1-2. Vawlei thar kan hngah lioah zeidah kan tuah a hau?

 HI VAWLEI ṭhalo hi a dingmi vawlei thar in ka airolh lai timi Jehovah biakam kha kan sunsak tuk. (2 Pet. 3:13) Mah vawlei thar cu zeitik set ah dah a rat lai ti cu kan hngal lo nain caan saupi hngah a hau ti lai lo ti kha thil sining hna nih a langhter.—Matt. 24:32-34, 36; Lam. 1:7.

² Biatak chung i kan umnak cu zei caan a si cang hmanhah mah biakam kan zumhnak kha fehter peng a hau. Zeicah? A ṭhawngmi zumhnak hmanh a der ṭhan khawh caah a si. Lamkaltu Paul nih a dermi zumhnak kha “kan tlaihchan pengmi sualnak” tiah a auh. (Heb. 12:1) Kan zumhnak a der nakhnga lo a rauhhlan ah vawlei thar a ra taktak cang lai ti a langhtermi thil hna kha hmaan tein kan hlathlai peng a hau.—Heb. 11:1.

3. Hi capar ah zei kong dah kan i ruah hna lai?

³ Hi capar ah vawlei thar kong Jehovah biakam kan zumhnak a fehter khomi lam pathum kong kan i ruah hna lai: (1) tlanhnak man kong ṭha tein ruahnak thawngin, (2) Jehovah ṭhawnnak kong ruahnak thawngin le (3) thlaraulei tuahsernak caah a caan peknak thawngin a si. Cun Habakkuk sin Jehovah chimmi bia nih kan zumhnak a fehter ning kong zong kan i ruah hna lai. A hmasa bik ah a ra laimi vawlei thar biakam cungah a fekmi zumhnak ngeih a herhnak, atu ah kan ton khawhmi thil sining cheukhat kha i ruah hna u sih.

 A Fekmi Zumhnak Ngeih A Herhnak Thil Sining Hna

4. Zei bantuk biakhiahnak hna ah dah a fekmi zumhnak ngeih a herh?

⁴ Nifatin a fekmi zumhnak langhter a haumi biakhiahnak hna kan tuah. Tahchunhnak ah, hawikomhnak, nuamhsaihnak, fimcawnnak, ṭhitumnak, fa ngeihnak le pawcawmnak rian ti bantuk biakhiahnak hna kan tuah. Hitin kan i hal kho: ‘Hi chan ṭhalo hi a rauhhlan ah Pathian vawlei thar nih a airolh cang lai ti ka zumh kha kaa thimmi nih a langhter maw? Asiloah thihnak cu zeizong vialte a donghnak a si ti a zummi hna nih kaa thimmi cungah huham an ka iap maw?’ (Matt. 6:19, 20; Luka 12:16-21) Vawlei thar kan naih tuk cang timi kan zumhnak a feh ahcun a ṭha bikmi biakhiahnak kan tuah khawh lai.

5-6. Lungretheihnak kan ton tikah a fekmi zumhnak zeicah kan herh? Tahchunhnak pe.

⁵ A fekmi zumhnak ngeih a herhnak hneksaknak hna zong kan tong. Kan lung a donghter khomi hremnak, a zualmi zawtnak asiloah a dang thil hna kan tong men lai. A hmasa ahcun kan tonmi buaibainak kha kan inkhawh tiah kan ruah men lai. Asinain mah bantuk buaibainak hna cu caan saupi a rauh tawn caah inkhawhnak kan ngeih nakhnga le lunglawm tein Jehovah rian kan ṭuan khawh peng nakhnga a fekmi zumhnak kan ngeih a hau lai.—Rom 12:12; 1 Pet. 1:6, 7.

⁶ Harnak kan ton lioah Jehovah vawlei thar cu zeitikhmanh ah a ra ti lai lo tiah kan ruah men lai. Mah cu kan zumhnak a der tinak a si maw? A si hrimhrim lo. Tahchunhnak pakhat hi ruathmanh u. Khuasik caan i a kih tuk lioah zeitikhmanh ah ṭhal nikhua a phan ti lai lo tiah kan ruah men lai. Asinain ṭhal caan cu a hung phan ko. Cu bantukin kan lung a dongh tuk lioah vawlei thar cu zeitikhmanh ah a ra ti lai lo tiah kan ruah men lai. Asinain kan zumhnak a ṭhawn tikah Pathian biakam cu a tling hrimhrim lai ti kha kan hngalh. (Salm 94:3, 14, 15; Heb. 6:17-19) Kan nunnak ah Jehovah biaknak kha zumhnak he pakhatnak ah kan chiah peng khawh.

