1. Pumhnak ah zeicah a phi kan pek?

 ZEICAH Khrihfabu pumhnak ah kan i pumh? A bik in cun Jehovah thangṭhat awkah a si. (Salm 26:12; 111:1) Cun harnak caan ah pakhat le pakhat thazaang kan i pek khawh nakhnga ca zongah a si. (1 Thes. 5:11) Pumhnak ah kan kut kan thlir i a phi kan pek tikah mah thil pahnih kha kan tuahmi a si.

2. Pumhnak ah a phi pek dingin zei caanṭha hna dah kan ngeih?

² Zarh fatin pumhnak ah a phi peknak caanṭha kan ngei. Tahchunhnak ah, zarhdonghnak ah Khrihfabu Vennak Innsang Cawnnak ah kan i tel kho. Zarhlai pumhnak ah Thlaraulei Lungvar Hna, Khrihfabu Baibal Cawnnak le a dang i ruahṭi dingmi ṭhen hna ah a phi kan pek khawh.

3. Zei zuamcawhnak dah kan ton khawh i Hebru 10:24, 25 nih zeitindah a kan bawmh khawh?

³ Kan dihlak in Jehovah thangṭhat le zumtukhat unau pawl thazaang pek kha kan duh. Asinain a phi kan pek tikah zuamcawhnak kan tong kho. A phi pek awkah ṭihnak kan ngei kho. Asiloah a phi tampi pek kan duh ko nain kan duh tlukin atu le atu a kan hal men lai lo. Mah bantuk zuamcawhnak hna kha zeitindah kan tawnghtham khawh? Lamkaltu Paul nih Hebru mi hna sin a cakuat ah a phi kha kan hmuh. Hmunkhat ah i pumhṭi a biapitnak kong a chim lioah ‘pakhat le pakhat i forhnak’ ah lungthin kan pek awk a si tiah a ti. (Hebru 10:24, 25 rel.) Kan zumhnak langhter awkah a sawhsawh tein a phi kan pekmi hmanh nih midang thazaang a ngeihter khawh hna ti  kha kan i cinken ahcun kut thlir awkah ṭihnak kan ngei ti lai lo. Atu le atu a kan hal lo hmanhah Khrihfabu i unau dang nih a phi peknak caanṭha an hmuhmi cungah kan i lawm kho.—1 Pet. 3:8.

4. Hi capar ah zei a kong pathum dah kan i ruah hna lai?

⁴ Hi capar ah a phi petu an tlawmnak Khrihfabu hmete ah pakhat le pakhat zeitindah thazaang kan i pek khawh timi kong kan i ruah hmasa hna lai. Cun a phi petu an tamnak Khrihfabu ngan ah pakhat le pakhat zeitindah thazaang kan i pek khawh timi kong zong kan i ruah hna lai. A donghnak ah, a phi kan pek tikah kan chimmi bia in midang kha zeitindah thazaang kan pek khawh hna timi kong zong kan i ruah hna lai.

5. Aa pummi an tlawm ahcun pakhat le pakhat zeitindah thazaang kan i pek khawh?

⁵ Khrihfabu hmete asiloah phu pakhat ah a phi petu tampi an tam lo caah caantlaitu nih thim ding tampi a ngei lo. A caan ah pakhatkhat nih a phi an pek nakhnga chikkhat hngah a hau men lai. Mah bantuk pumhnak cu um a harmi le thazaang petu a si lomi a lo men lai. Zeidah na tuah khawh? Na kut kha thlir lengmang. Cutin na tuah ahcun midang zong a phi tam deuh pek awkah na forh khawh hna lai.

6-7. A phi peknak he aa tlaiin kan ṭihnak kha zeitindah kan zorter khawh?

⁶ A phi pek kha na ṭih tuk ahcun zeidah na tuah khawh? Mi tampi zong ṭihnak an ngei ve. Asinain unau pawl caah thazaang petu a si nakhnga a phi peknak he aa tlaiin na ṭihnak zorter awkah a dang lam na kawl kho lai maw? Zeitindah na tuah khawh?

⁷ Hlanah rak chuahmi Vennak Innsang i ruahnak cheuhnak hna hlathlainak in bawmhnak na hmu kho. b Tahchunhnak ah, ṭha tein i timtuah. (Ptb. 21:5) A kong kha ṭha deuh in na hngalh ahcun lungtho tein a phi pek awkah naa fawih deuh lai. Cun a phi kha tawi tein in pe. (Ptb. 15:23; 17:27) A phi tawi tein na pekmi nih na ṭihnak kha a zorter lai. Unau pawl caah catlang pakhat asiloah pahnih lawng aa telmi a tawimi a phi cu a kong tampi aa telmi a saumi a phi nakin hngalhthiam awkah a fawi deuh lai. Nangmah holh tein tawi tein a phi na pekmi nih ṭha tein naa timhtuah i a konglam fiang tein na hngalh ti kha a langhter lai.

