1. Vancung ah chawva khonnak kong he aa tlaiin Jesuh nih zeidah a chim?

LAKSAWNG dihlak cu mit in hmuh khawh a si lo. A sunglawi bikmi laksawng zong hmuh khawh a si lo. Tlangcung cawnpiaknak ah Jesuh nih vancung ah chawva khon cu tangka tampi ngeih nakin a ṭha deuh tiah a ti. Cun hitin a ti chap: “Nan chaw a umnak ah khan nan lung zong a um ve lai.” (Matt. 6:19-21) Thil pakhatkhat kha a sunglawi tukmi in kan hmuh ahcun mah kha ngeih khawh awkah kan i zuam lai. ‘Vancung ah chawva’ kan khon ahcun Pathian hmaiah minṭhatnak kan hmu lai asiloah amahlei ah kan ṭang kho lai. Jesuh nih cu bantuk laksawng cu zeitikhmanh ah hrawh khawh asiloah fir khawh a si lo tiah a ti.

2. (a) Paul nih 2 Korin 4:17, 18 ningin zei thil cungah dah lungthin pek dingin a kan forh? (b) Hi capar ah zei kong dah kan i ruah hna lai?

² Lamkaltu Paul nih hitin a kan forh: “Kan i zohchihmi cu . . . hmuh khawh lomi thil khi an si.” (2 Korin 4:17, 18 rel.) Mah hmuh khawh lomi laksawng ah Pathian vawlei thar ah kan hmuh dingmi thil ṭha vialte aa tel. Atu ah mit in hmuh khawh lomi laksawng pali in ṭhathnemhnak kan hmu kho timi kong kha hi capar ah kan i ruah hna lai. Mah laksawng hna cu Pathian he hawikom sinak, thlacam khawhnak, Pathian thiang thlarau bawmhnak le phungchim rianṭuannak ah Jehovah, Jesuh le vancungmi hna sinin kan hmuhmi bawmhnak hna an si. Cun hmuh khawh lomi laksawng kan sunsak kha zeitindah kan langhter khawh timi kong zong kan i ruah hna lai.

3. Mit in hmuh khawh lomi, a sunglawi bikmi laksawng cu zeidah a si, mah cu zeitindah a si khawh?

³ Jehovah Pathian he hawikom sinak cu mit in hmuh khawh lomi, a sunglawi bikmi laksawng a si. (Salm 25:14) Pathian cu a tling lomi minung he hawikom a si buin zeitindah a thiang bikmi a si khawh peng? “Vawlei sualnak a kalpitu” Jesuh tlanhnak man thawngin cutin a tuah khawhmi a si. (Johan 1:29) Jehovah nih Jesuh cu a thih tiang zumhfek tein a um lai ti a hngalh caah mipawl kha a khamh hna. Cucaah Khrih a thih hlanah a rak nungmi mi pawl he Pathian cu hawikom a rak si kho.—Rom 3:25.

4. Pathian hawi a hung simi hlanlio zumhfekmi pa cheukhat kong kha tahchunhnak pe.

⁴ Pathian hawikom a hung simi hlanlio zumhfekmi pa cheukhat kong kha i ruah hna u sih. Abraham cu a zumhnak a fek tukmi a si. A thih hnu kum 1000 leng tiang Jehovah nih Abraham kha “ka hawi” tiah a rak auh. (Isa. 41:8) Mah cu Jehovah nih a hawile pawl kha an thih tik hmanhah a nungmi in a hmuh rih hna tinak a si. Cucaah Abraham cu Jehovah hmuhnak ah a nung rih. (Luka 20:37, 38) A dang pakhat cu Job a si. Jehovah nih a hmaiah vancungmi pawl an i pumh tikah Job kong kha uangthlar ngaiin a rak chim. Jehovah nih Job kha “soisel awk um lo, miding, Pathian a ṭih i ṭhatlonak a mertakmi” tiah a auh. (Job 1:6-8) Pathian a bia lomi hna sinah kum 80 hrawng zumhfek tein a rian a ṭuanmi Daniel kong he aa tlaiin tah Jehovah nih zeitindah a ruah? Vancungmi nih voithum tiang Pathian ‘dawtmi’ na si tiah kum upa Daniel kha a rak chimh. (Dan. 9:23; 10:11, 19) Cucaah Jehovah nih a thi cangmi, a dawtmi a hawile cu thawhter ṭhan a duh hna ti kha kan zumh khawh.—Job 14:15.

