CAWN AWK CAPAR 25
Lungretheihnak Inkhawh awkah Jehovah kha i Bochan
“Lungrethei ngaingai in a ummi . . . ka si.”—1 SAM. 1:15.
HLA 30 Ka Pa, Ka Pathian le Ka Hawi
LANGHTERNAK *
1. Jesuh ralrin peknak kha zeicah kan ngaih awk a si?
JESUH nih donghnak caan he aa tlaiin a chimchung lioah hitin a ti: “I ralring tuah u. . . . khuasak tintuk harnak lawng kha ruat hlah u.” (Luka 21:34) Mah ralrin peknak kha kan ngaih a hau. Zeicah? Atu ah mi kip nih an tonmi buaibainak kha kan ton ve caah a si.
2. Unau pawl nih zei bantuk lungretheihnak dah an ton?
2 A caan ah caankhatte ah buaibainak tampi kan tong. A tanglei tahchunhnak hna hi ruathmanh. Caan saupi chung thahri fah zawtnak a ngeimi, Jehovah Tehte pakhat a simi John * cu a nupi nih an i umnak kum 19 a si hnuah a kaltak. Mah tikah a ngaih a chia tuk. Cun a fanule pahnih nih Jehovah kha an kaltak. Bob le Linda te nuva cu mah he aa lo lomi zuamcawhnak an tong. An pahnih ningin an rian an sung i an inn zong an sung. Mah lengah Linda cu a nunnak caah ṭih a nungmi lung zawtnak a ngei, cun a dang hliahcang fah zawtnak zong a ngei.
3. Filipi 4:6, 7 ningin zeidah kan zumh khawh?
3 A kan Sertu le dawtnak a ngeimi kan Pa, Jehovah nih lungretheihnak kan ton tikah kan intuar ning a hngalhthiam ti kha kan zumh khawh. Cucaah kan tonmi buaibainak hna tawnghtham khawh awkah bawmh a kan duh. (Filipi 4:6, 7 rel.) Baibal ah Pathian salle nih an tonmi zuamcawhnak kong a langhtermi tampi a um. Mah lungretheihnak hna inkhawh awkah Jehovah nih a salle a bawmh hna ning kong zong a langhter. Tahchunhnak cheukhat i ruah hna u sih.
Elijah—“Kanmah Bantuk Minung a Si ve Ko”
4. Elijah nih zei bantuk zuamcawhnak hna dah a ton, Jehovah kong he aa tlaiin zeitindah a ruah?
4 Elijah cu a har tukmi caan chungah Jehovah rian a ṭuan i a fak tukmi zuamcawhnak hna a tong. Israel mi tuanbia ah zumhawk a tlak lomi siangpahrang Ahab nih Baal a biami miṭhalo Jezebel kha a ṭhit. An pahnih in ram chungah Baal biaknak kha an karhter i Jehovah profet tampi kha an thah hna. Asinain Elijah cu a luat. Jehovah aa bochan caah mangṭam zongin a luat. (1 Si. 17:2-4, 14-16) Mah lengah Elijah nih Baal profet hna le Baal a biatu hna nih an ralchanh tikah Jehovah kha aa bochan. Israel mi kha Jehovah biak awkah a forh hna. (1 Si. 18:21-24, 36-38) Mah a har tukmi caan chungah Jehovah nih atu le atu a huhphenh ning le a bawmh ning kha Elijah nih a hmuh.
Elijah nih thazaang a hmuh ṭhan nakhnga bawmh awkah Jehovah nih vancungmi kha a thlah (Catlangbu 5-6 zoh) *
5-6. Elijah nih 1 Siangpahrang 19:1-4 ningin zeitindah a intuar, Jehovah nih Elijah a dawt kha zeitindah a langhter?
