1, 2. Nulepa cheukhat cu an fale nih Jehovah sinah i pumpek in tipil in an duh tikah zeicah an lungre a theih khawh men?

BAIBAL a cawngmi tampi cu Jehovah sinah an i pumpe i tipil an ing. An lak i tampi cu biatak ah a ṭhangmi le a ṭha bikmi lam aa thimmi mino an si. (Salm 1:1-3) Nang cu Khrihfa nulepa na si ahcun na fa tipil a in lai ni kha naa ngaih tuk ko lai.—3 Johan 4 he tahchunh.

² Asinain na lungretheihnak a um rih men ko lai. Mino cheukhat cu tipil an in hnuah Pathian phunglam ningin nun cu a ṭha bikmi a si taktak maw tiah an lung a hrinmi kha na hmuh men lai. Cheukhat nih cun biatak hmanh an kaltak men lai. Cucaah na fa nih Jehovah a hun biak hnuah aa thlen lai asiloah biatak a duhnak a tlau lai kha na thin a phang men lai. Na fa cu kumzabu pakhatnak i Efesa Khrihfabu hna bantuk a hung si kho. Jesuh nih hitin a ti hna:  “Hmasa i na rak ka dawt bantuk khan na ka daw ti lo.” (Biat. 2:4) Na fa nih Pathian a dawt zungzal nakhnga le khamhnaklei ah a ṭhan nakhnga zeitindah na bawmh khawh? (1 Pet. 2:2) Timote sinin kan cawn khawh.

3. (a) Timote cu zeitindah Khrihfa pakhat a hung si i a hngalhmi kong kha zeitindah a lehrulh? (b) Paul nih Timote kha zei a kong pathum cawn dingin dah a forh?

³ Lamkaltu Paul cu AD 47 ah Listra khua ah a voikhatnak a rak tlawng. Mah lioah kumhrafai a simi Timote nih Jesuh kong a rak theihmi a si men lai. A hngalhmi kha a nunnak ah a hman i kumhnih a rauh hnuah Paul he khual an tlawngṭi. Kum 16 hrawng a rauh hnuah Paul nih Timote sinah hitin a ṭial: “Nang cu biatak kaan cawnpiakmi ah khan dir law fek tein zum peng ko. Nangmah cawnpiaktu saya cu ahodah kan si kha na kan hngalh i na ngakchiat lio tein Cathiang [Hebru Cathiang], kha a hngalmi na si; na hngalh bangin Cathiang nih cun Khrih Jesuh zumhnak thawngin hmuhmi khamhnak i aan kalpi khotu fimnak kha aan pek.” (2 Tim. 3:14, 15) Paul nih Timote kha (1) cathiang hngalh awk, (2) a cawnmi kha fek tein zumh awk le (3) Khrih Jesuh zumhnak thawngin hmuhmi khamhnak i a kalpitu fimnak ngeih awkah a forhmi bia kha i cinken.

4. Fale cawnpiaknak ah zei hna dah nan hman? (A hramthawknak hmanthlak zoh.)

⁴ Khrihfa nulepa a simi nih nan fale kha Hebru Baibal le Khrihfa Greek Baibal a simi cathiang kha hngalhter nan duh ko hna lai. A ngakchia tukmi an si hmanhah Baibal ah a ummi minung le thil sining kong hna kha an hngalh khawh. Nulepa nih fale bawmhnak caah hman khawhmi video, brochure le cauk tampi kha Jehovah bupi nih a kan timhpiak. Nan holh in chuahmi zei hna dah a um? Jehovah he pehtlaihnak ṭha an ngeih nakhnga Baibal i a hrampi hngalhnak an ngeih a hau.

5. (a) ‘Fek tein zumh’ timi cu zei sullam dah a si? (b) Timote nih Jesuh kong thawngṭha fek tein a zumh ti kha zeitindah kan hngalh khawh?

