1, 2. Harnak kan ton tikah Jehovah nih zeitindah a kan hnemh, Baibal ah zei bia dah a kan kamh?

MINO unaupa pakhat nih 1 Korin 7:28 ah aa ṭhiummi hna nih ‘nifate in a chuak lengmangmi harnak an tong lai’ timi kong kha a ruat. Cun kum upa a simi, innchunghawi a ngeimi Khrihfa upa pakhat kha hitin a hal: “Mah Baibal caang chimmi ‘harnak’ cu zeidah a si i innchunghawi ka ngeih tikah zeitindah ka tawnghtham lai?” Mah tikah Khrihfa upa nih a phi a chimh hlanah lamkaltu Paul nih a ṭialmi Jehovah cu ‘zeizong vialte ah a kan hnemtu Pathian, . . . Harnak kan innak kip ah a kan hnemtu’ a si timi bia kha ruah awkah ruahnak a cheuh.—2 Kor. 1:3, 4.

² Jehovah cu harnak kan ton caan ah a kan hnemtu, dawtnak a ngeimi kan Pa a si. Jehovah nih a Bia Baibal hmangin aan bawmhmi le lam aan hruaimi kha naa cinken ko lai. Hlanlio a salle caah a ṭha bik a duhpiak hna  bantukin kan ca zongah a ṭha bik a kan duhpiak.—Jeremiah 29:11, 12 rel.

3. Hi capar ah zei kong dah kan i ruah hna lai?

³ Buaibainak le harnak hna a chuahnak a ruang kha kan hngalh ahcun inkhawh awkah kan i fawih deuh lai. Innchungkhar i tonmi harnak zongah cutin a si ve. Baibal chan le tuchan i ahote kong nih dah kan herhmi hnemhnak a kan pek khawh? Mah biahalnak hna le harnak zeitindah kan inkhawh timi kong kha atu i ruah hna u sih.

4, 5. Nuva hna nih an tonmi harnak cu zeidah a si?

⁴ Jehovah nih hmasa bik minu kha a ser i mipa sinah cun a ratpi, cuticun a nupi a hung si. Jehovah nih hitin a ti: “Pa nih a nu le a pa a kaltak hna i a nupi he an i fonh i pumkhat i an can hi a si.” (Gen. 2:24) Kan dihlak in mitlinglo kan si. (Rom 3:23) Cucaah aa ṭhiummi hna nih buaibainak kan tong lai ti kha an i ruahchan awk a si. Tahchunhnak ah, an i ṭhitum hlanah nu nih a nu le a pa nawl a ngaih hna lai. Asinain an i ṭhitum hnuah cun a vapa cu nu i a lu a hung si tiah Baibal nih a ti. (1 Kor. 11:3) A hramthawk ah cun a vapa nih a nupi lamhruainak pek kha aa harh men lai. Cun nu zong nih a nu le a pa canah a vapa lamhruainak cohlan kha aa harh ve men ko lai. Mah lengah an i ṭhitumka ah an rualchan pawl he an lung aa khahlonak a um kho i mah cu an caah zuamcawhnak a si kho.

⁵ Nau an hun pawi tikah zeitindah an um lai khi ruathmanh. An i nuam tuk ko lai nain an lungre zong a thei lai. Nau an pawi caan ah siseh, mah hnu zongah siseh a chuak khomi ngandamnak kong he aa tlaiin an lungre a thei men lai. Tangka a dihnak a tam deuh cang lai ti zong an hngalh. Nau a chuah hnuah nuva hna nih thlennak cheukhat tuah an hau lai. Fale zohkhenhnak caah nule nih a caan tampi an pek a hau lai. Cucaah a hlan bantukin nuva hna nih anmahle anmah a caan an i pe kho tuk ti lai lo. Pale cu rian tam deuh an hun ngei lai. An nupile le an fale zohkhenhnak rian an ngei.

6-8. Nuva hna nih fa an ngeih khawh lo tikah zeitindah an um khawh men?

⁶ Nuva cheukhat cu a dang harnak an tong. Fa ngeih an duh tuk ko nain an ngei kho lo. Nupile cu fa an ngeih khawh lo tikah an lung a dong men lai. (Ptb. 13:12) Baibal chan ah nu pawl caah va ngeih le fa ngeih cu a biapi tukmi a si. Mah ruangah Jakob nupi Rachel cu a u bantukin fa a ngeih khawh lo tikah a lung a dong tuk. (Gen. 30:1, 2) Tuchan i ram cheukhat zongah fa tampi ngeih cu a biapi tuk tiah an ruah. Cu bantuk ram ah missionary a ṭuanmi unau pawl kha mi nih zeicah fa nan ngeih lo tiah an hal tawn hna. A si khawh chungin a ruang an chimh hna hnu hmanhah cheukhat nih cun “nan caah thla kan in campiak hna lai” tiah an ti rih hna.

