1. Kolose 2:4, 8 ningin Satan cu kan ruahnak uk awkah zeitindah aa zuam?

SATAN nih Jehovah kha ralchanh hna seh ti a kan duh. Cucaah kan ruahnak thlen awk, phundang cun kan ruahnak uk awk le amah nawl ngaih awkah fakpi in aa zuam. Kan lungthin a la khomi thil hna kha hmangin amah hnu kan zulh nakhnga leem awk asiloah hlen awkah aa zuam.—Kolose 2:4, 8 rel.

2-3. (a) Kolose 2:8 ah langhtermi ralrin peknak cu zeicah lungthin kan pek awk a si? (b) Hi capar ah zei kong dah kan i ruah hna lai?

² Satan i ṭih a nung tukmi hlennak tangah kan um maw? Kan um. Kolose 2:8 i Paul nih a ṭialmi ralrin peknak cu zumlotu hna caah a si lo ti kha i cinken. Thiang thlarau in chiti thuhmi Khrihfa hna caah a ṭialmi a si. (Kol. 1:2, 5) Mah lio caan i Khrihfa hna zong ṭih a nungmi hlennak tangah an rak um i tuchan ahcun hlan nakin ṭih a nung deuhmi hlennak tangah kan um. (1 Kor. 10:12) Zeicah? Satan cu vawlei ah thlak a si i zumhfekmi Pathian salle kha hlen awkah fakpi in aa zuam. (Biat. 12:9, 12, 17) Mah lengah kannih cu miṭhalo le chungthu lengnal pawl ‘an ṭhat lo chin lengmang’ lio caan ah kan nung.—2 Tim. 3:1, 13.

³ Hi capar ah Satan nih kan ruahnak uk awkah “hlennak menmen” kha hmangin zeitindah aa zuam timi kong kan i ruah hna lai. Mah lengah Satan “hlennak” pathum kong zong kan i ruah hna lai. (Efe. 6:11) Cun a changtu capar ah Satan hlennak ruangah kan ngeih khawhmi a ṭha lomi ruahnak zeitindah hloh khawh a si timi kong zong kan i ruah hna lai. Asinain Biakammi Ram an luh hnuah Israel mi pawl Satan nih a hlen hnaning in kan cawn khawhmi kong kha i ruah hmasa hna u sih.

4-6. Deuteronomi 11:10-15 ningin Israel mi cu Biakammi Ram an luh tikah lothlawh ning he aa tlaiin zeibantuk lam thar dah an cawn a hauh?

⁴ Satan nih Israel mi kha siasal biak awkah fimkhur ngaiin a leem hna. Zeitindah a tuah? Rawl an herh ti kha a hngalh, cucaah mah kha hmangin amah duhnak an tuah nakhnga aa zuam. Israel mi nih Biakammi Ram an luh tikah cinthlak ning kha a thar in an cawn a hau. Izipt ram an um lioah Israel mi nih Nail Tiva ti kha hmangin an lo kha ti an pek. Asinain Biakammi Ram ah tiva ngan a um lo caah an cinthlak a ṭhan khawh nakhnga ruah ti le dapti an herh. (Deuteronomi 11:10-15 rel; Isa. 18:4, 5) Cucaah Israel mi nih lothlawh ning lam thar kha an cawn a hau. Mah cu an caah a fawi lai lo, zeicahtiah thetse ram ah lo a thlomi tam deuh cu an rak thi.

⁵ Jehovah nih a miphun pawl kha an sining cu aa thleng lai tiah a ti hna. Cun ralrin zong a pek hna, mah cu a hmasa ahcun lothlawhnak he aa pehtlai lomi a lo men lai. Hitin a ti hna: “I ralring tuah u. Cuti a si lo ahcun nan lung cu dehhlen a si lai i nan pial lai i pathian dang hna rian kha nan ṭuan lai i nan biak sual ko hna lai.” (Deut. 11:16, 17) Jehovah nih lothlawh ning lam thar kong a chimh hna lioah a hmaan lomi pathian biak kha nan doh lai tiah zeicah ralrin a pek hna?

