1, 2. (a) Mihring thar i hruk khawh a si ti cu zeitindah kan hngalh? (b) Kolose 3:10-14 ah mihring thar sinak ah aa telmi zei ziaza hna dah kan hmuh?

MITHAR timi biafang kha Vawlei Thar Lehnak Baibal ah voihnih kan hmuh. (Efe. 4:24; Kol. 3:10) Mah cu “Pathian he aa loin sermi” ziaza kha a chim duhmi a si. Kan caah mihring thar i hruk cu a si kho hnga maw? A si kho ko. Jehovah nih minung kha amah he i loin a kan ser caah a ngeihmi ziaza hna kha kan i zohchunh khawh.—Gen. 1:26, 27; Efe. 5:1.

² Mitlinglo kan si caah a ṭha lomi duhnak kan ngei ti cu a hmaan ko. Cun kan pawngkam thil zong nih a kan iap khawh. Asinain Jehovah bawmhnak thawngin siter a kan duhmi minung bantuk kan si kho. Cu bantuk minung si khawh awkah a kan bawmmi mihring thar sinak ah aa telmi ziaza cheukhat kha i ruah hna u sih. (Kolose 3:10- 14 rel.) Phungchimnak ah mah ziaza hna kha zeitindah kan langhter khawh ti zong kan i ruah hna lai

3. Mihring thar sinak ah aa telmi ziaza pakhat cu zeidah a si?

³ Paul nih duhdanh ngeihlonak cu mihring thar i hruknak ah a biapimi a si ti kha a langhter. Hitin a ti: “Jentail mi ti a um ti lo, Judah mi ti a umti lo, cuarpar tanmi ti a um ti lo, tan lomi ti a um ti lo, mihrut, Sitian mi, miluat, sal, ti a um ti lo.” * Khrihfabu chungah miphun, ram le sining ruangah midang nakin ka ṭha deuh timi ruahnak a um awk a si lo. Zeicah? Khrih zultu kan si caah kan dihlak in ‘pakhat kan si dih cang.’—Kol. 3:11; Gal. 3:28.

4. (a) Jehovah salle nih midang kha zeitindah an pehtlaih hna awk a si? (b) Zei bantuk thil sining nih dah Khrihfa lungrualnak kha a hrawh khawh?

⁴ Mihring thar aa hrukmi kan si ahcun zei bantuk miphun le hnulei sining a ngeimi an si hmanhah upatnak he kan pehtlaih hna lai. (Rom 2:11) Hmun cheukhat ah mah cu a hleiin a har kho men. Tahchunhnak ah, Thlanglei Africa ah cozah nih mi pawl cu anmahle an miphun ning cio in an umter hna. Jehovah Tehte Hna telin mi tampi cu cuka hmun hna ah an um rih ko. Cucaah 2013, October thla ah Uktu Bu nih ‘an lung kaupi in hunpiak’ awkah le pakhat le pakhat ṭha tein i theihhngalh awkah a bawmmi, a hleikhunmi timhtuahnak pakhat kha an tuahpiak hna.—2 Kor. 6:13.

5, 6. (a) Ram pakhat ah Pathian miphun pawl an lung aa rual chin nakhnga zei timhtuahnak dah an tuah? (A hramthawknak hmanthlak zoh.) (b) A phichuak cu zeidah a si?

⁵ Miphung le holh aa lo lomi Khrihfabu pahnih kha zarhte, zarhpi ah caan hmanṭi dingin an timhtuahpiak hna. Unau pawl cu phungchim an kalṭi, an i pumṭi i inn ah an i lengkai hna. Mah timhtuahnak ah Khrihfabu tampi an i tel. An hmuhmi hmuhtonnak ṭha hna kha zung ṭengnge ah ca an ṭial i Jehovah Tehte a si lomi hmanh nih an ṭial. Tahchunhnak ah, biaknaklei hruaitu pakhat nih hitin a ti: “Keimah cu Jehovah Tehte ka si lo, asinain nannih cu phungchim rian kha ṭha tein nan dirh i nan za tein nan lung aa rual.” Mah timhtuahnak he aa tlaiin unau pawl nih zei ṭhatnak dah an hmuh?

