JEHOVAH PATHIAN nih amah a biami hna lakah daihnak um seh ti a duh. Cucaah pakhat le pakhat karah daihnak ser hna seh ti a duh. Cutin an tuah tikah Khrihfabu ah daihnak a um. Mah nih mi tampi kha Khrihfabu ah a hnuh hna.

Tahchunhnak ah, Madagascar ram i khuachia thiamnak a ngeimi pa pakhat nih Jehovah mi hna lakah a ummi daihnak kha a hmuh i “biaknak pakhat kha i thim ding a si ahcun mah biaknak hi kaa thim lai” tiah a ti. A hnuah khuachia biaknak kha a ngol i a innchungkhar ah thlennak hna a tuah, cun daihnak Pathian Jehovah kha a hun biak.

Mah pa bantukin kum fatin mi tampi cu Khrihfabu ah an hung lut i an duh tukmi daihnak kha an hmuh. Asinain Khrihfabu chungah “nahchuahnak nan ngeih i mi cungah nan thin a hun peng” ahcun hawikomhnak a rawk kho i harnak a chuak kho tiah Baibal nih a ti. (Jeim 3:14-16) Mah lengah Baibal nih buaibainak hna tawnghtham ning le daihnak ser ning he aa tlaimi ruahnak cheuhnak zong a kan pek. Mah ruahnak cheuhnak hna man a ngeih ning kha zohhmanh hna u sih.

“Keimah he rian a ṭuanṭimi unaupa pakhat he buaibainak kan ngei. Voikhat cu pakhat le pakhat kan i auhnawh chih lioah mi pahnih an ra i kan i sikmi kha an kan zoh.”—CHRIS.

“Phungchimnak ah kan kalṭi tawnmi unaunu pakhat nih ruahlopi in phungchim kan i timhmi kha a ngol. Cun a ka chawn ti lo. A ruang cu ka hngal lo.”—JANET.

“Mi pathum he voikhat ah Internet phone in kan i chawn. An lak in pakhat nih ka chuak ta lai a ti, cucaah line a phih cang rua tiah ka ruah i a dang sinah a kong ka ceih. Asinain mah pa nih a phone kha a rak thla lo.”—MICHAEL.

“Kan Khrihfabu ah hmaikal pahnih cu buaibainak an ngei. Pakhat le pakhat an i mawhchiat chih. Cutin bia an i almi nih midang kha an lung a rawhter hna.”—GARY.

Mah cu buaibainak nganpi cu a lo lem lo. Asinain mah thil sining nih lungfahnak a chuahter khawh i Khrihfabu daihnak zong a hrawh khawh. Lunglawmh awk ngai a simi cu mah unau pawl nih Baibal lamhruainak kha an zulh i daihnak an hmu ṭhan. Zei Baibal lamhruainak nih dah a bawmh hna tiah na ruah?

“Lampi ah pakhat le pakhat nan thin i hunter hlah u.” (Gen. 45:24, NW) Josef nih a ule kha a pa sin i an kir lioah mah bia hi a chimmi a si. Mi pakhat nih a intuarnak aa uk kho lo i fawi tein a thin a hun tikah thil sining cu a chia chin ko lai. Midang zong an thin a hung ve men lai. Chris nih a caan ah toidor tein um le lamhruainak zulh cu ka caah a har ti kha a hngalh. I thlen a duh caah amah he bia aa almi unaupa kha a va nawl. Cun a lungthin i uk khawh awk zongah fakpi in aa zuam. Aa zuamnak kha  unaupa nih a hmuh tikah amah zong cutin a tuah ve. Atu ah cun Jehovah rian kha nuam tein an ṭuanṭi cang.

“Ruahnak i cheuhnak a um lo ahcun khuakhannak kha a pingah a kal tawn.” (Ptb. 15:22) Janet cu a hawinu nih a chawnh duh ti lo tikah mah Baibal caang hi zulh awkah bia a khiah. Mah unaunu he i ruahceihṭi awkah a va kal. Na thinhun ding le na ngaihchiat dingin ka tuah sualmi a um maw tiah Janet nih a hal. A hmasa ahcun an pahnih in an sia a rem lo. Asinain dai tein bia an i ruah thluahmah tikah an sia a hung rem deuhdeuh. Mah tikah unaunu nih hlanah a rak cangmi thil kong ah amah nih a theihthiam sualmi a si le Janet nih a thin a hunter hngami thil zeihmanh a tuah lo ti kha a hun hngalh. Janet kha a nawl i atu ah cun an pahnih in hawikom an si ṭhan cang, Jehovah rian zong hmunkhat ah an ṭuanṭi ṭhan cang.

