1. Tlanhnak man nih kan caah zei ṭhatnak dah a chuahter khawh?

JESUH Khrih tlanhnak man nih thluachuah tampi a kan hmuhter khawh. Tahchunhnak ah, tlanhnak man nih dinnak a duhmi Adam tefa vialte kha hmailei ah Pathian chungkhar ah i tel khawhnak caanṭha a hmuhter hna. Cun nuamhnak in a khatmi zungzal nunnak zong a kan hmuhter khawh. Tlanhnak man cu vancung ruahchannak a ngeimi kan si ah, vawleicung ruahchannak a ngeimi kan si ah, kan dihlak caah a biapi tuk.—Heb. 1:8, 9.

2. (a) Jesuh cawnpiakmi thlacamnak ah van le vawlei he aa tlaimi zei bantuk a biapi tukmi kong dah aa tel? (A hramthawknak hmanthlak zoh.) (b) Hi capar ah zei kong dah kan i ruah hna lai?

² Jesuh nih a thih hlan, kumhnih hrawngah a zultu hna kha hitin thlacam awkah a cawnpiak hna: “Vancung khua i a um kan Pa, Na min thiang cu upat si ko seh; Na Pennak cu rung tlung ko seh, Vancung khua ah na duhnak an tuah bangin Vawleicung ah hin tuah si ve ko seh.” (Matt. 6:9, 10) Tlanhnak man cu Jehovah min thianternak, Pathian Pennak uknak le Pathian duhnak tuahnak he zeitindah aa pehtlaih ti kha i ruah hna u sih.

3. Jehovah min nih zeidah a langhter? Satan nih Jehovah min kha zeitindah a rak thangchiat?

³ Pakhatnak ah, Jesuh nih Jehovah min thianter a si nakhnga caah thla a rak cam. Jehovah min nih Jehovah aho a si kha a langhter. Jehovah cu van le vawlei ah a ṭhawng bikmi le a ding bikmi a si. Jesuh nih “a Thiangmi ka Pa” ti zongin a auh. (Johan 17:11) Jehovah cu a thiangmi a si caah a tuahmi kip le a sermi nawlbia kip cu an thiang. Asinain minung caah phunglam sernak nawl a ngeihmi he aa tlaiin Satan nih Eden dum ah lunghrinnak a rak chuahter. Jehovah kong he aa tlaiin lihbia a chim i Pathian min thang a chiatter.—Gen. 3:1-5.

4. Pathian min a thian nakhnga Jesuh nih zeitindah a rak tuah?

⁴ Jesuh nih Jehovah min kha a sunsak tuk i Jehovah min a thian nakhnga a si khawh chungin aa zuam. (Johan 17:25, 26) Zeitin in dah? A tuahsernak le a cawnpiaknak in Jehovah phunglam cu a ding i a kan halmi vialte cu kanmah ṭhatnak caah a si ti kha mi nih an hngalh nakhnga a rak bawmh hna. (Salm 40:8-10 rel.) Satan nih thih tiangin harnak a tonter ko nain Jesuh cu zumhfek tein a um zungzal. A tlingmi minung pakhat nih Jehovah nawl tling tein ngaih khawh a si ko ti kha a langhter.

5. Jehovah min a thian nakhnga zeitindah kan tuah khawh?

⁵ Kannih tah Jehovah min kan sunsak kha zeitindah kan langhter khawh? Kan tuahsernak in kan langhter khawh. Jehovah nih thiang tein um awkah a kan hal. (1 Peter 1:15, 16 rel.) Mah cu amah lawng kha kan biak lai i kan lungthin dihlak in a nawl kan zulh lai tinak a si. Hremnak kan ton hmanhah Jehovah cawnpiaknak ningin nun awkah kan si khawh chungin kan i zuam. Jehovah phunglam ningin kan nunnak thawngin a min thang kan ṭhatter khawh. (Matt. 5:14-16) Jehovah nawlbia cu a ṭha i Satan cu lihbia a chimmi a si ti kha kan langhter. Asinain mitlinglo kan si caah palhnak kan tuah ko lai. Cutin kan tuah tikah kan i ngaichih i Jehovah min a chiattermi tuahsernak hna kha ngol awkah fakpi in kan i zuam.—Salm 79:9.