⁶ A hmasa ahcun Xhosa holh a hmangmi unaunu Noma nih an inn a chiat caah Mirang holh a hmangmi Khrihfabu i unau pawl kha len a sawm ngam hna lo. Asinain mirang unau pawl he phungchim an kalṭi i cun an inn ah a leng hna hnu cun a ning a zak ti lo. Hitin a chim: “Anmah zong kanmah bantuk an si ve  ko.” Mirang holh a hmangmi Khrihfabu i unau pawl cu Xhosa holh a hmangmi Khrihfabu i an rat tikah Noma nih an lak i cheukhat kha an inn ah rawl ei a sawm hna. Mah lakah mirang Khrihfa upa pakhat zong aa tel ve, anih cu plastic ṭhutdan niamte ah a ṭhutmi kha a hmuh tikah Noma cu a khuaruah a har tuk. Mah program thawngin unau tampi cu hawikom thar tampi an hun ngei i cutin i hawikomh zungzal awkah bia an khiah.

7. Zaangfahnak kha a zungzal in zeicah kan langhter awk a si?

⁷ Satan vawlei a dongh hlan tiang Jehovah miphun cu harnak an tong ko lai. Rian ngeihlonak, a zual tukmi zawtnak, hremnak, leiser ral le a dang harnak hna kan tong i dinlonak ruangah kan ngeihmi thil zong kan sung. Harnak ton caan ah pakhat le pakhat kan i bawmh khawh nakhnga zaangfahnak taktak kan ngeih a hau. Zaangfahnak nih midang kha dawtnak he pehtlaih awkah a kan forh lai. (Efe. 4:32) Mah ziaza hna cu mihring thar i hruknak ah aa telmi an si. Mah nih Pathian i zohchunh awk le midang hnemh awkah a kan bawmh lai.—2 Kor. 1:3, 4.

8. Khrihfabu ah zaangfahnak kan langhter tikah zei ṭhatnak dah a chuak? Tahchunhnak pe.

⁸ Khrihfabu chungah a ummi ramdang mi le a sining a ṭha lomi hna cungah zeitindah zaangfahnak kan langhter khawh? Anmah he i hawikomh in Khrihfabu ah a biapimi an si ti kha kan hngalhter hna awk a si. (1 Kor. 12:22, 25) Tahchunhnak ah, Dannykarl cu Philippines in Japan ah aa ṭhial. Ramdang mi a si caah a rian ṭuanṭihawi pawl nih ṭha tein an pehtlai lo. A hnuah Jehovah Tehte Hna sinah aa pum i hitin a chim: “Aa pummi tam deuh cu Japan mi an si ko nain an hawikom hlun bantukin ṭha tein an ka conglawmh.” Zaangfahnak a ngeimi unaupa pawl nih Jehovah he an i naih chin nakhnga an bawmh. A hnuah tipil a ing i atu ah cun Khrihfa upa a si cang. Khrihfa upa a ṭuanṭimi unau pawl nih Dannykarl le a nupi Jennifer cu Khrihfabu caah thluachuah an si tiah an ti. Hitin an ti: “Hmaikal ṭuan awkah nunning sawhsawh in an nung i Pathian Pennak kha hmasa bik ah an chiah caah zohchunh awk ṭha an si.”—Luka 12:31.

9, 10. Phungchimnak ah zaangfahnak langhternak in hmuhmi thluahchuah pawl kha tahchunhnak pe.

⁹ Pennak kong thawngṭha kan chim tikah “mi cungah ṭhatnak tuah” khawhnak caanṭha kan hmu. (Gal. 6:10) Jehovah Tehte tampi cu a rak i ṭhialmi ramdang mi cungah zaangfahnak an ngei i an holh an cawng. (1 Kor. 9:23) Mah nih ṭhatnak tampi a chuahter. Tahchunhnak ah, Australia ram ah a ummi hmaikal unaunu Tiffany nih Brisbane khua i Swahili holh a hmangmi Khrihfabu kha bawmh a duh hna caah an holh a cawng. An holh cawn cu a har ko nain a nunnak cu sullam a hun ngei deuh. Tiffany nih hitin a ti: “Phungchimnak ah nuamhnak hmuh na duh ahcun ramdang holh a hmangmi Khrihfabu ah i ṭhial. Mah cu na khua kaltak loin khualtlawn he aa lo. Vawleicung  pumpi i unau pawl khuaruahhar in an lung aa rualmi kha na hmuh lai.”

