KAN hnu kum ah vawleicung pumpi i unaupa thong tampi cu Khrihfa upa in le bu rianṭuantu in rian pek an si. Nang zong mah lakah naa tel ve ahcun cu bantuk lam in Jehovah le unau pawl caah rian na ṭuan khawh caah naa nuam tuk lai ti cu a fiang ko.

Asinain lungretheihnak tlawmpal zong na ngei ko lai. Jason timi mino Khrihfa upa pakhat nih hitin a ti: “Rian pek ka si hmasa bik lioah ka rian thar nih a ka nenh tuk tiah ka ruah.” Moses le Jeremiah zong nih Jehovah sinin rian thar an hmuh lioah sining kan tlinh lo tiah an rak ruah ve. (Ex. 4:10; Jer. 1:6) Cutin na ruah ve ahcun mahle mah zumhnak ngeih awk le ṭhancho zungzal awkah zeidah na tuah khawh? Timote sinin tampi na cawn khawh.—Lam. 16:1-3.

Lamkaltu Paul he khual an tlawnṭi hmasa bik lioah Timote cu kum 20 hrawng a si men lai. Mah sawmnak a hmuh hmasa lioah Timote nih kei cu ka ngakchia tuk rih i midang cawnpiak awk le ruahnak cheuh awkah sining ka tlinh lo tiah a ruah men lai. (1 Tim. 4:11, 12; 2 Tim. 1:1, 2, 7) Asinain a ṭhangcho lengmang i mah hnu kumhra ah Paul nih Filipi Khrihfa hna kha hitin a ti hna: “Timote kha nan sinah tuan i ratter kha a si kho lai tiah Bawi Jesuh cu ka zumh ko.” Zeicah Paul nih cutin a ruah? Hitin a ti: “Amah lawnglawng hi keimah lungthin bantuk a ngei.”—Fil. 2:19, 20.

Timote cu Khrihfa upa pawl caah zeicah zohchunh awk ṭha bik a si? A ruang paruk hi zohhmanh.

1. Mi cungah zawnruahnak taktak a ngei. Paul nih Filipi khua i unau pawl kha Timote cu “nan zawn aan ruat taktakmi hna” a si tiah a ti hna. (Fil. 2:20) Unau pawl cu Jehovah he naih tein um hna seh ti a duh i anmah bawmhnak caah a caan le a thazaang kha lungtho tein a hman.

Kum 20 leng Khrihfa upa a ṭuan cangmi unaupa William nih Khrihfa upa in rian pek a si kami hna kha hitin a ti hna: “Unau pawl kha daw hna u. Thil sining cungah nawlngeihnak hmannak nakin unau pawl an herhmi kha biapi deuh ah chia u.” Pa zeizat nih dah mawṭaw an i cit timi nakin amah caante ah mawṭaw dirnak hmun phanh lawng a duhmi mawṭaw mawngtu bantuk kha si hlah u.

2. Jehovah rian kha hmasa bik ah a chiah. Paul nih Timote cu ‘anmah rian lawng a ruat i Jesuh Khrih kong a ruat lomi’ hna he aa dang tuk tiah a ti. (Fil. 2:21) Paul nih a pawngkam i unau pawl cu anmah pumpak khuasaknak ca lawngah lungthin an pekmi kha a hmuh. A caan ah Jehovah rian nakin anmah pumpak rian kha biapi deuh ah an chiah. Asinain Timote cu cutin a si lo. Pathian rian ah tam deuh in tel khawhnak caanṭha a kawl caah “keimah ka kal lai! Ka thlah tuah” tiah a timi Isaiah bantuk a si.—Isa. 6:8.

Nangmah pumpak herhmi le Khrihfabu herhmi na ṭuan tikah zeitindah a tlarimi na si khawh? Pakhatnak ah, Paul i mah ruahnak cheuhnak hi zul: “A biapi deuhmi thil kha hngalh i zuam.” (Fil. 1:10, NW) Jehovah rian kha pakhatnak ah chia. Pahnihnak ah, na caan le na thazaang tam tuk a lami tuahsernak hna kha hrial. Paul nih Timote kha “tlanval lio pumsa duhnak kha zamtak i zuam hna law . . . dinnak le zumhnak le dawtnak le daihnak kha kawl i zuam” tiah a ti.—2 Tim. 2:22.

