1. Jesuh nih hmasa bik khuaruahhar thil a tuah lioah a cangmi kong kha fianter.

 JESUH phungchim rian a thawkka AD 29 ah a cangmi kong kha na mitthlam ah cuanter hmanh. Jesuh, a nu Mary le a zultu cheukhat cu Jesuh a chuahkehnak Nazareth chaklei Kana khua i nupi ṭhit puai ah sawm an si. Mary cu mah chungkhar i an hawi pakhat a si i khual pawl zohkhenhnak rian bawmh dawh a si. Asinain ṭhitumnak puai an tuah lioah an chungkhar le monu le mopa an ning a zahter khomi thil a rak cang. Mitsur zu nih a dihtak hna. b An i ruahchanmi lengin puai a zawhmi an tam caah a si kho men. Mary cu khulrang in a fapa sinah a ra i “mitsur zu an ngei ti lo” tiah a ti. (Johan 2:1-3) Mah tikah Jesuh nih zeidah a tuah? Khuaruahhar lam in ti kha ‘a ṭha bikmi’ mitsur zu ah a rak canter.—Johan 2:9, 10.

2-3. (a) Jesuh nih khuaruahhar a simi a ṭhawnnak kha zeitindah a rak hman? (b) Jesuh tuahmi khuaruahhar thil ruahnak in zeitindah ṭhathnemhnak kan hmuh khawh?

² Jesuh nih phungchim rian a ṭuan lioah khuaruahhar thil tampi a rak tuah. c Mi thong tampi bawmh awkah khuaruahhar a simi a ṭhawnnak kha a hman. Tahchunhnak ah, khuaruahhar thil a tuahmi pahnih ah pa 5,000 le a hnuah pa 4,000 kha rawl a dangh hna. Mah ah nu le ngakchia i telin an dihlak  ah 27,000 hrawng an si kho men. (Matt. 14:15-21; 15:32-38) Mah thil sining pahnih ah Jesuh nih mizaw tampi zong a damter hna. (Matt. 14:14; 15:30, 31) Jesuh nih khuaruahhar lam in a damtermi hna le rawl a danghmi hna mibupi cu zeitluk in dah an khuaruah a har lai ti kha ruathmanh.

³ Tuchan ah Jesuh tuahmi khuaruahhar thil in tampi kan cawn khawh. Hi capar ah mah khuaruahhar thil nih a kan cawnpiakmi, zumhnak a fehter khomi a kong cheukhat kha kan i ruah hna lai. Cun khuaruahhar thil a tuah lioah Jesuh nih a langhtermi toidornak le zaangfahnak kan i zohchunh khawh ning kong zong kan i ruah hna lai.

4. Jesuh tuahmi khuaruahhar thil nih kan zumhnak a fehter khomi aho kong dah a kan cawnpiak?

⁴ Jesuh tuahmi khuaruahhar thil hna nih kan zumhnak a fehtermi amah kong lawng si loin a Pa kong zong a kan cawnpiak. A tak ti ahcun Jehovah cu khuaruahhar thil hna i a Hrampi a si. Lamkaltu 10:38 nih hitin a ti: “Jesuh kha a cungah zeitindah Pathian nih Thiang Thlarau le ṭhawnnak a toih ti kha nan hngalh fawn. Pathian cu a sin i a um caah khua zakip ah aa chawk i ṭhatnak kha a tuah i khuachia ṭhawnnak toiah a ummi mi vialte kha a damter hna.” Jesuh nih a tuahmi khuaruahhar thil i telin a chimmi le a tuahmi dihlak ah a Pa ruahnak le intuarnak tling tein aa zohchunh ti kha i cinken. (Johan 14:9) Jesuh tuahmi khuaruahhar thil in kan cawn khawhmi a kong pathum kha i ruah hna u sih.

5. Khuaruahhar thil tuah awkah Jesuh kha zeinihdah a forh? (Matthai 20:30-34)

⁵ Pakhatnak, Jesuh le a Pa nih a kan dawt tuk. Vawleicung a um lioah Jesuh nih sifah harnak a tongmi pawl bawmh awkah khuaruahhar a simi a ṭhawnnak a hmannak thawngin mi pawl a dawt hna kha a langhter. Voikhat cu mitcaw pahnih nih bawmhnak an hal. (Matthai 20:30-34 rel.) Jesuh nih “a zaangfah hna” i a damter hna ti kha i cinken. Hika ah a hmanmi “zaangfah” timi Greek biafang nih kan chunglei in a rami zaangfahnak taktak kha a chim duhmi a si. Dawtnak langhternak a simi cu bantuk zaangfahnak nih Jesuh kha a rawl ṭammi pawl dangh awk le thinghmui zawtnak a ngeimi pawl damter awk zongah a forh. (Matt. 15:32; Mar. 1:41) “Zaangfah thiammi” Jehovah Pathian le a Fapa nih a kan dawt tuk i sifah harnak kan ton tikah an lung a fak ti kha kan zumh khawh. (Luka 1:78; 1 Pet. 5:7) Cucaah minung tonmi ṭhatlonak hna an hloh lai caan kha an i ngaih tuk.

