1, 2. (a) Tipil innak cu zeicah a biapimi biakhiahnak a si ti kha fianter. (b) Tipil in hlanah zeidah i fian hmasa a herh?

NANG cu tipil in a duhmi mino pakhat na si maw? Mah cu na hmuh khawhmi tinvo lakah a sunglawi bikmi a si. A hmasa capar ah kan cawn cang bantukin tipil innak cu a biapi tukmi biakhiahnak a si. Jehovah sin naa pumpeknak, phundang cun Jehovah kha a zungzal in kaan biak lai i ka nunnak ah na duhnak pakhatnak ah ka chiah lai tiah bia naa kam kha mi hmaiah na langhtermi a si. Mah cu a biapi tukmi biakamnak a si. Cucaah biakhiahnak a tuah khomi nutling, patling na si tik, nangmah lungtho tein cutin tuah na duh tik le Pathian sin, i pumpek timi a sullam na hngalhthiam tik lawngah tipil na in ding a si.

² Asinain tipil in awkah timhcia ka si rih lo tiah na ruah men lai. Asiloah nangmah nih cun timhcia ka si cang tiah na ruah men ko lai nain na nu le na pa nih na upat deuh tik le hmuhtonnak tam deuh na ngeih tik tiang hngahter an in duh  men lai. Mah tikah zeidah na tuah awk a si? Na lung dong hlah. Na hmuhmi mah caan chungah ṭhancho dingin i zuam. Cuticun tipil in awkah sining na tlinh khawh lai. Mah naa tinhnak kha i cinken law mah sining pathum i ṭhancho awkah hmuitinh na chiah khawh: (1) Na zumhnak, (2) na tuahsernak le (3) naa lawmhnak.

3, 4. Timote sinin mino pawl nih zeidah an i cawn khawh?

³ Mah biahalnak hna zeitindah na leh lai khi ruathmanh: Pathian a um ti kha zeicah ka zumh? Baibal cu Pathian sinin a rami a si tiah zeicah ka zumh? Vawlei ziazalei phunglam nakin Pathian phunglam ningin nun cu a ṭha deuh tiah zeicah ka ruah? Mah biahalnak hna nih lamkaltu Paul i ruahnak cheuhnak kha zulh awkah aan bawmh khawh. Hitin a ti: ‘A ṭhami thil le Pathian nih a lawmhmi thil le a tlingmi thil hna kha hngal u, cucu Pathian duhmi an si.’ (Rom 12:2, NW) Zeicah cutin hngalh a herh?

⁴ Timote kong hi ruathmanh. Timote cu “a ngakchiat lio tein” a nu le a pi nih an cawnpiak caah Cathiang ṭha tein a hngalmi a si. Asinain Paul nih Timote kha ‘biatak an in cawnpiakmi ah khan dir law fek tein zum peng ko’ tiah a ti. (2 Tim. 3:14, 15, NW) Cucaah Timote nih Cathiang in biatak ka hmuh khawh ti kha zumh awkah aa zuam. A nu le a pi nih an fial ruangah si loin a hngalhmi kha ṭha tein a tuaktan i a zumh caah biatak kha a cohlanmi a si.—Hebru 5:14 rel.

5, 6. “Chia le ṭha thleidan khawhnak” kha hmanthiam awkah na no lio tein cawn cu zeicah a biapit?

⁵ Nangtah zeitin? Biatak na hngalhnak hi a saupi cang men lai. Cutin a si ahcun na zumhnak a ruang hna kha tuaktan awkah hmuitinh chia. Mah nih na zumhnak fehter awkah aan bawmh lai. Mah lengah ṭhirual hneknak, vawlei ruahnak asiloah nangmah intuarnak hna ruangah a ṭhalomi biakhiahnak tuah lo awk zongah aan bawmh lai.

⁶ “Chia le ṭha thleidan khawhnak” kha hmanthiam awkah na no lioin na cawn a si ahcun mah biahalnak hna hi na phit khawh lai: ‘Pathian a um ti kha zeitindah na hngalh? Pathian nih a kan dawt a si ahcun sifah harnak hi zeicah umnak nawl a awnh? Pathian hi aho nih dah a ser?’ Baibal tam deuh in na hlathlai ahcun mah biahalnak hna ruangah lunghrinnak ngeih loin na zumhnak tu a fek chin lai.

