1, 2. (a) Jehovah nih zeidah a kan hngalhter? (b) Isaiah 46:10, 11 le 55:11 ah zei biakam dah kan hmuh?

BAIBAL ah kan hmuhmi a hmasa bik bia cu a sawhsawh te a si ko nain hmual a ngei tukmi bia a si. Hitin a ti: ‘Pathian nih van le vawlei a ser.’ (Gen. 1:1) Van le vawlei i Pathian sermi thil tampi lakah tlawmpal te lawng kan hmuh khawh. Vankawlawng, ceunak le vawlei dah ti bantuk thil kong he aa tlaiin tlawmpal te lawng kan hngalh. (Pct. 3:11) Asinain Jehovah nih vawlei le minung ca i aa tinhnak kha a kan hngalhter. Minung kha amah muikeng in a ser hna i vawleicung ah nuam tein umter a duh hna. (Gen. 1:26) Annih cu a fale an si lai i amah cu an Pa a si lai.

² Genesis dal thumnak in Jehovah tinhnak zuamcawh a si kha kan hngalh. (Gen. 3:1-7) Asinain Jehovah nih a tawnghtham khawh lomi buaibainak a um lo. Ahohmanh nih aa tinhnak kha an kham kho lo. (Isa. 46:10, 11; 55:11) Jehovah i a hramthawk aa tinhnak cu rikhiahmi caan ah a tling hrimhrim lai ti kha kan zumh.

3. (a) Zei a biapimi cawnpiaknak nih dah Baibal biatak hngalhthiam awkah a kan bawmh? (b) Mah cawnpiaknak kha zeicah atu kan i ruah hna lai? (c) Zei biahalnak hna dah kan i ruah hna lai?

 ³ Vawlei le minung ca i Pathian tinhnak kan hngalh lengah mah tinhnak i Jesuh dirhmun zong kan hngalh. Mah cu a biapi tukmi Baibal biatak a si i Pathian Bia kan hun hlathlai tikah kan hngalh hmasa bikmi biatak zong a si kho men. Mah a biapi tukmi cawnpiaknak kha midang nih an hngalh nakhnga bawmh kan duh hna. Khrih a thih Philhlonak i rak i pumh awkah mi pawl kan sawm hnanak thawngin cutin tuah khawhnak caanṭha kan ngei. (Luka 22:19, 20) Mah a biapi tukmi caan i an rak i pumh tikah Pathian tinhnak kong kha tam deuh in an hngalh lai. Cucaah Baibal kan cawnpiakmi hna le hngalh duhnak a ngeimi hna nih hngalh an duh hngami biahalnak cheukhat kha atu zohhmanh hna u sih. Mah biahalnak pathum hi kan i ruah hna lai. Vawlei le minung ca i Pathian tinhnak cu zeidah a si? Zeithil dah a rak cang? Pathian tinhnak tlinternak caah Jesuh tlanhnak man cu zeicah tawhfung a si?

4. Sermi thil nih zeitindah “Pathian sunparnak fiang tein a langhter”?

⁴ Jehovah cu khuarauhhar awktlak Sertu a si. A sermi thil vialte kha a sang bikmi phunglam in a ser hna. (Gen. 1:31; Jer. 10:12) Aa dawh tukmi le ningcang tein a sermi thil hna in zeidah kan cawn khawh? Jehovah nih a sermi thil vialte a hme bik in a ngan bik tiang ṭhatnak petu an si ti kha kan hngalh. Mah lengah khuaruahhar a simi minung cell, ngakchia chuakka asiloah aa dawh tukmi ni a tlakmi na zoh tikah zeitindah na intuar? Jehovah nih aa dawhmi thil hna hngalh khawhnak in a kan ser caah mah thil hna kha kan duh tuk.—Salm 19:1; 104:24 rel.

5. Sermi thil vialte nih hmunkhat ah rian an ṭuanṭi nakhnga Jehovah nih zeidah a tuah?

⁵ Jehovah nih a sermi thil vialte caah ri a ser. Kokek phunglam hna le ziazalei phunglam hna a ser. Van le vawlei ah a ummi thil vialte nih hmunkhat ah rian an ṭuanṭi nakhnga mah phunglam kha a sermi an si. (Salm 19:7-9) Van le vawlei ah a ummi thil vialte nih dirhmun le ṭuanvo an ngei cio. Tahchunhnak ah, vawlei dah nih vawlei tuamtu thli kha vawlei he a naihter i mah nih rili le tilet kha a uk hna. Vawlei dah um hlah sehlaw vawleicung ah nunnak a um kho lai lo. Kokek thil hna kha Jehovah nih ri a serpiak hna caah van le vawlei cu ningcang tein a um kho. Mah nih vawlei le minung ca i Jehovah tinhnak kha a langhter. Phungchimnak ah mah khuaruahhar a simi van le vawlei a Sertu Jehovah kong hngalh awkah midang kan bawmh khawh hna.—Biat. 4:11.