⁵ Baibal chungah a ummi minung le thil sining kong hna cawnpiak lawngin a za lo. Timote zong nih ‘fek tein a zumhmi’ kha i cinken. Paul nih a hmanmi mah Greek biafang cu “thil pakhatkhat a hmaan ti zumh le i fian” timi sullam a ngei. Timote nih a “ngakchiat lio tein” Hebru Baibal kha a rak hngalh. A hnuah Jesuh cu Messiah a si ti kha a hun zumh. Timote cu a zumhnak a hun ṭhawng tuk i tipil a ing. Cun missionary pakhat in Paul he rian an ṭuanṭi.

6. Nan fale nih Baibal in an hngalhmi kha an zumh nakhnga zeitindah nan bawmh khawh hna?

⁶ Timote bantukin nan fale nih ‘fek tein  an zumh’ nakhnga zeitindah nan bawmh khawh hna? Pakhatnak, na lung sau. A fekmi zumhnak ngeih awkah a caan pek a hau. Nanmah nih nan zumh ruangah nan fale zong nih an zumh ve lai tinak a si lo. Fale pakhat cio nih Baibal an zumhnak a feh nakhnga “chia le ṭha thleidan khawhnak” an ngeih a hau. (Hebru 5:12 rel.) Nulepa nih nan fale an zumhnak a feh nakhnga nan bawmh khawh hna, a hleiin biahalnak an tuah tikah nan bawmh khawh hna. Tahchunhnak pakhat hi zohhmanh u sih.

7, 8. (a) Pa pakhat nih a fanu a cawnpiak tikah zeitindah lungsaunak a langhter? (b) Na fale cungah zeitik ah dah lungsaunak na ngeih a herh?

⁷ Kum 12 fanu a ngeimi Thomas nih hitin a chim: “‘Vawleicung i thilnung pawl karhnak caah Jehovah nih thlennawnnak a hmang maw?’ asiloah ‘Thil sining ṭhatternak caah phu pakhatkhat, tahchunhnak ah, thimnak ti bantuk ah zeicah kan i tel lo?’ tiah ka fanu nih a ka hal tawn. A caan ahcun zeidah zumh ding ti kha chimh sawhsawh lo awkah kaa zuam tawn. Mi pakhat i a zumhnak cu a kong nganpi pakhat thawngin si loin langhtertu thil hmetete tampi thawngin a si.”

⁸ Thomas nih a fanu ṭha tein cawnpiak khawh awkah lungsau a hau ti zong a hngalh. A tak ti ahcun Khrihfa dihlak nih lungsaunak ngeih a hau. (Kol. 3:12) Thomas nih a fanu a zumhnak a feh khawh nakhnga bawmh awkah a caan pek le bia tampi in ruah a hau ti kha a hngalh. Baibal in a hngalhmi kong hna kha i ruahceihṭi a hau ti zong a hngalh. Thomas nih hitin a ti: “A hleiin a biapimi kong hna ah kan fanu nih a hngalhmi kong hna hi a zum taktak maw, a hngalthiam taktak maw ti kha ka nupi he hngalh kan duh. Biahalnak a kan tuah ahcun a ṭhami a si. A tak ti ahcun ka fanu nih thil pakhat kha biahalnak tuah loin a cohlan lai ti ka phang.”

9. Na fale nih Baibal an zumhnak fehter awkah zeitindah na bawmh khawh hna?

⁹ Nulepa nih lungsau tein an fale an cawnpiak hna tikah an fale nih zumhnak “a kauhning le a sauning le a sanning le a thuhning” kha an hun hngalhthiam lai. (Efe. 3:18) An kum le hngalhthiamnak an ngeihning he aa tlakin kan cawnpiak khawh hna. An hngalhmi kong hna an hun zumh tikah an sianginn kaiṭi hawi pawl telin midang sinah an zumhnak kilven an i fawih lai. (1 Pet. 3:15) Tahchunhnak ah, kan thih tikah zeidah kan ton lai timi kong kha na fale nih Baibal in an fianter kho maw? Baibal fianternak kha an hngalthiam maw? * Na fale nih Baibal an zumhnak a feh nakhnga bawmh awkah na lung  a sau a hau, asinain mah cu a phu tuk.—Deut. 6:6, 7.