⁶ Israel mi nih an pawngkam ah a ummi, siasal a biami miphun hna sinah lothlawh ning lam cheukhat cawn an duh lai ti kha Jehovah nih a hngalh. Israel mi nakin an pawngkammi hna cu hmuhtonnak a ngei deuhmi an si caah Pathian miphun nih an sinin hman awk a tlakmi lam cheukhat an cawn khawh ti cu a hmaan ko. Asinain mah cu ṭih a nung tuk. Lo a thlomi Kanaan mi hna cu Baal a biami an si i an biaknaklei zumhnak cu an cungah huham a  ngei. Vancung cu Baal ta a si i amah nih ruah a surter tiah an zumh. Cu bantuk a hmaan lomi zumhnak in a miphun pawl hlen an si lai kha Jehovah nih a duh lo. Asinain Israel mi nih atu le atu Baal biak awkah an i thim. (Nam. 25:3, 5; Biac. 2:13; 1 Si. 18:18) Israel mi pawl cu zeitindah Satan sal an hung si ti kha zoh hna u sih.

7. Biakammi Ram an luh tikah Israel mi hna zumhnak cu zeitindah hneksak a si?

⁷ Satan nih a hmanmi lam pakhatnak cu an ram ah ruah sur seh timi duhnak kha a si. Kum fatin April thla donghnak lei in September thla chung tiang Biakammi Ram ah ruah ti a tlawm. Israel mi hna nunnak le hlawhtlinnak cu ruah ti cungah aa hngat. Ruah cu October thla hrawng in sur hram aa thawk. Cucaah hlawhtlinnak hmuh awkah an pawngkam ah a ummi, siasal a biami miphun hna an phungphai kha kan i zohchunh a hau tiah Israel mi nih an zumh nakhnga Satan nih a hlen hna. An pawngkam ah a ummi hna nih biaknaklei phungphai hna kha kan zulh lawngah kan pathian nih ruah a surter lai tiah an zumh. Cun Jehovah a bia lomi mah mi hna nih cutin kan tuah lawngah caan saupi khuakhennak kha kan hrial khawh lai ti zongin an zumh. Cucaah a hmaan lomi biaknak tuahsernak hna kha an tuah i a hmaan lomi Baal pathian kha an biak. 

8. Satan nih a hmanmi lam pahnihnak cu zeidah a si? Fianter.

⁸ Satan nih Israel mi hlen awkah a hmanmi lam pahnihnak cu a ṭhalomi duhnak kha a si. Siasal a biami miphun hna nih fih a nungmi thil hna an tuahnak thawngin an pathian kha an biak. Mah a hmaan lomi biaknak ah nu he, pa he biakinn ah hlawhhlang sinak hna aa tel. Siasal a biami miphun hna nih nu le nu, pa le pa sualnak le a dang nupa sualnak hna kha an awnh lawng si loin mah kha cohlan awk a tlakmi in an hmuh. (Deut. 23:17, 18; 1 Si. 14:24) Mah phungphai nih an pathian kha an ram ah rawl tampi chuahter awkah a forh tiah an zumh. Israel mi tampi cu nupa sualnak he aa tlaimi siasal a biami hna phungphai nih an lung a lak hna. Cucaah a hmaan lomi pathian biak awkah an i thim. A tak ti ahcun Satan nih a sal a sitermi hna a si.

9. Hosea 2:16, 17 ningin Israel mi nih Jehovah an hmuhning cungah an lung aa tuai nakhnga Satan cu zeitindah aa zuam?

⁹ Satan nih a hmanmi lam pathumnak cu Israel mi nih Jehovah an hmuhning cungah an lung aa tuai nakhnga aa zuammi kha a si. Profet Jeremiah chan ah Jehovah nih a hmaan lomi profet hna nih “Baal min ruangah” A miphun pawl kha A min an philhter hna tiah a ti. (Jer. 23:27) Pathian miphun nih Jehovah min hman kha an ngol i Jehovah min canah “A Ngeitu” asiloah “Bawipa” tiah sullam a ngeimi Baal min in an airolh. Mah tuahsernak nih Israel mi caah Jehovah le Baal an i dannak kha hngalh awkah a harter i Baal biaknak le Jehovah biaknak kha cawhkalh awkah a fawiter.—Hosea 2:16, 17 rel.