8. Jehovah nih kan si khawh chungin kan i zuammi kha zeitindah a hmuh?

⁸ Mah ruahnak cheuhnak cheukhat kha na zulh ko nain voikhat asiloah voihnih nak tam a phi pek dingin na ṭih rih ah tah zeitin? Jehovah nih na tuah khawhmi tuah awkah na si khawh chungin naa zuammi kha a sunsak tuk ti kha zum. (Luka 21:1-4) Jehovah nih kan tuah khawhmi lengin a kan hal lo. (Fil. 4:5) Na tuah khawhmi kha tuah awkah biakhiak, cutin tuah awkah hmuitinh chia law lungdaihnak ngeih awkah thlacam. A hmasa bik ah na hmuitinh cu tawi tein a phi pakhat pek kha a si kho men.

9. Khrihfabu ngan ah zei bantuk zuamcawhnak dah a um kho?

⁹ Nan Khrihfabu ah thawngthanhtu tampi an um ahcun a dang zuamcawhnak pakhat na ngei kho men. A phi a pemi unau an tam tuk caah na kut na thlirmi kha an in hmu men lai lo. Tahchunhnak ah, Danielle cu pumhnak ah  a phi pek kha a duh tuk. c Mah kha biaknak cheubang, midang thazaang pek khawhnak lam le Baibal cawnpiakmi cungah a zumhnak fehter khawh ning lam in a hmuh. Asinain Khrihfabu ngan aa ṭhial tikah a phi kha atu le atu an hal ti lo, a caan ahcun pumhnak dihlak ah voikhat hmanh an hal lo. Cucaah hitin a ti: “Kaa pumhmi cu pakpalawng a si. Tinvo sung ka sung tiah kaa ruat. Atu le atu cutin a si caah an ka tuah hramhram tiah ka hun ruah.”

10. A phi tam deuh pek awkah zeitindah caanṭha kan kawl khawh?

¹⁰ Nangtah Danielle bantukin na ruat bal ve maw? Cutin na si ahcun lungdongh in pumhnak ah a phi pek ti loin ngaih sawhsawh awkah bia na khiah men lai. Asinain a phi pek awkah i zuam peng. Zeidah na tuah khawh? Pumhnak pakhat cio caah a phi tampi i timh cu bawmtu a si ti kha na hmuh ko lai. A hramthawklei ah a phi pek dingin hal na si lo hmanhah a donghnaklei ah a phi pek ding caanṭha na ngei rih. Vennak Innsang Cawnnak ca i naa timhtuah tikah catlangbu pakhat cio le mah capar i a biatlangpi aa pehtlaih ning kha ruat. Cutin na tuah ahcun a konglam chungin a ṭhami a phi kha na pek khawh lai. Mah lengah fianter awkah a har deuhmi catlangbu chung i a thukmi biatak kong zong a phi pek awkah naa timtuah kho. (1 Kor. 2:10) Zeicah? Mah cawn dingmi ṭhen ah a phi a pemi an tlawm caah a si kho men. Mah ruahnak cheuhnak kha na zulh ko nain pumhnak ah atu le atu a phi pek awkah caanṭha na hmuh rih lo ah tah zeitin? Pumh hlanah caantlaitu sinah a phi pek na duhmi biahalnak kha na chimh khawh.

11. Filipi 2:4 nih zei tuah awkah dah tha a kan pek?

¹¹ Filipi 2:4 rel. Lamkaltu Paul nih Khrihfa hna kha midang duhning kha hmuh thiam i zuam u tiah tha a pek hna. Pumh lioah mah ruahnak cheuhnak kha zeitindah kan zulh khawh? Kanmah bantukin midang zong nih a phi pek an duh ve ti kha kan i cinkennak thawngin a si.

12. Pumhnak ah midang thazaang kan pek khawh hna nakhnga a ṭha bikmi lam cu zeidah a si? (Hmanthlak zong zoh.)

¹² Hitin ruathmanh. Na hawile he bia nan i ruah tikah anmah kha biachim ding caan  tlawmte lawng pek in nangmah nih bia tampi na chim lai maw? Na chim lai lo. Anmah zong bia chimter na duh ko hna lai. Cu bantukin pumhnak ah mi tampi nih a phi pe hna seh ti kan duh. A tak ti ahcun unau pawl thazaang pek awkah a ṭha bikmi lamkhat cu an zumhnak langhternak caanṭha kan pek hnanak thawngin a si. (1 Kor. 10: 24) Cutin kan tuah khawh ning kha i ruah hna u sih.

13. Midang kha a phi tampi pek awkah zeitindah caanṭha kan pek khawh hna?

¹³ Pakhat cu a phi tawi tein pek kha a si i mah nih midang zong a phi peknak caanṭha a hmuhter hna lai. Khrihfa upa le a dang hmuhtonnak a ngeimi thawngthanhtu hna nih zohchunawk ṭha an chiah khawh. Tawi tein a phi na pek tik hmanhah a kong tampi chim kha hrial. Catlangbu chung i a kong dihlak kha na chim ahcun midang chim awk a um ti lai lo. Tahchunhnak ah, mah catlangbu chungah ruahnak cheunak pahnih a um—mah cu tawi tein a phi pek ding le a kong tampi chim lo ding kha a si. Mah catlangbu phit awkah hal hmasa na si ahcun a kong pakhat lawng kha chim.

