1-2. (a) Jehovah nih minung he zeitindah pehtlaihnak a tuah? (b) Hi capar ah zei kong dah kan i ruah hna lai?

JEHOVAH nih kanmah he pehtlaihnak tuah kha a duh. Hlanlio ah profet, vancungmi le a Fapa, Jesuh Khrih hmangin a ruahnak kha a kan hngalhter. (Amos 3:7; Gal. 3:19; Biat. 1:1) Tuchan ah a Bia, Baibal hmangin a kan pehtlaih. A ruahnak kan cawn khawh nakhnga le a lamhruainak kan hngalhthiam nakhnga Baibal kha a kan pek.

² Jesuh vawleicung a um lio zongah Jehovah nih vancung in voithum tiang bia a chim. Jehovah nih zeidah a chim, a chimmi in zeidah kan cawn khawh ti le a chimmi in ṭhatnak hmuh awkah zeidah kan tuah awk a si ti kha kan i ruah hna lai.

3. Marka 1:9-11 ah kan hmuh bantukin Jesuh tipil a in lioah Jehovah nih zeidah a chim, a chimmi bia nih zei a biapimi kong dah a langhter?

³ Jehovah nih vancung in a voikhatnak bia a chimmi kha Marka 1:9-11 ah a langhter. (Rel.) “Nangmah cu ka dawtmi ka Fapa na si. Na cungah ka lung a tling ngaingai ko” tiah a ti. A Pa nih amah a dawtnak le a zumhnak a langhtermi bia a theih tikah Jesuh cu a lung a suk tuk lai. Jehovah bia nih a biapimi Jesuh kong pathum kha a langhter. Pakhatnak, Jesuh cu a Fapa a si. Pahnihnak, Jehovah nih a Fapa kha a dawt. Pathumnak, Jehovah cu a Fapa cungah a lung a tling. Pakhat cio kong kha tam deuh in i ruah hna u sih.

4. Jehovah nih Jesuh tipil a in lioah ‘nangmah cu ka Fapa na si’ tiah zeicah a ti?

⁴ ‘Nangmah cu ka Fapa na si.’ Jehovah nih mah bia kha  zeicah a chim? Jesuh cu vancung a um lio in Pathian Fapa a si cang. Asinain tipil a in lioah a dang lam thar in Pathian Fapa a hung si. Thiang thlarau in chiti thuh a si i Pathian nih a thimmi Siangpahrang le Tlangbawi Ngan si dingin vancung kai ṭhan awkah ruahchannak a ngei. (Luka 1:31-33; Heb. 1:8, 9; 2:17) Cucaah Jesuh tipil a in lioah a Pa nih ‘nangmah cu ka Fapa na si’ tiah a tinak a si.—Luka 3:22.

5. Dawtnak langhternak le thapeknak ah Jehovah kha zeitindah kan i zohchunh khawh?

⁵ “Nangmah cu kan dawtmi ka fapa na si.” Jehovah langhtermi dawtnak le lungtlinnak nih midang tha pek awkah caanṭha kan kawl awk a si ti kha a kan hngalhter. (Johan 5:20) Mi pakhat nih a kan dawtnak a langhter i ṭhatnak kan tuahmi caah a kan thangṭhat tikah kan hung ṭhangcho. Cu bantukin Khrihfabu unau pawl le chungkhar mi hna nih kan sinin dawtnak le thapeknak kha an herh. Midang kan thangṭhat hna tikah an zumhnak kan fehtermi le zumhfek tein Jehovah biak awkah kan bawmhmi hna a si. Nulepa nih a hleiin an fale kha tha an pek hna a hau. An fale kha lungtak tein an thangṭhat hna i an cungah dawtnak an langhter tikah an fale kha ṭhancho awkah an bawmhmi hna a si.

