1-2. (a) Minung nih hnemhnak kan herh i midang hnemh khawhnak sining zong kan ngei ti kha zei tahchunhnak nih dah a langhter? (b) Ngakchia cheukhat nih zeitindah lungfahnak an tuar?

MINUNG nih hnemhnak kan herh i midang hnemh khawhnak sining zong kan ngei. Tahchunhnak ah, ngakchiapa pakhat cu lente aa celhnak ah a khuk aa khon ahcun a ṭah buin a nu le a pa sinah a rak tli ko lai. A nu le a pa nih a hma cu an damter kho lo nain an hnemh khawh. Ngakchia kha zeidah a cang tiah an hal lai, a mitthli an hnawhpiak lai i hnemhnak bia an chim lai. Cun a hma kha sii an thuhpiak lai asiloah an menpiak ko lai. Tlawmpal ah ngakchia cu a ngam lai i lente hmanh aa celh ṭhan men lai. A hnuah cun a hma cu a dam ko lai.

² A caan ah ngakchia cu lam tampi in harnak pek an si. Cheukhat cu tlaihhrem an si. Voikhat te asiloah kum tampi chung atu le atu tlaihhrem an si men lai. Zeiti a si hmanhah tlaihhremnak nih lungthin kha caan saupi tiang a hnorsuan khawh. Thil sining cheukhat ahcun tlaihhrem a hmangmi kha tlaih in dantat an si. Thil sining cheukhat tu ahcun dantatnak a tong lomi an lo men lai. Asinain tlaihhrem a hmangmi hna cu dantat an si colh hmanhah tlaihhrem a tongmi ngakchia cu a upat hnu tiang lungfahnak a tuar peng rih men lai.

3. 2 Korin 1:3, 4, ah a langhter bantukin Jehovah nih zeidah a duh, zei biahalnak dah kan i ruah hna lai?

³ A ngakchiat lioah tlaihhremnak a ton caah lungthinlei le ruahnaklei in fahnak a tuar pengmi unau pakhat kha zeinihdah a bawmh khawh? (2 Korin 1:3, 4 rel.) Jehovah nih a tuu pawl cu a dawt hna i an herhmi hnemhnak pek a duh hna ti cu a fiang ko. Mah biahalnak pathum hi i ruah hna u sih: (1) Tlaihhrem a tongmi  ngakchia pawl cu zeicah hnemh an herh? (2) An herhmi hnemhnak kha aho nih dah an pek khawh hna? (3) Zeitindah kan hnemh khawh hna?

4-5. (a) Ngakchia le upa an i dannak hngalh cu zeicah a biapit? (b) Ngakchia pakhat cu tlaihhrem a si ahcun midang cungah zumhnak a ngeihmi kha zeitindah a um khawh?

⁴ An ngakchiat lioah tlaihhrem a tongmi cheukhat cu an upat hnu, kum tampi a rauh hnu hmanhah hnemh an herh rih. Zeicah? Mah kha hngalhthiam awkah upa pawl he an i dannak kha kan hngalhthiam hmasa a hau. Tlaihhremnak nih ngakchia a hnorsuan hna ning le upa a hnorsuan hna ning cu lam tampi in aa thleidang tuk men lai. Tahchunhnak cheukhat in i ruah hna u sih.

⁵ Ngakchia nih anmah a zohkhenhtu le a cawmtu hna he naih tein um le anmah he a ṭhami pehtlaihnak ngeih a hau. Cu bantuk pehtlaihnak nih ngakchia pawl kha ka him timi ruahnak a ngeihter hna i anmah a dawmi hna kha i bochan awkah a cawnpiak hna. (Salm 22:9) Ngaihchiat awk ngai a simi cu, ngakchia tam deuh cu an chungkhar mi le an chungkhar mi i an hawile nih an tlaihhrem hna. A ngakchiat lioah aa bochanmi pakhatkhat nih a tlaihhrem ahcun kum tampi a rauh tiang midang cungah zumhnak a ngei ti lo.