5. Jehovah he hawikom si awkah zeidah a herh?

⁵ Tuchan ah mitlinglo a simi minung zeizat dah Jehovah he hawikom an si? Nuai tampi an si. Vawleicung pumpi ah a ummi pa, nu, ngakchia tampi nih Pathian hawikom taktak si an duh kha an tuahsernak in an langhter. Jehovah hawile pawl cu “miding mi” an si. (Ptb. 3:32) Mah hawikomhnak cu Jesuh tlanhnak man an zumh caah a si. Tlanhnak man ruangah Jehovah he hawikom kan si kho, cun a sinah kan pum kan i pe kho i tipil zong kan ing kho. Mah a biapimi kehlan hna kan hlannak thawngin van le vawlei ah a lianngan bikmi, Pathian he hawikom a simi aa pumpe i tipil a ingmi Khrihfa nuai tampi hna lakah kan i tel kho.

6. Pathian he hawikom sinak kan sunsak kha zeitindah kan langhter khawh?

⁶ Pathian he hawikom sinak kan sunsak kha zeitindah kan langhter khawh? Kum zakhat leng Pathian cungah zumhfek tein a um pengmi Abraham le Job bantukin hi chan ṭhalo ah Jehovah rian kan ṭuannak cu zei can a si hmanhah zumhfek tein kan um awk a si. Daniel bantukin kan nunnnak nakin Pathian he kan i hawikomhnak kha kan sunsak deuh awk a si. (Dan. 6:7, 10, 16, 22) Jehovah bawmhnak thawngin kan tonmi harnak vialte kha kan inkhawh lai i a zungzal in a hawikom kan si kho lai.—Fil. 4:13.

7. (a) Phungthlukbia 15:8 ningin Jehovah nih kan thlacamnak kha zeitindah a ruah? (b) Jehovah nih kan thlacam kha zeitindah a kan leh?

⁷ A dang mit in hmuh khawh lomi laksawng pakhat cu thlacamnak a si. Aa kom tukmi hawikom hna cu pakhat le pakhat an ruahnak le an intuarnak hna kha an i chim. Jehovah he kan i hawikomhnak tah cutin a si ve maw? A si. Jehovah nih Baibal hmangin bia a kan ruah, cun a ruahnak le a intuarnak zong kha a  kan chimh. Thlacamnak in a sinah bia kan chim khawh i kan ruahnak le kan intuarnak zong kha kan chimh khawh. Jehovah nih kan thlacamnak kha lunglawm tein a kan ngaihpiak. (Phungthlukbia 15:8 rel.) Jehovah cu dawtnak a ngeimi hawikom a si caah kan thlacamnak kha ngaihpiak lawng si loin a leh zong a kan leh. A caan ah kan thlacamnak cu khulrang in leh kan si men lai nain a caan ahcun mah kong he aa tlaiin thla kan cam peng rih men lai. Asinain kan thlacamnak kha aa tlakmi caan le a ṭha bikmi lam in a kan leh lai ti kha kan zumh khawh. Kan i ruahchan lomi lam in Pathian nih kan thlacamnak a kan leh lai ti cu a fiang ko. Tahchunhnak ah, kan tonmi harnak lakpiak canah “inkhawhnak” kan ngeih nakhnga fimnak le ṭhawnnak a kan pek men lai.—1 Kor. 10:13.

