MOSES Nawlbia nih “Pathian hmaiah chiatserh in bia kaa kam,” asiloah “Jehovah min in chiatserh in bia kaa kam” ti bantukin mi nih chiatserh biakamnak an tuahmi kha a awnh. Asinain Jesuh chan ah Judah mi nih chiatserh biakamnak tuah kha a phung bantukin an hmuh i an chimmi bia kip ti awkin bia an rak i kam. An chimmi bia zumhawktlak deuh seh tinak ah biakamnak an rak tuah, asinain cutin a herh loin biakamnak an tuahmi kha Jesuh nih voihnih tiang a rak mawhchiat hna. “‘A si,’ ‘A si lo,’ ti lawng kha chim ko u” tiah a rak cawnpiak hna.—Matt. 5:33-37; 23:16-22.

Dictionary pakhat (Theological Dictionary of the New Testament) chim ningin Judah mi caah chiatserh biakamnak tuah asiloah an bia a hmaan tinak caah biakamnak tuah cu zeitluk in dah a fawi ti kha Talmud cauk nih a langhter. Chiatserh biakamnak ningin an tuah a herhnak zawn le buar khawh a sinak zawn hna kha a dikthliar in Talmud cauk nih a langhter.

Mah an tuahsernak a mawhchiatmi hna cu Jesuh pakhat lawng a si lo. Tahchunhnak ah, Judah tuanbia ṭialtu Flavius Josephus nih biakamnak tuah a hrialmi Judah phu pakhat kong a rak ṭial. Mah phu chungmi hna nih chiatserh biakamnak tuah cu lihchim nakin a ṭhalo deuh tiah an zumh. Mi pakhat nih ka bia zum hna seh tinak caah chiatserh in bia aa kam ahcun mi lihchim a si tiah an ruah. Sirach Fimnak asiloah Phungchimtu (23:11) ah “Chiatserh biakamnak a tuahmi pa cu a lung chungin nawlbia a buarmi a si” tiah a ti. Jesuh nih a biapi lomi kong ah chiatserh biakamnak tuah kha a mawhchiatmi a si. A zungzal in bia hmaan kan chim a si ahcun kan chimmi zum hna seh tinak caah chiatserh biakamnak tuah a hau lai lo.