1. A hramthawk tein Pathian rianṭuannak ah zeidah a lang?

JEHOVAH le Jesuh cu a hramthawk tein an lung aa rual. Jehovah nih thil dang vialte hlanah Jesuh kha a ser hmasa bik. Mah hnuah Jesuh cu Pathian he rian an ṭuanṭi i ‘a pawngah rianthiam ngaimi bantukin a rak um.’ (Ptb. 8:30) Jehovah salle zong nih an hmuhmi rian kha hmunkhat te ah an ṭuanṭi. Tahchunhnak ah, Noah le a chungkhar cu hmunkhat ah lawng an saṭi. A hnuah Israel mi cu puan biakinn saknak, phoihnak le hmunkhat hnu hmunkhat ṭhialnak ah rian an ṭuanṭi hna. Biakinn ah Jehovah kha thangṭhat awkah hmunkhat ah hla an saṭi i ringawn a phunphun an tum. Jehovah miphun nih mah thil vialte an tuah khawhmi cu hmunkhat ah rian an ṭuanṭi caah a si.—Gen. 6:14-16, 22; Nam. 4:4-32; 1 Chan. 25:1-8.

2. (a) A hmasa Khrihfa hna he aa tlaiin i cinken awk tlak cu zeidah a si? (b) Zei biahalnak hna dah kan i ruah hna lai?

 ² Kumzabu pakhatnak i Khrihfa hna zong hmunkhat ah rian an ṭuanṭi. Annih cu an sining le an rian aa dang cio ko nain an lung aa rual tiah lamkaltu Paul nih a ti. An dihlak in an Hruaitu Jesuh Khrih hnu kha an zulh. Paul nih annih kha hmunkhat ah rian a ṭuanṭimi, pum chungnge tampi a ngeimi pum pakhat he a tahchunh hna. (1 Korin 12:4-6, 12 rel.) Tuchan ah tah zeitin? Phungchim rian ah, Khrihfabu ah le innchungkhar ah zeitindah rian kan ṭuanṭi khawh?

3. Lamkaltu Johan nih zei langhnak dah a hmuh?

³ Kumzabu pakhatnak ah lamkaltu Johan nih muko a tummi vancungmi pasarih kha langhnak ah a hmuh hna. A panganak vancungmi nih a muko a tum tikah “van in vawlei ah arfi pakhat a tlami” kha a hmuh. Mah “arfi” nih tawh pakhat hmangin khorthuk pi kha a awn. Mah tikah khor chungin meikhu chahpi an hung chuah i mah chungin khaubawk an chuak. Mah khaubawk nih ram hring le thingkung pawl harnak pek canah “an cal ah Pathian hmelchunhnak a ngei lomi” kha an doh hna. (Biat. 9:1-4) Mah khaubawk run nih Moses chanah Izipt ram ah an tuah bantukin rawhnak tampi a chuahter khawh ti kha Johan nih a hngalh. (Ex. 10:12-15) Johan nih a hmuhmi mah khuabawk run nih Jehovah biaceihnak kong a thanhmi chiti thuhmi Khrihfa kha a aiawh hna. Vawleicung nun ding aa ruahchanmi mi nuai tampi zong an sinah an i fon ve. Phungchim rian kha lungrual tein an ṭuanṭi. Mah rian nih mi tampi kha a hmaan lomi biaknak in luat awk le Satan huham tangin luat awkah a bawmh hna.

4. Pathian miphun nih zei rian dah an ngeih, cutin tuah khawhnak lam cu zeidah a si?

⁴ Donghnak a rat hlanah vawleicung pumpi ah “thawngṭha” chim ding rian kan ngei. Mah cu a ngan tukmi rian a si. (Matt. 24:14; 28:19, 20) “Nunnak ti” “a haalmi paoh” sawm awk rian kan ngei. Mah cu Baibal biatak kong hngalhthiam a duhmi vialte cawnpiak an herh tinak a si. (Biat. 22:17) Asinain hmunkhat ah rian kan ṭuanṭi i kan i ‘funtom’ lawngah cutin kan tuah khawh lai.—Efe. 4:16.

