1, 2. Jehovah salle nih zei hna dah an doh?

ABEL thawkin tuchan i zumhfekmi Pathian salle vialte cu zumhnak caah fakpi in an i zuam. Lamkaltu Paul nih Hebru Khrihfa hna kha Jehovah mithmai ṭha le a thluachuah hmuh awkah “harnak tampi nan ing, asinain harnak nih khan an tei hna lo” tiah a ti hna. (Heb. 10:32-34) Paul nih Khrihfa hna an i zuamnak kha tlikzuamnak, paihnak le boxing ti bantuk Greek mi hna lentecelhnak he a tahchunh. (Heb. 12:1, 4) Tuchan ah kannih zong nunnak tlikzuamnak ah kan tli ve. Lungvaivuanhter a kan duhtu, atu kan i nuamhnak le hmailei ruahchannak tlauter a duhtu ral kan ngei hna.

² Satan le a vawlei kha fakpi in kan doh hna. (Efe. 6:12) Hi vawlei cawnpiaknak le ruahnak, ziaza rawhralnak, kuakzuknak, zuritnak le ritnak sii hmannak ti bantuk a ṭhalomi tuahsernak hna doh cu a biapi tuk. Mah lengah lungdonghnak le kan derthawmnak hna zong kha doh zungzal a hau.—2 Kor. 10:3-6; Kol. 3:5-9.

3. Kan ral pawl doh awkah Pathian nih zeitindah a kan cawnpiak?

 ³ Cu bantuk a ṭhawng tukmi kan ral hna dohnak ah teinak kan hmu kho lai maw? Kan hmu kho ko, asinain a har men ko lai. Paul nih amahle amah kha boxing aa thongmi he aa tahchunh i hitin a ti: “Ka thongh tikah a ping a pang a thongmi bantuk ka si lo.” (1 Kor. 9:26) Boxing a thongmi pakhat nih a dang pakhat kha a thongh bantukin kannih zong kan ral kha kan doh ve a hau. Cutin doh khawh awkah Jehovah nih a kan bawmh i a kan cawnpiak. Baibal, Baibal hrambunhmi cauk, Khrihfabu pumhnak le civui hna in a kan cawnpiak. Cuka in na hmuhmi lamhruainak vialte kha na zul maw? Na zulh lo ahcun a ral ṭha tein a thong kho lomi, thli lakah a thongmi bantuk na si lai.

4. Ṭhatlonak nih a kan tei nakhnga lo zeidah kan tuah lai?

⁴ Hliphlau tein kan um zungzal a hau. Zeicah? Kan ral pawl nih kan i rin lo lio caan asiloah kan tha a der lio caan ah an kan doh khawh caah a si. Baibal nih hitin ralrin a kan pek: “Ṭhatlonak kha i teiter hlah u, ṭhatnak tu in ṭhatlonak kha tei i zuam u.” (Rom 12:21) Ṭhatlonak kha kan doh peng ahcun kan tei khawh ko. Asinain kan i thlahdorh i kan doh ti lo ahcun Satan, a vawlei le kan derthawmnak nih a kan tei khawh. Cucaah zeitikhmanh ah na hnabei dong hlah. Na lung dong hlah. Na kut tha zong derter hlah.—1 Pit. 5:9.

5. (a) Pathian thluachuah kan hmuh nakhnga kan i zuamnak ah zeinihdah a kan bawmh lai? (b) Baibal chung i ahote kong dah kan i ruah hna lai?

⁵ Teinak hmuh khawh awkah kan dohnak a ruang kha kan i cinken a hau. Mah cu Pathian mithmai ṭha le a thluachuah hmuh kan duh caah a si. Hebru 11:6 nih hitin a ti: “Pathian a fuhmi paohpaoh nih cun, Pathian cu a um i amah a kawlmi cu laksawng a pek hna, ti kha an zumh awk a herh.” Jehovah kawl timi nih a mithmai ṭha hmuh kan duh ahcun fakpi in kan i zuam a hau ti kha a chim duhmi a si. (Lam. 15:17) Cutin a tuahmi zohchunh awk ṭha nu le pa tampi kong kha Baibal ah kan hmuh. Jakob, Rachel, Josef le Paul cu lungthinlei le pumsalei ah harnak a pemi thil tampi an rak tong. Asinain mah vialte kha an tei khawh. Kannih zong kan i zuam ahcun Jehovah thluachuah kan hmu kho ti kha mah an kong hna nih a langhter. Zeitindah kan i zohchunh khawh hna ti kha zohhmanh u sih.