7-9. Na zumhnak fehter chin awkah zeitindah na tuah khawh?

⁷ Teima tein pumpak Baibal hlathlainak tuahnak nih biahalnak phit khawh awk, lunghrinhnak hloh khawh awk le na zumhnak fehter awkah aan bawmh khawh. (Lam. 7:11) Hlathlainak ah hman khawhmi bupi chuahmi cauk tampi kan ngei. Thilnung Pawl Hi Sermi An Si Maw? timi brochure le Nangmah Aan Zohkhenhtu Sertu Pakhat A Um Maw? timi cauk [Kawl] an hlathlainak thawngin mi tampi cu ṭhatnak an hmu. Mah lengah mino  tampi cu jw.org ah taarmi, “Baibal Cawnpiakmi Taktak Cu Zeidah A Si?” timi aa pehmi capar in ṭhatnak an hmu. Mah kha BAIBAL CAWNPIAKMI > KUMHRA FAI timi tangah zoh khawh a si. Mah aa pehmi Baibal hlathlainak nih Baibal na zumhnak fehter chin awkah aan bawmh lai.

⁸ Nang cu Baibal ṭha tein a hngalmi na si caah mah hlathlainak ah aa telmi biahalnak cheukhat cu na phit khawh colh men ko lai. Asinain na phi cu a hmaanmi a si ti kha naa fiang maw? Mah hlathlainak nih Baibal cacaang pawl ṭha tein ruah awk le na zumhnak a ruang ṭial awkah aan bawmh lai. Cun na zumhnak kong kha mi sinah zeitindah ka chim lai ti hngalh awk zongah aan bawmh lai. Online ah taarmi, mah hlathlainak kha pumpak Baibal hlathlainak caah na hman khawh. Mah nih na zumhnak a fehter chin lai.

⁹ Na zumhnak fehter awkah naa zuammi cu tipil in dingah a biapimi kehlan na hlanmi a si. Kumhra fai a simi unaunu pakhat nih hitin a chim: “Tipil in dingin biakhiahnak ka tuah hlanah Baibal ṭha tein ka hlathlai. Mah tikah mah hi a hmaanmi biaknak a si ti kha ka hun hngalh. Nikhat hnu nikhat mah ka zumhnak cu a fek chin.”

10. Tipil a ing cangmi Khrihfa pakhat nih a zumhnak kha a tuahsernak ah a langhter lai ti i ruahchan cu zeicah aa tlak?

¹⁰ ‘Zumhnak cu tuahnak zeihmanh a um lo ahcun a thimi thil a si ko’ tiah Baibal nih a ti. (Jeim 2:17) A ṭhawngmi zumhnak na ngeih ahcun na tuahsernak ah a lang ko lai. Zeiti lam in dah? Baibal nih ‘a thiangmi nunning le Pathian sin i pekmi’ tiah a timi ningin na nunnak thawngin na langhter ko lai.—2 Piter 3:11 rel.

11. ‘A thiangmi nunning’ timi bia kha fianter.

¹¹ ‘A thiangmi nunning’ langhter khawh awkah na ziaza cu a thian a hau. Tahchunhnak ah, a luancia thlaruk kong kha ruathmanh. Thil ṭhalo tuah awk lem na si  tikah a ṭha le a ṭhalomi kha na ‘thleidang’ kho maw? (Heb. 5:14) Tukforhnak asiloah ṭhirual hneknak na tei khawh lio caan hna a um maw? Sianginn i na tuahsernak nih na zumhnak kong kha ṭha tein a langhter maw? Jehovah cungah zumhfek tein na um maw asiloah na hawile nih capo ah an ka saih lai ti phan ah anmah duhnak dah na tuah? (1 Pit. 4:3, 4) Ahohmanh kan tling lo ti cu a hmaan ko. Jehovah a biaknak a sau cangmi hmanh a caan ah an ning a zak men lai i midang sin phungchim kha an i harh men lai. Asinain Pathian sinah aa pumpe cangmi pakhat cu Jehovah Tehte a simi kha aa uangthlar lai i mah kha a thiangmi a nunning in a langhter lai.