10. Fale cawnpiaknak ah a biapi tukmi lam pakhat cu zeidah a si?

¹⁰ Na tuahsernak cu na fale an zumhnak fehternak ah a biapi tukmi a si. Fanu pathum a ngeimi Stephanie nih hitin a chim: “Ka fale kha an ngakchiat lio tein ‘Jehovah cu a um i a dawtnak le a phunglam hna cu an ding ti ka zumhnak a ruang kha ka chim hna maw? Jehovah ka dawt taktakmi kha ka fale nih fiang tein an hmu kho maw? tiah keimahle keimah kaa hal tawn. Keimah nih ka zumh lomi kha ka fale nih an zumh lai tiah kaa ruahchan kho lo.”

11, 12. Fimnak timi cu zeidah a si, mah cu mi pakhat i a kum cungah aa hngat lo ti kha zeitindah kan hngalh khawh?

¹¹ Kan cawn cang bantukin Timote nih (1) cathiang kha a hngalh i (2) a cawnmi kong kha a fek tein a zumh. Asinain Paul nih Timote kha cathiang nih “khamhnak ah aan kalpi khotu fimnak” an ngeihter khawh tiah a timi cu zei sullam dah a si?

¹² Insight on the Scriptures, Uk 2nak ah Baibal nih fimnak ah “buaibainak hna tawnghtham khawh awk, hrial khawh awk, hmuitinh phanh khawh awk le midang ruahnak cheuh khawh awkah hngalhnak le hngalhthiamnak hna hman khawhnak aa tel. Mah cu hruhnak he aa ralkahmi a si” tiah a fianter. “Ngakchia nih hin hruhnak thil . . . hi an tuah tawn phung a si” tiah Baibal nih a ti. (Ptb. 22:15) Hruhnak he aa ralkahmi fimnak cu puitlingmi sinak a langhtertu pakhat a si. Mi pakhat cu a kum a hun upat ruang men ah si loin Jehovah a ṭih i a nawl a ngaih caah thlaraulei patling a hung si.—Salm 111:10 rel.

13. Mino pawl nih khamhnak a kalpi khotu fimnak an ngeih kha zeitindah an langhter khawh?

¹³ Thlaraulei nutling, patling a simi mino pawl cu an duhnak asiloah ṭhirual hneknak ruangah “tilet le thlichia bantuk a simi nih a kenkip ah a choihmi” an si lo. (Efe. 4:14) Mah canah “chia le ṭha thleidan khawhnak” kha hmangin a ṭha le ṭha lo hngalh awkah an i zuam. (Heb. 5:14) Cucaah an nu le an pa asiloah a dang upa pawl nih an hmuh hna lo hmanhah a ṭhami biakhiahnak an tuah. (Fil. 2:12) Cu bantuk fimnak cu khamhnak caah a herhmi a si. (Phungthlukbia 24:14 rel.) Nan fale nih cu bantuk fimnak an ngeih nakhnga zeitindah nan bawmh khawh hna? Nan sunsakmi thil kha nan hngalhter hna a hau. Nan biachim le nan tuahsernak in Baibal phunglam ningin nun nan zuammi kha an hmuh awk a si.—Rom 2:21-23.

14, 15. (a) Tipil in a duhmi mino pakhat nih zei kong dah a ruah awk a si? (b) Pathian nawlbia zulhnak in hmuhmi thluachuah kong ruah awkah nan fale kha zeitindah nan bawmh khawh hna?

¹⁴ Nan fale an zumhnak fehter awkah a ṭhami le a ṭhalomi kong chimhnak lawngin a za lo. Hi bantuk biahalnak hna hi  tuaktan awkah nan bawmh hna awk a si: ‘A ṭhami a lomi thil hna kha zeicah Baibal nih a thlauh? Baibal phunglam hna cu ka caah a zungzal in a ṭhami a si ti kha zeitindah ka zumh khawh?’—Isa. 48:17, 18.

¹⁵ Na fa nih tipil in a duh ahcun mah he aa tlaimi rian kong zong thukpi in ruah awkah na bawmh a hau. Mah rian kha zeitindah a hmuh? Zei ṭhatnak dah a hmuh lai? Zei thil hna dah a hlawt lai? Hlawtmi nakin ṭhatnak cu zeitindah a ngan deuh? (Mar. 10:29, 30) Mah kong hna kha tipil in hlanah ṭha tein ruah cu a biapi tuk. Nawlngaihnak in hmuhmi thluachuah le nawlngaih lo ruang i hmuhmi ṭhatlonak hna kha ṭha tein ruah awkah na fa kha bawm. Mah tikah Baibal phunglam zulh cu a caah a zungzal in a ṭhami a si ti kha cohlan awkah aa fawih deuh lai.—Deut. 30:19, 20.