10. Tuchan ah Satan nih mi hlen awkah zei lam dah a hman?

¹⁰ Tuchan zongah Satan nih mah bantuk lam kha a hman. Nupa sualnak kha cohlan awk a tlakmi a lawhternak thawngin le mi kha Jehovah an hmuhning cungah an lung a tuaiter hnanak thawngin a sal a siter hna. Satan nih Jehovah an hmuhning cungah zeitindah an lung a tuaiter hna ti kha i ruah hmasa hna u sih.

11. Mi nih Jehovah an hmuhning cungah an lung aa tuai nakhnga Satan nih zeitindah aa zuam?

 ¹¹ Satan nih mi nih Jehovah an hmuhning cungah an lung aa tuai nakhnga aa zuam. Jesuh lamkaltu pawl an thih hnuah zumhpialmi Khrihfa cheukhat nih a hmaan lomi cawnpiaknak kha an hun karhter. (Lam. 20:29, 30; 2 Thes. 2:3) Mah zumhpialmi hna nih a hmaanmi Pathian kha thleidan khawh awkah an harter. Tahchunhnak ah, an Baibal ah Pathian min kha an telh ti lo. Mah canah “Bawipa” ti bantukin an airolh. Pathian pumpak min kha an hloh i “Bawipa” timi min in an airolh. Mah nih Baibal reltu hna caah Jehovah le Baibal ah langhtermi a dang “bawipa” hna an i dannak kha hngalhthiam awkah a harter. (1 Kor. 8:5) Jehovah he, Jesuh he “Bawipa” tiah an auh hna caah Jehovah le Jesuh an i lawh lonak kha hngalhthiam awkah a harter. (Johan 17:3) Mah nih Baibal cawnpiaknak a si lomi Thumkomh pathian cawnpiaknak kha a karhter. Cucaah mi tampi nih Pathian kong cu hngalh khawh a si lo tiah an zumh. Mah cu ṭih a nung tukmi lihbia a si.—Lam. 17:27.

12. Rom 1:28-31 ah a langhter bantukin a hmaan lomi biaknak nih zeidah a hlorh, a phichuak cu zeidah a si?

¹² Satan nih a ṭhalomi duhnak kha a hman. Hlanlio Israel chan ah Satan nih ziaza rawhralnak karhter awkah a hmaan lomi biaknak kha a hman. Tuchan zongah mah kha a hman ve. A hmaan lomi biaknak nih nupa sualnak tuah kha a awnh i mah kha cohlan awk a tlakmi a siter. Cucaah Pathian ka bia tiah aa timi, mi tampi nih nupa sualnak he aa tlaimi, a fiangmi Pathian phunglam kha an zul duh ti lo. Lamkaltu Paul nih a hmaan lomi biaknak nih a hlorhmi nupa sualnak ruangah a chuakmi kong kha Rom Khrihfa hna sin a cakuat ah a langhter. (Rom 1:28-31 rel.) “Tuah awk a si lomi thil” ah nu le nu, pa le pa sualnak i telin nupa sualnak dihlak aa tel. (Rom 1:24-27, 32; Biat. 2:20) A fiangmi Baibal cawnpiaknak zulh cu kan caah a biapi tukmi a si.

13. Satan nih mi hlen awkah a hmanmi a dang lam cu zeidah a si?

¹³ Satan nih Lung duhnak kha a hman. Kanmah ca le kan chungkhar zohkhenhnak caah thiamnak cheukhat cawn kan duhmi cu a phung a si ko. (1 Tim. 5:8) Mah thiamnak hna kha sianginn kainak le ca fakpi in i zuamnak thawngin ngeih khawh a si. Asinain kan i ralrin a hau. Ram tampi ah siangngakchia nih sianginn ah hman awk a tlakmi thiamnak  lawng si loin vawlei fimnak zong an cawn. Tahchunhnak ah, sianginn ah siangngakchia pawl kha Pathian kong he aa tlaiin lunghrinhnak ngeih awk le Baibal kha upat lo awkah an forh hna. Siangngakchia pawl kha mifim dihlak nih nunnak cu thlennawnnak in aa thawk ti kha an zumh tiah an cawnpiak hna. (Rom 1:21-23) Cu bantuk cawnpiaknak nih ‘Pathian fimnak’ kha a ralchanh—1 Kor. 1:19-21; 3:18-20.

