1-2. Jesuh cu zeicah a lungre a theih?

 MINUNG pakhat in a nunnak a donghnak ni ah Jesuh cu a lungre a thei. A rauhhlan ah mi ṭhalo hna nih an hrem lai i an thah lai. Asinain a lungre a theihmi cu a rauhhlan ah a thih lai ca lawngah a si lo, a Pa kha a dawt tuk i a lunglawmhter a duh ca zongah a si. A ton hngami a fakmi hneksaknak hna kha zumhfek tein a inkhawh ahcun Jehovah min a thian nakhnga ka bawmhmi a si lai ti kha a hngalh. Jesuh nih mi pawl zong kha a dawt hna. A thih tiang Jehovah cungah zumhfek tein a um lawngah zungzal nunnak ruahchanhnak kan ngei kho lai ti kha a hngalh.

² Jesuh cu a lungre a thei tuk ko nain daihnak a ngei. Lamkaltu pawl kha “keimah daihnak cu kaan pek hna” tiah a ti hna. (Johan 14:27) Jesuh cu mi pakhat nih Jehovah he a sunglawi tukmi pehtlaihnak thawngin ngeihmi, lungdaihnak a simi “Pathian daihnak” kha a ngei. Mah daihnak nih Jesuh kha lungretheih lo awkah a bawmh.—Fil. 4:6, 7.

3. Hi capar ah zei kong dah kan i ruah hna lai?

³ Jesuh nih a tonmi hneksaknak phun cu kan tong lai lo. Asinain Jesuh hnu a zultu paoh cu hneksaknak an tong lai. (Matt. 16:24, 25; Johan 15:20) Jesuh bantukin a caan ah kan lungre a thei ko lai. Lungretheih tuk lo awk le lungdaihnak tlauter lo awkah zeidah kan tuah khawh? Jesuh nih vawleicung phung a chim chung ah a tuahmi thil pathum kong le hneksaknak kan ton tikah Jesuh kha zeitindah kan i zohchunh khawh timi kong kan i ruah hna lai.

4. 1 Thesalon 5:17 ruah buin Jesuh nih vawleicung a nunnak a donghnak ni ah atu le atu thla a cam ti a langhtermi tahchunhnak cheukhat pe.

⁴ 1 Thesalon 5:17 rel. Jesuh cu vawleicung a nunnak a  donghnak ni ah atu le atu thla a cam. A zultu pawl kha a thih philhlonak tuah ning a hmuhsak hna. Cun mitsur zu le changreu a pek hna hlanah thla a cam. (1 Kor. 11:23-25) Lanhtak Puai tuahnak hmun in an chuah hlanah a zultu pawl he thla an cam. (Johan 17:1-26) Mah zan ah a zultu pawl he Olive Tlang ah an kai i atu le atu thla a cam. (Matt. 26:36-39, 42, 44) A thih hlanah hmanung bik a chimmi bia cu thlacamnak a si. (Luka 23:46) Jesuh nih a nunnak a donghnak ni ah a cangmi thil vialte kong he aa tlaiin Jehovah sinah thla a cam.

5. Lamkaltu pawl cu zeicah an ralṭhatnak a zor?

⁵ Jesuh nih hneksaknak a inkhawhnak a ruang pakhat cu a Pa sinah atu le atu thla a cam i inkhawhnak ngeih awkah bawmhnak a hal caah a si. Asinain lamkaltu pawl cu mah zan ah teima tein thla an cam lo. A phichuak cu hneksaknak an ton tikah an ralṭhatnak cu a zor. (Matt. 26:40, 41, 43, 45, 56) Hneksaknak kan ton tikah Jesuh nunning kha kan i zohchunh i ‘a zungzal in thla kan cam’ lawngah zumhfek tein kan um kho lai. Zei caah dah thla kan cam khawh?