5, 6. Phungchim rian nih zeitindah kan lung a rualter?

⁵ Mi tam khawh chung tam sin phung kan chim khawh nakhnga phungchim rian kha ṭha tein tlangtlak a hau. Khrihfabu sinin kan hmuhmi lamhruainak nih cutin tuah khawh awkah a kan bawmh. Phungchimnak ca tonnak kan tuah hnuah Pennak kong thawngṭha kha mi sinah kan chim. Cun Baibal hrambunhmi cauk nuai tampi kha mi kan pek  hna. A caan ah special phungchimnak campaign ah kan i tel. Mah rian i naa tel tikah aa khatmi thawngṭha a chimmi vawleicung pumpi i unau tampi le vancungmi hna he rian na ṭuanṭimi a si.—Biat. 14:6.

⁶ Vawleicung pumpi i phungchim rian a phichuak kong kha Yearbook i kan rel tikah kan lung a cawlcang tuk. Civui ah rak i pumh ve awkah mi kha lungrual tein kan sawm hna. Civui ah kan theihmi phungchimnak, drama le hmuhsaknak hna cu an i khat dih. Mah nih Jehovah kha a ṭha bik pek awkah a kan forh. Cun kum fatin tuahmi Ruahnolhnak ah kan i pumh tik zongah vawleicung pumpi unau cu kan lung aa rual. (1 Kor. 11:23-26) Jehovah nih kan caah a tuahmi ca kan i lawmhnak le Jesuh nawlbia kan ngaih langhter awkah Nisan thla 14, nitlak hnuah hmunkhat ah kan i pum. Ruahnolhnak kan tuah hlan zarh tlawmpal lioin mi tam khawh chung tam an i pumh khawh ve nakhnga kan sawm hna.

7. Hmunkhat i rian kan ṭuanṭi tikah zeidah kan tuah khawh?

⁷ Khaubawk pakhat nih amah tein thil tampi a tuah kho lo. Cu bantukin kanmah lawngin vawleicung pumpi ah phung kan chim kho lo. Asinain hmunkhat ah rian kan ṭuanṭi caah thangṭhatnak le upatnak vialte hmuh awkah aa tlakmi Jehovah kong kha mi tampi sinah kan chim khawhmi a si.

8, 9. (a) Khrihfa pawl lungrual tein um ding cawnpiaknak caah Paul nih zei tahchunhnak dah a hman? (b) Khrihfabu ah zeitindah rian kan ṭuanṭi khawh hna?

⁸ Paul nih Efesa khua ah a ummi hna kha Khrihfabu zeitindah dirh ding ti a chimh hna i Khrihfabu chungmi kip nih “a lam kip in kan ṭhan awk a si” tiah a ti hna. (Efesa 4:15, 16 rel.) Khrihfa kip nih Khrihfabu lungrual tein um awk le Khrihfabu Hruaitu Jesuh hnu zulh awkah an bawmh khawh ti fianternak caah Paul nih minung pum kha a hman. “Pum chung i a ummi hliah le caang vialte nih khan pum cu kekkuai loin an ṭem an ṭawn” tiah Paul nih a ti. Mino asiloah upa kan si ah siseh, a ngan a dammi asiloah a dam lomi kan si ah siseh zeidah kan tuah awk a si?

⁹ Jesuh nih Khrihfabu hruaitu dingah Khrihfa upa pawl kha rian a pek hna. Cucaah annih kha kan upat hna awk a si i an kan pekmi lamhruainak hna kha kan zulh awk a si. (Heb. 13:7, 17) Asinain cutin tuah cu a zungzal in cun a fawi lo. Cucaah Jehovah sinah bawmhnak kan hal khawh. Khrihfa upa nih an kan pekmi zei bantuk lamhruainak paoh kha zulh awkah thiang thlarau nih a kan bawmh khawh. Kan i toidor i Khrihfa upa pawl he rian kan ṭuanṭi ahcun Khrihfabu caah zeitluk in dah bawmtu a si lai ti kha ruat. Kan Khrihfabu ah lungrualnak  a um lai i pakhat le pakhat kan i dawtnak zong a fek chin lai.