3. Jehovah rian ah fakpi in aa zuam. Paul nih Timote kong he aa tlaiin hitin a ti: “Keimah le amah cu pa le fa bantukin thawngṭha rian kan ṭuan.” (Fil. 2:22)  Timote cu a tha a thumi a si lo. Paul he hmunkhat ah rian an ṭuanṭi i mah nih an i hawikomhnak kha a fehter chin.

Tuchan Jehovah bupi zongah ṭuan awk rian tampi a um. Mah rian cu lungsi hnangamnak a pemi rian a si i unau pawl he naih tein um awkah aan bawmh lai. Cucaah “Bawipa rian teimak tein nan ṭuannak ahcun i manh lo ngai in um zungzal ko u.”—1 Kor. 15:58.

4. A hngalhmi kha a zulh. Paul nih Timote sinah hitin cakuat a ṭial: “Nang nih cun kaan cawnpiaknak le ka ziaza le ka nunnak i kaa tinhmi kha na zulh hna; zumhnak ka ngeihmi le ka lungsaunak le ka dawtnak ngeihmi le ka inkhawhnak ngeihmi . . . kha na hmuh hna.” (2 Tim. 3:10, 11) Timote nih a hngalhmi kha a zulh caah rian tampi pek a si.—1 Kor. 4:17.

Hmuhtonnak a ngeimi Khrihfa upa pakhat kha i zohchunh awk in na chiah khawh. Kum tampi chung Khrihfa upa a ṭuanmi Tom nih hmuhtonnak a ngeimi Khrihfa upa nih a cungah siaherhnak a langhtermi le a cawnpiakmi kha aa cinken. Hitin a ti: “A sinah ruahnak cheuhnak ka hal zungzal i mah ningin ka tuah. Mah nih mahle mah zumhnak a ka ngeihter.”

5. Amahle amah aa cawnpiak peng. Paul nih Timote kha ‘Pathian sin pumpek ding timi hmuitinh he nangmahle nangmah kha i cawnpiak’ tiah ruahnak a cheuh. (1 Tim. 4:7, NW) Lente aa celhmi pakhat nih cawnpiaktu a ngeih hmanhah amahle amah aa cawnpiak a hau rih. Paul nih Timote kha hitin a forh: “Mi zapi cu . .  Cathiang kha rak relpiak lengmang hna, phung kha rak chim lengmang hna law rak cawnpiak lengmang hna. . . . Na ṭhannak kha mi vialte nih an hmuh nakhnga cu thil cu teimak tein tuah lengmang ko hna.”—1 Tim. 4:13-15.

Na thiamnak kha na ṭhanchoter zungzal a hau. Baibal kha teima tein hlathlai zungzal law bupi sinin hmuhmi hmanung bik lamhruainak kha zul. Mahle mah i zum tuk hlah. Hmuhtonnak tampi na ngeih caah hlathlainak ṭha tein tuah loin zei bantuk thil sining paoh ka tawnghtham khawh tiah na ruah ahcun a palh lai. Timote bantukin “nangmah kha ṭha tein i ralring law na cawnpiaknak zong kha i ralring.”—1 Tim. 4:16.

6. Jehovah thiang thlarau kha aa bochan. Paul nih Timote kha hitin a ti: “Kan chungah a ummi thiang thlarau ṭhawnnak thawngin na kut chungah chiahmi thil ṭha kha him tein keng hna.” (2 Tim. 1:14) Timote nih Pathian thiang thlarau kha aa bochan a hau.

Kum tampi chung Khrihfa upa a ṭuanmi Donald nih hitin a chim: “Rian pekmi pa hna nih Pathian he an i pehtlaihnak kha an sunsak a hau. A sunsakmi hna cu ‘an ṭhawng chin lengmang.’ Pathian thiang thlarau hmuh awk le mah nih a chuahtermi ziaza pawl ngeih awkah thla an cam ahcun unau pawl caah thluachuah taktak an si lai.—Salm 84:7; 1 Pet. 4:11.

Bu rianṭuantu le Khrihfa upa a si kami hna nih nangmah bantukin Jehovah rian ah ṭhancho zungzal dingin an i zuammi hmuh cu thazaang petu a si. A hmasa ah langhtermi Jason nih hitin a chim: “Khrihfa upa ka ṭuan chungah tampi ka cawn i mahle mah zumhnak ka ngeihmi zong a ṭhangcho. Atu cu ka rian ah kaa nuam tuk cang i mah kha tinvo sung taktak in ka hmuh.”

Ṭhancho awkah naa zuam zungzal lai maw? Timote kha naa zohchunh ahcun nang zong unau pawl caah thluachuah na si ve lai.