6. Daihnak ngeih peng awkah zumhnak nih zeitindah a kan bawmh lai?

⁶ Jehovah sinah “kan zumhnak hi nganter deuh” tiah thla kan cam khawh. (Luka 17:5; Johan 14:1) Satan nih Jesuh hnu a zulmi paoh a kan hneksak lai caah zumhnak ngeih kan herh. (Luka 22:31) Zuamcawhnak pakhat hnu pakhat kan ton hmanhah daihnak ngeih peng awkah zumhnak nih zeitindah a kan bawmh lai? A harmi hneksaknak hna tei khawh awkah kan tuah khawhmi paoh kan tuah tikah Jehovah nih a kan bawmh lai timi zumhnak nih lungretheih lo awkah a kan  bawmh. Zeicahtiah aa tlakmi caan ah a ṭha bik in a kan tawnghthampiak lai ti kha kan hngalh. Jehovah nih thil sining tawnghtham awkah zeidah tuah awk a si ti kha kanmah nakin a hngalh deuh ti kan zumh caah lungdaihnak kan ngei.—1 Pet. 5:6, 7.

7. Robert nih a chimmi in zeidah na cawn khawh?

⁷ Thlacamnak nih zei bantuk hneksaknak kan ton hmanhah lungdaihnak ngeih peng awkah a kan bawmh. Atu ah kum 80 leng a si cangmi, zumhfekmi Khrihfa upa Robert kong hi ruathmanh. Hitin a ti: “Filipi 4:6, 7 i ruahnak cheuhnak nih hneksaknak tampi ka tonmi kha tawnghtham khawh awkah a ka bawmh. Tangka lei chambaunak ka ngei. Khrihfa upa rian kha chikkhat chung cu ka rak ṭuan kho lo.” Robert cu lungdaihnak ngeih peng awkah zeinihdah a bawmh? “Ka lungre a hun theihle cangka in thla ka cam” tiah a ti. “Atu le atu thla ka cam deuhdeuh tikah lungdaihnak ka ngei deuhdeuh tiah ka zumh.”

8. Johan 8:29 ah a langhter bantukin Jesuh nih lungdaihnak a ngeihnak a dang a ruang cu zeidah a si?

⁸ Johan 8:29 rel. Jesuh cu hremnak a tong ko nain a Pa lung a lawmhtermi thil ka tuah ti kha a hngalh caah lungdaihnak a ngei. Cutin tuah awk a har caan hmanhah nawl a ngai peng. A Pa kha a dawt i a nunnak ah Jehovah rianṭuannak kha biapi bik ah a chiah. Vawleicung a rat hlanah Jesuh cu Pathian caah “rian thiam ngaimi” a si. (Ptb. 8:30) Vawleicung a um lioah midang sinah a Pa kong kha lungtho tein a chim. (Matt. 6:9; Johan 5:17) Mah rian  nih Jesuh kha lunglawmhnak nganpi a pek.—Johan 4:34-36.

9. Phungchim rian ah tam deuh kan i tel tikah zeicah lungdaihnak kan ngeih?

⁹ Jehovah nawl kan ngaihnak thawngin le ‘Bawipa rian teimak tein kan ṭuannak’ thawngin Jesuh kha kan i zohchunh khawh. (1 Kor. 15:58) Phungchim rian ah kan “caan kha a dihlak in” kan hman tikah kan tonmi buaibainak kha a ṭhatnaklei in kan hmuh khawh deuh lai. (Lam. 18:5) Tahchunhnak ah, phungchimnak ah kan tonmi hna cu kanmah nakin buaibainak tam deuh a ngeimi an si men lai. Asinain Jehovah dawt awkah an cawn i ruahnak cheuhnak an zulh tikah an nunning cu a ṭha deuh i an hun i nuam. Cu bantuk thil sining kan hmuh tikah Jehovah nih a kan zohkhenh lai ti kha kan zumh chinchin. Mah zumhnak nih lungdaihnak ngeih peng awkah a kan bawmh. A nunnak ah lungdonghnak le man ka ngei lo timi ruahnak a ngeimi unaunu pakhat nih mah cu a hmaan ti kha a hun hngalh. Hitin a ti: “Phungchim rian ah tam deuh kaa tel tikah ka intuarnak kha ka uk khawh deuh i kaa nuam deuh. Phungchim rian ah kaa tel caah Jehovah he kan i naih deuh tiah ka ruah.”