“Pathian sinah nan laksawng cu biakṭheng cung i pekchanh na zalh tikah khan, na unau pakhatkhat kha na cungah thinhunnak a ngei ti na hun hngalh ahcun biakṭheng hmaiah cun na laksawng cu chia ta law khulrang in va kal law na unau he khan remnak va tuah.” (Matt. 5:23, 24) Jesuh nih mah ruahnak cheuhnak hi Tlang cung Cawnpiaknak ah a rak chimmi a si. Michael nih zaangfahnak ngei loin unaupa kong a ceih hnuah a lung a ṭha ṭhan lo. Thil sining ṭhatter ṭhan awkah a herhmi zeipoah tuah dingin bia a khiah. Unaupa sinah a va kal i toidor tein a nawl. Mah tikah zeidah a cang? “Unaupa nih lungtak tein a ka ngaihthiam” tiah Michael nih a chim. An pahnih in hawikom an si ṭhan cang.

“Pakhat le pakhat lungsilonak nan i ngeih tikah pakhat le pakhat i ngaithiam u law i bawm u.” (Kol. 3:12-14) Lohmun ah bia aa almi hmaikal pahnih kha naa cinken ti hna maw? Midang an lung an ṭhatter lomi le siarem loin an tuahmi hna kha hngalhthiam awkah Khrihfa upa pakhat nih nemnak tein a bawmh hna. Lungsau awk le Khrihfabu daihnak hmunhter awk a si kha a hngalhter ṭhan hna. Mah ruahnak cheuhnak kha an cohlan i an zulh. Atu ah cun hmunkhat tein thawngṭha an chimṭi cang.

Kolose 3:12-14 ah kan hmuhmi ruahnak cheuhnak nih toidor tein um awk, kan lung a kan fahtertu kha ngaihthiam awk le mah kong kha ruah ti lo awkah a kan bawmh khawh. Asinain ngaihthiam awkah kan i zuam ko buin kan ngaihthiam khawh lo ah tah zeitin? Matthai 18:15 ah a kan bawmmi Baibal phunglam pakhat a um. Mah cu Jesuh nih a bik in sualnak ngan a tuahmi hna caah a chimmi a si ko nain unau pakhatkhat he buaibainak kan ngeih tik paohah kan zulh khawh. Nemnak le toidornak tein buaibainak tawnghthamṭi awkah kan i zuam kho.

Baibal ah a dang ruahnak cheuhnak tampi a um rih. Mah lak i tam deuh cu “thlarau nih a chuahtermi . . . dawtnak, lawmhnak, daihnak, lungsaunak, zaangfahnak, ṭhatnak, zumhawk tlakmi sinak, toidornak le mahle mah i tei khawhnak” hna langhternak cungah an i hngat. (Gal. 5:22, 23) Mah kong hi ruathmanh. Seh ṭha tein rian a ṭuanter khomi seh  sii bantukin thlauraulei ziaza hna nih remnak a chuahter khawh.

Kan dihlak in kan sining aa dang cio. Kan ziaza aa dang cio i kan hmuhning le kan lehrulhning zong aa dang cio. Mah nih kan i hawikomhnak kha a nuamhter i lungthawhnak a umter khawh. Asinain kan sining aa danmi nih i theihsualnak le lung i khahlonak zong a chuahter khawh. Hmuhtonnak a ngeimi Khrihfa upa pakhat nih hitin a chim: “A ningzah a pangmi pakhat cu a holh a tammi le a aw a thangmi hna pawng i an um tikah a har kho men. Mah an i lawh lonak cu a biapi lomi a lo ko lai nain mah nih buaibainak nganpi a chuahter khawh.” Sining aa lo lomi hna cu zeitikhmanh ah an umṭi kho lai lo tiah na zum maw? Lamkaltu pahnih kong kha zohhmanh u sih. Peter kong kan ruah tikah a lungthin chungah a ummi paoh a chimmi in kan mitthlam ah kan cuanter men lai. Johan kong kan ruah tikah bia a chim hlan le a tuah hlanah dawtnak kong a ruat hmasami in kan mitthlam ah kan cuanter men lai. Peter le Johan cu an sining aa dang. Asinain Jehovah rian kha hmunkhat te ah ṭha tein an ṭuanṭi. (Lam. 8:14; Gal. 2:9) Tuchan zongah cutin a si kho. An sining aa dang tukmi Khrihfa hna hmanh hmunkhat te ah rian an ṭuanṭi kho.

Asinain unau pakhatkhat nih na thin a huntermi bia a chim asiloah a tuah ah tah zeitin? Khrih cu nangmah caah a thih bantukin amah ca zongah a thi ve ti i cinken in a cungah dawtnak na langhter awk a si. (Johan 13:34, 35; Rom 5:6-8) Mah unaupa kha komh ti lo dingin asiloah hrial dingin bia na khiah awk a si lo. Mah canah hitin i  hal: ‘Mah unaupa nih Jehovah nawlbia a ralchanhmi thil pakhatkhat a tuah maw? I timh ciammam in ka lung a ka fahtermi a si maw? Asiloah kan sining aa danmi men dah a si? Ngeih ka duhmi sining hna a ngei maw?’

