1923 ah England ram, Yorkshire peng i Hemsworth khua ah ka chuak. Bob timi ṭa pakhat ka ngei. A hmaan lomi biaknak nih zeitindah mi an hlen hna ti a langhtermi cauk cheukhat kha kumkua ka si lioah ka pa nih a rak hmuh. Ka pa cu a relmi kong nih a lung a suk tuk. Biaknaklei hruaitu pawl nih mi an cawnpiak ningin an tuah lomi kha a huat tuk. Kum tlawmpal a rauh hnuah Bob Atkinson cu inn ah a ra i Unaupa Rutherford phungchimnak aw an khumhmi kha a kan ngaihter. Ka Pa nih a relmi cauk a chuahtu hna le mah phungchimtu hi bukhat an si ti kha kan hun hngalh. Ka nu le ka pa nih Unaupa Atkinson kha nifate inn ah zanriah rak ei in Baibal kong biahalnak hna kha phit dingin an sawm. Kan inn in meng tlawmpal aa hlatnak ah a ummi unaupa pakhat inn ah i pumh dingin a kan sawm. Hmaan tein kan hun i pum i Hemsworth khua ah Khrihfabu hmete dirh a hung si. A rauhhlan ah zone rianṭuantu (atu ahcun khualtlawng rianṭuantu tiah auh a si) hna kha umnak kan khanpiak hna. Cun Kan pawngkam Khrihfabu i hmaikal pawl zong kha rawl ei kan sawm tawn hna. Mah unau pawl he i hawikomhnak nih ṭhatnak a ka hmuhter.

Mah lio caan ah kan chungkhar in chawlehnak rian pakhat kan tuah. Asinain ka pa nih ka ṭa kha “hmaikal ṭuan na duh ahcun mah rian hi kan ngol lai” tiah a ti. Bob cu a hna a tla i kum 21 a si ah hmaikal ṭuan dingin inn in a chuak. Kumhnih a rauh hnu, kum 16 ka si ah hmaikal ka hun ṭuan ve. Zarhte le Zarhpi ahcun midang he phungchim kan kalṭi nain zarhlai ahcun keimah lawng ka si. Awkhumhmi kuang le tehte khaannak card hna kha ka hman. Jehovah nih a ṭhangcho tukmi Baibal cawnpiakmi pakhat a ka peknak thawngin thluachuah a ka pek. Mah Baibal ka cawnpiakmi chungkhar in mi tampi nih a hnuah biatak kha an hun cohlan. A hmaikum ah Mary Henshall he special hmaikal ṭuanṭi dingin rian an ka pek. Voikhat hmanh thawngṭha chim a si rih lo nak hmun, Cheshire ah an kan thlah.

Vawlei Ralpi IInak lioah nu pawl kha raltuknak bawmh awkah rian pek a si. A dang biaknaklei  rianṭuantu pawl cu mah rian in an luat caah special hmaikal pawl zong kan luat ve lai tiah kan ruah. Asinain biaceihnak zung nih an hna a tlak lo caah ni 31 chung thong ka tla. A hmaikum, kum19 ka si ah zumhnak ruangah ralkap tlak a duh lomi in cazin an ka khumh. Ka kong kha biaceihnak zung pahnih nih an ka hrawhpiak. Mah caan chung vialte thiang thlaurau nih a ka bawmh ti le Jehovah nih zumhfek tein ka um khawh nakhnga thazaang a ka pek ti kha ka hngalh.—Isa. 41:10, 13.

1946 ah Arthur Matthews he kan i tong. Arthur nih ralkap tlak a al hna caah thlathum chung thong an thlak. Thong in a chuahle cangka Hemsworth ah special hmaikal a ṭuanmi a naupa, Dennis sinah a rak um. An ngakchiat lio tein a pa nih Jehovah kong a rak cawnpiak hna caah kumhra fai an si ah tipil an ing. Mah hnu tlawmpal ah an pahnih in hmaikal an ṭuan i Dennis cu special hmaikal in Ireland ah rian pek a si. Cucaah Arthur cu amah lawng a tang. Hmaikal rian teima tein a ṭuanmi kha ka nu le ka pa nih an uar tuk i an sinah um dingin an sawm. Ka va len hna tikah rawl ei dih in Arthur he umkheng kan ṭawlṭi tawn. A hnuah ca kan i kua lengmang. 1948 ah Arthur cu thlathum chung thong a tla ṭhan. 1949, January ah kan i um i kan si khawh chung caantling rian ah i tel dingin hmuitinh kan ngei. Tangka kha semrel tein kan hman, cun kan i manh caan ah thingthei lawhnak in tangka kan kawl. Jehovah nih thluachuah a kan pek caah hmaikal rian kha kan ṭuan kho peng.