6. Jesuh Khrih cungah zeicah zumhnak kan ngeih khawh?

⁶ “Na cungah ka lung a tling.” Jesuh nih a duhnak kha zumhfek tein a tuah lai ti a zumh kha Jehovah nih mah bia in a langhter. Jehovah nih a Fapa cungah cu bantuk zumhnak a ngeih bantukin kannih zong Jehovah biakam vialte a tlin nakhnga Jesuh nih zumhawktlak tein a tuah lai ti kha tling tein kan zumh khawh. (2 Kor. 1:20) Jesuh kong kan ruah tikah a sinin cawn awk le a keneh  zulh ding timi kan biakhiahnak cu a fek chin lai. Jehovah nih Jesuh cungah zumhnak a ngeih bantukin a salle zong nih a Fapa sinin an cawn zungzal lai ti kha a zumh.—1 Pet. 2:21.

7. Matthai 17:1-5 ningin zei lioah dah Jehovah nih vancung in bia a chim, zei bia dah a chim?

⁷ Matthai 17:1-5 rel. Jesuh ‘a mui aa thlen’ lioah Jehovah nih vancung in a voihnihnak bia a chim. Jesuh nih Peter, Jeim le Johan kha tlang sangpi cungah kai dingin a sawm hna. Cuka an um lioah khuaruahhar a simi langhnak an hmuh. Jesuh a hmai cu a ceu i a hnipuan cu a tleu in a tleu. Moses le Elijah a aiawhmi mi pahnih cu Jesuh he a thih lainak kong le a thawh ṭhan lainak kong kha an i ruah. Lamkaltu pathum cu “thu hluahmah in an rak i hngilh” ko nain an hun i hlauh tikah mah khuaruahhar a simi langhnak kha an hmuh. (Luka 9:29-32) Mah hnuah a ceumi minmei nih a run zelh hna i minmei chung cun Pathian aw kha an theih. Jesuh tipil a in lioah a tuah bantukin Jehovah nih a Fapa cungah a lung a tlinnak le a dawtnak kha a langhter ṭhan. Hitin a ti: “Hi pa hi ka dawtmi ka Fapa, ka lung a ka tong ngaingaimi a si.” Cun “amah bia kha ngai u” tiah a ti chap.

8. Langhnak cu Jesuh le a zultu hna cungah zeitindah huham a ngeih?

⁸ Langhnak nih Jesuh cu Pathian Pennak ah Siangpahrang in sunparnak le ṭhawnnak a hmuh lainak kong kha a langhter. Khrih cu harnak le fahnak in buin a thih lai caah inkhawhnak ngeih awkah thazaang pek a rak si. Langhnak nih zultu pawl an zumhnak kha a fehter chin. Mah nih an ton laimi harnak ca le an ṭuan laimi rian caah timhtuah dingin a bawmh hna. Kum 30 hrawng a rauh hnuah lamkaltu Peter nih langhnak kong kha a chim, mah nih langhnak kha fiang tein aa cinken rih ti a langhter.—2 Pet. 1:16-18.

9. Jesuh nih a zultu pawl kha zulh awk a tlakmi zeibantuk ruahnak cheuhnak dah a pek hna?

⁹ “Amah bia kha ngai u.” Jehovah nih a Fapa bia ngai hna sehlaw kan nawl ngai hna seh ti a kan duh. Vawleicung a um lioah Jesuh nih zeidah a chim? A bia ngaih a biapitnak kong tampi a chim. Tahchunhnak ah, a zultu pawl kha thawngṭha zeitindah chim ding a si ti kha dawtnak in a cawnpiak hna i ralring tein um awkah a hngalhter ṭhan lengmang hna. (Matt. 24:42; 28:19, 20) Fek tein um awkah a forh hna i lungdongh lo awkah tha a pek hna. (Luka 13:24) A zultu pawl cu pakhat le pakhat an i dawt a hau, lungrual tein an um zungzal a hau i a nawlbia an zulh a hauh caah Jesuh cu an caah a lungre a thei. (Johan 15:10, 12, 13) Jesuh nih a zultu pawl a pekmi hna ruahnak cheuhnak cu zulh awk a tlak tukmi a si. Mah ruahnak cheuhnak cu Jesuh nih a pek hna lio bantukin tuchan zongah a biapi tuk.

