Tahchunhnak ah, unaupa pakhat i a fapa cu amahle amah aa that tiah hei ti u sih. A pa cu a lung a kuai tuk ko lai. Jehovah nih hmailei kha a zoh chung i mah ngaihchiatnak hi amah le a nupi nih an inkhawh lai tiah bia a khiahmi maw a si hnga tiah a ruah. Hi chan ṭhalo ah mi tampi nih ngaihchiatnak kan tong ko lai. Kan nunnak ah kan tonmi thil vialte hi Jehovah nih rikhiahmi an si tiah kan ruah awk a si maw?

1 Korin 10:13 ah Paul nih a chimmi bia kha kan hlathlai tikah zeidah kan inkhawh lai i zei bantuk hneksaknak hna dah kan ton lai ti kha Jehovah nih a hngalhcia timi ruahnak cu Baibal he aa tlak lo ti kha kan hngalh. Zeicah cutin kan chim khawh? A ruang pali in zohhmanh hna u sih.

Pakhatnak, Jehovah nih zalong tein thimnak nawl a kan pek. Kanmah tein biakhiahnak tuah hna seh ti a kan duh. (Deut. 30:19, 20; Josh. 24:15) Jehovah duhning in biakhiahnak kan tuah ahcun Jehovah lamhruainak kha kan i ruahchan khawh. (Ptb. 16:9) Asinain a ṭhalomi biakhiahnak kan tuah ahcun mah ruangah a chuakmi ṭhatlonak kha kan in lai. (Gal. 6:7) Cucaah kan tonmi hneksaknak hna hi Jehovah nih a thimmi a si ahcun zalonnak taktak kan ngei tiah kan ti kho lai maw?

Pahnihnak, Jehovah nih ‘kan i ruahchan lomi thil sining’ hna in a kan huppheng lo. (Pct. 9:11, NW) Mi pakhat cu aa tlak lomi caan ah aa tlak lomi hmun i a um ruangah a fakmi accident a tong men lai. Jesuh nih innsang nih a nenh hna ruangah a thimi minung 18 kong kha a chim. Mah cu Pathian ruangah a si lo ti kha Jesuh nih a fianter. (Luka 13:1-5) Mah accident an ton hlanah Pathian nih ahodah a thi lai i ahodah a nung lai tiah biakhiahnak a tuah ti ruah cu aa tlak lomi a si.

Pathumnak, kan dihlak in Jehovah cungah zumhawktlak tein kan um zungzal a hau. Jehovah salle nih Jehovah an biakmi cu thluachuah a pekmi hna ruangah a si tiah Satan nih a ti. Harnak an ton ahcun Jehovah cungah zumhawktlak tein an um lai lo tiah a ti. (Job 1:9-11; 2:4; Biat. 12:10) Jehovah nih kan tonmi harnak cheukhat in a kan huhphenh ahcun Satan chimmi bia a hmaanmi a lo lai.

Palinak, Jehovah nih kan ton hngami thil vialte kha hngalh awkah aa zuam lo. Jehovah nih a duh ahcun hmailei ah a cang hngami thil vialte kha a hngalh khawh ti cu a hmaan ko. (Isa. 46:10) Asinain Jehovah nih hngalh awkah aa zuam lo tiah Baibal nih a ti. (Gen. 18:20, 21; 22:12) Jehovah cu dawtnak a ngeimi le a dingmi a si caah zalong tein thimnak nawl kan ngeihmi kha a kan khengkham lo.—Deut. 32:4; 2 Kor. 3:17.

Jehovah nih “nan inkhawh leng tiangin tukforhnak cu nan cungah a tlunter lai lo” tiah Paul nih a ti tikah zeidah a chimduhmi a si? Mah cu harnak ton hlanah si loin harnak ton lioah Jehovah nih a tuahmi kha Paul nih a chimmi a si. * Cucaah zei bantuk hneksaknak kan ton hmanhah Jehovah kan i bochan ahcun Jehovah nih a kan bawmh lai ti kha Paul bia in kan zumh khawh. (Salm 55:22) Paul nih cutin a chim khawhnak a ruang pahnih kha atu zohhmanh hna u  sih.