10. Bu rianṭuantu hna nih Khrihfabu ah lungrualnak a um nakhnga zeitindah an bawmh? (A hramthawknak hmanthlak zoh.)

¹⁰ Bu rianṭuantu hna zong nih Khrihfabu ah lungrualnak a um nakhnga an bawmh. Khrihfa upa pawl bawmh awkah fakpi in an i zuam i an tuahmi vialte caah kan i lawm tuk. Tahchunhnak ah, bu rianṭuantu hna nih phungchimnak ah hmanmi cauk pawl a za in a um nakhnga an timhtuah i pumhnak ah a rami hna kha lunglawm tein an don hna. Biakinn remhnak le thianhhlimhnak rian zong kha teima tein an ṭuan. Mah unaupa pawl he rian kan ṭuanṭi ahcun Jehovah kha lungrual tein le ningcang tein kan biak khawh lai.—Lamkaltu 6:3-6 he tahchunh.

11. Mino pawl nih Khrihfabu ah lungrualnak a um nakhnga zeitindah an bawmh khawh?

¹¹ Khrihfa upa cheukhat cu kum tampi chung Khrihfabu rian kha an ṭuan. Asinain an hun upat tikah a hlan tlukin an ṭuan kho ti men lai lo. Mah tikah mino unaupa pawl nih an bawmh khawh hna. Annih kha ṭha tein cawnpiak an si ahcun Khrihfabu rian kha tam deuh in an ṭuan khawh lai. Rian aa zuammi bu rianṭuantu pawl cu hmailei ah Khrihfa upa rian an ṭuan kho. (1 Tim. 3:1, 10) Mino Khrihfa upa cheukhat cu peng zohkhenhtu rian ṭuan khawh ding tiangin an ṭhancho caah Khrihfabu tampi kha an tlawn hna i unau pawl kha an bawmh hna. Mah mino pawl nih lungtho tein unau pawl an bawmh hna caah kan i lawm tuk.—Salm 110:3; Phungchimtu 12:1 rel.

12, 13. Chungkharmi dihlak hmunkhat i rianṭuanṭi awkah zeinihdah a bawmh khawh hna?

¹² Chungkharmi pakhat cio kha lungrual tein rianṭuanṭi awkah zeinihdah a bawmh khawh hna? Zarh fatin tuahmi chungkhar pumhnak nih a bawmh khawh hna. Nulepa le fale cu Jehovah kong hmunkhat i an cawnṭi tikah pakhat le pakhat an i dawtnak cu a fek chin. Chungkhar pumhnak ah phungchim rian he aa tlaiin an i timhtuah ahcun lohmun ah hmualngei tein an i tel kho lai. Chungkharmi pakhat cio nih biatak kong an chimmi an theih tikah le Jehovah an dawt i a duhnak tuah an duhmi kha an hmuh tikah pakhat le pakhat an i naih chin.

¹³ Nuva hna cu hmunkhat ah zeitindah rian an ṭuanṭi khawh? (Matt. 19:6) An pahnih in Jehovah an dawt i hmunkhat i an biakṭi tikah an innchungkhar cu a nuam lai i an lung aa rual lai. Abraham le Sarah, Isak le Rebekah, Elkanah le Hannah bantukin pakhat le pakhat  cungah dawtnak an langhter awk a si. (Gen. 26:8; 1 Sam. 1:5, 8; 1 Pit. 3:5, 6) Nuva hna nih cutin an tuah tikah an lung aa rual lai i Jehovah he an i naih deuh lai.— Phungchimtu 4:12 rel.

