1. Lamkaltu Paul nih chiti thuhmi Khrihfa hna sinah zeibantuk ralrin peknak ca dah a ṭial?

“HI VAWLEI kalning hin kal ve lengmang ti hlah u.” (Rom 12:2) Mah bia hi Paul nih kumzabu pakhatnak i Khrihfa hna sinah a ṭialmi a si. Pathian sinah aa pumpemi le thiang thlarau in chiti thuh a simi pa le nu hna kha zeicah cutin ralrin a pek hna?—Rom 1:7.

2-3. Jehovah kan ralchanh nakhnga Satan cu zeitindah aa zuam, asinain “ralhruang fekfek” bantukin hram aa sihmi kan ruahnak kha zeitindah kan hrawh khawh?

² Khrihfa cheukhat cu Satan vawlei nih a hlorhmi, a ṭhalomi ruahnak le fimthiamnak nih a iap hna caah Paul cu a lungre a rak thei. (Efe. 4:17-19) Mah cu kan dihlak cungah a cang khomi a si. Satan cu hi vawlei uktu a si caah Jehovah sinin kan i hlat nakhnga lam a phunphun hmangin a kan leem khawh. Tahchunhnak ah, a biapimi asiloah a min a thangmi si kan duh ahcun Jehovah sinin kan i hlat nakhnga mah kha a hman lai. Amah ruahnak bantukin kan ruah ve nakhnga hnulei kan sining, kan nunphung asiloah kan fimthiamnak ti bantuk thil cheukhat hmanh kha a hman men lai.

³ “Ralhruang fekfek” bantukin hram aa sihmi kan ruahnak cu hrawh khawh a si maw? (2 Kor. 10:4) Paul a bialehnak hi i cinken: “Pathian hngal kho hna hlah seh tinak ca i chonmi vanpang porhlawtnak vialte kha kan baoh dih; minung lungthin kha sal ah kan tlaih hna i Khrih nawl kha kan ngaihter hna.” (2 Kor. 10:5) Jehovah bawmhnak thawngin a ṭhalomi kan ruahnak kha hloh khawh a si. A ṭhalomi siivai nih a  chuahtermi thil kha sii nih a hloh khawh bantukin Satan vawlei nih a chuahtermi a ṭhalomi thil kha hloh awkah Baibal nih a kan bawmh khawh.

4. Baibal biatak kan cawn hmasa bik lioah kan lak i tampi nih zei bantuk thlennak dah kan tuah?

⁴ Baibal biatak na cawn i Jehovah biak awkah bia na khiah lioah thlennak na tuahmi kong kha ruat ṭhan hmanh. Jehovah biak awkah kan lak i tampi cu a ṭhalomi thil tuah kha kan ngol. (1 Kor. 6:9-11) Mah a ṭhalomi thil tuah kha ngol khawh awkah Jehovah nih a kan bawmh caah kan i lawm tuk.

5. Rom 12:2 ah kan tuah awk a simi zei thil pahnih dah a langhter?

⁵ Asinain mah lawngin kan i lungsak awk a si lo. Tipil kan in hlanah sualnak ngan kan rak tuahmi kha kan ngol nain mah sualnak ngan a kan tuahter ṭhan khomi zei bantuk leemsoinak hmanh kha hrial awkah fakpi in kan i zuam zungzal a hau. Cutin zeitindah kan tuah khawh? Paul nih hitin a ti: “Hi vawlei kalning hin kal ve lengmang ti hlah u, sihmanhsehlaw chunglei in Pathian nih nan lungthin kha a dihumnak in in thleng hna seh.” (Rom 12:2) Cucaah thil pahnih kan tuah a hau. Pakhatnak, ‘vawlei kalning in kal lengmang’ asiloah vawlei huham i iapter kha kan ngol a hau. Pahnihnak, kan ruahnak kan thlennak thawngin aa ‘thlengmi’ kan si a hau.