6. Pathian nih Jesuh kha zei bantuk ṭhawnnak dah a pek?

⁶ Pahnihnak, Pathian nih Jesuh kha minung tonmi buaibainak vialte tawnghtham awkah ṭhawnnak a pek. A tuahmi khuaruahhar thil thawngin Jesuh nih kanmah tein kan tawngtham khawh lo dingmi buaibainak hna tawnghtham awkah ṭhawnnak a ngeih kha a langhter. Tahchunhnak ah, Jesuh cu minung tonmi buaibainak a chuahtertu hrampi a simi—zawtnak le thihnak i telin sualnak ro kan comi in luatter awkah ṭhawnnak a ngei. (Matt. 9:1-6; Rom 5:12, 18, 19) A tuahmi khuaruahhar thil nih zawtnak “a phunphun” a ngeimi kha a damter khawh hna i a thimi hmanh a thawhter khawh hna ti kha a langhter. (Matt. 4:23; Johan 11:43, 44) Cun thlichia kha a uk khawh i thlarau ṭhalo sinin minung luatter khawhnak ṭhawnnak zong a ngei. (Mar. 4:37-39; Luka 8:2) Jehovah nih a Fapa kha cu bantuk ṭhawnnak a pek ti hngalh cu zeitluk in dah hnemtu a si.

7-8. (a) Jesuh tuahmi khuaruahhar thil nih zeidah a kan zumhter? (b) A ra laimi vawlei thar ah zei khuaruahhar thil dah hmuh lai naa ngaih?

 ⁷ Pathumnak, Pathian Pennak ah hmailei thluachuah hna a tling lai ti kha kan zumh khawh. Vawleicung ah Jesuh nih minung pakhat in a tuahmi khuaruahhar thil hna nih Pathian Pennak i vancung Siangpahrang in thil tam deuh a tuah lai ti kha a kan cawnpiak. A rauhhlan i Khrih uknak tangah kan hmuh dingmi kong kha ruathmanh. Zawtnak le minung nih kan tonmi sifah harnak vialte kha a hloh dih cang lai caah a tlingmi ngandamnak kha kan i nuamhpi cang lai. (Isa. 33:24; 35:5, 6; Biat. 21:3, 4) Leiser ral ruangah sifah harnak kan tong ti lai lo i ahohmanh ṭamhal zongin kan um ti lai lo. (Isa. 25:6; Mar. 4:41) “Thlan chung” in a rak chuakmi kan dawtmi pawl donnak tinvo sung zong kan hmu lai. (Johan 5:28, 29) A ra laimi vawlei thar ah a hleiin zeidah naa ngaih?

⁸ Khuaruahhar thil a tuah tikah Jesuh nih kan i zohchunh awk sining a simi toidornak le zaangfahnak hna kha a langhter. Kana khua i ṭhitumnak puai thawkin tahchunhnak pahnih kha i ruah hna hmanh u sih.

9. Ṭhitumnak puai ah Jesuh nih zeidah a rak tuah? (Johan 2:6-10)

⁹ Johan 2:6-10 rel. Ṭhitumnak puai i mitsur zu a dih tikah Jesuh cu pakhatkhat tuah dingin rian a ngei maw? A ngei lo. Messiah nih khuaruahhar lam in mitsur zu a chuahter lai  timi chimchungbia zong a um lo. Asinain na puai ah na danghmi hna zu a dih ahcun zeitindah na um lai ti khi ruathmanh. Jesuh nih mah innchungkhar, a hleiin monu le mopa cungah zaangfahnak a ngei i an ningzahter kha a rak duh lo. Cucaah capar a thawklei ah langhtermi bantukin khuaruahhar thil pakhat a rak tuah. Ti liter 390 (galan 103) kha a ṭha bikmi mitsur zu ah a rak canter. Siang ngaiin mah zatzat a pekmi hna cu monu le mopa nih cheukhat kha hmailei caah i chiah awk asiloah phaisa tam deuh an hmuh nakhnga zuar awkah a si kho men. Aa ṭhiumkami nuva hna cu zeitluk in dah an hna a ngam lai.