10. Brenda nih a chimmi in zeidah na cawn khawh?

¹⁰ Brenda timi unaunu kong zong hi ruathmanh. A fanu he, amah he a zual tukmi zawtnak an ngei. Brenda cu lam a kal kho lo i a thazaang a der caah kekual bunhmi ṭhutdan kha a hman. A caan ah innkhat hnu innkhat phungchim a kal, asinain tam deuh cu cakuat in phung a chim. Hitin a ti: “Hi donghnak caan ah ka zawtnak cu a dam lai lo ti kha ka hngalh i ka cohlan tikah phungchim rian ah ka lungthin dihlak ka pek khawh. A tak ti ahcun phung ka chim tikah ka lungretheihnak kong kha ka ruat lo. Mah canah kan Khrihfabu lohmun i innkhat hnu innkhat phungchimnak ah ka tonmi hna asiloah cakuat in phung ka chimhmi hna tu kha lungthin ka pek hna. Cun phung ka chim tikah hmailei ruahchannak kong kha ka ruah zungzal.”

11-13. (a) Lamkaltu pawl le a dang pawl nih Jesuh caah hawikom ṭha taktak an si kha zeitindah an langhter? (b) Jesuh hawile cu a cungah zeitindah huham an ngeih?

¹¹ Jesuh phungchim rian a ṭuan chung vialte zumhfekmi lamkaltu pawl nih a caah hawikom ṭha taktak an si kha an langhter. Annih cu mah Baibal ah a langhtermi hawikom phun an si: “Unau nakin a fek deuhmi hawikom zong an um ve.” (Ptb. 18:24) Jesuh nih cu bantuk hawikom pawl kha a sunsak tuk hna. Phungchim rian a ṭuan lioah a chuahṭi khat a naule hmanh nih an zum lo. (Johan 7:3-5) Mah lengah a rualchan pawl zong nih a hrut cang tiah an ti. (Mar. 3:21) Mah he i ralkah in Jesuh nih a thih lai zan ah zumhfekmi lamkaltu pawl kha hitin a ti hna: “Harnak ka in caan a dihlak in a ka umpitu cu nanmah nan si.”—Luka 22:28.

¹² A caan ah lamkaltu pawl nih a ngaih an chiatter ko nain an palhnak kha a zohpiak hna lo. Mah canah amah an zumhnak tu kha a zoh. (Matt. 26:40; Mar. 10:13, 14; Johan 6:66-69) A thih lai zan ah Jesuh nih mah zumhawktlakmi pa hna kha hitin a ti hna: “Ka Pa sinin ka theihmi vialte kha kaan chimh dih hna caah, ka hawile, ti tu ah kaan ti cang hna.” (Johan 15:15) Jesuh cu a hawile nih thazaang an pek ti cu lunghrinh awk a um lo. Phungchim rian a ṭuannak ah an bawmh caah Jesuh cu aa lawm tuk.—Luka 10:17, 21.

¹³ Lamkaltu hna lengah Jesuh nih a dang hawikom nu he, pa he a ngeih hna. Mah a hawile pawl nih phungchim rian le a dang zulh awk a tlakmi lam in an bawmh. Cheukhat nih cun an inn ah len an sawm i cheukhat hmun ahcun rawl ei an sawm. (Luka 10:38-42;  Johan 12:1, 2) Cheukhat cu amah he khual an tlawngṭi i an ngeihmi kha an hrawmh ve. (Luka 8:3) An caah hawikom ṭha a si caah Jesuh zong hawikom ṭha a ngei. An caah thilṭha a tuahpiak hna i an tuah khawh lo leng tiangin an sinin aa ruahchan lo. Jesuh cu mitling a si ko nain mitlinglo a simi a hawile nih an bawmhnak kha a sunsak. Mah nih lungdaihnak ngeih awkah a bawmh ti cu lunghrin awk a um lo.

14-15. Zeitindah hawikom ṭha kan i ser khawh, zeitindah an kan bawmh khawh?