10-11. Jesuh bia kan ngaih kha zeitindah kan langhter khawh?

¹⁰ Jesuh nih “biatak kha a hna a phih kanh lomi paoh nih cun ka bia kha an ngaih” tiah a ti. (Johan 18:37) ‘Pakhat le pakhat kan i ngaihthiam i kan i bawmh’ tikah Jesuh bia kan ngaih kan langhtermi a si. (Kol. 3:13; Luka 17:3, 4) “A caan a rem zongah a rem lo zongah” lungtho tein thawngṭha kan chimnak thawng zongin a bia kan ngaih kha kan langhter.—2 Tim. 4:2.

¹¹ Jesuh nih “ka tuu nih cun ka aw kha an ngaih” tiah a ti. (Johan 10:27) Khrih zultu pawl nih a bia kha lungthin an pek lawng si loin an zulhnak thawng zongin a bia an ngaih kha an langhter. “Khuasak tintuk harnak”  ruangah an lung a vaivuan lo. (Luka 21:34) Mah canah a har tik caan hmanah Jesuh nawl ngaih cu an caah a biapi tuk. Unau tampi cu ralchanhtu hna nih dohnak, sifahnak le leiser ral hna i telin harnak tampi kha an inkhawh. Zei bantuk harnak an ton hmanhah Jehovah cungah zumhfek tein an um zungzal. Jesuh nih hitin bia a kamh hna: “Ka nawlbia kha a cohlang i a zulmi paoh cu keimah a ka dawmi kha an si. A ka dawmi cu ka Pa nih a dawt ve hna lai.”—Johan 14:21.

12. Jesuh bia kan ngaih kan langhter khawhnak a dang lam cu zeidah a si?

¹² Jesuh bia kan ngaih kan langhter khawhnak a dang lam a um rih: Mah cu a kan hruaitu ding ah a thimmi hna he rian kan ṭuanṭinak thawngin a si. (Heb. 13:7, 17) Hriamnam thar hmanning le phungchim rian ṭuanning, zarhlai pumhnak tuahning a phunphun, biakinn sakning, remhning le kan Biakinn zohkenhning hna i telin Pathian bupi nih nai kum hna ah timhtuahnak tampi an tuah. Dawtnak le siaherhnak he mah lamhruinak a kan pek caah kan i lawm tuk. Bupi hmangin lamhruainak a kan pekmi zulh awk kan i zuamnak ah Jehovah nih thluachuah a kan pek lai ti kha kan zumh khawh.

13. Jesuh bia kan ngaih tikah zei ṭhatnak dah kan hmuh?

¹³ Jesuh nih a kan cawnpiakmi vialte kan ngaihnak thawngin ṭhatnak kan hmu. Jesuh nih a zultu pawl kha a cawnpiaknak nih hrimhnak aan pek hna lai tiah bia a kamh hna. Hitin a ti: “Dinhnak kha nan hmuh ko lai. Ka seihnam cu a bei a nuam i ka thil cu a zaang.” (Matt. 11:28-30) Jesuh nunnak le a phungchim rianṭuannak kong aa ṭialnak thawngṭha cauk pali i telin Pathian Bia nih hrimhnak, thlaraulei thazaang le fimnak a kan pek. (Salm 19:7; 23:3) Jesuh nih hitin a ti: “Pathian bia kha a thei i a ngaimi caah cun zeitluk in dik lunglawmhnak a si chinchin.”—Luka 11:28.

14-15. (a) Johan 12:27, 28 ah a langhter bantukin zei lioah dah Jehovah nih vancung in a voithumnak bia a chim? (b) Jehovah bia nih Jesuh kha zeicah hnemhnak le thazaang a pek?

¹⁴ Johan 12:27, 28 rel. Johan thawngṭha cauk ah Jehovah nih vancung in a voithumnak bia a chimmi kha a langhter. A thih hlan ni tlawmpal ah Jesuh nih Jerusalem ah hmanung bik Lanhtak Puai a tuah. “Ka lungre a thei” tiah a ti. Cun hitin thla a cam: “Ka Pa, na min cu upatnak pe ko.” A Pa nih vancung  in hitin a leh: “Upatnak cu ka pek cang i ka pek ko rih lai.”