6. Jakob kha i zuam awkah zeinihdah a bawmh, zeitindah laksawng a hmuh? (A hramthawknak hmanthlak zoh.)

⁶ Zumhfekmi Jakob nih Jehovah a dawt ca le an i pehtlaihnak a sunsak caah inkhawhnak he fakpi in a rak i zuam. Na tefa thluachuah ka pek hna lai timi Jehovah biakam kha tling tein a rak zumh. (Gen. 28:3, 4) Jakob cu kum 100 hrawng a si lioah Pathian thluachuah hmuh awkah vancungmi he hmanh an rak i pai. (Genesis 32:24-28 rel.) Jakob nih amah thazaang in mah a ṭhawngmi vancungmi kha a rak paihmi a si maw? A si hrimhrim lai lo. Thluachuah hmuh dingin biakhiahnak a tuah i a rak i zuammi a si. Jakob aa zuamnak kha Jehovah nih thluachuah a  pek i “Pathian a Paitu” asiloah Zuamnak A Ngeimi tiah sullam a ngeimi Israel timi min kha a pek. Hmuh awkah kan kawlmi Jehovah mithmai ṭha le a thluachuah kha Jakob nih a rak hmuh.

7. (a)  Rachel nih zei bantuk lung a donghtermi thil dah a ton? (b) Rachel nih zeidah a tuah i zeitindah thluachuah a hmuh?

⁷ Jakob a nupi Rachel nih a vapa sinah Jehovah nih bia aa kammi zeitindah a tlin lai ti hmuh lai kha aa ngaih tuk. Asinain a poi ngaimi pakhat cu Rachel cu fa a ngei kho lo. Baibal chan ah fa ngeih khawh lo cu nu pawl caah a har tukmi thil a si. Rachel nih cu bantuk thil sining lakah zeitindah aa zuam peng? Ruahchannak a ngeihmi kha zeitikhmanh ah a hlaw bal lo. Mah canah Jehovah sinah atu le atu thla a camnak thawngin aa zuam peng. Rachel a thlacamnak kha Jehovah nih a theihpiak i fa ngeih khawhnak thluachuah a pek. Cucaah “kan i cuh i keimah nih ka tei” tiah a ti.—Gen. 30:8, 20-24.

8. Josef nih zei bantuk harnak hna dah a ton, Josef kong cu kan caah zeitindah zohchunh awk ṭha a si?

⁸ Jakob le Rachel an zumhfehnak cu an fapa Josef cungah huham a ngei i harnak a ton caan ah mah nih a bawmh. Josef cu kum 17 a si tikah a nunning cu aa thleng dih. Amah a nahchuahmi a ule nih sal ah an zuar. Sualnak a ngei lo nain Izipt ram i thonginn ah kum tampi chung a rak tla. (Gen. 37:23-28; 39:7-9, 20, 21) Asinain Josef cu lungdongh le lungfah in a um lo, cun phuhlam awk zongah aa zuam lo. Zeicah? Jehovah he an i pehtlaihnak kha a sunsak i mah kha a lungthin dihlak in a ruah peng caah a si. (Lev. 19:18; Rom 12:17-21) Josef kong nih a kan bawmh khawh. Kan ngakchiat lio nunning cu a chiat hmanhah asiloah atu kan nunnak cu ruahchannak a um lomi a lawh hmanhah  kan i zuam zungzal a hau. Cutin kan tuah ahcun Jehovah nih thluachuah a kan pek lai ti cu a fiang ko.—Genesis 39:21-23 rel.

9. Jakob, Rachel le Josef kha zeitindah kan i zohchunh khawh hna?

⁹ Tuchan zongah a harmi zuamcawhnak hna kan tong kho men. Dinlonak, duhdanhnak, nehsawhnak le nahchuahnak hna kan tong kho men. Lungdongh loin Jakob, Rachel le Josef kha lawmhnak he Jehovah biak zungzal awkah zeinihdah a bawmh hna ti kha i cinken. Pathian he an i pehtlaihnak kha an sunsak tuk caah Pathian nih thazaang a pek hna i thluachuah a pek hna. An thlacam ningin an i zuam zungzal. Kannih zong donghnak caan ah kan nun caah hmailei ruahchannak kha fek tein i tlaih peng cu a biapi tuk. Jehovah mithmai ṭha hmuh awkah i paih, phundang cun fakpi in i zuam kha na duh maw?