16. Tipil a ing cangmi fale an zumhnak a hun der tikah nulepa nih zeidah an tuah awk a si?

¹⁶ Na fa cu tipil a in hnuah biatak he aa tlaiin a lung a hrin ahcun zeidah na tuah khawh? Tahchunhnak ah, na fa nih vawlei thil hna kha a hun duh men lai. Asiloah Baibal phunglam zulh cu nunnak ah a ṭha  bikmi a si timi kong he aa tlaiin a lung a hring men lai. (Salm 73:1-3, 12, 13) Mah tikah na lehrulhning cu Jehovah a bia zungzal lai maw, zungzal lai lo timi cungah huham a ngei kho. Na fa cu a ngakchia tukmi asiloah kumhrafai a si hmanhah mah ruangah bia i al lo dingin i zuam. Mah canah na dawtmi le bawmh na duhmi kha hngalhter.

17, 18. Mino pakhat nih lunghrinnak a hun ngeih ahcun nulepa nih zeitindah an bawmh khawh?

¹⁷ Tipil a ing cangmi mino pakhat cu Jehovah sinah aa pumpe cangmi a si. Mah cu zeidang vailte nakin Jehovah dawt awk le a rianṭuan awkah bia aa kammi a si. (Marka 12:30 rel.) Jehovah nih mah biakamnak kha a biapi tukmi in a hmuh i biakamnak a tuahtu zong nih a biapimi in a hmuh ve awk a si. (Pct. 5:4, 5) Mah kong kha aa tlakmi caan ah nem tein na fa na chimh khawh. Asinain Jehovah bupi nih a kan timhpiakmi a kong hna kha nulepa nih ṭha tein rel le hlathlainak tuah hmasa a hau. Jehovah sin i pumpeknak le tipil innak cu a biapi tuk, asinain mah nih thluachuah tampi a hmuhter lai.

¹⁸ Tahchunhnak ah, Mino Biahalnak—Hmualngeimi Lehnak, Uk 1nak, thleihhlei i “Nulepa Biahalnak” timi ah a ṭhami ruahnak cheuhnak hna na hmuh khawh. Mah ah kumhrafai a simi na fa nih biatak a hlawt tiah khulrang in ruat colh hlah, zei ruangah dah a si ti kha hngalh awkah i zuam tiah nulepa kha ruahnak a cheuh hna. Mah cu lilennak le ṭhirual pawl hneknak ruangah a si kho. Asiloah a dang mino pawl cu Jehovah rianṭuannak amah nakin an ṭhangcho deuh tiah a ruah caah a si kho men. “Mah a kong lam hna cu zumhnak i a hrampi he aa pehtlaimi a si lo. Na zumhnak ningin na fa nih zulh aa harhmi men lawng a si” tiah thleihhlei nih a fianter. Biatak he aa tlaiin lunghrinnak a ngeimi fale kha nulepa nih zeitindah bawmh khawh a si timi ruahnak cheuhnak tampi zong aa tel.

19. Nulepa hna nih fale kha ‘khamhnak i a kalpi khotu fimnak’ ngeih awkah zeitindah an bawmh khawh hna?

¹⁹ Nulepa nih fale kha “Khrihfa ziaza le cawnpiaknak he” ṭhanter awkah a biapi tukmi rian le tinvo an ngei. (Efe. 6:4) Kan cawn cang bantukin fale kha Baibal biatak cawnpiak lawng si loin an hngalhmi kha fek tein an zumh nakhnga bawmh an hau. An zumhnak a feh tikah Jehovah sinah i pumpek in lungthin dihlak in biak awkah a forh hna lai. Jehovah Bia, a thiang thlarau le naa zuamnak nih na fa cu ‘khamhnak i a kalpi khotu fimnak’ ngeih awkah bawm hram ko seh.