A pakhatnak a ruang cu kan tonmi harnak hna cu “midang zong nih an in cio tawnmi an si ko.” Cucaah mi nih an ton ciomi thil kha kan tonmi a si ko. Jehovah kan i bochan ahcun mah harnak hna kha kan inkhawh lai i zumhawktlak tein kan um kho zungzal lai. (1 Pet. 5:8, 9) 1 Korin dal 10 a thawklei ah Paul nih Israel mi nih ramcar chungah an tonmi hneksaknak cheukhat kong kha a ṭial. (1 Kor. 10:6-11) Mah hneksaknak hna cu midang nih an ton bal lomi le Israel  mi nih an inkhawh hnga lomi a si lo. Asinain Israel mi cheukhat nih Jehovah nawl kha an ngai lo. Annih nih Jehovah kha an i bochan lo caah Jehavah cungah zumhawktlak tein an um lo.

A pahnihnak a ruang cu Pathian cu zumhawktlak Pathian a si. Mah cu zei sullam dah a si? Jehovah nih hlanlio a salle a rak zohkhenh hnaning in “amah a daw i a nawlbia a zulmi hna” kha zumhawktlak tein a bawmh hna ti kha a kan hngalhter. (Deut. 7:9) Jehovah nih a biakam ningin a tuah zungzal lai ti kha kan hngalh. (Josh. 23:14) (1) Jehovah nih kan inkhawh lo tiangin a har tukmi hneksaknak hna kha umnak nawl a awnh lai lo ti le (2) “chuah khawhnak lam” zong a kan serpiak lai ti kha kan zumh khawh.

Jehovah nih amah aa bochanmi hna caah “chuah khawhnak lam” kha zeitindah a serpiak hna? Jehovah nih hneksaknak hna a hloh khawh ti cu a hmaan ko. Asinain Jehovah nih “tukforhnak nan in tikah inkhawhnak thazaang aan pek hna lai i chuah khawhnak lam zong aan serpiak hna lai” tiah Paul nih a timi kha i cinken. Cucaah Jehovah nih zumhfek tein kan um khawh nakhnga thazaang a kan peknak thawngin chuah khawhnak lam a kan serpiak. Chuah khawhnak lam a kan serpiak ning lam cheukhat kha i ruah hna u sih.

• Jehovah nih “harnak kan innak kip ah a kan hnemh.” (2 Kor. 1:3, 4) Jehovah nih Baibal, thiang thlarau le zumhfekmi a salle hmangin lungdaihnak a kan pek.—Matt. 24:45; Johan 14:16; Rom 15:4.

• Jehovah nih a thiang thlarau hmangin lam a kan hruai khawh. (Johan 14:26) A ṭhami biakhiahnak kan tuah khawh nakhnga thiang thlarau nih Baibal tuanbia le phunglam hna i cinken awkah a kan bawmh khawh.

• Jehovah nih kanmah bawmh awkah a vancungmi pawl a hman khawh hna.—Heb. 1:14.

• Jehovah nih kanmah bawmh awkah unau pawl a hman khawh hna. Unau pawl nih an biachim le an tuahsernak in thazaang an kan pek khawh.—Kol. 4:11.

1 Korin 10:13 ah kan hmuhmi Paul bia in zeidah kan hngalh khawh? Kan tonmi harnak hna hi Jehovah nih a kan thimpiakmi a si lo. Asinain Jehovah kan i bochan ahcun zei bantuk harnak hmanh kan inkhawh lai ti kha kan zumh. A cungah zumhawktlak tein kan um khawh zungzal nakhnga Jehovah nih chuah khawhnak lam a kan serpiak lai ti kha kan hngalh.