10. Johan dal 2 ah langhtermi sullam a ngei tukmi a kong cheukhat cu zeidah a si? (Hmanthlak zong zoh.)

¹⁰ Johan dal 2 ah langhtermi sullam a ngei tukmi a kong cheukhat kha zohhmanh hna u sih. Jesuh nih lung ralca ah ti a rawng lo ti kha na hngal maw? Amah cungah lungthin pekter canah sal pawl kha ralca chungah ti rawng u tiah a ti hna. (Caang 6, 7) Ti kha mitsur zu in a canter hnuah amah Jesuh nih mitsur zu kha puai tlangtlatu sinah a kalpi lo. Mah canah sal pawl kha pek dingin a fial hna. (Caang 8) Jesuh nih mitsur zu hrai kha khual pawl hmaiah i tlaih in uangthlar ngaiin ‘ka tuahmi mitsur zu hi tep tuah u’ tiah a ti lo.

11. Jesuh tuahmi khuaruahhar thil in zeidah kan cawn khawh?

¹¹ Jesuh nih ti kha mitsur zu in a cantermi khuaruahhar thil in zeidah kan cawn khawh? Toidornak kong kan cawn khawh. Jesuh cu khuaruahhar thil he aa tlaiin aa uangthlar lo; a tak ti ahcun a rak liimmi thil kong he aa tlaiin zeitikhmanh ah aa uangthlar bal lo. Mah canah aa toidor i a Pa kha atu le atu a rak thangṭhat. (Johan 5:19, 30; 8:28) Kanmahle kanmah toidor tein kan i hmuhnak thawngin Jesuh kha kan i zohchunh ahcun kan tuahmi thil kong he aa tlaiin kan i uangthlar lai lo. Jehovah rian ah zei rian kan ṭuan hmanhah kanmah kong ah si loin a rianṭuannak tinvo sung kan hmuhmi khuaruahhar a simi Pathian kong tu ah i uangthlar hna u sih. (Jer. 9:23, 24) Pathian kha hmuh awk aa tlakmi upatnak kan pek awk a si. Jehovah bawmhnak tel loin zei thilṭha hmanh kan liim kho lai lo.—1 Kor. 1:26-31.

12. Jesuh toidornak kan i zohchunh khawh ning a dang lam pakhat cu zeidah a si? Tahchunhnak pe.

¹² Jesuh toidornak kan i zohchunh khawh ning a dang lam pakhat kha i ruah hna u sih. Mah thil sining hi ruathmanh. Khrihfa upa pakhat nih bu rianṭuantu mino pakhat kha a hmasa bik zapi ca phungchimnak caah i timhtuah dingin a caan tampi pek in a rak bawmh. Khrihfa upa bawmhnak thawngin mino unaupa nih Khrihfabu caah a ṭha tukmi phungchimnak a rak pek khawh. Pumh a dih hnuah unau pakhat cu Khrihfa upa sinah a ra i ‘Mah mino unaupa a phungchimmi cu a ṭha tuk’ tiah a ti. Mah tikah Khrihfa upa nih ‘A si, amah bawmh awkah a caan tampi ka pek’ tiah a ti lai maw? Asiloah toidor tein ‘A si, amah caah kaa uangthlar tuk’ tiah dah a ti lai? Toidornak kan ngeih ahcun midang ca kan tuahmi thilṭha caah kan i porhlaw lai lo. Jehovah nih kan tuahmi thil kha a hmuh i a sunsak ti kan hngalh caah kan i lungsi. (Matthai 6:2-4 he tahchunh; Heb. 13:16) Jesuh kha kan i zohchunh i toidornak kan langhter tikah Jehovah lung kan lawmhter.—1 Pet. 5:6.

13. Nain khua pawngah Jesuh nih zeidah a hmuh i zeidah a tuah? (Luka 7:11-15)

¹³ Luka 7:11-15 rel. Jesuh phungchim rian a ṭuan lioah a cangmi mah kong hi ruathmanh. A luancia kum 900 lio i profet Elijah nih nuhmei nu fapa a thawhternak hmun Shunem khua he aa hlat tuk lomi Galile khua,  Nain ah Jesuh cu a tlawng. (2 Si. 4:32-37) Khua hauka a phanh tikah khua chungin ruak an hun thlahmi kha a hmuh. Mah thil sining cu ngaihchiat awk taktak a si, zeicahtiah nuhmei nu cu a fapa ngeihchun te nih a thihtak. Asinain a ngaih a chiami nuhmei nu cu amah lawng a si lo. A sinah khua chung i mibupi zong an ra ve. Jesuh nih mibu kha a dirter hna i a ngaih a chia tukmi a nu caah chingchiah awk tlak a simi thil pakhat a rak tuah. A fapa kha a rak thawhter. Mah cu thawngṭha cauk ah a hleiin langhtermi Jesuh nih a thawhter ṭhanmi hna pathum lakah a pakhatnak a si.