6. Mitlinglo kan si ko nain Jehovah nih zeicah a dingmi in a kan hmuh khawh?

⁶ Chiti thuhmi kan si ah, “tuu dang” kan si ah tlanhnak man kan zumh tikah Jehovah nih kan sualnak kha a kan ngaihthiam. Anmah tein a sinah aa pumpe i amah a biami hna kha a cohlan hna. Chiti thuhmi hna kha a dingmi a fale in le “tuu dang” kha a dingmi a hawile in a thanh hna. (Johan 10:16; Rom 5:1, 2; Jeim 2:21-25) Cucaah tlanhnak man nih atu hmanhah kan Pa he a ṭhami pehtlaihnak ngeih awk le a min thianter awkah a tuah khawh.

7. Tlanhnak man nih zei bantuk thluachuah hna dah a kan hmuhter khawh?

⁷ Bawipa thlacamnak ah Jesuh nih “na Pennak cu rung tlung ko seh” tiah a ti. Tlanhnak man cu Pathian Pennak he zeitindah aa pehtlaih? Pathian Pennak asiloah cozah cu Jesuh le minung lakin thimmi 144,000 in dirhmi a si. Tlanhnak man nih 144,000 kha vancung nunnak in a thawhter khawh hna. (Biat. 5:9, 10; 14:1) Annih nih siangpahrang le tlangbawi in kum thongkhat chung Jesuh he vawlei kha an uk lai. Mah caan chungah vawlei kha paradis i ser awk le minung vialte mitling si awkah Jehovah nih Pennak kha a hman lai. Vancung le vawleicung i Jehovah salle cu a donghnak ah  chungkhar pakhat an si lai. (Biat. 5:13; 20:6) Jesuh nih Satan kha a hrawh lai i Satan chuahtermi buaibainak vialte kha a hloh lai.—Gen. 3:15.

8. (a) Jesuh nih a zultu hna kha Pathian Pennak a biapitnak hngalhthiam awkah zeitindah a bawmh hna? (b) Tuchan ah Pennak kha zeitindah kan bawmh khawh?

⁸ Jesuh nih a zultu pawl kha Pathian Pennak a biapitnak hngalhthiam awkah a bawmh hna. Zeitin in dah? Tipil a in dihle cangka a kalnak hmun kip ah “Pathian Pennak kong Thawngṭha” kha a chim. (Luka 4:43) Cun a zultu hna kha “vawleicung khuazakip” ah thawngṭha chim dingin a fial hna. (Lam. 1:6-8) Tuchan ah Pennak kong chimnak rian thawngin mi nih tlanhnak man kong hngalhnak le Pathian Pennak uknak tangah a ummi sinak caanṭha an hmu. Vawleicung pumpi thawngṭha chimnak rian ah chiti thuhmi hna kan bawmh hnanak thawngin zumhfek tein Pennak tangah a ummi kan si kha kan langhter.—Matt. 24:14; 25:40.

9. Jehovah nih minung ca i aa tinhnak kha a tlinter lai tiah zeicah kan zumh khawh?

⁹ Jesuh nih ‘na duhnak tuah si ko seh’ tiah a ti tikah zeidah a chimduhmi a si? Jehovah nih thil pakhatkhat a um lai tiah a ti tikah mah thil cu a um hrimhrim lai. (Isa. 55:11) Satan ralchanhnak nih Jehovah kha a kham kho lai lo. Vawlei ca i Jehovah duhnak cu zeidah a si? Adam le Evi i a tlingmi tefa in vawlei hi khat dih hna seh ti a duh. (Gen. 1:28) Adam le Evi nih fa ngeih loin an thih ahcun an tefa in vawlei khat hna seh timi Pathian tinhnak cu pakpalawng a si lai. Cucaah Jehovah nih fa ngeihnak nawl a awnh hna. Tlanhnak man nih zumhnak a ngeimi vialte kha mitling sinak le zungzal nunnak caanṭha a hmuhter hna. Jehovah nih minung kha a kan dawt tuk i kan caah a timhmi a ṭha tukmi nunnak kha hmu hna seh ti a kan duh.

