NA NUNNAK ah naa nuamh bikmi ni kha ruathmanh. Nupi na ṭhit, va na ngeih ni maw asiloah fa na ngeih hmasa bik ni dah? Asiloah tipil na in ni maw? Tipil na in ni cu na caah a biapi bik le naa nuamh bikmi ni a si men lai. Mah ni ah Pathian kha na lungthin, na ruahnak, na nunnak le na thazaang dihlak in na dawtnak na langhtermi kha unau pawl nih an hmuh tikah annih zong an i nuam tuk.—Mar. 12:30.

Tipil na in thawkin Jehovah na biaknak ah lawmhnak tampi na hmu ko lai. Asinain thawngthanhtu tampi cu hlanah an rak ngeihmi lawmhnak a tlau. Zeicah cutin a si? Lunglawm tein Jehovah biak zungzal awkah zei a ruang hna dah a um?

Pennak thawngṭha nih a kan lawmhter tuk. Zeicah? Pennak nih a rauhhlan ah hi vawlei ṭhalo hi a hrawh cang lai i vawlei thar a ser cang lai tiah Jehovah nih bia a kan kamh caah a si. Zefaniah 1:14 nih hitin a ti: “BAWIPA ni a liannganmi cu a nai cang, khulrang in a ra lio; cu ni tlukin khulrang in a tli khomi an um lo.” Asinain kan hngahnak a sau tuk cang tiah kan ruah ahcun hlanah kan rak ngeihmi lawmhnak a tlau kho. Mah nih Pathian rian kan ṭuannak ah kan lung a zorter khawh.—Ptb. 13:12.

Unau pawl he caan kan hmanṭi ahcun lunglawm tein Jehovah biak zungzal awkah thazaang kan ngei lai. Jehovah miphun i an ziaza ṭha ruangah a hmaanmi biaknak kha na duh i Pathian na hun biakmi a si kho men. (1 Pit. 2:12) Asinain unau pakhatkhat cu Pathian nawlbia a buar ruangah chimhhrinh a si ahcun zeidah a cang kho? Mah nih unau cheukhat kha an lung a donghter men hna lai i an i lawmhnak a tlauter men lai.

Thilri chawva duh tuknak zong nih kan i lawmhnak a tlauter khawh. Zeitin in dah? Satan vawlei nih kan herh taktak lomi thil hna kha a herhmi bantukin ruah awkah a kan hlen. Cucaah Jesuh i mah bia hi i cinken hna u sih: “Ahohmanh bawi pahnih sal nan si kho lai lo; pakhat kha nan dawt deuh lai i pakhat kha nan huat deuh lai; pakhat sinah khan cun zumhawktlak tein nan um lai i pakhat tu kha cu zei ah nan rel lai lo. Pathian le tangka cu an rian nan ṭuan kep kho lai lo.” (Matt. 6:24) Lunglawm tein Jehovah biak buin caankhat te ah hi vawlei in hmuh khawhmi thil vialte hmuh i zuam cu a si kho lo.

Jehovah a dawmi hna caah amah biak cu thilrit a si lo. (1 Johan 5:3) Jesuh bia hi i cinken: “Re a theimi le thil a ritmi vialte hna, ka sinah ra tuah u, dinhnak kha kaan pek hna lai. Ka seihnam kha i bei u, kei cu nunnem le toidornak lungthin a ngeimi ka si caah ka nawl hi i cawn ve u; cun dinhnak kha nan hmuh ko lai. Ka seihnam cu a bei a nuam  i ka thil cu a zaang.” (Matt. 11:28-30) Cucaah a hmaanmi Khrihfa sinak nih hrimhnak le lawmhnak a kan hmuhter. Lunglawm tein Jehovah biak awkah a ruang ṭha kan ngei taktak. Mah lak in pathum kha atu i ruah hna u sih.—Hab. 3:18.

Nunnak a kan Petu, aa nuammi Pathian kha kan biak. (Lam. 17:28; 1 Tim. 1:11) Kan nunnak cu a kan Sertu ta a si ti kan hngalh. Cucaah tipil kan innak zei can a si cang hmanhah lunglawm tein Pathian kan biak zungzal awk a si.