¹⁰ Japan ram i chungkhar pakhat zong nih cutin an tuah. An fanu Sakiko nih hitin a chim: “A rak i ṭhialmi Brazil mi kha phungchimnak ah kan ton lengmang hna. Biathlam 21:3, 4 le Salm 37:10, 11, 29 kha Portugul holh in ṭialmi Baibal in kan relpiak hna tikah ṭha tein an ngaih i a caan ahcun an mitthli hmanh a tla.” Mah chungkhar cu a rak i ṭhialmi ramdang mi cungah zaangfahnak an ngei i biatak hngalh awkah bawmh an duh hna. Cucaah an chungkhar ningin Portugul holh an cawng. A hnuah Portugul holh a hmangmi Khrihfabu kha an bawmh hna. Kum tampi chung a rak i ṭhialmi ramdang mi tampi kha Jehovah sal si awkah an bawmh hna. Sakiko nih hitin a ti: “Portugul holh cawn awkah fakpi in kan i zuam, asinain kan i zuamnak nakin kan hmuhmi thluachuah cu a ngan deuh tuk. Jehovah cungah kan i lawm tuk.”—Lamkaltu 10:34, 35 rel.

11, 12. (a) Mihring thar i hruknak ah a hmaanmi lungput zeicah kan ngeih a herh? (b) Toidor tein um awkah zeinihdah a kan bawmh lai?

¹¹ Mihring thar kan i hrukmi cu midang sinin thangṭhatnak hmuh duh ah si loin Jehovah thangṭhat kan duh caah a si awk a si. A tlingmi vancungmi pakhat hmanh a hun i porhlaw i sualnak a tuahmi kha i cinken. (Ezekiel 28:17 he tahchunh.) Kannih cu mitlinglo kan si caah porhlawtnak ngeih lo awkah i zuam cu a har khun ko lai. Asinain toidornak kha kan i hruk khawh ko. Zeinihdah a kan bawmh lai?

¹² Toidornak ngeih awkah nifate in Baibal rel le ṭha tein ruah a hau. (Deut. 17:18-20) A hleiin Jesuh cawnpiaknak le toidornak a rak langhtermi kha kan ruah a hau. (Matt. 20:28) Jesuh cu aa toidor tuk caah lamkaltu pawl an ke kha a rak ṭawlpiak hna. (Johan 13:12-17) Cun thiang thlarau hmuh awkah Jehovah sinah thla kan cam a hau. Thiang thlarau nih midang nakin kan ṭha deuh timi lungput kha doh khawh awkah a kan bawmh lai.—Gal. 6:3, 4; Fil. 2:3.

13. Toidornak nih zei ṭhatnak dah a chuahter?

 ¹³ Phungthlukbia 22:4 rel. Jehovah nih toidor tein umter a kan duh. Toidornak nih ṭhatnak tampi a chuahter. Kan i toidor ahcun Khrihfabu ah daihnak le lungrualnak a karh chin lai. Cun Jehovah nih a vel zong a kan pek lai. Lamkaltu Peter nih hitin a ti: “Nan dihlak in toidornak puan kha i aih u law pakhat le pakhat i bawm u, zeicahtiah Cathiang nih, ‘Pathian nih mi lungpuam cu a doh hna i mi toidor mi cu a vel kha a pek hna’ a ti.”—1 Pet. 5:5.

14. Nemnak le lungsaunak ah zohchunh awk ṭha bik cu ahodah a si?

¹⁴ Tuchan vawlei ah nemnak le lungsaunak a langhtermi cu santlai lomi in an hmuh hna. Asinain mah cu a hmaan lo. Mah ziaza hna cu van le vawlei ah a ṭhawng bikmi Jehovah sinin a rami an si. Jehovah cu nemnak le lungsaunak ah zohchunh awk ṭha bik a si. (2 Pet. 3:9) Tahchunhnak ah, Abraham le Lot kha vancungmi hmangin an bia a rak leh hna lioah Jehovah cu zeitluk in dah a lung a sau ti kha ruathmanh. (Gen. 18:22-33; 19:18-21) Cun nawl a ngai lomi Israel mi hna cungah kum 1,500 leng Jehovah nih lungsaunak a rak langhter.—Ezek. 33:11.

15. Nemnak le lungsaunak langhternak ah Jesuh nih zei zohchunh awk ṭha dah a chiah?

¹⁵ Jesuh cu mi “nunnem” a si. (Matt. 11:29) Derthawmnak a ngeimi a zultu pawl cungah a lung a sau. Vawleicung i phungchim rian a ṭuan lioah ralchanhtu pawl nih a ding loin sual an rak puh. Asinain a ding loin thihnak a in tiang nemnak le lungsaunak kha a rak langhter. Vailam cungah fahnak a in lio hmanhah a thattu pawl kha ngaihthiam awkah a Pa sinah thla a campiak hna. Hitin a ti: “An tuahmi kha zei a si ti awk an hngal lo.” (Luka 23:34) Lungretheihnak le fahnak a in lio hmanhah Jesuh nih nemnak le lungsaunak a langhter zungzal.—1 Peter 2:21-23 rel.