14. Luka dal 7 ah langhtermi sullam a ngei tukmi a kong cheukhat cu zeidah an si? (Hmanthlak zong zoh.)

¹⁴ Luka dal 7 ah langhtermi sullam a ngei tukmi a kong cheukhat kha zohhmanh hna uh sih. A ngaihchia tukmi nu kha Jesuh nih “a hmuh” i, cun “a zaangfah ngaingai” ti kha naa cinken maw? (Caang 13) A fapa ruak pawng i a kal pah in a ṭahmi kha Jesuh nih a hmuh caah a zaang a fah tukmi a si kho men. Jesuh nih a zaangfah sawhsawh lawng si loin a cungah zaangfahnak kha a langhter. Zumhnak aw he “Ṭap hlah” tiah a rak ti lai ti cu a fiang ko. Cun amah bawmh awkah thil pakhat a rak tuah. A fapa kha a thawhter ṭhan i “a nu sinah khan a pek ṭhan.”—Caang 14, 15.

15. Jesuh tuahmi khuaruahhar thil in zeidah kan cawn khawh?

¹⁵ Jesuh nih nuhmei nu fapa a thawhter ṭhanmi khuaruahhar thil in zeidah kan cawn khawh? A ngaih a chiami hna cungah zaangfahnak langhter dingin kan cawn khawh. Jesuh bantukin mithi pawl cu kan thawhter ṭhan kho hna lo ti cu a fiang ko. Asinain Jesuh bantukin thihtaknak ruangah a ngaih a chiami hna cungah zaangfahnak kan langhter khawh ve. Anmah bawmh awk le hnemh awkah kan biachim le kan tuahsernak in zaangfahnak langhter awkah kanmahlei in thawk hmasa khawh. d (Ptb. 17:17; 2 Kor. 1:3, 4; 1 Pet. 3:8) A sawhsawh tein chimmi bia le zaangfahnak langhtermi thil hmetete hmanh nih thazaang tampi a pek khawh hna i a hnemh khawh hna.

16. Hmanthlak langhtermi in nai ah a fa nih a thih takmi nu pakhat hmuhtonnak in zeidah na cawn khawh?

 ¹⁶ Hmuhtonnak pakhat kong kha ruathmanh. A luancia kum tlawmpal lioah unaunu pakhat nih Khrihfabu pumhnak i hlasak lioah a pawngah a ṭhumi nu pakhat a ṭahmi kha a hmuh. Mah hla cu thawhṭhannak ruahchannak kong a si i anih cu nai ah a fanu nih a thih takmi a si. Unaunu nih a hmuh tikah a pawngah a kal colh, a ban in a tlaih i a tangmi hla kha a sakpi. A hnuah mah nu nih “unau pawl dawtnak kha tling tein ka hmuh” tiah a ti. Aa pumh caah aa nuam tuk. Cun “Biakinn cu hnemhnak kan hmuh khawhnak hmun a si” tiah a ti. “Ruahchannak a ngei lomi” thihtaknak a tongmi hna cungah zaangfahnak langhter awkah kan tuahmi thil a sawhsawh te hmanh kha Jehovah nih a hmuh i a sunsak tuk ti kha kan zumh khawh.—Salm 34:18.

17. Hi capar in zei kong dah kan cawn khawh?

¹⁷ Baibal chung i Jesuh tuahmi khuaruahhar thil kong hlathlainak in thazaang tampi kan hmu kho. Jehovah le Jesuh nih a kan dawt tuk i Jesuh cu minung buaibainak tawnghtham awkah ṭhawnnak a ngei ti kha a kan cawnpiak. Cucaah a ruahhlan ah Pathian Pennak nih vawlei a uk tikah a tling dingmi hmailei biakam kha tling tein kan zumh khawh. Mah kong pawl kan hlathlai tikah Jesuh sining kan i zohchunh khawh ning a dang lam zong kan ruah khawh. Jesuh tuahmi a dang khuruahhar thil hna cungah lungthin pek awkah pumpak hlaihlainak asiloah Chungkhar Pumhnak tuah awkah cazin na tuah khawh. Na cawn khawhmi kong kha hlathlai law na hngalhmi kong kha midang zong chim ve hna. Cutin na tuah ahcun thazaang a ngeihtermi biaruahnak tampi na ngei kho lai.—Rom 1:11, 12.

18. A hnu capar ah zei kong dah kan i ruah hna lai?

¹⁸ A phungchim rianṭuannak a donghnaklei ah Jesuh nih Baibal ah langhtermi a thawhter ṭhanmi hna lak i a pathumnak kha a rak tuah. Asinain mah thawhṭhannak hi cu aa phundang—a dawtmi hawipa kha aa thleidangmi thil sining ah a rak thawhter. Thawngṭha cauk chung i khuruahhar thil hna in zeidah kan cawn khawh? Thawhṭhannak ruahchannak cungah kan zumhnak kha zeitindah kan fehter khawh? A hnu capar ah mah biahalnak hna kha kan i ruah hna lai.