8. Thlacamnak laksawng kan sunsak kha zeitindah kan langhter khawh?

⁸ A man a sung tukmi thlacamnak laksawng kan sunsak kha zeitindah kan langhter khawh? Lamkhat cu “a zungzal in thlacam u” timi Jehovah nawlpeknak kan zulhnak thawngin a si. (1 Thes. 5:17) Jehovah nih thlacam dingin a kan hnek lo. Mah canah kan zalonnak kha a upat i “thlacam zungzal” dingin a kan forh. (Rom 12:12) Cucaah thlacamnak kan sunsak kha nifatin thla kan cam lengmangnak thawngin kan langhter khawh. Thla kan cam tikah Jehovah thangṭhat le a cung kan i lawmhnak biachim kha kan philh awk a si lo.—Salm 145:2, 3.

9. Thlacamnak he aa tlaiin unaupa pakhat nih zeitindah a ruah, nangtah zeitindah na ruah?

⁹ Jehovah rian caan saupi kan ṭuanmi le thla kan cammi Pathian nih a kan leh ning nih thla kan cammi ningin a cang lai ti kha a kan zumhter chinchin. Tahchunhnak ah, kum 47 chung caantling rian a ṭuanmi unaupa Chris kong hi ruathmanh. Hitin a ti: “Zingka tein thawh kha ka duh, zeicahtiah Jehovah sinah thla ka cam khawh caah a si. Ni a chuahka le zeizong vialte aa dawh tuk caan ah Jehovah sinah biachim cu zeitlukin dah hrimhnak petu a si. Mah nih thlacamnak laksawng i telin a kan pekmi laksawng dihlak cungah i lawmh dingin a ka forh.  Cun ka ih lai i thla ka cam tikah a thiangmi chiaṭha thleidannak lungthin he ka it kho.”

10. Pathian thiang thlarau kha zeicah kan sunsak awk a si?

¹⁰ Pathian thiang thlarau cu mit in hmuh khawh lomi, kan sunsak dingmi a dang laksawng pakhat a si. Cucaah Jesuh nih thiang thlarau hmuh awkah thlacam zungzal dingin a kan forh. (Luka 11:9, 13) Jehovah nih a thiang thlarau thawngin “thil ti khawhnak ṭhawnnak” hmanh kha a kan pek. (2 Kor. 4:7; Lam. 1:8) Pathian thiang thlarau bawmhnak thawngin kan tonmi zei bantuk harnak hmanh kha kan inkhawh.

11. Thiang thlarau nih zeiti lam in dah a kan bawmh khawh?

¹¹ Thiang thlarau nih pek kan simi Pathian rian kha ṭuan awkah a kan bawmh khawh i kan ngeih ciami sining pawl ṭhanchoter awk zongah a kan bawmh khawh. Pathian rian kan ṭuannak ah hlawhtlinnak kan hmuhmi cu Pathian thiang thlarau nih a kan bawmh caah a si ti kha kan hngalh.

12. Salm 139:23, 24 ningin thiang thlarau bawmhnak hmuh awkah zei tuah dingin dah thla kan cam awk a si?

¹² Pathian thiang thlarau kan sunsak kan langhter khawhnak a dang lamkhat cu a ṭha lomi ruahnak asiloah duhnak lungthin kan ngeihmi kha hngalh awkah Jehovah sinah bawmhnak kan halnak thawngin a si. (Salm 139:23, 24 rel.) Cutin thla kan cam ahcun Jehovah nih a thiang thlarau hmangin a ṭha lomi ruahnak asiloah a ṭha lomi duhnak kan ngeihmi kha a kan hngalhter lai. A ṭha lomi duhnak le ruahnak kan ngei ti kan hun hngalh ahcun mah kha hloh awkah thazaang kan pe tiah Pathian thiang thlarau sinah bawmhnak kan hal awk a si. Cu tin kan tuah ahcun zei thil ruang hmanhah a thiang thlarau bawmhnak i donhter kan duh lo kha Jehovah nih a hmuh lai.—Efe. 4:30.