6, 7. Jehovah nih Adam le Evi a pekmi hna laksawng cheukhat cu zeidah an si?

⁶ Jehovah tinhnak cu vawleicung ah minung zungzal nun ding kha a si. (Gen. 1:28; Salm 37:29) Jehovah cu a siang tukmi a si i Adam le Evi kha a sunglawi tukmi laksawng a phunphun a pek hna. (Jeim 1:17 rel.) Jehovah nih zalong tein thimnak nawl a pek hna i khua tuaktan khawhnak, dawtnak langhter khawhnak le hawikom ser khawhnak zong a pek hna. Sertu nih Adam sinah bia a chim i thilṭha zeitindah tuah khawh a si ti zong lamhruainak a pek. Adam zong nih amahle amah, saram le vawlei zeitindah  zohkhenh awk a si ti kha a rak cawn. (Gen. 2:15-17, 19, 20) Jehovah nih Adam le Evi kha a thawtnam hngalh khawhnak, tawngh khawhnak, hmuh khawhnak, theih khawhnak le a haw theih khawhnak zong a pek hna. Cuticun aa dawhmi an inn ah nuam tein khua an sa kho. Adam le Evi nih lungthawh awk ngai a simi rian tampi an ngei. Annih cu thilthar an cawng zungzal kho i an hmu zungzal kho.

⁷ Pathian tinhnak ah zei zong dah aa tel rih? Jehovah nih Adam le Evi kha a tlingmi fa ngeih khawhnak a pek hna. An fale zong nih vawlei a khah tiang tefa an ngei chin ve lai. Jehovah nih a hmasa bik a tlingmi minung a fale a simi Adam le Evi a dawt hna bantukin nulepa nih an fale kha daw hna seh ti a duh. Minung chungkhar hna kha vawlei le vawleicung ah a ummi a sunglawimi le aa dawh tukmi thil vialte kha a pek hna. Mah cu a zungzal in an inn a si lai.—Salm 115:16.

8. Pathian nih Adam le Evi kha Genesis 2:16, 17 ah kan hmuhmi nawlbia kha zeicah a pek hna?

⁸ Thil sining cu Jehovah tinhnak bantukin a hung si colh lo. Zeithil dah a rak cang? Adam le Evi nih zalong tein thimnak nawl an ngeihmi ri a um kha an cohlang maw, cohlang lo ti hngalhnak caah Jehovah nih a sawhsawh te a simi nawlbia pakhat a pek hna. Hitin a ti: “Dum chung i a ummi thingkung vialte hi an thei na ei dih ko hna lai, sihmanhsehlaw a ṭha le a ṭhalo hngalhnak pe khotu thingkung a tlai bel hi na ei lai lo. Cu thingthei cu na ei hrimhrim lai lo. Na ei ahcun na ei ni hrimhrim ah na thi lai.” (Gen. 2:16, 17) Mah nawlbia hngalhthiam cu an caah a har lo. Mah lengah dum chungah a thawmi a dang thingthei tampi a um caah mah nawlbia zulh cu an caah a har lo.

9, 10 (a) Satan nih Jehovah kha zeitindah sual a puh? (b) Adam le Evi nih zei tuah awkah dah bia an khiah? (A hramthawknak hmanthlak zoh.)

⁹ Evi nih a Pa Jehovah bia a ngaih nakhnga lo Satan Khuachia nih rul kha a hman. (Genesis 3:1-5 rel; Biat. 12:9) Pathian nih minung a fale kha ‘dum chung i a ummi thingthei kip ei awkah’ a awnh hna lo timi kongkau a chuahter. Mah cu ‘tuah nan duhmi kha tuahnak nawl nan ngei lo? ti bantukin a chimmi a si. Mah hnuah “nan thi lai lo” tiah a ti rih. Mah cu lihbia a si. Evi kha Pathian bia ngaih a hau lo tiah zumhter aa zuam. Satan nih hitin a ti: “Kha thingthei nan ei ahcun nan ei cangka in amah [Pathian] bantukin hngalhnak nan ngei ve lai . . . ti a hngalh caah a si.” Mah thingthei nih a hleikhunmi hngalhnak a pek hna lai caah Jehovah nih eiter a duh hna lo tiah Satan nih a chim. A donghnak ah a hmaan loin mah bia hi a kamh hna: “Amah [Pathian] bantukin hngalhnak nan ngei ve lai i a ṭha le a ṭhalo kha nan hngal ve lai.”