10. A thi cangmi hna nih tlanhnak man in zeitindah ṭhatnak an hmuh khawh?

¹⁰ Jehovah kong hngalhnak caanṭha a hmu bal lomi, mithi nuai tampi tah zeitin? Jehovah nih mi kha nunter a duh hna. Cucaah a thimi kha a nunter ṭhan hna lai. Tlanhnak man nih mithi pawl a nunter ṭhan khawh hna. Cun Jehovah kong cawnnak le zungzal nunnak caanṭha an hmu lai. (Lam. 24:15) Jehovah cu nunnak Hram a si. Jehovah nih a thimi pawl a nunter ṭhan hna tikah amah cu an Pa a hung si lai. (Salm 36:9) Bawipa thlacamnak ah Jesuh nih Jehovah kha “vancung khua i a um kan Pa” tiah a ti. (Matt. 6:9) Jehovah nih Jesuh kha a biapi tukmi mithi thawhternak rian a pek. Cucaah Jesuh nih “keimah hi thawhṭhannak le nunnak cu ka si” tiah a ti.—Johan 6:40, 44; 11:25.

11. “Mibu nganpi” ca i Pathian duhnak cu zeidah a si?

¹¹ Jesuh nih hitin a ti: “Pathian nih tuah hna seh tiah a duhmi thil a tuahmi paoh cu ka nau, ka far le ka nu an si.” (Mar. 3:35) Phun kip, ram kip, holh kip in a rami mi tampi cu amah a biami an si lai kha Pathian nih a duh. Annih cu “mibu nganpi, ahohmanh nih a rel in rel cawk lomi” in langhter an si. Annih nih tlanhnak man kha an zumh i Pathian bia an ngaih. Pathian kha an thangṭhat i hitin an ti: “Kan khamhnak cu bawiṭhutdan cungah a ṭhumi Pathian le Tuufa sinin a rami a si.”—Biat. 7:9, 10.

12. Jesuh thlacamnak in minung ca i Jehovah tinhnak he aa tlaiin zeidah kan hngalh khawh?

¹² Jesuh cawnpiakmi Bawipa thlacamnak in Jehovah kong le minung ca i aa tinhnak  kong kha tampi kan hngalh. Pakhatnak, Jehovah min thianter awk le amah thangṭhat awkah kan si khawh chungin kan tuah a hau. (Isa. 8:13) Jesuh tlanhnak man nih khamhnak a kan hmuhter khawh i Pathian min zong a ṭhatter khawh. A tak ti ahcun Jesuh min cu “Jehovah Cu Khamhtu A Si” timi sullam a ngei. Pahnihnak, tlanhnak man in nawl a ngaimi minung nih ṭhatnak an hmuh nakhnga Jehovah nih a Pennak kha a hman lai. Pathumnak, zeithil hmanh nih Jehovah duhnak tlin lo awkah a kham kho lo ti kha kan zumh.—Salm 135:6; Isa. 46:9, 10.

13. Zeicah tipil kan in?

¹³ Tlanhnak man cung kan i lawmhnak langhter khawhnak a biapimi lam pakhat cu Jehovah sin, i pumpeknak le tipil innak in a si. Cuticun tlanhnak kan zumh le “Bawipa ta kan si” kha kan langhter khawh. (Rom 14:8) Tipil kan inmi cu Jehovah sinah “chiaṭha thleidannak lungthin thiang” kan halmi a si. (1 Pet. 3:21) Tlanhnak man in ṭhatnak a kan hmuhternak thawngin Jehovah nih a kan leh. A biakam vialte a tlinter dih lai ti kha kan zumh khawh.—Rom 8:32.

