“NI HMANUNG BIK” caan ah nunnak cu a har tuk caah a hlan nakin lungsaunak kan ngeih chinchin a hau. (2 Tim. 3:1-5) Kan pawngkam i mi tampi cu an lung a sau lo. Anmah zawn lawng an i ruat, bia-al an duh i mahle mah aa uk kho lomi an si. Cucaah hitin kan i hal awk a si: ‘Ka pawngkam mi hna bantukin a lung a sau lomi ka si maw? Lungsaunak timi cu zei sullam dah a si? Lungsaunak ngeih awkah zeidah ka tuah khawh?’

Baibal ah hmanmi “lungsaunak” timi biafang cu zei sullam dah a ngeih? Thil sining pakhat inkhawh lawng kha a si lo. A lung a saumi pakhat cu ruahchannak in inkhawhnak a ngei, mah cu thil sining a ṭha deuh te lai tiah aa ruahchanmi kha a si. Amah ca lawng aa ruat lo. A thin a huntertu asiloah a ding loin a pehtlaihtu pawl hmanh telin midang intuarnak kha biapi ah a chiah. An i pehtlaihnak cu a ṭhangcho te lai tiah aa ruahchan peng. Baibal nih lungsaunak cu dawtnak in a rami a si tiah a timi cu khuaruahhar awk a si lo. * (1 Kor. 13:4) Lungsaunak cu “thlarau nih a chuahtermi” ziaza lakah aa tel. (Gal. 5:22, 23) Cu a si ah lungsaunak ngeih awkah zeidah kan tuah a herh?

Lungsaunak ngeih awkah Pathian nih amah aa bochanmi a pekmi hna thiang thlarau bawmhnak kan hal a hau. (Luka 11:13) Pathian thiang thlarau cu a ṭhawng tukmi a si, asinain kan thlacammi ningin kan tuah a hau. (Salm 86:10, 11) Mah cu nifate lungsaunak langhter awkah kan si khawh chungin kan i zuam a hau i kan zia ah kan canter a hau tinak a si. Asinain kan lung a sau lo caan a um kho men. Zeinihdah a kan bawmh khawh?

Jesuh sinin cawn le i zohchunh a hau. Lamkaltu Paul nih “mithar” sinak kong a chim tikah lungsaunak aa tel. Hitin a kan forh: “Khrih nih aan pekmi hna daihnak kha nan lungchung i biaceihtu ah ser u.” (Kol. 3:10, 12, 15) Cutin tuah awkah Jesuh hnu zulh le aa tlakmi caan ah Pathian nih thil sining a remh lai ti kha kan zumh a hau. Mah zumhnak kan ngeih ahcun kan pawngkam ah zei thil a can hmanhah lungsaunak kan ngei zungzal lai.—Johan 14:27; 16:33.

Kan dihlak in a rannak in vawlei thar ra cang seh ti kan duh. Asinain Jehovah cu kan cungah zeitluk in dah a lung a sau timi kan ruah tikah lungsaunak ngeih chinchin awkah kan cawn. Baibal nih hitin a ti: “Bawipa cu a biakam tlinter awkah a khul a nuar ko tiin mi a cheu nih an ruah bang hin a si lo, nanmah cung i lungsaunak a ngeih ca tu ah hin a si deuh. Zeitintiah pakhat tlau hmanh hi a duhmi a si lo i mi vialte hi sual ngaihchihnak ngei hna seh ti tu hi a duhmi a si.” (2 Pet. 3:9) Cucaah kan cung i Jehovah lungsaunak kong kan ruah tikah midang cungah kan lung a sau chinchin ve lai. (Rom 2:4) Lungsau a herhnak thil sining cheukhat cu zei hna dah an si?

Nifate kan nunnak ah lungsau a herhnak thil sining tampi a um. Tahchunhnak ah, a biapimi thil pakhat chim awk na ngeih tikah midang hnahnawh lo dingin lungsaunak langhter a hau. (Jeim 1:19) Pakhatkhat nih kan thin a kan hunter tik zongah lungsau a hau. Lungsau loin lehrulh canah Jehovah le Jesuh nih kan derthawmnak an lehrulhning i cinken cu a ṭha. Palhnak kan tuahmi thil hmetete tampi cungah an lungthin an chia lo. Mah canah kan ngeihmi sining ṭha hna kha an hmuh i ṭhancho awkah lungsau tein a caan an kan pek.—1 Tim. 1:16; 1 Pet. 3:12.

Pakhatkhat nih kan chimmi asiloah kan tuahmi cu a palh tiah an kan ti tik zongah lungsaunak ngeih a hau. A hmasa ah kan lehrulhning cu thinhun in kanmahle kanmah kan i runven men lai. Asinain Baibal nih a dang lam in lehrulh awkah a kan fial. Hitin a ti: “Lung a saumi hi aa porhlawmi nakin a ṭha deuh. Na thin sum khawh kha i zuam, lungchung in mi uam peng hi hruh a si.” (Pct. 7:8, 9) Cucaah sual a kan puhnak cu a hmaan lomipi a si hmanhah lungsaunak langhter le kan lehrulh hlanah ṭha tein ruah hmasa a hau. Jesuh zong midang nih a hmaan lopi in sual an puh tikah cutin a rak tuah.—Matt. 11:19.