5 Siangpahrang pakhatnak 19:1-4 rel. Asinain Jezebel nih thah a timh tikah Elijah cu ṭihnak a hun ngei. Cucaah Beersheba khua ah a tli. A lung a dongh tuk caah Pathian sinah “a thih nakhnga a hal.” Zeinihdah cutin a intuarter? Elijah cu “kanmah bantuk minung” mitlinglo a si ve. (Jeim 5:17) Lungretheihnak le thabat tuknak nih a lung a donghtermi a si men lai. Cun Elijah nih Israel mi cu an ṭhancho lo caah Jehovah biak awkah tha ka pekmi hna cu san a tlai lo i Jehovah a biami cu keimah lawng ka si cang tiah a ruah caah a si men lai. (1 Si. 18:3, 4, 13; 19:10, 14) Zumhfekmi profet pakhat nih cutin a intuar caah kan khuaruah a har men lai. Asinain Jehovah nih Elijah a intuarnak kha a hngalhthiam.
6 Jehovah nih Elijah kha a intuarnak ruangah a mawhchiat lo. Mah canah thazaang a ngeih ṭhan nakhnga a bawmh. (1 Si. 19:5-7) A hnuah Jehovah nih Elijah kha khuaruahhar a simi a ṭhawnnak a hmuhsaknak thawngin a ruahnak kha nem tein a remhpiak. Cun Jehovah nih Israel ram chungah Baal a bia lomi, mi 7,000 an um rih tiah a chimh. (1 Si. 19:11-18) Cuticun Jehovah nih Elijah a dawt kha a langhter.
Jehovah nih a Kan Bawmh Ning
7. Jehovah nih Elijah a bawmh ningin zeidah kan zumh khawh?
7 Lungretheihnak na tong maw? Jehovah nih Elijah intuarnak a hngalhthiam ti hngalh cu zeitluk in dah hnemtu a si. Mah nih kan intuarnak zong Jehovah nih a hngalhthiam ti kha a kan zumhter. Jehovah nih ri kan ngeihmi kha a hngalh i kan ruahmi le kan intuarnak hmanh kha a hngalh. (Salm 103:14; 139:3, 4) Elijah bantukin Jehovah kan i bochan ahcun Jehovah nih lungretheihnak a chuahtermi buaibainak hna kha tawnghtham khawh awkah a kan bawmh lai.—Salm 55:22.
8. Lungretheihnak inkhawh awkah Jehovah nih zeitindah aan bawmh lai?
8 Lungretheihnak nih na sining cu zeitikhmanh ah aa thleng ti lai lo tiah aan ruahter khawh i na lung aan donghter khawh. Cutin na intuar ahcun Jehovah nih na lungretheihnak inkhawh awkah aan bawmh lai kha i cinken. Zeitindah aan bawmh lai? Na tonmi buaibainak le na intuarnak kong kha a sinah chim awkah aan sawm. Cun na thlacamnak kha aan leh lai. (Salm 5:3; 1 Pet. 5:7) Cucaah na tonmi buaibainak kong he aa tlaiin Jehovah sinah thla cam zungzal. Elijah bantukin direct in cun aan chawn lai lo nain a Bia, Baibal le a bupi hmangin aan chawnh lai. Baibal ah aa ṭialmi pawl na relmi nih hnemhnak le ruahchannak aan pek khawh. Unau hna zong nih thazaang an in pek khawh.—Rom 15:4; Heb. 10:24, 25.
9. Zumhawk a tlakmi hawikom nih zeitindah a kan bawmh khawh?
9 Jehovah nih a rian cheukhat kha Elisha pek awkah Elijah kha a fial. Cuticun Jehovah nih Elijah kha a lung a dongh tikah amah a bawm kho hngami hawikom ṭha a pek. Cu bantukin zumhawk a tlakmi kan hawi pakhat kha kan intuarnak kong kan chimh tikah lungretheihnak inkhawh awkah a kan bawmh khawh. (2 Si. 2:2; Ptb. 17:17) Na buaibainak le na intuarnak kong na chimh khawhmi pakhat hmanh an um lo tiah na ruah ahcun thazaang aan pe khomi Khrihfa nutling, patling pakhat he i ton awkah Jehovah sinah thlacam.
10. Elijah hmuhtonnak nih zeitindah ruahchannak a kan ngeihter, Isaiah 40:28, 29 ah langhtermi biakam nih zeitindah a kan bawmh khawh?