¹⁴ Hawikom ṭha pawl nih Jehovah cungah zumhfek tein um awkah a kan bawmh. Hawikom ṭha ser awkah a ṭha bikmi lam cu kanmah theng hawikom ṭha kan sinak thawngin a si. (Matt. 7:12) Tahchunhnak ah, Baibal nih kan caan le kan thazaang kha midang bawmhnak ah hman dingin a kan forh. A hleiin “bawmhnak” a herhmi hna caah a si. (Efe. 4:28) Nan Khrihfabu ah na bawmh khawhmi pakhat kong kha na ruat kho maw? A kum upat ruang asiloah a dam lo ruangah leng ah a chuak kho lomi kha dawr ah na kalpiak kho hna lai maw? Tangkalei chambaunak a ngeimi chungkhar kha mehhang na cawkpiak kho hna lai maw? jw.org^® website le JW Library^® app hman ningcang na thiam ahcun Khrihfabu i unau pawl kha hman ningcang na chim kho hna lai maw? Midang bawmhnak kha biapi ah kan chiah ahcun kan i nuam deuh lai.—Lam. 20:35.

¹⁵ Kan hawile nih hneksaknak kan ton tikah an kan bawmh lai i mah nih lungdaihnak ngeih peng awkah a kan bawmh lai. Job nih hneksaknak a tonmi kong a chimh tikah Elihu nih a ngaihpiak bantukin kan intuarnak kong kan chimh hna tikah lungsau tein a kan ngaihpiaknak  thawngin kan hawile nih an kan bawmh. (Job 32:4) Kan hawile nih kan caah biakhiahnak an kan tuahpiak lai tiah kan i ruahchan awk a si lo. Asinain Baibal hrambunh in ruahnak a kan cheuhmi kha kan ngaih ahcun fim a si. (Ptb. 15:22) A hawile bawmhnak kha Siangpahrang David nih toidor tein a cohlan bantukin kan hawile nih kan herhmi bawmhnak an kan pek tikah i porhlawt loin kan cohlan awk a si. (2 Sam. 17:27-29) Cu bantuk hawikom ṭha pawl cu Jehovah sinin hmuhmi laksawng an si.—Jeim 1:17.

16. Filipi 4:6, 7 ningin daihnak ngeih khawhnak lam pakhat cu zeidah a si? Fianter.

¹⁶ Filipi 4:6, 7 rel. Jehovah nih “Khrih Jesuh” thawngin daihnak ngeih khawh a si tiah zeicah a kan ti? Jehovah tinhnak ah Jesuh a rian kha kan hngalhthiam i kan zumh lawngah lungdaihnak kan ngeih khawh lai caah a si. Tahchunhnak ah, Jesuh tlanhnak man thawngin kan sualnak vialte kha ngaihthiam kan si. (1 Johan 2:12) Mah kong kan ruah tikah lungdaihnak kan ngei. Pathian Pennak ah Siangpahrang in Jesuh nih Satan le a vawlei ruangah kan tonmi sifah harnak vialte kha a hrawh dih cang lai. (Isa. 65:17; 1 Johan 3:8; Biat. 21:3, 4) Mah nih a ṭha tukmi ruahchannak a kan ngeihter. Jesuh nih a kan pekmi rian cu a har ko nain hi vawlei caan donghnak tiang kan sinah a um lai i a kan bawmh lai. (Matt. 28:19, 20) Mah nih ralṭhatnak a kan ngeihter. Lungdaihnak, ruahchannak le ralṭhatnak cu daihnak ngeih awkah a biapi tukmi an si.

17. (a) Khrihfa pakhat nih zeitindah lungdaihnak a ngeih peng khawh? (b) Johan 16:33 ah bia a kan kamh bantukin zeidah kan tuah khawh lai?

¹⁷ A fakmi hneksaknak na ton tikah zeitindah lungdaihnak na ngeih peng khawh? Jesuh nih a tuahmi thil naa zohchunhnak thawngin a si. Pakhatnak, zei thil a can hmanhah thlacam zungzal. Pahnihnak, tuah awkah a harmi a si hmanhah Jehovah nawl kha ngai law lungtho tein phungchim. Pathumnak, hneksaknak na ton tikah na hawile bawmhnak kha cohlang. Mah tikah Pathian daihnak nih na lungthin le na ruahnak kha him tein a chiah lai. Cun Jesuh bantukin zei bantuk hneksaknak paoh kha na tei khawh lai.—Johan 16:33 rel.