Mah cazin ah langhtermi chimchungbia cheukhat cu caan khatte ah a cangmi an si. Mah a cangmi thil dihlak nih “donghnak caan” ah kan nung ti kha a langhter.—Dan. 12:4.

• Baibal caang (hna) Biat. 11:7; 12:13, 17; 13:1-8, 12

  Chimchungbia “Sahrang pakhat” nih vawleicung mi pawl kha kum thong tampi chung a uk hna. Donghnak caan ah lu pasarih a ngeimi sahrang cu hma a pu. A hnuah a dam ṭhan i “vawleicung mi vialte” nih sahrang hnu kha an zulh. Satan nih “minu tefa a taang rihmi vialte hna doh awkah” sahrang kha a hman.

  A tlinnak Buanchukcho hnuah Jehovah ral a simi cozah hna nih minung kha an uk hna. Kum zabu tampi hnu, Vawlei Ralpi Inak lioah British Empire cu a thazaang a hung der. Asinain United States he an ṭanṭi tikah a hung ṭhawng ṭhan. A hleiin donghnak caan ah Satan nih Pathian miphun pawl hrem awkah vawleicung cozah vialte kha a hman hna.

• Baibal caang (hna) Dan. 11:25-45

  Chimchungbia Donghnak caan ah chaklei siangpahrang le thlanglei siangpahrang karah dohnak a um lai.

  A tlinnak Germany nih Britain le United States kha a doh hna. 1945 ah Soviet Union le amah lei ah a ṭangmi ram hna cu chaklei siangpahrang an hung si. 1991, Soviet Union a tlak hnuah Russia le amah lei ah a ṭangmi ram hna cu chaklei siangpahrang an hung si.

• Baibal caang (hna) Isa. 61:1; Mal. 3:1; Luka 4:18

  Chimchungbia Jehovah nih Messiah Pennak dirh a si hlanah a “lamkal” kha “lam a sialtu” dingin a thlah. Mah “lamkal” hna nih lungnemmi hna sinah “thawngṭha” kha an chim.

  A tlinnak 1870 thawkin, C.  T.  Russell le a hawile nih Baibal cawnpiakmi taktak kha ṭha tein an hlathlai. 1881 ah Pathian salle caah thawngṭha chim cu a biapi tukmi rian a si ti kha an hun hngalh. “Phungchimtu 1,000 Kan Herh hna” timi le “Phungchim awkah Chiti Thuhnak” ti bantuk capar hna an chuah.

• Baibal caang (hna) Matt. 13:24-30, 36-43

  Chimchungbia Pa pakhat nih a lo ah thlaici a tuh. Asinain a ral nih a lo ah belhci a vorhpiak. Mah belh cu a ṭhang i thlaici kha a khuh dih. Rawl ṭuan a zat tikah belh cu rawl kung he ṭhen a si.

  A tlinnak 1800 thawkin a hmaanmi le a hmaan lomi Khrihfa hna an i dannak cu a hung fiang chinchin. Donghnak caan chungah a hmaanmi Khrihfa hna cu pumh an si i a hmaan lomi Khrihfa hna sinin ṭhen an si.

• Baibal caang (hna) Dan. 2:31-33, 41-43

  Chimchungbia Milem i a ke cu thir le tlak aa cawhmi a si i sui, ngun le dar in sermi a si.

  A tlinnak Tlak nih Vawleicung Nawlngeitu Anglo-American a ralchanhtu mi pawl kha a aiawh hna. Zeicahtiah mah cozah pawl nih mi hna ruangah an nawlngeihnak kha tling tein an hmang kho lo.

• Baibal caang (hna) Matt. 13:30; 24:14, 45; 28:19, 20

  Chimchungbia “Rawl kung” kha “buk chungah” an rawn i “zumh awk a tlakmi le a fimmi sal” kha “a sal hawi zohkhenhtu” dingah rian a pek hna. “Pennak kong thawngṭha” kha vawleicung “miphun vialte” sinah an chim.

  A tlinnak 1919 ah zumhawktlak le a fimmi sal kha Pathian miphun pawl zohkhenh awkah rian pek an si. Mah caan thawkin Baibal Siangngakchia pawl nih phung kha tam deuh in an hun chim. Tuchan zongah Jehovah Tehte Hna nih ram 200 lengah phung an chim i Baibal hrambunhmi cauk kha holhphun 1,000 lengin an chuah.