¹⁰ Adam le Evi nih zeidah kan tuah lai ti kha biakhiahnak an tuah a hau. Pathian bia maw kan ngaih lai, Satan bia dah? Ngaihchiat awk ngai a simi cu Pathian bia ngaih lo awkah bia an khiah. Jehovah kha an Pa in an hlawt i Satan lei ah an ṭang. Cucaah Jehovah huhphenhnak an hmu ti lo i anmah tein an um cang.—Gen. 3:6-13.

11. Zeicah Adam le Evi an sualnak kha Jehovah nih zeirel loin a um lo?

¹¹ Adam le Evi nih Pathian bia an buar caah annih cu mitling an si ti lo. Mah lengah  Pathian nih ṭhatlonak kha a huat caah annih cu Pathian ral an hung si. “Ṭhatlonak kha zoh awkah na [Pathian] mit cu a thiang tuk.” (Hab. 1:13) Adam le Evi an sualnak he aa tlaiin Jehovah nih zeihmanh a tuah lo ahcun a sermi thil vialte caah ṭihnung a si lai. Vancungmi le minung nih a bia kan i bochan kho lai maw, bochan kho lai lo timi kong ah lunghrinnak an ngei kho men. Asinain a phunglam kha zumhfek tein an zulh ahcun zeitikhmanh ah a hlaw hna lai lo. (Salm 119:142) Adam le Evi nih zalong tein thimnak nawl an ngei ko nain Jehovah ralchanh ruangah a chuakmi thil sining kha cu an hrial kho lo. A donghnak ah an thi i ser an sinak leidip ah an kir ṭhan.—Gen. 3:19.

12. Adam fale nih zeidah an ton?

¹² Adam le Evi nih thingthei an ei caah Jehovah nih a chungkharmi in a cohlang ti hna lo. Eden dum in a ṭhawl hna i dum chungah zeitikhmanh ah an kir ṭhan kho ti lo. (Gen. 3:23, 24) An biakhiahnak ruangah a chuakmi thil kha Jehovah nih a tonter hna. (Deuteronomi 32:4, 5 rel.) Mah ruangah Jehovah sining pawl kha tling tein an i zohchunh kho ti lo. Adam nih a ṭha tukmi hmailei ruahchannak kha amah lawng si loin a tefa vialte zong a sunghter hna. Adam nih a tefa hna kha tlinlonak, sualnak le thihnak lawng a pek khawh hna. (Rom 5:12) Adam nih zungzal nunnak tinvo sung kha a hlohpiak hna. Adam le Evi nih a tlingmi fa an ngei kho ti lo i an fale zong nih a tlingmi fa an ngei kho ve ti lo. Satan nih Adam le Evi kha Pathian bia ngaih lo awkah a tuah khawh hna caah minung vialte zong cutin tuah khawh ve awkah aa zuam.—Johan 8:44.

13. Jehovah nih minung caah zei tuah dah a duh?

¹³ Jehovah nih minung kha a dawt rih ko hna. Adam le Evi nih amah an kaltak ko nain minung he pehtlaihnak ṭha ngeih a duh rih. Ahohmanh an thih lai kha a duh lo. (2 Pet. 3:9) Cucaah Pathian nih minung he pehtlaihnak ṭha an ngeih ṭhan khawh nakhnga a timhtuah colh. A phunglam a ralchanhmi minung he zeitindah cutin a tuah khawh? Zohhmanh u sih.

14. (a) Johan 3:16 ningin Pathian nih minung kha sualnak le thihnak in luat awkah zeidah a kan tuahpiak? (b)Midang he zei biahalnak hna dah kan i ruah khawh?

¹⁴ Johan 3:16 rel. Ruahnolhnak ah kan sawmmi mi tampi nih mah Baibal cacaang hi an hngalh. Asinain Jesuh raithawinak nih zungzal nunnak zeitindah a kan hmuhter khawh? Ruahnolhnak ah rak i pumh dingin mi kan sawm hna tik, Ruahnolhnak ah anmah he kan i pumh tik le a hnuah kan len ṭhan hna tikah mah biahalnak i a phi kha hngalhthiam awkah bawmhnak caanṭha kan hmu. Mah tikah tlanhnak man kong an hun hngalhthiam chin lai, cun Jehovah nih minung zeitluk in  dah a kan dawt ti le zeitluk in dah a fim ti zong an hun hngalhthiam chin lai. Tlanhnak man he aa tlaiin zei kong kha dah kan chimh khawh hna?

