Baibal ah kan hmuhmi Pathian tinhnak kong Paul nih a cherhchanmi a si ti kha a cungtang bia nih an langhter.

Baibal nih an nunnak a thlen khawh hna ti langhternak caah bupi chuahmi cauk hna nih Hebru 4:12 a cherhchan tawnmi cu aa thlakmi a si. Hebru 4:12 kha kaupi le thukpi in hlathlai ahcun bawmtu a si. Paul nih Hebru Khrihfa hna kha Pathian tinhnak ningin hmunkhat i ṭuan awkah a forhmi hna a si. Mah tinhnak hna cu Baibal ah hmuh khawh an si. Pathian nih Izipt ram in a luattermi, Israel mi hna kong kha tahchunhnak ah a hman. Annih cu Pathian pekmi dinhnak hmun biakammi ram, “cawhnuk le khuaihliti in a luangmi ram” ah luh ding ruahchannak an ngei.—Ex. 3:8; Deut. 12:9, 10.

Mah cu Pathian tinhnak a si. Asinain Isreal mi nih Jehovah lamhruainak kha an ngai lo i zumhnak an ngeih lo caah an lak i tam deuh cu dinhnak hmun ah an lut lo. (Nam. 14:30; Josh. 14:6-10) Paul nih Pathian “dinhnak chung i nan lut kho ti biakamnak” a um rih tiah a ti. (Heb. 3:16-19; 4:1) Mah “biakamnak” cu Pathian tinhnak chungah aa telmi a si ti cu a fiang ko. Hebru Khrihfa hna bantukin mah biakamnak kha rel in mah ningin hmunkhat ah kan ṭuanṭi kho. Mah biakamnak cu Baibal ah hram aa bunhmi a si ti langhternak caah Paul nih Genesis 2:2 le Salm 95:11 i bia hna kha a cherhchan.

Pathian “dinhnak chung i nan lut kho ti biakamnak a um” rih timi nih kan lung a kan suk tuk ding a si. Baibal ah hram aa bunhmi Pathian dinhnak chung i luh timi ruahchannak cu a si kho taktakmi a si ti kha kan zumh i luh ding zongah kar kan hlan cang. Moses Nawlbia zulh awk, a dang tuahsernak hna in Pathian mithmai ṭha hmuh awkah kan i zuamnak thawngin kar kan hlanmi a si lo. Pathian kan zumh caah aa tinhnak ningin nuam tein hmunkhat ah rian kan ṭuanṭi zungzal. Mah lengah vawleicung pumpi i mi thong tampi cu Baibal kha an hun hlathlai i Pathian tinhnak hna kha an hun hngalh. Mah tikah mi tampi cu an nunnak an i thleng, zumhnak an langhter, tipil an ing i Khrihfa an hung si. Cutin an i thlenmi nih “Pathian bia cu a nung i a ṭhawng” ti kha fiang tein a langhter. Baibal nih a langhter bantukin Pathian tinhnak cu kan nunnak ah huham a ngei i a zungzal in a ngei ko lai.