6. Tlaihhremnak cu zeicah zaangfahnak ngeih lo le harnak pek a si?

⁶ Ngakchia cu an lungfahter a fawi i tlaihhremnak cu zaangfahnak ngeih lo le harnak pek a si. An cutzat hlanah asiloah i ṭhitum awk le nupa sinak tuah awkah timhcia an si hlanah nupa sinak tuah dingin hneknak nih harnak nganpi a pek khawh hna. Mi pakhat cu a ngakchiat lioah tlaihhrem a si ahcun nupa sinak he aa tlaiin a ṭhalomi hmuhnak a ngei kho. Mah nih midang cungah zumhlonak le man ka ngei lo timi ruahnak a ngeihter khawh.

7. (a) Tlaihhrem a hmangmi caah ngakchia hlen cu zeicah a fawi, zeitindah cutin a tuah khawh? (b) Cu bantuk lihbia i a phichuak cu zeidah a si?

⁷ Ngakchia cu khuaruah khawhnak, tuaktan khawhnak asiloah hngalhnak le ṭih a nungmi thil hrial awkah sining an ngei lo. (1 Kor. 13:11) Cucaah ngakchia pakhat hlen le tlaihhrem cu a fawi tuk. Tlaihhrem a hmangmi hna nih ngakchia kha nangmah palh a si, thuh dingmi a si, mi sin na chim zongah ahohmanh nih an in zum lai lo asiloah an in bawm lai lo ti bantuk ṭih a nungmi lihbia kha an chimh hna. Asiloah upa le ngakchia nupa sinak tuah cu pakhat le pakhat i dawt langhternak a si tiah an ti hna. Cu bantuk lihbia nih ngakchia ruahnak kha a hrawh khawh i kum tampi tiang zumhlonak a ngeihter khawh. Tlaihhrem a tongmi ngakchia nih amah le amah kha a rawkralmi, a thurhnawmmi, dawtnak le hnemhnak hmuh awkah aa tlak lomi in aa ruah men lai.

8. Jehovah nih harnak a tongmi hna kha a hnemh khawh hna tiah zeicah kan zumh khawh?

⁸ Tlaihhremnak nih midang kha caan saupi tiang harnak a pek khawhmi hna cu khuaruahhar awk a si lo. Mah sualnak cu a ṭha lo tukmi a si. Tlaihhremnak a karhmi nih ni hmanung bik caan ah kan nung ti kha fiang tein a langhter. Cucaah “miṭhalo le chungthu lengnal pawl cu a ṭha lo chin lengmang khan an um” i mi tampi cu ‘zaangfahnak an ngei lo.’ (2 Tim. 3:1-5, 13) Satan ruahnak cu a ṭha lo taktakmi a si i mi nih Satan duhnak an tuahmi cu ngaihchiat awk ngai a si. Asinain Jehovah cu Satan asiloah Satan salle nakin a let tampi in a ṭhawng deuh. Jehovah nih Satan tuahmi kha a hngalh dih. Jehovah nih kan tonmi harnak vialte kha a hngalh dih i kan herhmi hnemhnak a kan pek khawh ti kha kan zumh khawh. “Zeizong vialte ah a kan hnemtu Pathian” kan biakmi cu thluachuah a si. “Harnak kan innak kip ah a kan hnemh  caah kannih zong nih harnak a phunphun in a ingmi kha kan hnemh khawh ve hna i kan hnemh hnanak cun Pathian sinin hnemhnak kan hmuhmi kha kan hman.” (2 Kor. 1:3, 4, NW) Anmah hnemh awkah Jehovah nih ahote dah a hman hna?

9. Salm 27:10 i Siangpahrang David bia ningin an chungkhar mi hna nih an hlawtmi hna caah Jehovah nih zeidah a tuah lai?

⁹ An nu le an pa nih an hlawtmi hna asiloah harnak a tongmi hna nih a hleiin hnemhnak an herh. Salm caṭialtu David nih Jehovah cu hnemhnak a kan pe zungzaltu a si ti kha a hngalh. (Salm 27:10 rel.) David nih an chungkharmi hna nih an hlawtmi hna kha Jehovah nih a bawmh hna lai ti kha a zumh. Jehovah nih zeitindah cutin a tuah? Zumhfekmi a salle kha a hman hna. Khrihfabu i unau pawl cu kan chungkhar bantuk an hung si. Tahchunhnak ah, Jesuh nih amah he Jehovah a biaṭimi hna kha ka nu le ka unau an si tiah a ti hna.—Matt. 12:48-50.