14. Zeicah Jehovah nih midang dawt awkah nawlbia a kan pek?

¹⁴ Jehovah nih a tuahmi thil vialte cu a nganmi a dawtnak ruangah a si. Jehovah duhnak cu amah a biami hna nih rak ka zohchunh hna sehlaw pakhat le pakhat i daw hna seh ti kha a si. (1 Johan 4:8-11) Midang kan dawt hna tikah ‘vancung khua i a ummi kan Pa fale’ si kan duh kha kan langhtermi a si. (Matt. 5:43-48) A ngan bikmi nawlbia pahnih cu Jehovah dawt le midang dawt kha a si. (Matt. 22:37-40) Kan minunghawi kan dawt hnanak langhter khawhnak lamkhat cu Pathian Pennak kong thawngṭha cawnpiaknak thawngin a si. Midang, a hleiin unau pawl dawt ding timi Jehovah nawlbia kan zulh tikah Jehovah kan dawtnak cu “a tling” lai.—1 Johan 4:12, 20.

15. (a) Atu ah Jehovah sinin zei bantuk thluachuah dah kan hmuh? (b) Hmailei ah zei bantuk thluachuah dah kan hmuh lai?

¹⁵ Tlanhnak man kan zumh ruangah kan  sualnak cu “hnawhpiak” a si tiah Jehovah nih aamah a khaan. Jehovah nih kan sualnak kha tling tein a kan ngaihthiam khawh. (Lamkaltu 3:19-21 rel.) A hmasa ah kan i ruah cang bantukin tlanhnak man nih minung cheukhat kha vancung ah Jehovah fale a siter hna. Annih cu chiti thuhmi kha an si. (Rom 8:15-17) “Tuu dang” ah aa telmi hna zong vawleicung i a chungkharmi si awkah a sawm hna. Annih cu mitling an hung si tikah hmanung bik hneksaknak an tong lai. Jehovah cungah zumhfek tein an um ahcun Jehovah nih a fale in a cohlan ve hna lai. (Rom 8:20, 21; Biat. 20:7-9) Jehovah nih a fale vialte kha a dawt zungzal hna lai. Tlanhnak man nih a zungzal in thluachuah a hmuhter hna lai. (Heb. 9:12) Jehovah nih mah a sunglawi tukmi laksawng kha a kan pek i ahohmanh nih a kan chut kho lo.

16. Tlanhnak man nih luatnak hmuh awkah zeitindah a kan bawmh?

¹⁶ Kan sualnak kan i ngaihchih ahcun Satan nih Jehovah chungkhar ah kan i tel nakhnga lo zeihmanh a tuah kho lai lo. Jesuh cu “voikhat ah za lak in” a thi. Tlanhnak man kha zungzal ca in a pek. (Heb. 9:24-26) Adam nih thihnak a kan hmuhter ko nain Jesuh raithawinak nih zungzal nunnak a kan hmuhter lai. Tlanhnak man nih Satan vawlei in le thihnak ṭihnak in a kan luatter khawh.—Heb. 2:14, 15.

17. Jehovah dawtnak cu na caah zei sullam dah a ngeih?

¹⁷ Pathian biakam cu a tling zungzal lai. Jehovah sermi kokek phunglam hna aa thlen bal lo bantukin Jehovah zong zeitikhmanh ah aa thleng bal lai lo. Zeitikhmanh ah kan lung a donghter lai lo. (Mal. 3:6) Jehovah nih nunnak laksawng lawng a kan pekmi a si lo. A dawtnak zong a kan pek chih. “Kanmah hrimhrim nih Pathian nih a kan dawtnak cu kan hngalh i kan zumh. Pathian cu dawtnak a si.” (1 Johan 4:16) A biakam cu a tling zungzal. A rauhhlan ah vawlei cu aa dawh tukmi paradis ah a cang, cang lai. Mikip nih Jehovah kha an i zohchunh lai i pakhat le pakhat zong an i daw lai. Mah hnuah van le vawlei i a ummi a salle vialte nih hitin an chim lai: “Thangṭhatnak le sunparnak le fimnak le lunglawmhnak le upatnak le ṭhawnnak le thil ti khawhnak cu zungzal in zungzal tiang kan Pathian ta a si! Amen!”—Biat. 7:12.