6. Jesuh nih Matthai 12:43-45 ah a langhtermi bia in zeidah kan cawn khawh?

⁶ Paul nih a chimmi ruahnak thlennak ah kan muisam thlennak nakin tam deuh aa tel. Mah cu kan nunnak kip cungah huham a ngei. (“ Thlennak Taktak maw a Si asiloah I Titernak dah a Si?” timi rinli kulh ah zoh.) Kan ruahnak, kan ziaza, kan intuarnak le kan duhnak hna kha thlen a hau. Cucaah kan dihlak in hitin kan i hal awk a si: ‘Khrihfa pakhat  si awkah lenglei lawngin aa thlengmi ka si maw asiloah chunglei in aa thlengmi Khrihfa taktak dah ka si?’ Mah an i dannak cu a biapi tukmi a si. Matthai 12:43-45 ah a langhtermi bia in Jesuh nih tuah a herhmi thil kha a kan hngalhter. (Rel.) Mah bia hna nih a biapimi kong a kan cawnpiak: A ṭhalomi ruahnak hloh lawngin a za lo, mah ruahnak ah Pathian nih a cohlanmi ruahnak in kan airolh a hau.

7. Kan lungthin le kan ruahnak kha zeitindah kan thlen khawh?

⁷ Kan lungthin le kan ruahnak cu thlen khawh a si maw? Baibal nih hitin a ti: “Nan lungthin le nan ruahnak ah ser tharmi nan si awk a si. Pathian he aa loin sermi nan mihring thar kha i hruk u law cucu a dingmi le a thiangmi nunning i a langmi nunnak taktak kha a si.” (Efe. 4:23, 24) Cucaah kan lungthin cu thlen khawh a si, asinain cutin tuah cu a fawi lo. A ṭhalomi duhnak le tuahsernak hna ngol awkah fakpi in kan i zuam a hau. ‘Kan lungthin le kan ruahnak’ kha kan thlen a hau. Mah ah kan duhnak, kan tuahsernak le thil kan tuahnak a ruang thlennak hna aa tel. Cutin tuah khawh awkah kan i zuam zungzal a hau.

8-9. Kan lungthin le kan ruahnak thlen a herh ti kha unaupa hmuhtonnak nih zeitindah a langhter?

⁸ Hlan ah a rak puarhrang tukmi unaupa pakhat kong i ruah hna hmanh u sih. Anih cu zu a ding tukmi le mi he aa vel tawnmi a si ko nain mah kha a ngol i a hnuah tipil a ing. Mah cu a umnak hmun hmete ah a ṭha tukmi tehte khannak a si. Asinain tipil a in dih hnu tlawmpal ah aa ruahchan lomi hneksaknak a tong. Nikhat cu zanlei sang ah zu a rimi pa pakhat cu a inn ah a ra i, i velh dingin a zuamcawh. A hmasa ahcun unaupa cu a thin aa sum. Asinain zuripa nih Jehovah min a thangchiat tikah unaupa cu a thin a hung tuk i aa sum kho ti lo. Mah tikah lengah a chuak i zuripa kha a velh. Zeicah cutin a tuah? Baibal a hlathlaimi nih puarhrannak lungput kha doh khawh awkah a bawmh ko nain a lungthin le a ruahnak tu cu a thleng kho rih lo.

⁹ Asinain unaupa cu a lung a dong lo. (Ptb. 24:16) Khrihfa upa pawl bawmhnak thawngin ṭhatnak tuahnak ah a ṭhangcho. A donghnak ah Khrihfa upa ṭuan ding tiang hmanhin sining a tlinh. Nikhat cu zanlei sang ah Biakinn lengah a hmasa kum i a rak tonmi zuamcawhnak bantuk kha a tong ṭhan. Zu a rimipa nih Khrihfa upa pakhat velh a duhnak kong kha a chim. Mah tikah unaupa nih zeidah a tuah? Dai tein a um i zu a rimipa kha nem tein a chawnh, lungdaih awkah a bawmh i inn tiang hmanh a va thlah. Atu tan ah unaupa nih a lehrulh ning cu zeicah aa dan? A lungthin le a ruahnak a thlen caah a si. Lungdaihnak le toidornak a ngei taktakmi a hung si. Mah nih Jehovah thang a ṭhatter.

