PAUL chan lioah khualtlawngmi hna caah tiin a dang tein timhpiakmi tilawng a um lo. Tilawng in khualtlawn awkah khualtlawngtu hna nih an kal duhnak leiah a kalmi, thil a phormi tilawng nih mi phorh a duh maw, duh lo ti kha an hal hmasa hna a hau. (Lam. 21:2, 3) Tilawng cu a kal duhnak hmun leiah a phanh lo hmanhah tilawng dinhnak hmun a phak tikah a kal duhnak hmun he aa naihnak ah a kal dingmi tilawng dang ah aa ṭhial kho.—Lam. 27:1-6.

Rili cung i khualtlawn cu kumkhat chungah ri an khiahmi caan lawngah tlawn khawh a si. Tilawng in khualtlawn awkah cuset, khaset tiin caan khiahmi a um lo. Khua caan a ṭhat lo ruang lawngah si loin hmelchunhnak a ṭhat lo ahcun khualtlawnnak kha a tlai kho. Tahchunhnak ah, tilawng puanzar cungah langak aa fuh i a awnh tik asiloah rilikam ah tilawng a rawkmi an hmuh tik ti bantuk caan ah a si. Asinian a kal duhnak leiah thli a hran ahcun tilawng dinhnak hmun in an chuak kho. Khualtlawngtu nih amah a phor hngami tilawng a hmuh tikah tiva kam ah a thilri pawl he tilawng a chuak cang lai tiah an thanh hlan tiang a hngah.

“Rom khua cu tilawng in khualtlawn a duhmi hna caah a fawi bikmi hmun a si. Zeicahtiah tiva kam ah tilawng tampi a um caah mi nih anmah tein tilawng kha kawl a hau lo” tiah tuanbia ṭialtu Lionel Casson nih a ti. Cun hitin a ti chap: “Tilawng dinhnak hmun cu Tiber Tiva hram ah a um. Mah pawng i a ummi Ostia khua ah hmun kaupi a um i mah kha zung tampi nih a kulh. Mah zung hna cu tilawng ngeitu pawl zung a si: Narbonne tilawng ngeitu hna nih [tuchan ah France] pakhat, Carthage tilawng ngeitu hna nih [tuchan ah Tunisia] pakhat, . . . ti bantukin an ngei cio. Pakhatkhat nih khualtlawn a duh tikah a kal duhnak khua a phanmi tilawng kha zungah a va hlat a hau.”

Rili cung i khualtlawnnak cu khual a tlawngmi hna caah a caan tampi a dih lo nain an nunnak caah ṭih a nung. Cucaah Paul cu missionary in khual a tlawn lioah voi tampi tilawng rawhnak a tong.—2 Kor. 11:25.