7. Zei bantuk ruahnak dah kan hrial a herh?

⁷ A fekmi zumhnak ngeih a herhnak a dang pakhat a simi—phungchim rian kong kha ruathmanh u. Phung kan chimhmi hna lakin mi tampi nih a ra laimi Pathian vawlei thar kong “thawngṭha” cu a si kho lomi a si tiah an ruah. (Matt. 24:14; Ezek. 33:32) Anmah bantukin Jehovah cawnpiakmi kong ah zeitikhmanh ah lunghrinnak kan ngeih nakhnga lo kan i ralrin a hau. Cun kan zumhnak kha fehter peng a hau. Cutin kan tuah khawhnak lam pathum kong kha i ruah hna u sih.

Tlanhnak Man Kong Kha Ṭha Tein Ruat

8-9. Tlanhnak man kong ruahnak nih kan zumhnak kha zeitindah a fehter khawh?

⁸ Kan zumhnak fehter khawhnak lamkhat cu tlanhnak man kong ṭha tein ruahnak thawngin a si. Tlanhnak man nih Pathian biakam pawl cu an tling hrimhrim lai ti kha a kan zumhter. Tlanhnak man pek kan sinak a ruang le mah ah aa telmi kong hna ṭha tein kan ruah tikah a ṭha deuhmi vawlei i zungzal nunnak he aa tlaimi Pathian biakam cu a tling hrimhrim lai timi kan zumhnak kha a fehter chin. Zeicah cutin kan chim khawh?

⁹ Tlanhnak man ah zeidah aa tel? Jehovah nih a dawt tukmi a fater, naih tein an umṭi pengmi a Fapa kha a tlingmi minung pakhat in hrin a si nakhnga vancung in a rak thlah. Jesuh cu vawleicung a um lioah harnak a phunphun a rak tong. A donghnak ah fahnak in buin a rak thi. Jehovah nih a pekmi a man cu  a sang tuk hringhran! Caan tawite chung a ṭha deuhmi nunnak kan hmuh nakhnga ca men ah dawtnak a ngeimi Pathian nih a Fapa kha fahnak in buin thihnak nawl a awnh bal lai lo. (Johan 3:16; 1 Pet. 1:18, 19) Jehovah nih kanmah bawmh awkah a dawt tukmi a Fapa a kan pek caah vawlei thar ah zungzal in kan nung kho lai ti kha a kan zumhter.

Jehovah Ṭhawnnak Kong Ruahnak

10. Efesa 3:20 ningin Jehovah nih zeidah a tuah khawh?

¹⁰ Kan zumhnak fehter khawhnak a pahnihnak lam cu Jehovah ṭhawnnak kong ruahnak thawngin a si. Jehovah cu a biakam vialte tlinter khawhnak ṭhawnnak a ngei. Vawlei thar ah zungzal nunnak timi biakam cu minung caah a si kho lomi a lo men lai. Asinain minung nih zeitikhmanh ah tuah khawh lomi thil hna kha Jehovah nih bia a kan kamh lengmang. Jehovah cu Lianngan Bik Pathian a si caah mah kha a tuah khawh. (Job 42:2; Marka 10:27) Cucaah khuaruahhar a simi thil hna bia a kan kamh tikah kan khuaruah a har lo!—Efesa 3:20 rel.

11. Aa thleidangmi Pathian biakam pawl lakin pakhat kha tahchunhnak pe. (“ Aa Thleidangmi Biakam Cheukhat Tlinnak” timi rinli kulh kha zoh.)