10. Lamkaltu Paul nih Khrihfa upa pakhat in a rian kong kha zeitindah a langhter?

¹⁰ Khrihfabu ah chungkhar bantukin pehtlaihnak ṭha a ngeimi tahchunhnak pakhat kong kha ruathmanh. Lamkaltu Paul cu rian aa zuammi, zumhfekmi Khrihfa upa a si. Zohchunhawk ṭha in a nung, amah nih Khrih aa zohchunh bantukin midang kha amah i zohchunh ve awkah a forh hna. (1 Kor. 11:1) Paul nih Khrihfa upa pakhat in a rian kong kha hitin a langhter: “Nan sinin thangṭhatnak hmuh kan i zuam lo. Nu nih a fale a zohkhenh hna bantuk tu in nan sinah khan nem tein kan um.” (1 Thes. 2:7) Tuchan ah zumhfekmi Khrihfa upa hna nih hnemh a herhmi hna kha Baibal hmangin an hnemh hna.

11. Midang hnemh awkah Khrihfa upa pawl lawng rian an ngei lo ti kha zeinihdah a langhter?

¹¹ Tlaihhrem a tongmi hna kha Khrihfa upa lawng nih maw an hnemh khawh hna? A si lo. Kan dihlak in “pakhat le pakhat i hnemh” awkah rian kan ngei. (1 Thes. 4:18, NW) Khrihfa nutling a simi unaunu hna nih thazaang pek a herhmi unaunu hna kha a hleiin  an bawmh khawh hna. Jehovah Pathian cu a fapa hnemhnak a pemi nu pakhat bantuk a si. (Isa. 66:13) Baibal ah lungretheihnak a tongmi hna hnemhnak a petu nu pawl kong a langhter. (Job 42:11) Jehovah nih harnak a tongmi unaunu pawl hnemhnak a pemi Khrihfa unaunu pawl a hmuh hna tikah aa lawm tuk. Thil sining cheukhat ahcun Khrihfa upa nih Khrihfa nutling a simi unaunu pakhat kha bawmhnak hal in harnak a tongmi unaunu pakhat kha bawmh khawh a si. *

12. Zei tuah dah kan hrial awk a si?

¹² Unau pawl bawmh dingin kan i zuam tikah chim an duh lomi kong kha kan hal hna awk a si lo. (1 Thes. 4:11) Bawmh a herhmi hna le hnemhnak a cohlangmi hna caah zeidah kan tuah khawh? Baibal chung i midang bawmh khawhnak a kong panga kha i ruah hna u sih.

13. 1 Siangpahrang 19:5-8 ah a chim bantukin Elijah caah Jehovah vancungmi nih zeidah a tuah, mah vancungmi kha zeitindah kan i zohchunh khawh?

¹³ Ṭha tein bawm hna. Profet Elijah cu amah thah a duhmi hna kut in a rak zam, a lungre a theih tuk caah thih hmanh a rak duh. Jehovah nih a lungre a thei tukmi Elijah sinah vancungmi a rak thlah. Vancungmi nih ṭha tein a rak bawmh. A sami rawl kha a pek i ei awkah a fial. (1 Siangpahrang 19:5-8 rel.) Mah tahchunhnak cu a ṭha tukmi a si. A caan ah a sawhsawh tein kan tuahmi cu midang caah bawmtu taktak a si. Rawl, laksawng asiloah caṭialmi card peknak in a ngaih a chiami unau pawl cungah dawtnak le zawnruahnak langhter khawh a si. Harnak a tongmi hna he biaruah kan i harh ahcun mah lam in ṭha tein kan bawmh khawh hna.