⁷ A dang tahchunhnak pakhat hi ruathmanh. England ram ah a ummi unaunu pakhat cu fa ngeih a duh tuk. Asinain nau ka ngei kho ti lai lo ti kha a hngalh tikah a lung a kekkuai dih. Cucaah a  vapa he mi fa i cawm ding in bia an khiah. Asinain a caan ahcun a ngaih a chia tawn rih. “Mi fa i cawm cu keimah chungchuak fa zohkhenh he cun aa lo lo” tiah a ti.

⁸ “Nu cu fa an ngeih ruangah hin khamh an si lai” tiah Baibal nih a ti. (1 Tim. 2:15) Asinain mah cu fa an ngeih ruangah zungzal nunnak an hmu lai tinak cu a si lo. Cu a si ah mah Baibal caang nih zeidah a chimduhmi a si? Nule cu an fale le innlei zohkhenhnak ah an rian a tam tuk i mah nih mi kong ceih lo ding le anmah he aa pehtlai lomi kong ah i teltum lo dingin a bawmh hna. (1 Tim. 5:13) Asinain an innchungkhar ah buaibainak cu a um rih ko lai.

9. Nuva hna nih a dang zei bantuk harnak dah an ton khawh?

⁹ Nuva cheukhat nih an tonmi a dang harnak pakhat cu innchunghawi nih thihtaknak a si. Cu bantuk thil cu kan tong lai lo tiah an i ruah men lai nain mah a har tukmi thil sining kha mi tampi nih an ton. Khrihfa nih cun thawhṭhannak ruahchannak kha an zumh i mah nih hnemhnak tampi a pek hna. (Johan 5:28, 29) Kan Pa Jehovah nih harnak caan chungah hnemhnak a kan pemi biakamnak tampi kha Baibal hmangin a kan pek. Jehovah salle cheukhat nih zeitindah hnemhnak an hmuh i mah nih zeitindah a bawmh hna ti kha atu i ruah hna u sih.

10. Hannah cu zeitindah hnemhnak a hmuh? (A hramthawknak hmanthlak zoh.)

¹⁰ Elkanah nupi, Hannah kong kha ruathmanh. Fa ngeih a duh tuk ko nain a ngei kho lo. Asinain a vapa i nupi dang, Peninnah cu fa tampi a ngei. (1 Samuel 1:4-7 rel.) Mah ruangah Peninnah nih Hannah kha “kumkhat hnu kumkhat” a zawmhtaih chin lengmang. Cucaah Hannah cu a lung a fak tuk. Hannah nih hnemhnak hmuh awkah zeidah a tuah? Jehovah sinah thla a cam. Jehovah biakinn ah a kal i saupi in thla a cam tawn. Jehovah sinah fapa pakhat a hal i a ka pek lai ti zong a zumh. Thla a cam dih tikah a hna a ngam i “ngaihchia mithmai a pu ti lo.” (1 Sam. 1:12, 17, 18) Jehovah nih fapa a ka pek lai asiloah lam khatkhat in a ka hnemh lai ti kha a hngalh.

11. Thlacamnak nih zeitindah hnemhnak a kan pek khawh?

¹¹ Mitlinglo kan si ca le Satan vawlei i kan nun caah harnak cu kan tong lengmang rih ko lai. (1 Johan 5:19) Asinain Jehovah cu “zeizong vialte ah a kan hnemtu Pathian” a si ti kan hngalhmi nih hnemhnak a kan pek. Kan tonmi harnak hna tawnghtham khawh awkah a kan bawmmi lam pakhat cu thlacamnak a si. Hannah nih cutin a rak tuah. Hannah nih a intuarnak vialte kha Jehovah sinah a  dikthliar in a chim i bawmhnak a rak hal. Cu bantukin kannih zong harnak kan ton tikah Jehovah sinah chim sawhsawh lawng si loin bawmhnak hmuh awkah kan nawl awk a si. Cun kan intuarnak kha a dikthliar in kan chim awk a si.—Fil. 4:6, 7.

12. Anna cu harnak a tong ko nain i nuamh awkah zeinihdah a bawmh?

¹² Fa kan ngeih lo ruang asiloah kan dawtmi pakhatkhat nih a kan thihtak ruangah kan ngaih a chia tuk ko lai. Asinain hnemhnak kan hmu kho. Jesuh chan ah a rak nungmi Anna kong hi ruathmanh. Va a ngeih in kumsarih a si ah a vapa nih a thihtak. Cun fa zong ngeih dawh a si lo. Kum 84 a si cangmi Anna nih zeidah a tuah? Baibal ah hitin kan hmuh: “Biakinn kha a kaltak bal lo i chun he, zan he Pathian kha rawl ulh le thlacam in a biak.” (Luka 2:37) Anna cu harnak a tong ko nain mah nih hnemhnak le nuamhnak a hmuhter.

13. Kan rualchan sinin hnemhnak kan hmuh lo hmanhah hawikomṭha sinin hnemhnak hmuh khawhning tahchunhnak pakhat kha chim.