14. Jehovah a bia lomi innchunghawi na ngeih ahcun nan innchungkhar a feh nakhnga zeidah na tuah khawh?

¹⁴ Jehovah a bia lomi he i ṭhi-um hlah u tiah Baibal nih fiang tein a ti. (2 Kor. 6:14) Asinain Jehovah Tehte a si lomi hna he aa ṭhi-ummi unau pawl an um. Cheukhat cu an i ṭhit-um hnuah biatak an hun hngalh, asinain an innchunghawi pawl tu cu Jehovah Tehte an hung si lo. A dang tu cu Jehovah a biami he an i ṭhi-um ko nain a hnuah an innchunghawi nih Khrihfabu kha an kaltak men lai. Cu bantuk thil sining hna ah Khrihfa hna nih Baibal ruahnak cheuhnak an zulhnak thawngin an innchungkhar fehter awkah an si khawh chungin an i zuam. Mah cu a zungzal in cun a fawi men lai lo. Tahchunhnak ah, Mary le a vapa David cu hmunkhat ah Jehovah an biaṭi. A hnuah David cu aa pum ti lo. Asinain Mary cu nupi ṭha si awkah aa zuam peng i Khrihfa ziaza a langhter. A fale paruk kha Jehovah kong a cawnpiak hna i pumhnak le civui hna ah a kalpi hna. An fale cu an cuza i an dihlak in inn in an chuah tikah Mary caah a har tuk ko nain Jehovah kha a biak zungzal. Asinain a hnuah Mary nih a chiahpiakmi mekazin pawl kha David nih a hun rel. Cun pumhnak cheukhat ah a hun i pum. Kumruk a simi a tupa te nih a caah ṭhutdan a chiahpiak peng i David aa pumh lo tikah “Ka pu, tuni pumhnak ah kaan hlam tuk” tiah a ti tawn. David cu kum 25 hnuah Jehovah sinah a kir ṭhan, atu ah cun a nupi he Jehovah kha lunglawm tein an biaṭi cang.

15. An i umnak a sau cangmi hna nih aa ṭhi-umkami hna kha zeitindah an bawmh khawh hna?

¹⁵ Satan nih chungkhar pawl kha a doh hna. Mah cu nuva hna nih hmunkhat ah  Jehovah an biakṭi a hauhnak a ruang pakhat a si. Nan i umnak cu zei can a si cang hmanhah nan innchungkhar fehter awkah zeitindah ka chim lai asiloah ka tuah lai ti kha ruat. Nan i umnak a sau cang ahcun aa umkami hna kha nan bawmh khawh hna. Chungkhar pumhnak nan tuah tikah nan sawm khawh hna. Mah tikah an i umnak zei can a si cang hmanhah pakhat le pakhat cungah dawtnak langhter a hau i kan lung aa rual a hau ti kha kha an hngalh lai.—Titas 2:3-7.

16, 17. A lung aa rualmi Pathian salle nih zeidah an i ngaih?

¹⁶ Israel mi cu Jerusalem ah Lanhtak Puai ca i an kal tikah hmunkhat ah rian an ṭuanṭi. An khuallam ca i a herhmi vialte kha an timhtuah. Cun hmunkhat ah an kalṭi i an i bawm hna. Biakinn an phanh tikah an dihlak in lungrual tein Jehovah kha an thangṭhat i an biakṭi. (Luka 2:41-44) Tuchan zongah vawlei thar nunnak ca kan i timhtuah tikah lungrual tein hmunkhat ah kan ṭuanṭi a hau. Cutin tuahnak ah ṭhancho na herh maw?

¹⁷ Hi vawlei mi hna cu thil sining tampi ah an lung aa khat lo i a do hmanh an i do. Asinain daihnak hmuh awk le biatak hngalhthiam awkah Jehovah nih a kan bawmh caah kan i lawm. Vawleicung pumpi ah a ummi a mi hna nih a duhmi lam in Jehovah kha an biak. A hleiin hi donghnak caan ah Jehovah miphun cu hlan nakin an lung aa rual chinchin. Isaiah le Mikah nih an rak chimchung bangin “Bawipa tlang” ah lungrual tein an kaiṭi. (Isa. 2:2-4; Mikah 4:2-4 rel.) Vawleicung mi vialte nih Jehovah biak awkah hmunkhat ah ‘an i funtom’ i rian an ṭuanṭi tikah zeitluk in dah kan i nuamh lai khi na mitthlam ah cuanter hmanh.