14. Elijah kong in zeidah kan cawn khawh?

¹⁴ Lungretheihnak a tongmi hna kha ka him timi ruahnak ngeihter hna. Elijah kong in thil dang kan cawn khawh rih. Horeb Tlang ah caan saupi a ke in a kal khawh nakhnga a herhmi bawmhnak kha Jehovah nih khuaruahhar lam in a rak pek. Jehovah nih hlanlio a miphun pawl he biakamnak a rak sernak mah hmun ah Elijah nih ka him timi ruahnak a ngei men lai. Cun amah thah a duhmi hna kut in ka luat cang tiah a rak ruah men lai. Mah kong in zeidah kan cawn khawh? Tlaihhremnak a tongmi hna kha hnemh kan duh hna ahcun ka him timi ruahnak an ngeih nakhnga kan bawmh hmasa hna a hau. Tahchunhnak ah, lungretheihnak a tongmi unaunu nih ka him timi ruahnak a ngeih nakhnga Khrihfa upa nih Biakinn i meeting tuahnak khaan ah len canah a inn tu ah len kha a duh deuh men lai. A dangtu nih cun Biakinn ah tlaihhrem an sinak kong chim kha an duh deuh men lai.

15-16. Ṭha tein bia a ngaimi sinak ah zeidah aa tel?

¹⁵ Ṭha tein bia a ngaimi si. Baibal nih hitin ruahnak a kan cheuh: ‘Ahohmanh bia theih duhnak lei ah cun a khul a rangmi si u law biachimnak lei ah cun a khul a nuarmi si u.’ (Jeim 1:19) Ṭha tein bia a ngaimi kan si maw? Ṭha tein bia a ngaimi timi cu bia an chim lioah zeihmanh chim loin biachim tu lawng zoh kha a si tiah kan ruah men lai. Asinain ṭha tein bia ngaihnak ah mahnak tam aa tel. Tahchunhnak ah, a hnuah Elijah nih a lungretheihnak kong kha Jehovah sinah a phuan dih i Jehovah nih ṭha tein a rak ngaihpiak. Jehovah nih Elijah nih ṭihnak a ngeihmi, keimah lawng ka si timi ruahnak a ngeihmi le ka ṭuanmi cu pakpalawng a si timi ruahnak a ngeihmi kha ṭha tein a hngalhthiampiak. Mah ruahnak a ngeihmi kha a hloh khawh nakhnga dawtnak in a rak bawmh. Elijah bia ṭha tein a ngaih kha Jehovah nih a rak langhter.—1 Si. 19:9-11, 15-18.

¹⁶ Unau pawl biachimmi kan ngaih tikah zawnruahnak a ngeimi kan si kha zeitindah kan langhter khawh? A caan ah, fimkhur tein kan chimmi bia in kan intuarnak kha kan langhter  khawh. Hitin na chim khawh: “Na cungah mah bantuk thil a canmi cu ka lung a ṭha lo tuk. Cu bantuk lam in zei bantuk ngakchia hmanh pehtlaih awk an si lo.” Asiloah biahalnak pakhat, pahnih na halnak thawngin lungretheihnak a tongmi na hawi nih a chimmi na hngalhthiampiak kha na langhter khawh. Hitin na hal khawh: “Zeidah na chim duhmi a si?” asiloah “Hitin ka hngalhthiam . . . A hmaan maw?” Cu bantuk dawtnak langhternak in ṭha tein bia a ngaimi na si le an kong hngalhthiam awkah aa zuammi na si kha hngalhter hna.—1 Kor. 13:4, 7.

17. Zeicah ‘biachimnak lei ah a khul a nuarmi’ le a lung a saumi kan si awk a si?

¹⁷ Fimhring tein um law ‘biachimnak lei ah a khul a nuarmi si.’ A lungre a theimi kha ruahnak cheuh awk asiloah a ruahnak remhpiak awkah a bia tan hlah. Cun na lungsau. Elijah cu a intuarnak kong Jehovah sinah a chim lioah a lungre a thei tuk i a ngaih a chia tuk. Jehovah nih thazaang a pek hnu hmanhah mah bantuk ruahnak kha a ngei ṭhan i mah bia kha a chim ṭhan. (1 Si. 19:9, 10, 13, 14) Mah nih zeidah a kan cawnpiak? A caan ah a lungre a theimi hna nih an intuarnak kong kha voikhat nak tam chim an duh men lai. Jehovah bantukin an bia kha lungsau tein ngaihpiak kan duh hna. Zeitindah tawnghtham ding a si ti chimh i zuam canah an cungah zaangfahnak le zawnruahnak kan ngeih kha kan langhter awk a si.—1 Pet. 3:8.