13. Thiang thlarau cungah kan i lawmh chinchin nakhnga zeitindah kan tuah khawh?

¹³ Atu kan chan ah thiang thlarau nih a tuahmi kong kha kan ruah ahcun thiang thlarau cungah kan i lawm chinchin lai. Jesuh nih van a kai hlanah a zultu pawl kha hitin a ti  hna: “Thiang Thlarau nan cung i a tlun tikah cun, ṭhawnnak in nan khat lai i . . . vawleicung khuazakip ah ka tehte nan si lai.” (Lam. 1:8) Mah bia hna hi atu kan chan ah khuaruahhar lam in a tling cang. Thiang thlarau bawmhnak thawngin vawleicung pumpi ah minung nuai riat le a cheu leng cu Jehovah a biami an hung si. Cun Pathian thiang thlarau nih dawtnak, lawmhnak, daihnak, lungsaunak, zaangfahnak, ṭhatnak, zumh awk tlakmi sinak, toidornak le mahle mah i tei khawhnak ti bantuk a ṭha tukmi sining hna kha ngeih chin awkah a kan bawmh ca zongah Pathian miphun in lungrual tein kan um kho. Mah sining hna cu “thlarau nih a chuahtermi” an si. (Gal. 5:22, 23) Thiang thlarau cu a man a sung tukmi laksawng a si.

14. Phungchim rian kan ṭuan tikah mit in hmuh khawh lomi zei bawmhnak dah kan hmuh?

¹⁴ Kannih cu Jehovah, Jesuh le vancungmi hna he ‘rian a ṭuanṭimi’ kan si, mah cu a sunglawi tukmi laksawng a si. (2 Kor. 6:1) Phungchim rianṭuannak ah kan i tel fatinte anmah he rian kan ṭuanṭimi a si. Paul nih amah le phungchim rianṭuannak ah aa telmi hna kha “Pathian ca i hmunkhat ah rian a ṭuanṭimi kan si” tiah a ti. (1 Kor. 3:9) Phungchim rianṭuannak ah kan i tel tikah Jesuh rianṭuanṭi hawi zong kan si. A zultu pawl kha “miphun vialte kha ka zultu ah va ser hna u” tiah nawl a pek hna hnuah Jesuh nih ‘nan sinah ka um lai’ tiah a ti hna. (Matt. 28:19, 20) Vancungmi kong he aa tlaiin tah zeitin? Vancungmi hna nih “vawleicung mi vialte . . . sin i . . . zungzal thawngṭha” chim khawh awkah lam a kan hruai caah kan i lawm tuk.—Biat. 14:6.

15. Jehovah cu phungchim rian kan ṭuannak ah a biapimi hmun in aa tel ti kha zei tahchunhnak nih dah a langhter?

¹⁵ Jehovah, Jesuh le vancungmi hna bawmhnak thawngin zeidah kan liim khawh? Pennak thlaici kan tuh tikah mi cheukhat nih an cohlan i an ṭhangcho. (Matt. 13:18, 23) Biatak thlaici kha ahote nih dah an ṭhanter i a thei an tlaiter? Jesuh nih “ka Pa nih . . . a hnuh hna dah ti lo” ahcun ahohmanh ka zultu an si kho lo tiah a ti. (Johan 6:44) Baibal nih cuset khaset tiin mah tahchunhnak kong kha a chim. Paul nih Filipi khua leng i nu phu pakhat sin phung a chim lioah a cangmi kong hi zohmanh hna u sih. Anmah lak i Lidia timi nu kong he aa tlaiin Baibal nih hitin a ti: “Paul nih a chimmi bia ngaih awk caah khan Pathian nih a lungthin kha a hunpiak.” (Lam. 16:13-15) Lidia bantukmi Jehovah nih a dang mi nuai tampi zong kha a sinah a hnuh hna.