Tahchunhnak ah, mah unaupa cu a holh a tam i nang cu na dai, asinain phungchim rianṭuannak ah amah nih biaruah a thawk hmasa tikah zeitluk in dah a ṭhat ti kha ruathmanh. Asiloah anih cu nangmah nakin a sian deuh ah tah zeitin? Kum upa, a dam lomi le a herhmi pawl bawmhnak in nuamhnak na hmu ve maw? Siannak langhter khawhning kha mah unaupa sinin na cawng kho lai maw? Nangmah le mah unaupa cu nan i dang ko nain a ṭhami a sining cungah na lungthin na chiah khawh. Hawikom ṭha bik nan si khawh lo hmanhah pakhat le pakhat nan hun i naih deuh lai. Mah nih nanmah pahnih kar le Khrihfabu karah daihnak a chuahter lai.

Kumzabu pakhatnak ah Eudio le Sintekhe timi unaunu pahnih an rak um. Annih cu an sining aa dang tukmi a lo ko nain lamkaltu Paul nih “Bawipa chungah unau bantuk tein lungkhat in um i zuam u” tiah tha a rak pek hna. (Fil. 4:2) Kannih zong unau pawl he hmunkhat te ah Jehovah biakṭi le Khrihfabu ah daihnak karhter kha kan duh.

Midang cungah kan ngeihmi a ṭha lomi intuarnak paohpaoh kha zeicah kan hloh colh awk a si? Mah intuarnak cu aa dawh tukmi pangpar dum ah a khomi belh kung he tahchunh khawh a si. Mah belh kung hna cu kan phawi colh lo ahcun dum vialte kha a khuh dih lai. Cu bantukin midang cungah kan ngeihmi a ṭhalomi intuarnak hna an ṭhawn chin ahcun mah nih Khrihfabu dihlak kha a hnorsuan khawh. Asinain Jehovah le unau kan dawt  hna ahcun Khrihfabu daihnak kilven awkah kan si khawh chungin kan i zuam lai.

Midang he daihnak ser kan i zuam ruangah a chuakmi ṭhatnak nih kan khuaruah a harter ko lai. Jehovah Tehte pakhat nih cutin a rak ton. Hitin a chim: “Unaunu pakhat nih ngakchia bantukin a ka pehtlaih tiah ka ruah. Mah nih ka thin a ka hunter. Ka thinhunnak cu a ṭhang thluahmah i mah unaunu kha ṭha tein ka chawn duh ti lo. ‘Kaa tlak ningin ka cungah upatnak a langhter lo caah a cungah upatnak ka langhter ve ti lai lo’ tiah ka ruah.”

A hnuah mah unaunu nih a lungput he aa tlaiin khua a ruat. “Ka chambaunak ka hun i hmuh tikah keimahle keimah kaa lungsi lo tuk. Ka ruahnak remh a herh ti kha ka hun hngalh. Mah kong he aa tlaiin Jehovah sin thla ka cam hnuah laksawng hmete pakhat ka cawk i unaunu sinah nawlnak ca tawi tein ka ṭial. Mah tikah pakhat le pakhat kan i kup i mah kong kha philh dingin kan hna a tla. Mah hnu cun zei bantuk buaibainak hmanh kan ngei ti lo.”

Mikip nih daihnak kan herh. Asinain porhlawtnak lungput nih daihnak a hrawh khawh. Mah cu vawlei mi hna lakah a cang tawnmi a si nain Jehovah nih amah a biami hna sinin aa ruahchanmi thil pakhat a um. Jehovah Tehte Hna lakah daihnak le lungrualnak a um awk a si. Lamkaltu Paul nih hitin a ṭial: “Pathian nih an auhnak hna he aa tlakmi nunning khan nung u tiah kaan forh hna. Toidornak lungthin ngei u, lungnem le lungsau in um zungzal u. Pakhat le pakhat i bawm u law cuticun nan i dawtnak kha langhter u. Pumkhat sinak, thlarau nih aan pekmi hna kha ngeih peng awkah aan funtu hna daihnak hri khan fek tein i ṭem u.” (Efe. 4:1-3) “Daihnak hri khan fek tein i ṭem u” timi bia kha Jehovah miphun nih an sunsak tuk. Cucaah daihnak hri kha fehter hna u sih law kan ton khawhmi zei bantuk buaibainak hmanh kha tawnghtham awkah kan si khawh chungin i zuam hna u sih.