18. Kan thlacamnak nih harnak a tongmi hna kha zeitindah hnemhnak a pek khawh hna?

¹⁸ Harnak a tongmi he lungtak tein thlacamṭi. Harnak a tongmi hna cu an lungre a theih tuk caah thla an cam ti men lai lo. Cu bantuk mi pakhat nih cun Jehovah naih awkah kaa tlak lo timi ruahnak a ngei men lai. Cu bantuk mi kha hnemh kan duh hna ahcun anmah he thlacamṭi dingin kan sawm khawh i an min auh in thla kan cam khawh. Cun kanmah le unau pawl nih zeitluk in dah kan dawt hna timi kong zong kan cam khawh. A sunglawi tukmi a salle nih daihnak le himnak an hmuh nakhnga bawmh awkah Jehovah  sinah kan hal khawh. Cu bantuk thlacamnak nih hnemhnak taktak a pek khawh hna.—Jeim 5:16.

19. Mi pakhat hnemhnak ah zeinihdah a kan bawmh khawh?

¹⁹ Hnemhnak a pemi bia kha chim awkah i thim. Na chim hlanah ruat hmasa. Ruat hmasa loin chimmi bia nih fahnak a pek khawh. Zaangfahnak bia nih hma a damter khawh. (Ptb. 12:18) Cucaah thla na cam tikah zaangfahnak, hnemhnak le thazaang a pemi bia chim khawh awkah Jehovah sinah bawmhnak hal. Jehovah bia aa telnak Baibal bia nakin a ṭhawng deuhmi bia a um lo ti kha i cinken.—Heb. 4:12.

20. Unau cheukhat nih tlaihhremnak an ton tikah zei bantuk ruahnak dah an ngeih khawh, zeidah hngalhter kan duh hna?

²⁰ Tlaihhrem a tongmi unau cheukhat nih sualnak ka ngei, ka thiang lo i ahohmanh nih an ka daw lo timi ruahnak an ngei. Mah cu zeitluk in dah ṭih a nun. Cucaah Baibal caang hmangin Jehovah caah a sunglawi tukmi an si ti kha hngalhter hna. (“ Baibal in Hmuhmi Hnemhnak” timi rinli kulh ah zoh.) A lungre a theih tuk lioah vancungmi nih profet Daniel zeitindah thazaang a pek ti kha philhhlah. Jehovah nih a dawt le a caah a sunglawi tukmi a si ti kha hngal seh ti a duh. (Dan. 10:2, 11, 19) Cu bantukin Jehovah caah lungretheihnak a tongmi unau pawl zong an sunglawi.

21. Ṭhatlonak a tuahmi le aa ngaichih lomi hna cungah zeidah a cang lai, asinain harnak a tongmi hna le a ding loin pehtlaih a simi hna caah zeidah kan tuah awk a si?

²¹ Midang kan hnemh hna tikah Jehovah nih a dawt hna ti kha kan hngalhter hna awk a si. Cun Jehovah cu a dingmi Pathian a si ti zong zeitikhmanh ah kan philh lo awk a si. Midang nih an hngalh lo hmanhah Jehovah nih tlaihhremnak a tongmi hna kha a hngalh hna. Jehovah nih a hmuh dih i a sualnak aa ngaichih lomi kha dan a tat hna lai. (Nam. 14:18) Cucaah tlaihhrem a tongmi hna cungah dawtnak langhter awkah kan tuah khawhmi zeipaoh tuah hna u sih. Satan le a vawlei ruangah tlaihhrem a tongmi hna kha Jehovah nih a zungzal in an hma a damter hna lai timi hngalhnak cu zeitluk in dah hnemtu a si. A rauhhlan ah mah harnak vialte kha kan lungthin le kan ruahnak chungah a um ti lai lo.—Isa. 65:17.