¹³ Kannih zong Khrihfabu i hawikomṭha pawl sinin hnemhnak kan hmu kho ve. (Ptb. 18:24) Paula cu kumnga a si lioah a nu nih Jehovah kha a kaltak. Paula cu a ngaih a chia tuk i mah thil sining cu a caah a har tuk. Asinain hmaikal a ṭuanmi unaunu Ann nih tha a pek i a cungah siaherhnak a langhter. “Ann cu ka rualchan a si lo nain siaherhnak a langhtermi nih thazaang a ka ngeihter. Mah nih Jehovah kha biak zungzal awkah a ka bawmh” tiah Paula nih a ti. A hnuah a nu cu Khrihfabu chungah a rak kir ṭhan i Paula cu aa nuam tuk. Paula nih Jehovah a biak zungzal nakhnga a bawmh khawh caah Ann zong aa nuam tuk ve.

14. Midang hnemhnak in zeitindah ṭhatnak kan hmuh khawh?

¹⁴ Midang ca thilṭha tuahnak ah kan  rian a tam tikah kan ngeihmi buaibainak kha kan philh tawn. Tahchunhnak ah, innchunghawi a ngeimi an si ah, a ngei lomi an si ah, unaunu tampi nih Pennak kong thawngṭha chimnak ah Jehovah he rian kan ṭuanṭi ahcun kan i nuam lai ti kha an hngalh. Thawngṭha kan chimnak thawngin midang kan siaherh hna kha kan langhter khawh. Unau pawl caah thilṭha kan tuah tikah anmah he kan i naih deuh. (Fil. 2:4) Lamkaltu Paul nih zohchunh awk ṭha a rak chiah. ‘Nu nih a fale a zohkhenh hna bantukin’ midang kha a zohkhenh hna. “Pa nih a fale a ti hna bantukin” Paul nih unau pawl kha a hnemh hna i tha a pek hna.—1 Thesalon 2:7, 11, 12 rel.

15. Mino pawl Jehovah kong cawnpiak awkah ahote dah rian a ngei?

¹⁵ Khrihfabu i unau pawl kha zeitindah kan hnemh khawh hna? A caan ah mithar pawl nih an fale Jehovah kong cawnpiak awk le Baibal cawnpiaknak hmanh tuah awkah bawmhnak an kan hal men lai. Jehovah nih nulepa kha fale cawnpiak awk le lamhruai awkah rian a pek hna ti kha Baibal nih a langhter. (Ptb. 23:22; Efe. 6:1-4) Thil sining cheukhat ah cun midang bawmhnak a herh ko lai nain nulepa theng zong nih fale cawnpiak cu a biapi tukmi a si. Fale he hmaan tein bia i ruah a hau.

16. Fale kan bawmh hna tikah zeidah kan i cinken awk a si?

¹⁶ Nulepa nih an fale Baibal cawnpiak dingin bawmhnak an kan hal tikah anmah bantukin nawl kan ngei lo ti kha kan i cinken awk a si. A caan ah an nu le an pa biatak ah a um lomi fale kha Baibal kan cawnpiak men hna lai. Mah tikah an nu le an pa inn ah an um lioah, nutling patling a simi unau dang an um lioah asiloah mi tamnak hmun ah cawnpiak cu fim a si. Cutin kan tuah ahcun ahohmanh nih phundang in an kan ruat lai lo. A hnu ahcun nulepa theng nih an fale Jehovah kong cawnpiak kha an duh khawh men.

17. Fale nih innchungkhar mi kha zeitindah an hnemh khawh hna?

¹⁷ Jehovah dawt awkah a cawngmi mino pawl nih chungkhar pawl kha an hnemh khawh hna i tha an pek khawh hna. Zeitin in dah? Nulepa an upat hnanak in le rian an ṭuannak thawngin an bawmh khawh hna. Cun fale nih Jehovah cungah zumhfek tein an umnak thawngin an chungkhar kha thazaang an ngeihter hna. Buanchukcho a tlun hlanah Lamek cu Jehovah a biami a si. A fapa Noah kong he aa tlaiin hitin a chim: “BAWIPA nih chiat a serhmi vawlei i rian har kan ṭuannak hin, hi pa nih hin dinhnak a kan pek lai.” Mah chimchungbia cu Jehovah nih hi vawleicung i chiatserhnak vialte a hloh dih tikah a tling. (Gen. 5:29; 8:21) Tuchan zongah Jehovah cungah zumhfek tein a ummi fale nih an innchungkhar kha hnemhnak an pek khawh hna. An chungkharmi dihlak kha atu ah le hmailei ah harnak inkhawh awkah an bawmh khawh hna.

18. Zei bantuk harnak kan ton hmanhah inkhawh awkah zeinihdah a kan bawmh khawh?

¹⁸ Thlacamnak, Baibal kong ṭha tein ruahnak le unau pawl he naih tein i komhnak nih harnak ton tikah hnemhnak hmuh awkah mi nuai tampi kha a bawmh hna. (Salm 145:18, 19 rel.) Jehovah cu kanmah hnemh awkah timhcia a si zungzal i atu ah le hmailei ah kan ton khawhmi zei bantuk harnak hmanh kha inkhawh awkah a kan bawmh lai.