Kumkhat leng a rauh hnuah Chaklei Ireland, Armagh khua ah rian pek kan si, a hnuah Newry ah kan i ṭhial. A khuahnih in Catholic biaknak an tamnak a si. Biaknaklei ah a ṭhawng tukmi an si caah ralring tein phung kan chim. Kan umnak in meng 10 (16 kilometers) aa hlatnak, unau pawl inn ah pumhnak kan tuah i aa pummi cu pariat hrawng kan si tawn. A caan ahcun kan riak i zelṭuang ah kan it. A thaizing ah thaithawh khim tein kan ei tawn. Cuka hmun ah Jehovah Tehte tampi an um cang ti ka hngalh caah kaa lawm tuk.

Ka ṭapa le a nupi, Lottie cu Chaklei Ireland ah special hmaikal an ṭuan. 1952 ah kan pali in Belfast ah tuahmi pengkomh civui kha kan zawh. Unau pakhat inn ah Britain zung ṭengnge rianṭuantu Pryce Hughes he kan i ṭhumṭi hna. Zankhat cu Ireland ah a ummi hna caah a hleiin chuahmi cauk hmemi pakhat (God’s Way Is Love) kong kha kan i ruah hna. Unaupa Hughes nih Ireland ram ah a ummi Catholic mi hna sin phungchim a harnak kong kha a kan chimh. Siangbawi pawl nih mi an forh hna caah unau pawl cu an inn in an hnuh hna i an velh hna. Pryce nih “mah cauk hmete hi ram chung dihlak ah pekṭhenhnak special campaign kan tuah lai i mah ah aa tel dingmi mawṭaw a ngeimi nuva pawl kan herh hna” tiah a ti. * Mah tikah “kan i tel lai” tiah kan ti colh.

 Dublin khua ah a ummi zumhfekmi unaunu, Ma Rutland inn ah hmaikal pawl cu an i ṭhum tawn. Kannih zong mah unaunu inn ah chikkhat chung kan um ve i kan ngeihmi thilri hna kha kan zuar. Cun kan pali in Bob saihka in mawṭaw cawk awk kan kawl. Hmancia a si ko nain a ṭha rihmi mawṭaw pakhat kha kan hmuh i kan cawk. Ahohmanh mawṭaw mawngh a thiammi kan um lo caah a zuartu pa kha kan i thlahter. Arthur cu mah zan ah ihkhun cungah ṭhu in mawṭaw kha aa mawnghter chunh len. A thaizing zingka ah kudawng in mawṭaw a chuah lioah missionary unaunu Mildred Willet ( a hnuah John Barr he an i um) a rak phan. Anih cu mawṭaw mawngh a thiammi a si. Mawṭaw mawngh ning kha a kan chimh i cuticun i thawh awkah timhcia kan si hna.

Umnak hmun kawl kan herh. Unau pawl nih mawṭaw he aa pehmi thlam ah um lo awkah ralrin a kan pek, zeicahtiah ralchanhtu pawl nih mei in an kan khanghpiak khawh caah a si. Cucaah inn kha kan kawl, asinain kan hmu kho lo. Mah zan cu kan pali in mawṭaw chungah kan it. A thaizing ah ihkhun pahnih a ummi, thlam pakhat kan hmuh. Mah cu kan inn a hung si. Khuaruahhar awk ngai a simi cu miṭha a simi, lothlo hna dum ah kan thlam cu kan chiah i zeihmanh buaibainak a um lo. Kan umnak in meng 10 in 15 (16 in 24 kilometers) chungah a ummi sang kha kan liim khawh. Hmundang i kan i ṭhial hnu zongah kan thlam kan chiahnak hmun ah kan rak leng ṭhan tawn hna.

Ireland ram, Thlanglei Nichuah lei ah a ummi inn vialte kha ralchanhnak um loin kan leng kho dih hna. Cauk hmete kha 20,000 leng kan pekṭhenh hna i lungthawhnak a ngeimi hna i an min kha Britain zung ṭengnge ah kan kuat. Atu ah cuka hmun ah Jehovah Tehte za leng an ummi cu thluachuah taktak a si.

Kum tlawmpal a rauh hnuah London thlanglei ah rian an kan pek. Zarh tlawmpal hnuah Britain zung ṭengnge i unaupa hna nih Arthur kha an chawnh i thaizing in khualtlawng rianṭuannak rian na thawk kho lai maw tiah an ti. Zarhkhat chung tinṭan a kan pek hnuah Scotland ah khualtlawng rian kha kan thawk. Cucaah Arthur cu phungchim ding kha timhnak caan tampi a ngei lo. Asinain anih cu zeitluk in a harmi a si hmanhah Pathian rian ṭuan awkah a cohlan zungzal. A tuahsernak nih thazaang a ka ngeihter tuk. Khualtlawng rianṭuannak ah kan i nuam tuk. Ṭuan bal lonak hmun ah kum tlawmpal kan ṭuan hnuah unau tampi he kan ṭuanṭi ṭhanmi cu thluahchuah taktak a si.