10. Kan lungthin le kan ruahnak thlen awkah zeidah kan tuah a hau?

¹⁰ Mah thlennak cu khulrang in asiloah amah tein aa thlengmi a si lo. Cucaah kum tampi chung “fakpi in” kan i zuam a hau men lai. (2 Pet. 1:5) Jehovah kan biaknak caan saupi a si men in a za lo. Kan lungthin le kan ruahnak thlen khawh awkah fakpi in kan i zuam a hau. A hrampi kehlan a simi thil nih thlennak tuah awkah a kan bawmh lai. Mah lakah cheukhat kong kha i ruah hna u sih.

11. Thlacamnak nih kan lungthin le kan ruahnak thlen awkah zeitindah a kan bawmh?

¹¹ Thlacamnak cu a biapi tukmi kehlan pakhatnak a si. Salm caṭialtupa bantukin thla  kan cam ve a hau: “Maw Pathian, ka chungah hin lungthin thar ka serpiak law a thar le zumhtlak a simi ruahnak ka chungah chia ko.” (Salm 51:10) Kan lungthin le kan ruahnak cu thlen a herh ti kha kan cohlan a hau i Jehovah sinah bawmhnak kan hal a hau. Thlennak tuah awkah Jehovah nih a kan bawmh lai ti kha zeitindah kan zumh khawh? Jehovah nih Ezekiel chan i a lung a hakmi Israel mi hna he aa tlaiin biakamnak a tuahmi in thazaang kan hmu kho: “Lungthin dang ka pek hna lai i an chungah thlarau thar ka khumh lai; an pum chungin lung bantukin a hakmi lung an ngeihmi kha ka chuah lai i titsa bantukin a nemmi lung kha ka pek hna lai.” (Ezek. 11:19.) Jehovah nih Israel mi kha thlennak tuah awkah bawmh a duh hna bantukin kannih zong bawmh a kan duh ve.

12-13. (a) Salm 119:59 ningin zeidah ṭha tein kan ruah a hau? (b) Zei bia dah naa hal awk a si?

¹² Ṭha tein ruahnak cu a biapi tukmi kehlan pahnihnak a si. Nifatin Baibal ṭha tein kan rel tikah kan relmi kong thukpi in ruah awkah a caan kan pek a hau. Cutin kan tuah ahcun thlen a herhmi kan ruahnak le kan intuarnak hna kha kan thlen khawh lai. (Salm 119:59 rel; Heb. 4:12; Jeim 1:25) Vawlei fimnak nih a iapmi kan ruahnak le kan intuarnak vialte kha kan hngalh a hau. Kan derthawmnak kha kan hngalh a hau i mah kha hloh awkah fakpi in kan i zuam a hau.

¹³ Tahchunhnak ah, hitin naa hal kho: ‘Ka lungthin chungah nahchuahnak tlawmpalte tal a um sual maw?’ (1 Pet. 2:1) ‘Ka miphun, ka fimthiamnak asiloah tangka tampi ka ngeih caah midang nakin ka ṭha deuh tiah kaa ruat maw?’ (Ptb. 16:5) ‘Ka ngeihmi thil a ngei ve lomi asiloah miphun dang hna kha keimah nakin an nauta deuh tiah ka ruat maw?’ (Jeim 2:2-4) ‘Satan vawlei nih a chuahpimi thil hna kha ka tlaihchanh maw?’ (1 Johan 2:15-17) ‘Ziaza rawhralnak le zaangennak aa telmi nuamhsaihnak hna kha ka duh maw?’ (Salm 97:10; 101:3; Amos 5:15) Mah biahalnak na leh tikah tuah na herhmi thil kha na hngalh men lai. Mah a ṭhawng tukmi kan ruahnak asiloah kan intuarnak kha kan thlen khawh ahcun Jehovah lung kan lawmhter lai.—Salm 19:14.