Nulepa nih an fale an lungput i remh awk asiloah a ṭha lomi duhnak hrial awk an bawmh hna tikah a hleiin an lung a sau a hau. Scandinavia Bethel ah rian a ṭuanmi Mattias kong hi ruathmanh. Kumhra fai a hung si tikah a sianginn kaiṭi hawi pawl nih a zumhnak ruangah capo ah an saih. Mah kha a nu le a pa nih a hmasa ahcun an hngal lo. Asinain a hnuah a zumhnak he aa tlaiin lunghrinhnak a hun ngeihmi kha an hmuh. A pa Gillis nih mah thil sining tawnghthamnak ah lungsaunak tampi kan langhter a hau tiah a ti. Mattias nih mah biahalnak hna hi a tuah: “Pathian cu ahodah a si? Baibal cu Pathian Bia a si lo ah tah zeitin? Mah hi Pathian duhmi maw a si asiloah kanmah duhmi dah a si ti kha zeitindah kan hngalh khawh?” Cun a pa kha “nanmah bantukin ka intuar lo le ka zumh lo ruangah zeicah biaceih ka si lai?” ti zongin a hal.

Gillis nih hitin a ti: “A caan ah kan fapa biahalnak ah thinhunnak aa tel. A nu le keimah  kha a kan ralchanh lo nain a caah a har tuk tiah a ruahmi biatak kha a ralchanh.” Gillis nih a fapa cu zeitindah a bawmh? “Ka fapa he hmunkhat ah kan ṭhu i suimilam tampi chung bia kan i ruah.” Gillis nih Mattias chimmi kha a ngaihpiak i a intuarnak le a ruahnak kha hngalhthiam awkah biahalnak hna a tuah. A caan ah Gillis nih a fapa kha a kong pakhat a chimh i mah kha nikhat chung ruah awkah a fial asiloah a hnuah mah kong kha an i ruahṭi ṭhan. A fapa chimmi bia kha ruah awkah ni tlawmpal pek a hauh caan hna a um tiah a ti. Cutin hmaan tein bia an i ruah tikah Mattias nih tlanhnak man sullam le Jehovah nih a kan dawt i kan cungah uknak nawl a ngei timi kong hna kha a hun hngalhthiam. A pa nih hitin a ti: “A caan pek a hau, mah cu a har ko nain duhsah duhsah in a lungthin chungah Jehovah a dawtnak cu a ṭhang. Lungdong lo tein le lungsau tein kan bawmh caah ka nupi he kan i lawm tuk.”

Gillis le a nupi nih an fapa lungsau tein an bawmh lioah Jehovah nih a kan bawmh lai ti kha an zumh. Gillis nih hitin a ti: “Hngalhthiamnak a ngeih nakhnga bawmh awkah Jehovah sin thlacam dingin amah kan dawtnak nih a kan forh tiah Mattias kha ka chimh tawn.” Lungdong lo tein lungsaunak an langhter caah a nu le a pa cu an i nuam tuk.

Caan saupi a zawmi chungkhar pakhat asiloah hawikom pakhat a zohkhenhmi kan si ahcun lungsaunak kan ngeih a hau. Scandinavia ah a um vemi, Ellen * kong hi ruathmanh.

A luancia kum riat hrawngah Ellen a vapa cu a zawtnak ruangah a thluak a rawk. Mah ruangah nuamhnak, ngaihchiatnak le zaangfahnak timi intuarnak hna a ngei ti lo. Mah thil sining cu Ellen caah a har tuk hringhran. Hitin a ti: “Lungsaunak tampi ngeih a hau i thla voi tampi ka cam. Ka duh bikmi Baibal caang a simi, Filipi 4:13 i ‘Khrih nih ṭhawnnak a ka pekmi thawngin zeithil hmanh hung chuak hna sehlaw ka ton khawh ko hna’ timi bia nih hnemhnak a ka pek.” Jehovah ṭhawnnak le bawmhnak thawngin Ellen nih mah thil sining kha lungsau tein a tei khawh.—Salm 62:5, 6.

Lungsaunak langhternak ah a ṭha bikmi zohchunh awk cu Jehovah thengte hi a si. (2 Pet. 3:15) Baibal ah Jehovah lungsaunak kong kha kan hmuh tawn. (Neh. 9:30; Isa. 30:18) Sodom khua hrawh awk i a biakhiahnak he aa tlaiin Abraham nih voi tampi biahalnak a tuah tikah Jehovah nih a lehrulhning kha naa cinken maw? Jehovah nih Abraham kha a bia a tan lo. Abraham biahalnak le lungretheihnak kha lungsau tein a ngaihpiak. Cun Sodom khua ah miding pahra te hmanh an um ahcun ka hrawk lai lo tiah bia a kamh. (Gen. 18:22-33) Jehovah nih lungsau tein a ngaih zungzal i a hleihluat tuk in a lehrulh bal lo.

Lungsaunak cu Khrihfa dihlak nih ngeih a herhmi, mithar sinak ah aa telmi a biapi tukmi a si. Lungsaunak ngeih awkah kan si khawh chung kan i zuam tikah dawtnak le lungsaunak a ngeimi kan Pa, Jehovah kan thangṭhat a si i “zumhnak le an lungsaunak thawngin Pathian nih bia a kamhmi hna a hmumi” lakah kan i tel ve lai.—Heb. 6:10-12.