¹⁵ Jesuh cu Jehovah cungah zumhfek tein um awk rian nganpi a ngeih caah a lungre a thei. Jesuh nih fakpi in hremnak ka tong lai i puarhrangpi in thah ka si lai ti kha a hngalh. (Matt. 26:38) Thil dang vialte nakin Jesuh caah a Pa min upatnak pek cu a biapi deuh. Jesuh cu Pathian min thangchiattu in sualpuh a si, cucaah a thihnak nih Pathian min a chiatter lai kha a lungre a thei. Jehovah bia nih Jesuh kha a fekmi zumhnak a ngeihter lai ti cu a fiang ko. Jehovah min upatnak pek a si lai kha Jesuh nih a zumh. A Pa bia nih Jesuh kha a ton hngami harnak hna inkhawh awkah hnemhnak le thazaang a pek. Mah lio caan ah a Pa chimmi bia a hngalthiamtu cu Jesuh lawng a si, asinain Jehovah nih a Bia kha kan dihlak caah a ṭialter hna.—Johan 12:29, 30.

16. A caan ah Pathian min chiatternak he aa tlaiin zeicah kan lungre a theih khawh men?

¹⁶ Jesuh bantukin Jehovah min a chiattertu si lai kha kan lungre a thei ve men lai. Jesuh bantukin a ding loin pehtlaih kan si men lai. Asiloah ralchanhtu hna nih a hmaan loin kan kong an chim men lai. Mah nih Jehovah min le bupi min a chiatter lai ti kha kan lungre a thei men lai. Cu bantuk caan ah Jehovah bia cu kan caah hnemtu taktak a si. Kan lungre a theih tuk a hau lo. ‘Pathian daihnak, minung hngalhnak a lonhtu nih cun, Khrih  Jesuh chungah kan lungthin le kan ruahnak cu him tein a chiah lai’ ti kha kan zumh khawh. (Fil. 4:6, 7) Jehovah nih a min kha upatnak a pek zungzal lai. A Pennak thawngin Satan nih a hrawhmi vialte kha a remh ṭhan lai i vawlei cu zumhfekmi a salle kha a pek hna lai.—Salm 94:22, 23; Isa. 65:17.

17. Isaiah 30:21 ningin Jehovah nih tuchan ah zeitindah a kan chawnh?

¹⁷ Jehovah nih tuchan zongah a kan chawnh peng rih. (Isaiah 30:21 rel.) Vancung in Pathian nih a kan chawnhmi cu kan thei lo. Asinain a Bia, Baibal hmangin lamhruainak kha a kan pek. Mah lengah Pathian thlarau nih “zumhawktlak le a fimmi sal” hna kha a salle rawl pek awkah a forh hna. (Luka 12:42) Cauk chuahmi, online ah taarmi, video le aw khumhmi cauk hna nih kan zumhnak fehter zungzal awkah a kan bawmh.

18. Jehovah bia nih zeitindah na zumhnak a fehter i ralṭhatnak aan ngeihter?

¹⁸ A Fapa vawleicung a um lioah Jehovah nih a chimmi bia kha i cinken hna u sih. Jehovah nih zeizong vialte a uk khawh i Satan le a vawlei nih an hrawhmi vialte a remh ṭhan lai ti kha Baibal ah aa ṭialmi Pathian bia nih a kan zumhter. Jehovah aw kha ngaih zungzal awkah biakhiak hna u sih. Cutin kan tuah ahcun atu ah kan tonmi buaibainak hna le hmailei ah kan ton hngami zuamcawhnak hna kha kan inkhawh lai. Baibal nih hitin a ti: “Pathian duhnak nan tuah khawh nakhnga le bia an kamhmi hna nan co khawh nakhnga lungsau thinfual in um u.”—Heb. 10:36.