Chiatser biakamnak timi cu “a biapi tukmi a si i thil pakhatkhat kha ka tuah lai tinak caah bia i kam asiloah thanhnak tuahmi kha a si, a caan ahcun tehte caah . . . Pathian hmanh telh chih a si tawn.” Mah cu kaa in asiloah ca in tuahmi a si men lai.

Cheukhat nih chiatser biakamnak tuah cu a palh tiah an ruah khawh men. A ruang cu Jesuh nih hitin a ti caah a si: “Biakamnak nan tuah tikah chiatser biahrennak zeihmanh tuah hlah u. . . . ‘A si,’ ‘A si lo,’ ti lawng kha chim ko u, cu pin cu Miṭhalo pa sinin a rami thil an si.” (Matt. 5:33-37) Moses Nawlbia ningin Israel mi nih thil sining cheukhat ah chiatsernak an tuah a herh i zumhfekmi Pathian salle nih chiatser biakamnak an rak tuah ti kha Jesuh nih a hngalh. (Gen. 14:22, 23; Ex. 22:10, 11) Jehovah theng nih chiatser in biakamnak a tuah ti zong a hngalh. (Heb. 6:13-17) Cucaah Jesuh nih zeitikhmanh ah chiatser in biakamnak kan tuah awk a si lo tiah a ti duhnak a si lo. Mah canah a biapi lomi thil asiloah sullam a ngei lomi thil caah chiatser lo dingin ralrin a kan pekmi tu a si. Tuah awkah bia kan i kammi ningin kan tuah zungzal awk a si, zeicatiah Jehovah nih cutin tuahter a kan duh.

Cu a si ah, chiatser in biakamnak tuah an in fial tikah zeidah na tuah awk a si? Pakhatnak ah, tuah awkah bia naa kammi ningin ka tuah khawh ti kha zum. Naa zumh lo a si ahcun chiatser in biakamnak tuah lo cu a ṭha bikmi a si lai. Baibal nih hitin ralrin a kan pek: “Bia i kam ṭung i tuah lo nakcun rak i kam lo lawlaw kha a ṭha deuh.” (Pct. 5:5) Pahnihnak ah, chiatsernak he aa tlaimi Baibal phunglam hna kha ṭha tein ruat law Baibal in cawnpiakmi na chiaṭha thleidannak lungthin ningin tuah. Baibal phunglam cheukhat cu zeidah an si?

Chiatser biakamnak cheukhat cu Pathian duhnak he aa ralkah lo. Tahchunhnak ah, Jehovah Tehte Hna cu an i ṭhitum tikah bia an i kam. Mah biakamnak cu chiatsernak phun a si. Monu le mopa nih Pathian le mi hmaiah pakhat le pakhat kan i daw lai, kan i sunsak lai i kan i upat lai, “kan nun chung” cutin kan tuah lai tiah bia an i kam. (Monu le mopa cheukhat nih cun an i ṭhitumnak ah mah bantuk biafang theng kha an chim men lai lo nain Pathian hmaiah bia an i kam ve.) Mah hnuah nuva an si cang tiah thanh a si i an i ṭhitumnak cu zungzal ca in a si awk a si. (Gen. 2:24; 1 Kor. 7:39) Mah ṭhitum biakamnak cu aa tlakmi a si i Pathian duhnak zong a si.

Chiatser biakamnak cheukhat cu Pathian duhnak he aa ralkah. A hmaanmi Khrihfa hna nih cun an ram kilvennak caah hriamnam i tlaih awk asiloah Pathian an zumhnak hlawt awkah chiatser biakamnak ti bantuk kha an tuah lai lo. Cutin a tuahmi cu Pathian nawlbia a buarmi an si. Khrihfa a simi cu ‘vawlei ta kan si lo’ caah vawlei lei kongkau le buaibainak hna ah kan i tel awk a si lo.—Johan 15:19; Isa. 2:4; Jeim 1:27.

 Chiatser biakamnak cheukhat cu chiaṭha thleidannak lungthin he aa tlaimi a si. A caan ah chiatser biakamnak kan tuah hlanah “Siangpahrang ta a simi cu Siangpahrang kha pe ko u, Pathian ta a simi cu Pathian kha pe ko u” timi Jesuh chimmi bia kha ṭha tein kan ruah awk a si.—Luka 20:25.

Tahchunhnak ah, Khrihfa pakhat nih rammi sinak caah asiloah passport caah form a phih tikah zumhawk tlakmi a sinak langhternak caah chiatser biakamnak tuah a herh hei ti u sih. Mah ram ah tuahmi cu bantuk chiatser biakamnak cu Pathian nawlbia he aa ralkahmi a si ahcun Baibal in cawnpiakmi a chiaṭha thleidannak lungthin nih cutin tuah awkah a awnh lai lo. Asinain chiatser biakamnak tuah awkah a chiaṭha thleidannak lungthin nih a awnh nakhnga biafang tlawmpal thlen dingin cozah nih nawl an awnh men lai.

Zumhawk tlakmi sinak langhternak ah tuahmi chiatser biakamnak cu Rom 13:1 i phunglam he aa tlak men lai, hitin a ti: “Ram uktu bawi kha an nawl va ngai hna u.” Pathian nih cutin tuah awkah a kan fialmi a si caah thil pakhatkhat tuah dingin chiatser biakamnak tuah cu a palh lo tiah Khrihfa hna nih bia an khiah men lai.

Chiatser biakamnak tuah tikah thil pakhat hman awk asiloah hmelchunhnak pakhatkhat tuah awkah hal na si ahcun Baibal in cawnpiakmi na chiaṭha thleidannak lungthin ningin zulh cu a biapimi a si. Hlanlio Rom mi le Sithian mi nih mi pakhat zumhawk tlakmi a sinak aamahkhaannak caah an vainam kha raltuknak pathian hmelchunh ah an hman i chiatser biakamnak an tuah. Greek mi nih chiatser biakamnak an tuah tikah an kut kha van ah an thlir. Kan chimmi le kan tuahmi thil a hmutu pathian a um i a sinah biaceih kan si lai tiah an zumh.

Jehovah sal pakhat nih a hmaan lomi biaknak he aa tlaimi zei bantuk miphun hmelchunhnak hmanh kha hmangin chiatser biakamnak a tuah lai lo. Asinain biaceihnak zung nih Baibal cungah na kut chiah awk asiloah a hmaan ning tein chim awkah chiatser biakamnak tuah dingin an in fial tikah zeidah na tuah lai? Mah bantuk caan ah Baibal nih hmelchunhnak pakhatkhat in chiatser biakamnak a tuahmi hna kong a langhter caah cutin tuah ve dingin bia na khiah men ko lai. (Gen. 24:2, 3, 9; 47:29-31) Cu bantuk chiatser biakamnak na tuah tikah biahmaan ka chim lai tiah Pathian hmaiah chiat na sermi a si kha i cinken cu a biapi. An in hal khawhmi zei bantuk biahalnal paoh kha hmaan tein chim awkah naa timhtuah a hau lai.

Jehovah he kan i pehtlaihnak kha kan sunsak tuk caah tuah dingin fial kan simi zei bantuk chiatser biakamnak paoh kha thlacam buin ṭha tein tuaktan awk a si. Cun kan chiaṭha thleidannak lungthin le Baibal phunglam buar lo awk zongah kan i ralrin awk a si. Chiatser biakamnak tuah awkah bia na khiah ahcun mah ningin na zulh a hau—1 Pet. 2:12.