14. Hawikom ṭha i thim cu zeicah a biapit tuk?

¹⁴ Hawikom ṭha i thimnak cu a biapi tukmi kehlan pathumnak a si. Kan hngalh zong, hngalh lo zongah kan hawile cu kan cungah huham an ngei tuk. (Ptb. 13:20) Kan rianṭuannak asiloah sianginn kan kainak ah kan pawngkammi hna nih Pathian ruahnak ngeih awkah a kan bawm lai lo. Asinain Khrihfa pumhnak ah hawikom ṭha kan hmuh khawh hna. Mah cu “kan i dawt khawh nakhnga le thil ṭha kan i tuahpiak khawh nakhnga” a kan forh khotu hmun a si.—Heb. 10:24, 25.

15-16. Kan ruahnak thlen awkah Satan cu zeitindah aa zuam?

¹⁵ Asinain Satan nih kan ruahnak thlen awkah aa zuam ti kha philh hlah. Kan ruahning Baibal kan i uktermi kha hrawh awkah cawnpiaknak a phunphun a hman.

¹⁶ Satan nih Eden dum ah Evi a halmi biahalnak phun kha a kan hal peng: “Pathian nih aan ti taktak hna maw?” (Gen. 3:1) Satan ukmi vawlei ah kan zumhnak ah lunghrinnak a kan ngeihtermi hi bantuk biahalnak hna hi kan theih tawn: ‘Nupa sinak aa khatmi ṭhitumnak hi Pathian nih a cohlang taktak lo maw? Chrismas le chuah ni puai hna hi Pathian nih a duh taktak lo maw? Thi i rawnh lo dingin Pathian nih na sinin aa ruahchan  taktak maw? Buchung chuahmi na dawtmi pakhat he pehtlaihnak tuah lo awkah dawtnak Pathian nih na sinin aa ruahchan taktak maw?’

17. Mi pakhat nih kan zumhnak kong he aa tlaiin lunghrinnak ngeih awkah biahalnak a kan tuah tikah zeidah kan tuah awk a si, Kolose 2:6, 7 ah a langhter bantukin a phi chuak cu zeidah a si?

¹⁷ Kan zumhnak kha kan fehter a hau. Kan zumhnak kong he aa tlaiin a biapimi biahalnak hna i a phi kha kan kawl lo ahcun kan zumhnak cungah lunghrinnak kan hun ngei kho. A donghnak ah mah lunghrinnak nih kan ruahnak le kan zumhnak kha a hrawh khawh. Cu a si ah zeidah kan tuah a herh? “A ṭhami thil le Pathian nih a lawmhmi thil le a tlingmi thil le . . . Pathian duhmi” thil kha kan hngalh khawh nakhnga kan ruahnak kha thlen a hau. (Rom 12:2) Hmaan tein hlathlainak kan tuah ahcun Baibal in kan cawnmi cu a hmaanmi a si ti kha kanmah theng nih kan zumh khawh lai. Cun Jehovah phunglam cu a hmaanmi a si ti zong kha tling tein kan zumh khawh lai. Cun fek tein hram aa sihmi thingkung bantukin ‘zumhnak ah fek tein’ a hmunmi kan si kho lai.—Kolose 2:6, 7 rel.

18. A ṭhalomi Satan vawlei huham in i huhphenh awkah zeinihdah a kan bawmh lai?

¹⁸ Kan zumhnak kha kanmah lawng nih kan fehter khawh caah kan lungthin le kan ruahnak kha tharter zungzal a hau. Zeitik caan paohah thlacam law bawmhnak hmuh awkah Jehovah sinah thiang thlarau hal. Ṭha tein ruat law na ruahnak le na lungthin kha i dothlat peng. Hawikom ṭha i thim; na ruahnak thlen awkah aan bawm khomi hawikom ṭha pawl kha i thim hna. Cutin na tuah ahcun a ṭhalomi Satan vawlei huham in naa huppheng kho lai i na hrial khawh lai. Cun “Pathian hngal kho hna hlah seh tinak ca i chonmi vanpang porhlawtnak vialte” kha na baoh khawh lai.—2 Kor. 10:5.