibal, Genesis 1:1.
Van le vawlei le nunnak hi Pathian nih a sermi maw a si asiloah zeihmanh loin dah a hung ummi a si? Hi capar ah cherhchanmi physic lei mifim pahnih chimmi bia le Baibal a hramthawknak i chimmi bia cu aa dang. A pahnih ningin cohlangtu an ngei veve. Asinain mi tampi nih cun an i fiang lo. Zuar bikmi cauk hna le TV i biaruahnak hna ah mah kong he aa tlaiin pakhat le pakhat bia alnak an ngei.
Sianginn i sayate nih van le vawlei le nunnak cu zeihmanh loin a hung ummi a si i Sertu a um lo tiah an in cawnpiak men lai. Sertu a um lo ti kha sayate nih an langhter kho maw? Asinain biaknaklei hruaitu hna nih cun Sertu a um tiah an chimmi kha na theih men lai. Annih tah an chimmi a hmaan ti kha an langhter kho maw? “Zumhnak” he aa pehtlaimi a si caah na cohlan awk a si tiah an in ti maw?
Hi kong kha na ruah bal ve ko lai. Sertu a um ti kha ahohmanh nih fiang tein an chim kho lo tiah na ruah men lai. A phi hngalh cu a biapi taktak maw? ti zongin na ruah men lai.
Hi capar ah mi tampi nih Sertu an zumhnak a kong cheukhat kha a fianter hmasa lai. Mah hnuah nunnak aa thawknak hngalh a biapitnak kong zong a fianter lai.