¹¹ Jehovah nih hlanlio a miphun sinah bia aa kammi, a si kho lomi a lomi thil cheukhat kong kha ruathmanh u. Abraham le Sarah kha an tar hnuah fapa nan ngei lai tiah a ti hna. (Gen. 17:15-17) Cun Abraham sinah na tefa hna kha Kanaan ram ka pek hna lai ti zongin a ti. Abraham tefa a simi Israel mi cu kum tampi chung Izipt ram i sal an si lioah mah biakam cu zeitikhmanh ah a tling kho lo dingmi a lo men lai. Asinain a rak tling taktak. Kum tampi a rauh hnuah Jehovah nih kum upa a simi Elizabeth cu fapa pakhat a ngei lai tiah a rak thanh. Cun ngaknu thiang Mary kha Pathian Fapa a hrin lainak kong zong a rak chimh. Mah nih a luancia kum thong tampi lioah Eden dum ah a rak sermi a biakam kha a tlinter lai!—Gen. 3:15.

12. Joshua 23:14 le Isaiah 55:10, 11 nih Jehovah ṭhawnnak he aa tlaiin zeidah a kan zumhter?

¹² Jehovah sermi biakamnak vialte le a tlinter ning kong kan ruah tikah Jehovah cu ṭhawnnak a ngei ti kha kan hngalh. Mah nih vawlei thar kong a biakam cung kan zumhnak kha a fehter chin. (Joshua 23:14; Isaiah 55:10, 11 rel.) Mah nih vawlei thar biakam cu saduhthah sawhsawh men a si lo ti kha midang nih an hngalh nakhnga bawmh awkah a kan timhtuah. Jehovah theng nih van thar le vawlei thar he aa tlaiin hitin a thanh: “A hmaanmi le zumhawktlak a simi bia an si.”—Biat. 21:1, 5.

Na Nunnak Kha Thlaraulei Tuahsernak In Khahter

13. Khrihfabu pumhnak nih kan zumhnak kha zeitindah a fehter chin khawh? Fianter.

¹³ Kan zumhnak a fehter khomi a pathumnak lam cu thlaraulei tuahsernak caah a caan peknak thawngin a si. Tahchunhnak ah, Khrihfabu pumhnak in ṭhatnak kan hmuh ning kha ruathmanh. Caantling rian a phunphun ah kum tampi chung aa telmi Anna nih hitin a chim: “Pumhnak nih ka zumhnak fehter peng awkah a ka bawmh. Phungchimtu cu mi cawnpiak a thiam tuk lomi a si asiloah a kong thar zeihmanh a chim lo hmanhah Baibal biatak kha ṭha deuh in hngalhthiam awk le ka zumhnak fehter awkah a ka bawmmi a kong pakhatkhat kha ka theih tawn.” b Pumhnak ah unau pawl nih a phi an pekmi kan ngaihmi zong nih kan zumhnak kha a fehter chin khawh.—Rom 1:11, 12; 10:17.

14. Phungchim rian nih kan zumhnak kha zeitindah a fehter?

 ¹⁴ Lohmun phungchimnak ah kan i telmi zong nih kan zumhnak kha a fehter chin. (Heb. 10:23) Kum 70 leng Jehovah rian a ṭuanmi Barbara nih hitin a chim: “Phungchim rian nih ka zumhnak a fehtermi kha ka hmuh. Midang sinah a ṭha tukmi Jehovah biakam kong ka chim deuhdeuh tikah ka zumhnak zong a ṭhawng deuhdeuh ve.”

15. Pumpak hlathlainak nih kan zumhnak kha zeitindah a fehter? (Hmanthlak zong zoh.)

¹⁵ Kan zumhnak a fehtermi thlaraulei tuahsernak pakhat cu pumpak hlathlainak hi a si. Susan nih hlathlainak caah a caan suai cu a caah bawmtu a si ti kha a hmuh. Hitin a ti: “Zarhpi Ni ah a hmaizarh i Vennak Innsang Cawn Dingmi kha ka hlathlai. Nikhat Ni le Nihnih Ni ah zarhlai pumhnak caah kaa timtuah. A taangmi nidang ah pumpak hlathlainak ka tuah.” Susan nih hlathlainak caah a caan a suaimi ningin a zulh peng ruangah a zumhnak cu a fek chin lengmang. Vawleicung pumpi zungpi ah kumhra leng a ṭuan cangmi Irene nih Baibal chimchungbia kong hlathlainak nih a zumhnak a fehtermi kha a hmuh. Hitin a ti: “Jehovah chimchungbia pawl cu a hme bikmi a neknok tiangin a tlin dihmi kha khuaruahhar in ka hmuh.” c