10 Jehovah nih Elijah kha lungretheihnak inkhawh awk le kum tampi chung zumhfek tein a rian ṭuan khawh awkah a bawmh. Elijah hmuhtonnak nih ruahchannak a kan ngeihter. A caan ah pumsalei le lungthinlei in kan bat tuk tikah kan lungre a thei tuk men lai. Asinain Jehovah kan i bochan ahcun amah biak zungzal khawh awkah kan herhmi thazaang a kan pek lai.—Isaiah 40:28, 29 rel.
Hannah, David le Salm Caṭialtu Pa nih Jehovah an i Bochan
11-13. Lungretheihnak nih hlanlio Pathian salle pathum kha zeitindah a hnorsuan hna?
11 Baibal ah an kong ṭialmi midang zong lungretheihnak an tong. Tahchunhnak ah, Hannah cu fa a ngeih khawh lo ruangah ningzahnak 1 Sam. 1:2, 6) Hannah cu a lungretheihnak nih a ngaih a chiatter chin. Cucaah a ṭap i rawl ei kha a duh lo.—1 Sam. 1:7, 10.
a tong i a va a nupi dang serhsatnak zong a tong. (12 A caan ah Siangpahrang David zong a lungre a thei. A tonmi harnak kha ruathmanh. A tuahmi palhnak tampi ruangah ka sual tuk timi ruahnak a ngei. (Salm 40:12) A dawtmi a fapa Absalom nih a ralchanh i a hnuah Absalom cu thah a si. (2 Sam. 15:13, 14; 18:33) Cun a hawikom ṭha bik zong nih David kha a rak rawi. (2 Sam. 16:23–17:2; Salm 55:12-14) Salm Baibal tampi ah David nih a lungdonghnak kong le Jehovah a bochannak a fehnak kong kha a langhter.—Salm 38:5-10; 94:17-19.
Salm caṭialtu pa kha lunglawm tein Jehovah biak ṭhan awkah zeinihdah a bawmh? (Catlangbu 13-15 zoh) *
13 Salm caṭialtu pa zong nih miṭhalo pawl nunning kha a hun nahchuah hna. Anih cu Pathian “biakinn” ah rian a ṭuanmi Levi mi Asaph tefa a si men lai. Mah salm caṭialtu pa cu a lungretheihnak ruangah lung nuam lo le lungsi loin a um. Pathian biaknak in hmuhmi thluachuah cung hmanhah lunghrinnak a hun ngei.—Salm 73:2-5, 7, 12-14, 16, 17, 21.
14-15. Bawmhnak hmuh awkah Jehovah aa bochanmi Baibal ah an kong ṭialmi pathum hna sinin zeidah kan cawn khawh?
14 Mah Jehovah salle pathum nih bawmhnak hmuh awkah Jehovah an i bochannak kong kha an chim. An lungretheihnak kong he aa tlaiin Jehovah sinah thla an cam. An lungre a theih tuknak a ruang kha Jehovah sinah zalong tein an chim. Cun Jehovah biaknak hmun ah an kal zungzal.—1 Sam. 1:9, 10; Salm 55:22; 73:17; 122:1.
15 Jehovah nih an pathum ningin zaangfahnak he a lehrulh hna. Hannah cu lungdaihnak a rak hmu. (1 Sam. 1:18) David nih hitin a ti: “Miṭha nih harnak tampi a in tawn, sihmanhselaw harnak a inmi chung khan BAWIPA nih a khamh.” (Salm 34:19) Cun salm caṭialtu pa zong nih a hnuah dawtnak in ruahnak a ka cheuh i Jehovah nih ‘ka kut in a ka hruai’ tiah a ruah. Hitin hla a sak: “Kei ca tu ahcun, Pathian pawng um cu a va nuam hringhran dah! BAWIPA chungah khan himnak ka hmuh.” (Salm 73:23, 24, 28) An sinin zeidah kan cawn khawh? A caan ah lungretheihnak a kan ngeihter khomi buaibainak kan tong men lai. Asinain Jehovah nih midang a rak bawmh hna ning kong kha kan ruah, amah i bochan in a sinah thla kan cam i tuah awkah a kan fialmi kan tuahnak thawngin a nawl kan zulh ahcun kan tawnghtham khawh lai.—Salm 143:1, 4-8.