14. Voi zeizat dah kan kut kan thlir lai timi biakhiahnak tuah awkah zeinihdah a kan bawmh khawh? (Hmanthlak zong zoh.)

¹⁴ Voi zeizat a phi ka pek lai timi biakhiahnak na tuah tikah hngalhthiamnak kha hmang. Atu le atu kan kut kan thlir ahcun a phi peknak caanṭha a hmu rih lomi an um ko nain kanmah lawng atu le atu hal dingin caantlaitu kha kan hnekmi bantuk a si lai. Mah nih midang kha kut thlir awkah an lung a donghter khawh hna.—Pct. 3:7.

15. (a) A phi pek dingin hal kan si lo ahcun zeitindah kan lehrulh awk a si? (b) Caantlaitu nih mikip caah zeitindah zawnruahnak a langhter khawh? (“ Caantlaitu Na Si Ahcun” timi rinli kulh kha zoh.)

¹⁵ Thawngthanhtu tampi nih cawn dingmi hlathlai lioah an kut an thlir ahcun pek kan duh tlukin atu le atu a phi kan pe kho men lai  lo. A caan ah caantlaitu nih kan dihlak in cun a kan hal kho lai lo. Mah nih kan ngaih a kan chiatter khawh, asinain hal kan si lo tikah kan thin a hun awk a si lo.—Pct. 7:9.

16. A phi a pemi pawl kha zeitindah thazaang kan pek khawh hna?

¹⁶ Na duh tlukin atu le atu a phi na pek khawh lo ahcun midang nih a phi an pekmi kha ṭha tein ngai law pumh dih hnuah a phi an pek caah thangṭhat hna. Na pekmi a phi nih unau pawl kha thazaang a pek khawh hna bantukin na thangṭhatmi hna zong thazaang a ngeihter khawh hna. (Ptb. 10:21) Thangṭhatnak cu pakhat le pakhat thazaang kan i pek khawhnak lam pakhat a si.

17. (a) Nulepa nih an fale kha aa tlakmi a phi pek awkah zeitindah an bawmh khawh hna? (b) Video ningin a phi pek awkah i timhtuah ning lam pali cu zeidah an si? (A tanglei fianternak zong zoh.)

¹⁷ Pumhnak ah pakhat le pakhat zeitindah thazaang kan i pek khawh rih? Nulepa na si ahcun na fale kha an kum he aa tlakmi a phi pek awkah i timhtuah dingin bawm hna. (Matt. 21:16) A caan ah, cawn dingmi hlathlai lioah chungkhar buaibainak asiloah ziaza rawhralnak ti bantuk a biapimi kongkau hna nan i ruah tikah ngakchia nih a pek khawhmi catlangbu pakhat asiloah pahnih a um kho men. Cun nan fale nih an kut an thlir fatin  zeicah hal an si lo ti kha an hngalhthiam nakhnga zong bawm hna u. Cutin na chimh hna ahcun anmah hal loin midang hal an si tikah an lung a dong lai lo.—1 Tim. 6:18. d

18. A phi kan pek tikah kanmahle kanmah cungah lungthin i pek kha zeitindah kan hrial khawh? (Phungthlukbia 27:2)

¹⁸ Kan dihlak in Jehovah thang a ṭhattermi le zumtukhat unau pawl caah thazaang a pemi a phi hna kha kan i timtuah kho. (Ptb. 25:11) A caan ah pumpak hmuhtonnak hna kha tawi tein a phi pek awkah caanṭha kan hmuh kho. Mah tikah kan kong tam tuk in chim kha kan hrial awk a si. (Phungthlukbia 27:2 rel; 2 Kor. 10:18) Mah canah Jehovah, Baibal le a miphun dihlak cungtu ah lungthin pek dingin kan i zuam. (Biat. 4:11) Catlangbu ca i biahalnak cu kanmah kong chim ding a si ahcun cutin a phi pek cu aa tlakmi a si. Hi capar i a changtu catlangbu ah mah kong he aa tlaimi tahchunhnak pakhat a um.

19. (a) Aa pummi dihlak cungah zawnruahnak kan langhter ahcun a phichuak cu zeidah a si lai? (Rom 1:11, 12) (b) Pumhnak ah a phi peknak he aa tlaiin zeidah na sunsak?

¹⁹ Zeitindah a phi pek ding a si timi kong ah dingrep a um lo nain kan dihlak in thazaang a pemi a phi pek awkah kan i zuam kho. Mah cu tam deuh in atu le atu a phi pek kha a chim duhmi a si kho men. Asiloah a phi peknak caanṭha kan hmuh caah i lungsi le midang zong a phi peknak caanṭha an hmuh caah i lawmh kha a chim duhmi a si kho men. Khrihfabu pumhnak ah midang duhnak cungah lungthin kan peknak thawngin lunglawm tein “pakhat le pakhat kan i bawm” kho.—Rom 1:11, 12 rel.