12. “Pathian sin i pekmi” timi ah zeidah aa tel, mah kha zeitindah na hmuh awk a si?

¹² “Pathian sin i pekmi” timi cu zeidah a si? Mah ah i pumhnak le phungchimnak ah kal ti bantuk tuahsernak hna aa tel. Cun Jehovah sin pumpak thlacamnak le Baibal hlathlainak ti bantuk midang nih hmuh lomi tuahsernak hna zong aa tel. Jehovah sinah aa pumpemi nih cun mah tuahsernak hna kha thilrit in a ruat lai lo. Hitin a chimmi Siangpahrang David bantukin a intuar ve ko lai: “Ka Pathian, zeitluk in dah na duhnak tuah cu ka duh! Na cawnpiaknak cu ka lung chungah kaa chiah hna.”—Salm 40:8.

13, 14. Zeinihdah “Pathian sin i pekmi” sinak kha tuahsernak in langhter awkah aan bawmh, mino cheukhat cu zeitindah ṭhatnak an hmuh?

¹³ Biahalnak cheukhat kha hlathlai in a phi pawl ṭialnak nih “Pathian sin i pekmi” sinak kha tuahsernak in langhter awkah aan bawmh khawh. Mah cu “Zei ca hna ah dah thla na cam, na thlacamnak nih Jehovah na dawtnak kha zeitindah a langhter?” “Pumpak Baibal hlathlainak ah zei hna dah aa tel?” “Na nu le na pa an i tel lo hmanhah phungchimnak ah naa tel maw?” timi biahalnak hna an si. ^[1] Thlacamnak, pumpak Baibal hlathlainak le phungchimnak hna he aa tlaiin na chiah duhmi zei bantuk hmuitinh paoh kha na ṭial khawh.

¹⁴ Tipil in a duhmi mino tampi cu catlap cungah an hmuitinh pawl ṭialnak in ṭhatnak an hmu. Mino uanaunu Tilda nih hitin a chim: “Hmuitinh pawl ka chiah khawh nakhnga tuahchunhnak catlap kha ka hman. Ka hmuitinh pawl kha pakhat hnu pakhat in ka tlinh khawh caah kumkhat hrawng a rauh tikah tipil in awkah timhcia ka hung si.” Mino unaupa Patrick zong cutin a tuahnak thawngin hlawhtlinnak a hmu ve. “Ka hmuitinh zei a si cu ka hngalh ko, asinain mah vialte kha catlap cungah ka ṭialmi nih ka hmuitinh phak khawh awkah a ka bawmh.”

15. Pumpeknak he aa tlaiin zeicah mah tein biakhiah ding a si ti kha fianter.

¹⁵ Catlap cung i ṭial dingmi biahalnak pakhat cu “nulepa le hawile nih Jehovah an biak ti lo hmanhah Jehovah kha na bia lai maw?” timi hi a si. Jehovah sin naa pumpek i tipil na in tikah Jehovah he pehtlaihnak  ṭha na ngei lai. Cucaah Jehovah na biakmi cu nulepa le hawile cungah aa hngat awk a si lo. A thiangmi na tuahsernak le Pathian sin naa pumpeknak nih biatak na hmuh i Pathian phunglam ningin nun na duh kha a langhter. Cuticun a rauhhlan ah tipil in awkah sining na hun tlinh ko lai.

16, 17. (a) Mi pakhat kha Khrihfa si awkah zeinihdah a forh awk a si? (b) Tlanhnak man ca naa lawmhnak kha zei tahchunhnak in dah na fianter khawh?