• Baibal caang (hna) Dan. 12:11; Biat. 13:11, 14, 15

  Chimchungbia Ki pahnih a ngeimi sahrang nih “sahrang pakhatnak milem” kha a ser i “nunnak thaw” a pek.

  A tlinnak Vawleicung Nawlngeitu Anglo-American nih Ramkomh Bu kha a hun hruai. A dang ram hna zong mah bu ah an hun i tel. 1926 in 1933 ah chaklei siangpahrang zong Ramkomh Bu ah a hun i tel ve. Mi pawl nih Pathian Pennak lawng nih vawleicung ah a chuahter khawhmi daihnak kha Ramkomh Bu nih a chuahter khawh lai tiah an zumh. Mi nih UN kong he aa tlai zongin cutin an zumh.

• Baibal caang (hna) Dan. 8:23, 24

  Chimchungbia A puarhrang ngaimi siangpahrang nih ‘rawhnak tampi kha a tuah lai.’

  A tlinnak Vawleicung Nawlngeitu Anglo-American nih mi tampi kha a thah hna i rawhnak tampi a chuahter. Tahchunhnak ah, Vawlei Ralpi IInak lioah United States nih amah le Britain ral a simi ram pakhat cungah atomic bomb pahnih a rak thlak. Mah hriamnam nih hlan nakin thil tam deuh a rak hrawh.

• Baibal caang (hna) Dan. 11:31; Biat. 17:3, 7-11

  Chimchungbia Ki pahra a ngeimi sahrang “sen” cu dongh hngal lo khor chungin a hung chuak, mah cu siangpahrang pariatnak a si. Daniel Baibal nih mah sahrang kha “ṭhionak a chuahtertu thil fihnung” in a langhter.

  A tlinnak Vawlei Ralpi IInak lioah Ramkomh Bu cu ruahlopi in a rak rawk. Ral a dih hnuah “khika hmun ah khan” UN cu chiah a si. Mi nih Ramkomh Bu bantukin UN zong kha Pathian Pennak nih a hmuh dingmi upatnak kha an pek. Asinain UN nih biaknak kha a doh lai.

• Baibal caang (hna) 1 Thes. 5:3; Biat. 17:16

  Chimchungbia Vawlei hruaitu hna nih “a dai dih ko i a him dih ko” tiah an thanh lai i “ki pahra” le “sahrang” nih “hlawhhlangnu” kha an doh lai i an hrawh lai. Mah hnuah vawlei hruaitu hna cu hrawh an si lai.

  A tlinnak Vawlei hruaitu hna nih daihnak le himnak um dingin kan tuah khawh tiah an ti lai. Cun vawlei hruaitu hna nih a hmaan lomi biaknak hrawh awkah UN kha an bawmh lai. Mah cu harnak nganpi hram thawknak i hmelchunhnak a si lai. Jesuh nih Armageddon ah a tang rihmi Satan vawlei a hrawh tikah harnak nganpi cu a dong lai.

• Baibal caang (hna) Ezek. 38:11, 14-17; Matt. 24:31

  Chimchungbia Gog nih Pathian miphun kha a doh hna lai. Cun vancungmi hna nih Pathian i “a mithim hna” kha an pumh hna lai.

  A tlinnak Chaklei siangpahrang le a dang cozah hna nih Pathian miphun kha an doh hna lai. Mah dohnak aa thawk hnu tlawmpal ah a tang rihmi chiti thuhmi hna cu vancung ah pumh an si lai.

• Baibal caang (hna) Ezek. 38:18-23; Dan. 2:34, 35, 44, 45; Biat. 6:2; 16:14, 16; 17:14; 19:20

  Chimchungbia “Rang raang pakhat aa citmi” nih Gog le a ralkap pawl a hrawh hnanak thawngin ‘teinak’ kha tlamtling tein a hmuh lai. “Sahrang” cu “kat mei alh tili ah” thlak a si lai i milem nganpi cu hrawh a si lai.

  A tlinnak Pathian Pennak ah uktu a ṭuan dingmi Jesuh nih Pathian miphun kha a khamh hna lai. Jesuh, 144,000 le vancungmi hna nih Pathian miphun a dotu vawlei hruaitu pawl kha an hrawh hna lai. Cuti cun Satan vawlei cu a dong lai.