16. Nemnak le lungsaunak kha zeitindah kan langhter khawh?

¹⁶ Paul nih nemnak le lungsaunnak langhter khawh ning kha hitin a ṭial: “Pakhat le pakhat lungsilonak nan i ngeih tikah pakhat le pakhat i ngaithiam u law i bawm u. Bawipa nih aan ngaihthiam hna bantukin pakhat le pakhat nan i ngaithiam lai.” (Kol. 3:13) Midang ngaihthiam awkah nemnak le lungsaunak ngeih a hau. Mah nih Khrihfabu ah lungrualnak a karhter.

17. Nemnak le lungsaunak ngeih cu zeicah a biapit?

¹⁷ Jehovah nih nemnak le lungsaunak i hruk awkah a kan fial. Vawlei thar ah um kan duh ahcun mah ziaza hna hi kan ngeih hrimhrim a hau. (Matt. 5:5; Jeim 1:21) Nemnak le lungsaunak kan langhter tikah Jehovah thang kan ṭhatter i midang zong cutin tuah ve awkah kan bawmh hna.—Gal. 6:1; 2 Tim. 2:24, 25.

18. Dawtnak le duhdanh ngeih lo cu zeitindah aa pehtlaih?

¹⁸ Kan i ruahmi ziaza vialte cu dawtnak he aa pehtlaimi an si. Tahchunhnak ah, unau pawl nih a rum deuhmi kha a si a fakmi nakin ṭha deuh in an pehtlaih hna caah zultu Jeim nih a chimhhrinh hna. Cu bantuk tuahsernak cu “na minung hawi kha nangmah naa dawt bantukin na dawt hna lai” timi Pathian nawlbia he aa ralkah tiah a ti hna. Cun hitin a ti chap: “Mi cu a lenglei i an langhning lawngin na ti hna ahcun na sual cang.” Dawtnak nih fimcawnnak, miphun le sining ruangah duhdanhnak ngeih lo awkah a kan bawmh. Dundanhnak kan ngeih lo kha lenglang lawngin si loin lungthin tak in kan langhter a hau.

19. Dawtnak i hruk cu zeicah a biapit?

¹⁹ Dawtnak cu ‘thlachiat a ruat i zaangfahnak a ngei’ cun “a lung a puam lo i aa porhlaw lo.” (1 Kor. 13:4) Thawngṭha kan chim tikah lungsaunak, zaangfahnak le toidornak kan ngeih a hau. (Matt. 28:19) Mah ziaza hna nih Khrihfabu chung i unau vialte he i rem awkah a fawiter deuh. Dawtnak kan langhter tikah Khrihfabu ah lungrualnak a um lai i Jehovah thang kan ṭhatter lai. Kan lung aa rualmi kha midang nih an hmuh tikah biataklei ah a hnuh hna lai. Baibal nih mihring thar kong he aa tlaiin hitin a donghtermi cu aa tlakmi a si: “Hi thil vialte cungah hin dawtnak kha chap u law dawtnak cu zeizong vialte, i rem ṭhipṭhep tein a funtomtu a si.”—Kol. 3:14.

20. (a) Zei biahalnak dah kan i hal awk a si? Zeicah? (b) Zei bantuk hmailei dah kan i ruahchan?

²⁰ ‘Mihlun i phoih awkah zei tuah dah ka herh rih?’ tiah kanmahle kanmah kan i hal awk a si. Bawmhnak hmuh awkah Jehovah sinah thla kan cam zungzal awk a si. ‘Pathian Pennak’ kan hmuh khawh nakhnga a ṭhalomi ruahnak le tuahsernak hna kha tei awkah fakpi in kan i zuam a hau. (Gal. 5:19-21) ‘Ka lungthin kha sertharmi si awkah thlennak ka tuah zungzal maw?’ ti zongin kan i hal awk a si. (Efe. 4:23, 24) Mitlinglo kan si caah mihring thar i hruk awkah fakpi in kan i zuam zungzal a hau. Mikip nih mihring thar tling tein kan i hruk khawh tikah zeitluk in dah a nuamh lai khi na mitthlam ah cuanter hmanh.