Kum 40 chung khualtlawng rianṭuantu a ṭuanmi unaupa Héctor kong hi ruathmanh. ‘A tar tik hmanhah’ lunglawm tein Jehovah a bia rih. (Salm 92:12-14) A nupi a dam lo ruangah Pathian rian ah an i tel kho tuk ti lo nain Héctor cu aa lawmhnak a tlau lo. Hitin a chim: “Ka nupi a zawtnak a zual thluahmahmi ka hmuh tikah ka ngaih a chia ko nain mah ruangah Pathian rianṭuannak i kaa lawmhnak tlau ding kha cu ka duh lo. Ka nunnak cu Jehovah ta a si ti hngalhnak cu lungthin dihlak in amah dawt awk le a rian ṭuan awkah aa tlakmi a ruang a si. Kaa lawmhnak a tlau nakhnga lo phungchim rian ah ka si khawh chungin i tel awk le Pennak ruahchannak kha a biapi bikmi in ruah awkah kaa zuam.”

Jehovah nih a nuammi nunnak kan ngeih nakhnga tlanhnak man a kan timhtuahpiak. “Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.” (Johan 3:16) Pathian pekmi tlanhnak man laksawng kan zumh kan langhter ahcun kan sualnak ngaihthiam kan si lai i zungzal nunnak kan hmu lai. Mah cu kan i lawmh awk a sinak a ruang ṭha bik a si. Tlanhnak man ca kan i lawmhnak nih lunglawm tein Jehovah biak awkah a kan forh lai.

Mexico ah a ummi unaupa Jesús nih hitin a ti: “Ka rian i sal bantuk ka si. Cutin ṭuan cu a herh hrimhrimmi a si lo nain tangka tam deuh hmuh awkah suimilam tampi le ni tampi chung aa peh in rian ka ṭuan. A hnuah Jehovah kong le minung caah a Fapa a kan peknak kong hna kha ka hun hngalh. Mah tikah Jehovah biak ka hun duh. Cucaah Jehovah sinah kaa pumpe i kum 28 chung ka ṭuannak company in chuah awkah bia ka khiak. Cun caantling in phungchim rian ka ṭuan.” Cuticun Jesús nih lunglawm tein Jehovah kha a hun biak.

A thiangmi ziaza nih a kan lawmhter. Jehovah kong na hngalh hlan i na nunning kha naa cinken ti maw? Lamkaltu Paul nih Rom khua i Khrihfa hna kha ‘sualnak sal nan rak si’ nain “dinnak sal” nan si cang tiah a ti hna. Annih cu a thiangmi  nunning in an nun cang caah zungzal nunnak an i ruahchan kho. (Rom 6:17-22) Kannih zong Jehovah phunglam ningin kan nun caah ziaza rawhralnak le zaangennak ruangah a chuakmi ngaihchiatnak in kan luat. Mah cu lunglawmh awk taktak a si.

Pathian a zum lo i tlennawnnak a zummi, boxing zong aa thawngmi Jaime kong hi ruathmanh. Jaime cu Khrihfa pumhnak ah a hun i pum i cuka ah a hmuhmi dawtnak nih a lung a suk tuk. A hmasa a nunning a hlawt khawh nakhnga le Jehovah a hun zumh khawh nakhnga ka bawm tiah Jehovah sinah thla a cam. Jaime nih hitin a chim: “Dawtnak le zaangfahnak a ngeimi Pathian a um ti kha duhsah duhsah in ka hun hngalh. Jehovah i a dingmi a phunglam ningin ka nun caah huhphenhnak ka hmu. Rak i thleng hlah ning law boxing ka thawnghṭi hawi hna bantukin ka thi ve cang hnga. Jehovah ka biak lio caan hi ka caah a nuam bikmi caan an si.”

Hi chan ṭhalo donghnak kan hngah lioah zeitindah kan um awk a si? Pathian duhnak kan tuah i zungzal nunnak kan hngak ti kha i cinken. “Cucaah ṭhatnak tuah kha baa hlah u sih; kan ngol lo ahcun a theitlai kan zun caan kha a phan ve ko lai.” (Gal. 6:8, 9) Jehovah bawmhnak thawngin “hremnak nganpi” in luat awkah a herhmi sining hna ngeih awk le lunglawm tein Jehovah biak zungzal awkah fakpi in i zuam hna u sih.—Biat. 7:9, 13, 14; Jeim 1:2-4.

Jehovah nih kan tuahmi rian le amah le a min ca kan langhtermi dawtnak kha a hngalh caah inkhawhnak laksawng a kan pek lai ti kan zumh khawh. Salm caṭialtu David nih hitin a ti: “BAWIPA ka sinah a um cu ka hngalh zungzal, amah cu keimah he naihte ah a um i zeihmanh nih an ka hnin kho lo. Cucaah lawmhnak le thanuamnak in ka khat i him tein ka um zungzal.” Kannih zong lunglawm tein Jehovah kan biak zungzal ahcun David bantukin kan chim khawh ve lai.—Salm 16:8, 9.