Cu bantuk thil sining ah mah pa nih phung ningin nupi a ṭhit ṭhan tikah a hmasa ṭhitumnak cu a dong tiah unau pawl nih an hmuh. Cutin an hmuhnak a ruang kha hngalhthiam awkah Jesuh chimmi, i ṭhennak le nupi, va ngeih ṭhannak kong kha zohhmanh hna u sih.

I ṭhen khawh a sinak a ruang pakhat lawng a um i mah kha Jesuh nih Matthai 19:9 ah a chim. Hitin a ti: “Ahohmanh nih a nupi kha zumhawktlak loin a um ti ṭung lo ahcun a mak i nudang a ṭhit ahcun nu le pa sualnak a tuah a si.” Jesuh bia in (1) Baibal nih a awnhmi, i ṭhen khawh a sinak cu nupa sualnak ruang lawngah a si ti le (2) Baibal nih a awnhmi a ruang um loin a nupi a ṭhen i nudang a ṭhimi pa cu nupa sualnak a tuahmi a si ti kha kan hngalh. a

Nupa sualnak a tuah i a nupi a ṭhenmi pa pakhat kha nupi ngeih ṭhan awkah Baibal nih a awnh tiah Jesuh nih a chim duhmi a si maw? A si lo. Chungkhar ah zuanzamnak a um tikah sualnak a ngei lomi a nupi nih a vapa kha ka ngaithiam lai maw, ngaithiam lai lo ti kha biakhiahnak a tuah khawh. A nupi nih a ngaihthiam lo i phung ningin an i ṭhen ahcun an pahnih in a dang innchungkhar an dirh kho veve ṭhan.

Asinain sualnak a ngei lomi a nupi nih a vapa kha ṭhen a duh lo ahcun lungtho tein kaan ngaihthiam tiah a ti men lai. A zuangzammi a vapa nih a nupi ngaihthiamnak kha cohlang loin a nupi kha a ṭhen ah tah zeitin? A nupi nih a ngaihthiam i ṭhen a duh lo caah nupi dang ngeih ṭhan awkah Baibal phunglam nih a awnh lo. Baibal lamhruainak kha zul loin nupi dang a ngeih ṭhan ahcun nupa sualnak a tuah ṭhanmi a si. Cucaah Khrihfa upa nih a ṭha lomi a tuahsernak tawnghtham awkah biaceihnak kawmiṭi kha an timhtuah lai.—1 Kor. 5:1, 2; 6:9, 10.

Nupi dang ngeih ṭhan awkah Baibal phunglam nih a awnh lomi pa pakhat i a hmasa a chungkhar le atu a dirh tharmi a chungkhar kha Khrihfabu nih zeitindah an hmuh awk a si? Baibal phunglam ningin a hmasa ṭhitumnak cu a hmun rih maw? Sualnak a ngei lomi a nupi nih a vapa kha ngaihthiam ding asiloah ngaihthiam lo dingin bia a khiak kho rih maw? Chungkhar thar a dirhmi kha zuanzamnak in hmuh a si lai maw?

A hlan ahcun sualnak a ngei lomi a nupi a thih hlan, vadang a ngeih hlan le nupa sualnak a tuah hlan tiang pa nih nupi dang a ṭhit ahcun zuanzamnak in Khrihfabu nih hmuh a rak si. Asinain Jesuh nih, i ṭhennak le nupi, va ngeih ṭhannak kong a chim tikah sualnak a ngei lomi innchunghawi kong kha a langhter lo. Mah canah Baibal nih a awnhmi a ruang um loin a innchunghawi kha a ṭhen i nupi dang a ngeimi cu nupa sualnak a tuahmi a si tiah a ti. Cu bantuk  thil sining ah i ṭhennak le nupi ngeih ṭhannak cu zuanzamnak a si tiah Jesuh nih fiang tein a ti caah a hmasa ṭhitumnak cu a dong.

Pa pakhat nih a nupi kha a ṭhen i nupi dang a ngeih ahcun sualnak a ngei lomi a hmasa a nupi nih ka ngaihthiam asiloah ka ngaithiam lo tiah a ti kho ti lo. Cucaah a vapa kha ka ngaithiam lai maw, ngaithiam lai lo timi a harmi biakhiahnak a tuah a hau lo. Khrihfabu nih mah dirh tharmi chungkhar an hmuh ning cu sualnak a ngei lomi innchunghawi a thih, vadang a ngeih ṭhan asiloah nupa sualnak a tuah timi cungah aa hngat lai lo. b

A cunglei i langhtermi ah pa nih nupa sualnak a tuah caah a nupi he an i ṭhen. A vapa cu nupa sualnak a tuah lo nain a nupi kha a ṭhen i nupi dang a ṭhit ah tah zeitin? Asiloah an i ṭhen hlanah nupa sualnak a tuah lo nain an i ṭhen hnuah a tuah i a nupi nih lungtho tein a ngaihthiam buin nupi dang a ngeih ah tah zeitin? Mah tahchunhnak hna i, ṭhennak le chungkhar thar dirh ṭhannak cu nupa sualnak tuah a si caah a hmasa ṭhitumnak kha a donghter lai. Cuticun innchungkhar dirh tharmi cu phungning in a hung si. 1979, November 15, Vennak Innsang [English], cahmai 32 ah hitin a ti: “Atu ah innchungkhar thar a dirhmi a si caah mah kha fawi tein a donghter kho ti lo i a hmasa a nupi sinah a kir kho ti lo; i ṭhennak, nupa sualnak le nupi dang ngeih ṭhannak he a hmasa ṭhitumnak cu a dong cang.”

Mah kan hngalhthiam ning thlen a simi nih Khrihfa hna kha mah ṭhitumnak cu a thiangmi a si ti lo asiloah zuanzamnak cu sualnak ngan a si lo tiah ruah dingin a ti duhnak a si lo. Baibal nih a awnhmi a ruang a um lo nain a nupi kha a ṭhen i nupi dang a ṭhit ahcun a zuangzammi a si caah Khrihfa upa nih biaceihnak kawmiṭi ṭhut dingin an timhtuah lai. (A nupi thar cu Khrihfa a si ahcun anih zong a zuangzammi a si ve caah biaceih a si lai.) A dirhmi chungkhar thar kha zuanzamnak in hmuh a si lai lo nain mah pa cu Khrihfabu ah kum tampi chung tinvo sung hna hmuh awkah sining a tlinh lai lo i a ṭha lomi a tuahsernak ruangah upat a si ti men lai lo. Khrihfa upa nih Khrihfabu ah tinvo sung hna an pek hlanah kaltak a simi a hmasa a nupi le a fale i tulio an sining zong kha ṭha tein an ruah hmasa awk a si.—Mal. 2:14-16.

Baibal nih a awnhmi a ruang um loin i ṭhennak le innchunghawi thar ngeih ṭhannak nih a chuahtermi thil ruangah Khrihfa hna nih a thiangmi ṭhitumnak timhtuahnak i Jehovah hmuh ning kha an i tlaih peng awk a si.—Pct. 5:4, 5; Heb. 13:4.