¹⁶ Nikhat cu Moses Nawlbia ṭha tein a hngalmi pa pakhat nih Jesuh kha hitin a hal: “Phungbia chungah hin zei nawlbia dah a ngan bikmi a si?” Jesuh nih hitin a leh: “Bawipa na Pathian cu na lungthin dihlak le na ruahnak dihlak le na nunnak dihlak in na dawt lai.” (Matt. 22:35-37) Mi pakhat nih tipil in a duhmi, Khrihfa pakhat si a duhmi cu Jehovah a dawt ruangah a si awk a si tiah Jesuh nih a fianter. Jehovah na dawtnak fehter awkah a ṭha bikmi lam pakhat cu Pathian i a ngan bikmi laksawng tlanhnak man kong ṭha tein ruahnak hi a si. (2 Korin 5:14, 15; 1 Johan 4:9, 19 rel.) Cutin na tuah ahcun a sunglawi tukmi laksawng caah naa lawmhnak kha langhter na duh ko lai.

 ¹⁷ Tlanhnak man ca naa lawmhnak kha mah tahchunhnak in na fianter khawh: Ti chungah na tla i mi pakhat nih aan khamh tiah ruathmanh. An khamh khawh cangka inn ah ṭin, na thil i thlen in aan khamhmi pa kha na philh lai maw? Na philh lai lo. Na nunnak aan khamhmi pa cungah lawmhnak bia na chim lengmang ko lai. Cu bantukin tlanhnak man a kan petu Jehovah le Jesuh cungah kan i lawmh tuk awk a si. Kan nunnak caah an sinah leiba kan ngei. Sualnak le thihnak in an kan khamh. An kan dawt caah vawleicung Paradis ah zungzal nun ding ruahchannak kan ngeih khawhmi a si.

18, 19. (a) Jehovah ta si lai kha zeicah na ṭih awk a si lo? (b) Jehovah biaknak nih na nunnak kha zeitindah a ṭhatter khawh?

¹⁸ Jehovah nih na caah a tuahmi thil hna kha na sunsak maw? Na sunsak a si ahcun pumpeknak le tipil innak tuah cu aa tlakmi a si. Pumpeknak timi cu Pathian duhnak kha a zungzal in ka tuah lai tiah bia i kam kha a si. Cu bantuk biakamnak tuah cu na ṭih awk a si maw? A si lo. Jehovah nih na nunnak kha a ṭha bikmi siter a duh ti kha philh hlah. Cucaah a duhnak a tuahmi hna kha laksawng a pek hna lai. (Heb. 11:6) Pathian sinah naa pumpek i tipil na in ruangah na nunnak cu a chia chin lai lo, mah canah a hung ṭha chinchin lai. Kumhra fai a si hlanah tipil a ing i atu ah kum 24 a simi unaupa nih hitin a chim: “Kum upat deuh tikah theihhngalhnak cu a tam deuh. Asinain Jehovah sin, i pumpek dingin bia ka rak khiah caah vawlei hnu zulh lo awkah huhphenhnak ka hmu.”

¹⁹ Jehovah nih na nunnak kha a ṭha bikmi siter aan duh. Asinain Satan cu amah zawn lawng aa ruat i nangmah kha zei ah aan rel lo. Amah hnu na zulh zongah zei ṭhatnak hmanh aan pe kho lo. Satan cu zei bantuk thawngṭha hmanh a ngei lo i zei bantuk ruahchannak hmanh zong a ngei lo. A ngeih lomi thil cu zeitindah aan pek khawh lai? Anih cu hmailei ah a ṭhalomi thil a ton lai caah mah lawng kha aan pek khawh.—Biat. 20:10.

20. Mino pakhat nih i pumpek in tipil in ding tiang ṭhancho awkah zeidah a tuah khawh? (“Ṭhancho Dingin Bawmh Awkah” timi rinli kulh zong zoh.)

²⁰ Jehovah sin na nunnak i pumpek cu na tuah balmi lakah a ṭha bikmi biakhiahnak a si. Cutin tuah awkah timhcia na si cang maw? Timhcia na si ahcun i cungcang hlah. Asinain timhcia ka si rih lo tiah na ruah ahcun hi capar ah aa telmi ruahnak cheuhnak hna kha hmang law ṭhancho awkah i zuam. “Atu tiang kan zulhmi phung ningin hmailei ah kal ko u sih” tiah Paul nih Filipi Khrihfabu kha a forh hna. (Fil. 3:16) Mah ruahnak cheuhnak hi na zulh ahcun a rauhhlan ah Jehovah sin, i pumpek in tipil in na duh ko lai.