Jehovah Tehte Hna chuahmi ca pawl kha a dang website asiloah social media ah ahohmanh taarnak nawl zeicah awnh an si lo?

Mi cheukhat nih kan cauk pawl kha man loin kan pek hna caah a dang website asiloah social media ah taar khawh asiloah copy tuah khawh a si tiah an ruah. Asinain mah nih kan website i Zulh Awk Phunglam Hna * caah buaibainak nganpi a chuahter khawh. Mah Phunglam hna nih “Internet (zei bantuk website, file i peknak site, video i peknak site asiloah social network) i mah website ah taarmi hmanthlak, ca, trademark, music, video le capar” pawl cu ahohmanh taarnak nawl an ngei lo ti kha fiang tein a langhter. Mah phunglam cu zeicah a herh?

Kan website i taarmi vialte cu nawlngeitu a um dih, mah cu upadi ningin huhphenh a si tinak a si. Mah nih ningcang loin hmannak in a kilven caah a biapi tukmi a si. Zumhpialmi le kan rian harnak pek a duhmi hna nih a caan ah kan cauk pawl kha anmah website ah an taar tawn, mah cu Jehovah Tehte Hna le midang lemnak caah a si. Asinain mi lung a hrintermi thil zong mah site hna ah an taar. (Salm 26:4; Ptb. 22:5) A dang nih kan thilri asiloah jw.org logo kha thanhlaar tuahnak, mobile app le an zuarmi thil hna ah an hman. Asinain kan thilri le kan logo cu phung ningin kilvenmi an si caah taza kan cuai khawh hna i cutin tuah lo awkah kan thlauh khawh hna. (Ptb. 27:12) Unau an si hmanhah mi cheukhat kha a dang website in kan cauk pawl taarnak nawl asiloah zuarmi thil ah jw.org logo kha hmannak nawl kan pek hna ahcun biaceihnak zung nih an kan bawm kho lai lo.

Jw.org a si zongah khoika paohin kan cauk pawl kha download kan tuah ahcun ṭihnung a si kho. Jehovah nih thlarau rawl kha “zumh awk a tlakmi le a fimmi sal” sin lawngin a kan pek. (Matt. 24:45) Mah “sal” nih thlarau rawl peknak ah www.pr418.com, tv.pr418.com le wol.pr418.com timi kan website lawng kha an hman hna. Cun mobile divice caah—JW Language^®, JW Library^® le JW Library Sign Language^® timi official app pathum lawng kan ngei. Mah site le app hna ah zei bantuk thanhlaar asiloah Satan vawlei in a rami zei thil hmanh kan hmu lai lo. Asinain a dang website asiloah app in kan cauk pawl kan hmuh ahcun lam cheukhat in thlenmi a si khawh caah ṭihnung a si.—Salm 18:26; 19:8.

Mah lengah mi nih ca ṭial khawhmi website ah kan thilri pawl kan taar ahcun mah nih zumhpialmi le midang kha Jehovah bupi thangchiat awkah a awnh khawh hna. Unau cheukhat cu, cu bantuk mi hna he bia an i al i mah nih Jehovah thang a chiatter chinchin. Internet in cutin bia i ruah cu mi pakhat a ruahnak remh awk le biatak a hngalhthiam nakhnga bawmhnak ah aa tlakmi lam a si lo. (1 Tim. 6:3-5; 2 Tim. 2:23-25) Cun mi cheukhat nih bupi sin asiloah Uktu Bu i unaupa pawl sinin a rami bantukin website le social media hna an tuah. Asinain mah cu a deu an si. Uktu Bu chungtel ahohmanh nih pumpak in zei bantuk Web page asiloah social media site an ngei lo.

Mi pawl kha jw.org kan hmuhsak hna tikah “thawngṭha” chimnak kan bawmh a si. (Matt. 24:14) Kan website le app pawl cu an ṭha chin thluahmah. Mah in mikip ṭhatnak hmuhter kan duh hna. Cucaah midang sinah kan cauk le kan website link kha kuatnak nawl kan awnh. Cuticun Jehovah nih “zumh awk a tlakmi le a fimmi sal” lawng hmangin a kan pekmi thlarau rawl kha mi kan hmuhsak khawh hna.