1962 ah Arthur cu thlahra chung Gilead sianginn kai dingin sawm a si tikah biakhiahnak nganpi kan rak tuah. Keimah lawngin um ding a si ko nain sawmnak kha cohlan dingin bia kan rak khiah. Hmaikal ṭuanṭi hawi ka ngeih ti lo caah Hemsworth ah special hmaikal ṭuan dingin rian an ka pek. Kumkhat a rauh hnuah Arthur cu a rak kir i pengkomh zohkhenhnak rian kha an kan pek. Kan rianṭuannak ah Scotland, England chaklei le Chaklei Ireland hna an i tel.

1964 ah Arthur cu Ireland zung ṭengnge rianṭuantu in rian thar a hmu. Khualtlawng rian ah kaa nuamh tuk caah Bethel i rian ṭuan ding kha a hmasa ahcun ka ṭih ngai. Asinain ka ruah ṭhan tikah Bethel ah rianṭuannak tinvo sung kan hmuh caah kaa lawm tuk. Kan huam lomi rian a si hmanhah kan cohlan ahcun Jehovah nih thluachuah a kan pek zungzal lai ti kha ka zumh. Bethel ah zung rian, cauk tuamnak rian, rawlchuannak le thianhhlimhnak rian hna ka ṭuan. A caan ah pengkomh zohkhennak rian zong kan ṭuan caah ram chung i a ummi unau tampi he kan i tong kho. Cun Ireland ah Baibal kan cawnpiakmi pawl an ṭhanchomi kan hmuhmi nih unau pawl he kan lung a rualter chinchin. Mah cu thluachuah taktak a si.

1965 ah Ireland ram, Dublin khua ah a hmasa bik ramkomh civui an tuah. * Ralchanhnak nganpipi a um ko nain civui cu tluang tein kan tuah khawh. Aa pummi dihlak cu 3,948 kan si i 65 tipil an ing. Ram kip in a rami 3,500 cu Dublin khua mi hna sinah an i ṭhum. Innngeitu kip nih lunglawmhnak ca an hmuh dih. Innngeitu pawl zong nih unau pawl i a ṭhami an tuahsernak kha an thangṭhat hna. Mah ruangah Ireland mi pawl i an hmuhning cu aa thleng.

1966 ah Dublin zung ṭengnge hruainak tangah chaklei le thlanglei Ireland cu lungrual tein rian an ṭuanṭi. Ramkhel lei le biaknaklei ruangah aa ṭhencheumi hna he cun kan i dang tuk. Catholic mi tampi biatak chungah an rak lut i hlanlio ah Protestant a simi unau pawl he Jehovah rian an ṭuantimi hmuh cu lungthawh awk ngai a si.

2011 ah Britain le Ireland zung ṭengnge cu an fonh i London Bethel ah rian an kan pek. Mah lioah Arthur cu a dam lo caah ka lungre a thei tuk. Anih cu Parkinson timi thihri zawtnak a ngei. 2015, May 20 ah kan i umnak kum 66 a si ah a thi.

Kum tlawmpal chung cu ka lung a kuai, ka lung a dong i ka ngaih a chia tuk. A hlan ahcun Arthur cu ka pawngah a um peng. Ka ngai tuk hringhran. Asinain cu bantuk thil sining hna ton caan ah Jehovah he kan i naih chin. Midang nih Arthur an dawtmi ka hmuh tikah mah nih ka lung a ka lawmhter. Ireland, Britain le United States i unau pawl sinin thapeknak ca ka hmuh. Mah cakuat hna le Arthur a naupa Dennis le a nupi Mavis, cun ka tunule Ruth le Judy hna sinin thazaang peknak tampi ka hmu.

Isaiah 30:18 Baibal caang nih thazaang tampi a ka pek. Hitin a ti: “Nan cungah a velngeihnak langhter duh ah BAWIPA nih an hngah ko hna. Amah nih cun a dingmi thil kha a tuah zungzal caah nanmah zaangfah awk kha aa tim ko. Lunglawmhnak hi BAWIPA i bochannak chungin a chuakmi a si.” Jehovah nih kan buaibainak vialte tawnghtham awk le vawlei thar ah lungthawh awk ngai a simi rian pek awkah lungsau tein a hngah timi hngalhnak nih tha a ka pek.

A luancia caan hna ka ruah ṭhan tikah Ireland ram ah Jehovah nih lam a kan hruaimi le thluachuah a kan pekmi kha ka hmuh. Mi tampi bawmhnak rian ah kaa tel khawh vemi cu tinvo sung taktak a si. Jehovah halmi rian ṭuannak nih thluachuah a kan hmuhter ti cu a hmaan tukmi a si.