16. Phungchim rianṭuannak ah hlawhtlinnak kan hmuh tikah ahodah kan thangṭhatnak awk a si?

¹⁶ Phungchim rianṭuannak ah hlawhtlinnak kan hmuh ahcun ahodah kan thangṭhat awk a si? Paul nih mah biahalnak kha Korin khrihfabu sin ca a kuat lioah hitin a leh hna: “Kei nih a ci ka tuh, Apollo nih a kung kha ti a toih, sihmanhsehlaw a ṭhantertu cu Pathian a si. A ci a tuhtu le a toihtu thamtham cu biapi a si ṭung lo. Pathian kha pei biapi cu a si cu, zeicahtiah amah nih khan pei a ṭhanter cu.” (1 Kor. 3:6, 7) Paul bantukin phungchim rianṭuannak ah zeibantuk a ṭhami a phichuak kan hmuh hmanhah Jehovah kha kan thangṭhat awk a si.

17. Pathian, Khrih le vancungmi hna he ‘rianṭuanṭinak’ tinvo sung kan sunsak kha zeitindah kan langhter khawh?

¹⁷ Pathian, Khrih le vancungmi hna he ‘rianṭuanṭinak’ tinvo sung kan sunsak kha zeitindah kan langhter khawh? Midang sinah kan si khawh chungin thawngṭha kan chimnak thawngin a si. Cutin kan tuah khawhnak  lam tampi a um. Mah lakah ‘zapi lakah siseh, an inn cio ah siseh’ tehte khaannak zong aa tel. (Lam. 20:20) Mi tampi nih tonsakphak phungchim kha an duh. Mising pawl he an i ton tikah panh tein an chawnhbiak hna i bia an ruah hmasa hna. Ṭha tein an lehrulh hna ahcun fimkhur tein Pennak kong thawngṭha kha an chimh hna.

18-19. (a) Biatak thlaici kha zeitindah ti kan toih khawh? (b) Jehovah nih Baibal a cawngmi pakhat a bawmh ning kha fianter.

¹⁸ ‘Pathian rianṭuanṭi hawi’ kan si caah a ci tuh lawng si loin ti zong kan toih a hau. Lungthawhnak a ngeimi hna he kan si khawh chungin biaruah ṭhan kha kan duh asiloah anmah he Baibal cawnpiaknak thawk khawh awkah mi pakhatkhat he pehtlaihnak tuah dingin kan timhtuah khawh. Jehovah bawmhnak thawngin Baibal kan cawnpiakmi nih an ruahnak le an intuarnak an thlenmi kan hmuh tikah kan i lawm.

¹⁹ Thlanglei Africa ah a ummi khuachia thiamnak a ngeimi Raphalalani kong hi ruathmanh. Baibal in a cawnmi kong kha a sunsak. Asinain thi tlawn a thiammi hna kong he aa tlaiin Baibal chimmi kha cohlan awkah aa harh tuk. (Deut. 18:10-12) A ruahnak kha duhsah tein thlen awkah Pathian kha nawl a awnh. A donghnak ah a pawcawmnak a simi mah khuachia thiamnak rian kha a rak ngol. Atu ah kum 60 a si cangmi Raphalalani nih hitin a ti: “Jehovah Tehte Hna nih rian ka hmuh khawh nakhnga lam tampi in an ka bawmh caah kaa lawm tuk. A bik in ka nunnak ka thlen khawh nakhnga a ka bawmh caah Jehovah cungah kaa lawm tuk. Cucaah atu ahcun tipil a ing cangmi Jehovah Tehte pakhat in phungchimnak ah kaa tel kho cang.”

20. Zei tuah awkah dah bia na khiah awk a si?

²⁰ Hi capar ah mit in hmuh khawh lomi laksawng pali kong kan i ruah cang hna. Mah lakah a biapi bikmi cu Jehovah he Hawikom sinak tinvo sung kan hmuhmi hi a si. Jehovah he hawikom kan hun si tikah a sinah thla kan cam kho, thiang thlarau bawmhnak kan hmu kho i Jehovah, Jesuh le vancungmi hna he rian kan ṭuanṭi kho. Mit in hmuh khawh lomi laksawng cungah i lawmh chinchin dingin bia kan khiah a hau. Cun Jehovah he a ṭha tukmi hawikom sinak cung zongah i lawmh zungzal kan duh.