15. Jesuh le Adam cu zeitindah an i dan?

¹⁵ Jehovah nih tlanhnak man a pe khomi a tlingmi minung a kan pek. Mah a tlingmi pa cu Jehovah cungah zumhawktlak tein um awk le ruahchannak a ngeilomi minung caah a nunnak pek duhnak lungput a ngeih a hau. (Rom 5:17-19) Jehovah nih a ser hmasa bikmi Jesuh kha vancung nunnak in vawleicung nunnak ah a ṭhial. (Johan 1:14) Cucaah Jesuh cu Adam bantukin a tlingmi minung a hung si. Asinain Adam he an i lawh lonak cu a tlingmi minung pakhat in Jehovah phunglam kha a zulh. A fak bikmi hneksaknak tang hmanhah Pathian nawlbia kha zeitikhmanh ah a buar lo.

16. Tlanhnak man cu zeicah a sunglawi tukmi laksawng a si?

¹⁶ A tlingmi Jesuh a thihnak nih minung kha sualnak le thihnak in a kan khamh khawh. Anih cu Adam he an i tluk awk a si. Jesuh cu a tlingmi a si i Pathian cungah zumhawktlak tein a um i a bia a ngaih. (1 Tim. 2:6) Kan caah a thi i nu, pa, ngakchia telin kan dihlak caah a nunnak kha raithawinak ah a pek. (Matt. 20:28) Tlanhnak man cu Pathian tinhnak tlinternak caah innka a hungtu tawh a si.—2 Kor. 1:19, 20.

17. Tlanhnak man nih zeidah a tuah khawh?

¹⁷ Jehovah nih mahca ṭhatnak hlaw in kan caah tlanhnak man a pek. (1 Pet. 1:19) Jehovah nih a kan dawt tuk i a fapa ngeihchunhte  kha kan caah a thihter. (1 Johan 4:9, 10) Cucaah Jesuh cu Adam canah kan Pa a hung si. (1 Kor. 15:45) Jesuh nih zungzal nunnak a kan hmuhter khawh lawng si loin hmailei ah Pathian chungkhar ah kan i tel ṭhan khawh nakhnga zong a kan bawmh. Tlanhnak man thawngin minung cu a tlingmi an hung si lai. Cun a dingmi a phunglam kha buar loin Pathian nih minung kha a chungkharmi in a cohlan ṭhan khawh hna. Jehovah cungah zumhawktlak tein a ummi vialte mitling an si caan cu zeitluk in dah a ṭhat lai khi na mitthlam ah cuanter hmanh. A donghnak ah vancung le vawleicung i a ummi vialte cu innchungkhar pakhat in an lung aa rual lai. Kan dihlak in Pathian fale kan si cang lai.—Rom 8:21.

18. Jehovah cu zeitik ah dah ‘zeizong vialte uktu’ a hung si lai?

¹⁸ Hmasa bik kan nu le kan pa nih Jehovah nawl an ngai lo nain minung kha a kan dawt rih i tlanhnak man a kan timhpiak. Mitlinglo kan si ko nain Jehovah cungah zumhawktlak tein kan umnak kha Satan nih a hrawk kho lo. Tlanhnak man thawngin Jehovah nih a dingmi si awkah a kan bawmh lai. ‘Fapa kha a hmu i a zummi paohpaoh’ nih zungzal nunnak an hmuh tikah nunnak cu zeidah a lawh lai khi na mitthlam ah cuanter hmanh. (Johan 6:40) Dawtnak le fimnak a ngeimi kan Pa nih aa tinhnak kha a tlinter lai i minung kha mitling si awkah a kan bawmh lai. Mah tikah Jehovah cu ‘zeizong vialte uktu’ a hung si lai.—1 Kor. 15:28.

19. (a) Tlanhnak man cung kan i lawmhnak nih zei tuah awkah dah a kan forh awk a si? (“Aa Tlakmi kha Kawl Zungzal hna U Sih” timi rinli kulh ah zoh.) (b) A hnu capar ah zei kong dah kan i ruah hna lai?

¹⁹ Tlanhnak man cung kan i lawmhnak nih mah a sunglawi tukmi laksawng kong mi sin chim awkah a kan forh awk a si. Dawtnak a ngeimi Jehovah nih a kan timhpiakmi tlanhnak man thawngin mi vialte nih zungzal nunnak kan hmu kho ti kha an hngalh a hau. Asinain tlanhnak man cu mah lawng a si rih lo. Satan nih Eden dum ah a chuahtermi kongkau zeitindah a tawnghtham ti kha a hnu capar ah kan i ruah hna lai.