14. Minung fimnak nih zeidah a hlorh?

¹⁴ Minung fimnak nih a dingmi Jehovah phunglam kha zei ah a rel lo i a ral hmanh a ralchanh. Mah cu thlarau nih a chuahtermi ziaza a si lo, mah canah “minung sining nih a tuah tawnmi” tu a si. (Gal. 5:19-23) Mah nih mi kha i porhlawt awkah a forh hna i a phichuak cu “anmah zawn lawng aa ruatmi” an hung si. (2 Tim. 3:2-4) Mah ziaza cu Pathian nih a salle ngeihter a duhmi hna toidornak lungthin he aa ralkah. (2 Sam. 22:28) Sianghleiruun a kaimi Khrihfa cheukhat nih Pathian ruahnak si loin vawlei ruahnak tu kha an hun cohlan. Mah kha zeirel loin kan um ahcun zeidah a cang kho ti kha i ruah hna u sih.

15-16. Unaunu pakhat hmuhtonnak in zeidah na cawn khawh?

¹⁵ Kum 15 leng caantling rian a ṭuanmi unaunu nih hitin a ti: “Tipil a ing cangmi Jehovah Tehte pakhat in sianghleiruun kai ṭih a nunnak kong kha ka rel i ka theih, asinain mah ralrin peknak kha zei ah ka rel lo. Mah ruahnak cheuhnak cu keimah he aa pehtlai lo tiah ka ruah.” Unaunu nih zei bantuk buaibainak dah a ton? Hitin a ti: “Sianginn ca zohnak ah a caan le thazaang tam tuk ka pek caah hlan bantukin Jehovah sinah thla ka cam kho ti lo, cun midang he Baibal kong i ruah awk le  pumhnak caah ṭha tein i timtuah awkah ka ba tuk. Lunglawmh awk ngai a simi cu a sangmi fimcawnnak nih Jehovah he kan i pehtlaihnak a hrawh i ka ngol a hau ti kha ka hun hngalh. Cucaah ka ngol.”

¹⁶ A sangmi fimcawnnak cu mah unaunu a ruahnak cungah zeitindah huham a ngeih? Hitin a ti: “Kaa thimmi fimcawnnak nih midang palhnak cungah lungthin pek awkah a ka cawnpiak, a hleiin unau pawl an palhnak kha a si. Cun an sinin tam tuk i ruahchan awk le an sinin i ṭhen awk zongah a ka cawnpiak. Mah ruahnak kha caan saupi tiang ka rak doh. Mah ka hmuhtonnak nih vancung kan Pa nih a bupi hmangin a kan pekmi ralrin peknak zeirel loin um cu zeitluk in dah ṭih a nun ti kha a ka hngalhter. Jehovah nih keimahle keimah kaa hngalhmi nakin ṭha deuh in a ka hngalh. A bia kha ka ngaih awk a si.”

17. (a) Zei bantuk biakhiahnak dah kan tuah awk a si? (b) A hnu capar ah zei kong dah kan i ruah hna lai?

¹⁷ Satan vawlei “fimnak, santlaihnak zeihmanh a ngei lomi fimnak, hlennak menmen a simi” kha sal i siter lo awkah biakhiak hna u sih. Zeitikhmanh ah Satan kha i hlenter hlah. (1 Kor. 3:18; 2 Kor. 2:11) Jehovah na hmuhning cungah na lung aa tuai nakhnga lo Satan kha nawl awnh hlah. A sangmi ziazalei Jehovah phunglam kha zul. Jehovah ruahnak cheuhnak kha zei rel loin na um nakhnga lo Satan kha nawl awnh hlah. Asinain hi vawlei ruahnak cu na cungah huham a ngei ti na hngalh ahcun zeidah na tuah awk a si? Baibal nih “ralhruang fekfek” bantuk a simi ruahnak le ziaza hna hrawh awkah zeitindah a kan bawmh khawh ti kha a hnu capar kan i ruah hna lai.—2 Kor. 10:4, 5.