Jesuh chuahnak le a thawklei a nunning kong Matthai ṭialmi le Luka ṭialmi aa dannak cu aa lo lomi mi pahnih i an ruahnak le an hmuhtonnak in ṭialmi a si caah a si.

Matthai nih Josef aa telnak kong kha a hleiin a ṭial. Mary fa a pawi ti a hngalh tikah Josef nih a lehrulhning, a mang ah vancungmi nih thil sining kong a chimhning le mah lamhruainak kha Josef nih a zulhning hna kha a langhter. (Matt. 1:19-25) Vancungmi nih Josef a mang ah an chungkhar ningin Izipt ram ah tlik dingin ralrin a pekmi hna le mah ningin an tuahnak kong kha a langhter. Cun Israel ram ah kir ṭhan dingin Josef a mang ah vancungmi nih a chimh ṭhannak kong le Nazareth khua ah an chungkhar ningin an kir ṭhannak kong zong a ṭial. (Matt. 2:13, 14, 19-23) Matthai Thawngṭha cauk a thawklei dal pahnih ah Matthai nih Josef min kha voiriat a langhter nain Mary min tu cu voili lawng a langhter.

Asinain Luka nih cun Mary kong kha a hleiin a ṭial. Mary sinah Gabriel a langhnak kong, a rualchan Elizabeth sin a va tlawnnak kong le Jehovah a thangṭhatnak kong hna kha a langhter. (Luka 1:26-56) Jesuh nih hmailei ah a ton hngami harsatnak kong Simeon nih Mary sinah a chimmi zong kha Luka nih a langhter. Cun Jesuh kum 12 a si lioah an chungkhar ningin biakinn ah an kalnak kong zong a langhter. Mah kong a ṭial tikah Josef chimmi bia kha si loin Mary chimmi bia tu kha a langhter, cun mah thil sining cu Mary caah sullam a ngei tuk ti zongin a ti. (Luka 2:19, 34, 35, 48, 51) Luka Thawngṭha cauk i a hmasalei dal pahnih ah Luka nih Mary min kha voi 12 a langhter i Josef min tu cu voi 3 lawng a langhter. Cucaah Matthai nih Josef kong kha tam deuh in a langhter i Luka nih Mary kong kha tam deuh in a langhter.

Jesuh chuahkehnak kong an ṭialmi kong aa dang. Matthai nih Josef chuahkehnak kha a langhter, cun Jesuh cu Josef cawmmi fa a si caah Jesuh cu phung ningin David hrinsor a si ti kha a fianter. Zeicah? Josef cu Siangpahrang David fapa, Solomon tefa pakhat a si. (Matt. 1:6, 16) Asinain Luka nih cun Mary chuahkehnak kha a langhter i Jesuh cu “minung lei in” David hrinsor a si ti kha a langhter. (Rom 1:3) Zeicah? Mary cu Siangpahrang David fapa, Nathan tefa a si. (Luka 3:31) Luka nih Mary kha Heli fanu in zeicah a langhter lo? Pa chungkhar lei lawng hi phung ningin a lutmi a si caah a si. Cucaah Luka nih Josef kha Heli fapa tiah a ti tikah Heli i a fanu va a si kha mi nih an hngalh ko.—Luka 3:23.

Matthai le Luka ṭialmi chuahkehnak cazin kan zohnak tikah Jesuh cu Biakammi Messiah a si ti kha fiang tein a lang. Jesuh cu Siangpahrang David tefa a si kha a fian tuk caah Farasi le Sadusi mi nih an rak al kho lo. Matthai le Luka ṭialmi Jesuh chuahkehnak cazin nih kan zumhnak kha a fehter chin i Pathian biakam vialte a tling hrimhrim lai ti kha a kan zumhter chin.