“Pel Loin A Ra Hrimhrim Ko Lai”

16. Habakkuk sin Jehovah biakam cu tuchan kan caah zeicah sullam a ngei tukmi a si? (Hebru 10:36, 37)

¹⁶ Jehovah salle cheukhat cu hi chan ṭhalo donghnak an hngahnak a saupi cang. Minung hmuhnak in cun Pathian biakam tlinnak cu a nuar tukmi a lo men lai. Asinain Jehovah nih a salle an intuarnak kha a hngalh i profet Habakkuk sinah hitin bia a kamh: “Langhnak na hmuhmi nih khan sawhmi caan a ngei i cucu langhnak taktak cu a si. A tlin lainak caan cu khulrang in a ra lio. A rauhhmanh ah hngak  ko, zeicahtiah pel loin a ra hrimhrim ko lai!” (Hab. 2:3) Mah Pathian biakam cu Habakkuk ca lawngah maw ṭhatnak petu a si? Asiloah tuchan kan caah tah sullam a ngei maw? Thiang thlarau forhfialnak in lamkaltu Paul nih mah bia kha vawlei thar aa ruahchanmi Khrihfa hna caah a rak hman. (Hebru 10:36, 37 rel.) Khamhnak kong Pathian biakam cu a nuarmi a lawh hmanhah “pel loin a ra hrimhrim ko lai” ti kha kan zumh khawh.

17. Jehovah nih Habakkuk ruahnak a cheuhmi kha unaunu pakhat nih zeitindah a zulh?

¹⁷ Jehovah salle tampi nih kum tampi a rauhhmanh ah ‘hngak u’ timi Jehovah ruahnak cheuhnak kha an zulh. Tahchunhnak ah, Louise cu 1939 in Jehovah a hun bia. Hitin a chim: “Mah lioah siangsangruun ka dih hlanah Armageddon a ra lai tiah ka rak ruah. Asinain cutin a rak si lo. Kum tampi chungah Jehovah sinin biakammi laksawng an hmuh hlanah caan saupi a rak hngakmi Noah, Abraham, Josef le a dang Baibal tuanbia kong relnak in ṭhatnak ka hmu. Pathian biakam cu a tling hrimhrim lai timi zumhnak nih keimah le midang kha vawlei thar cu a nai tuk cang ti zumh awkah a kan bawmh.” Jehovah a biaknak a saupi cangmi mi tampi zong an hna a tla ve ko lai!

18. Sermi thil kong hlathlainak nih a ra laimi vawlei thar kan zumhnak kha zeitindah a fehter khawh?

¹⁸ Vawlei thar a phan rih lo ti cu a hmaan ko. Asinain na hmaika ah a ummi—arfi, thingkung, saram le na minunghawi ti bantuk thil cheukhat kong kha ruathmanh. Mah hna cu an um lo caan hmanhah a um taktakmi an si kha ahohmanh an lung a hring lai lo. Annih cu Jehovah sernak thawngin an ummi a si. (Gen. 1:1, 26, 27) Pathian nih vawlei thar ka ser lai ti zongin bia a kan kamh. Mah a biakam kha a tlinter lai. Vawlei thar ah minung cu a tlingmi ngandamnak he zungzal in an nung cang lai. Vawlei thar cu Pathian rikhiahmi caan ah a ra hrimhrim lai ti kha kan zumh khawh.—Isa. 65:17; Biat. 21:3, 4.

19. Na zumhnak kha zeitindah na fehter khawh?

¹⁹ Mah caan chungah na zumhnak fehter awkah na ngeihmi caanṭha paohpaoh kha hmang. Tlanhnak man cung naa lawmhnak kha langhter zungzal. Jehovah ṭhawnnak kong kha ruat. Na nunnak kha thlaraulei tuahsernak in khahter. Cutin tuahnak thawngin “an zumhnak le an lungsaunak thawngin Pathian nih bia a kamhmi hna a hmumi” lakah naa tel kho ve.—Heb. 6:11, 12; Rom 5:5.