Jehovah i Bochan law Hlawhtlinnak Hmu
A hmasa ah unaunu pakhat cu amah lawngin um a duh, asinain midang bawmh khawhnak lam a kawl tikah thil sining cu aa thleng (Catlangbu 16-17 zoh)
16-17. (a) Jehovah le a salle sinin zeicah kan i ṭhen awk a si lo? (b) Zeitindah thazaang kan hmuh ṭhan khawh?
16 Mah hna pathum kong nih Jehovah le a miphun sinin kan i ṭhen awk a si lo timi a biapi tukmi kong zong a kan cawnpiak. (Ptb. 18:1) A vapa nih a kaltak tikah a lungre a thei tukmi Nancy nih hitin a ti: “Aho he hmanh i ton ka duh lo caan asiloah i chawnh ka duh lo caan tampi a um. Asinain keimah lawngin ka um tikah ka ngaih a hung chia chin.” Nancy nih buaibainak a tong vemi midang bawmh khawhnak lam a kawl tikah thil sining cu aa thleng. Hitin a ti: “Midang nih an tawnghtham ning kong an chimmi kha ka ngaih. Anmah le an buaibainak kha lungthin ka pek tikah keimah le ka buaibainak cungah lungthin ka pe kho tuk ti lo ti kha ka hun hngalh.”
17 Kan i pumhnak thawngin thazaang kan hmu ṭhan kho. Kan i pumh tikah “a kan bawmtu le a kan hnemtu” si awkah Jehovah kha caanṭha tam deuh kan pekmi a si. (Salm 86:17, NW) Jehovah nih a thiang thlarau, Baibal le a salle kha hmangin thazaang a kan pek. Kan i pumh tikah “pakhat le pakhat kan i bawm” kho. (Rom 1:11, 12) Unaunu Sophia nih hitin a ti: “Jehovah le unau pawl nih inkhawhnak ngeih awkah an ka bawmh. Ka caah a biapi bikmi cu pumhnak a si. Phungchimnak le pumhnak ah tam deuh kaa tel tikah lungretheihnak kha ka inkhawh deuh ti kha ka hngalh.”
18. Kan lung a dongh tikah Jehovah nih zeidah a kan pek khawh?
18 Kan lung a dongh tikah Jehovah nih hmailei ah lungretheihnak a um ti lai lo tiah bia a kan kamh lawng si loin atu zongah lungretheihnak inkhawh awkah a kan bawmh khawh ti kha philh hlah. Lungretheihnak le ruahchannak ka ngei lo timi intuarnak hna tei khawh awkah ‘duhnak lungthin le ṭhawnnak a kan pek.—Fil. 2:13, NW.
19. Rom 8:37-39 nih zeidah a kan zumhter?
19 Rom 8:37-39 rel. Lamkaltu Paul nih Pathian dawtnak he zeihmanh nih a kan ṭhen kho lai lo ti kha a kan zumhter. Lungretheihnak inkhawh aa zuammi unau pawl kha zeitindah kan bawmh khawh hna? A hnu capar ah zaangfahnak langhternak thawngin le lungretheihnak a tongmi unau pawl bawmhnak thawngin Jehovah i zohchunh khawh ning kong kha kan i ruah hna lai.
HLA 44 Toidormi Thlacamnak
^ cat. 5 Lungretheih tuknak asiloah caan saupi chung lungretheihnak nih lungthinlei le pumsalei in harnak a kan pek khawh. Jehovah nih zeitindah a kan bawmh khawh? Jehovah nih Elijah kha lungretheihnak inkhawh awkah zeitindah a bawmh timi kong kan i ruah hna lai. A dang Baibal ah an kong ṭialmi hna sin zongin lungretheihnak ton tikah Jehovah bawmhnak hmuh awkah zeidah tuah a herh timi kong kha kan hngalh lai.
^ cat. 2 An min thlen a si.