10, 11. (a) Pathian thluachuah hmuh awkah zeicah kan i zuam awk a si? (b) A hmaanmi biakhiahnak tuah awkah zeinihdah a kan bawmh lai?

¹⁰ Pathian thluachuah hmuh awkah zeicah kan i zuam awk a si? Kannih cu mitlinglo kan si caah a ṭhalomi duhnak pakhatkhat kha kan doh a hau men lai. Cheukhat cu phungchimnak he aa tlaiin a hmaanmi lungput ngeih awkah an i zuam, cheukhat cu damlo ruang le lunglen ruangah an i zuam a hau men lai. Cheukhat cu mi ngaihthiam kha an i harh men lai. Jehovah kan biaknak cu zei can a si cang hmanhah zumhfekmi hna laksawng a pemi, Jehovah Pathian biak awkah a harter khomi thil hna kha doh zungzal a hau.

¹¹ A hmaanmi biakhiahnak tuah le Khrihfa nunning in nun cu a har tuk men ko lai. A hleiin a ṭhalomi duhnak doh tikah a har kho. (Jer. 17:9) Cutin na um ahcun thiang thlarau hmuh awkah Jehovah sinah thlacam. Thlacamnak le thiang thlarau nih a hmaanmi thil tuah awkah thazaang an in pek khawh i Pathian thluachuah hmuh awkah an in bawmh khawh. Na thlacam ningin nun awkah biakhiak. Nifate Baibal rel awkah i zuam. Pumpak hlathlainak le chungkhar pumhnak tuah awkah a caan pe.—Salm 119:32 rel.

12, 13. A ṭhalomi duhnak kha uk khawh awkah Khrihfa pahnih cu zeinihdah a bawmh hna?

¹² A ṭhalomi duhnak tei khawh awkah Baibal, thiang thlarau le bupi chuahmi cauk hna nih unau pawl kha a bawmh hna. Kumhra fai a simi pa pakhat nih 2003, December 8, I Hlau! [Mirang] mekazin chung i “A Ṭhalomi Duhnak Kha Zeitindah Na Tei Khawh?” timi capar kha a rel. Zeitindah a lehrulh? Hitin a chim: “A ṭhalomi ka ruahnak kha i uk khawh awkah kaa zuam. ‘A ṭhalomi duhnak tei khawh ding cu mi tampi caah a har’ timi capar ka rel tikah kei zong mah unau pawl bantuk ka si ve tiah ka ruah. Keimah lawng ka si lo ti kha ka hun hngalh.” 2003, October 8, I Hlau! [Mirang] ah aa telmi “Phungning Loin Nunnak—Pathian Nih A Cohlang Maw?” timi capar zongin ṭhatnak a hmuh. Mah capar in mi cheukhat nih ‘pum ah fahnak pakhat’ an doh zungzal ti kha a hun hngalh. (2 kor. 12:7) Thiang tein nun awkah  an i zuam buin hmailei ruahchannak he aa tlaiin a hmaanmi lungput an ngei. Hitin a ti: “Cucaah nikhat a liam fatin zumhfek tein ka um kho tiah ka ruah. Hi chan ṭhalo in nifate ka luat khawh nakhnga Jehovah nih a bupi a hman caah kaa lawm tuk.”

¹³ United State ah a ummi unaunu pakhat i a hmuhtonnak zong hi ruathmanh. Hitin a ṭial: “Kan herhmi te kha kan herh lio caan ah a kan pek zungzal caah kaa lawm tuk. Mah capar hna hi keimah caah an ṭialmi a si tiah ka ruah tawn. Jehovah nih a huatmi a ṭhalomi duhnak pakhat kha kum tampi chung ka rak doh. A caan ah lungdong in mah duhnak kha doh ti loin um hna ka hun duh. Jehovah cu zaangfahnak a ngei i ngaihthiam a hmangmi a si ti kha ka hngalh ko. Asinain a ṭhalomi duhnak ka ngeih ca le mah kha ka huat khawh lo caah Jehovah bawmhnak ka hmu kho lai lo tiah ka ruah. Mah a dong kho lomi dohnak nih ka nunnak kha a harter. . . . 2013, March 15, Vennak Innsang i ‘Jehovah “Hngalh khawhnak Lungthin” Na Ngei maw?’ timi capar ka rel hnuah Jehovah nih bawmh a ka duh ti kha ka hun hngalh.”

14. (a) Paul nih a dohmi thil he aa tlaiin zeitindah a intuar? (b) Kan derthawmnak kan dohmi kha zeitindah kan tei khawh?

¹⁴ Rom 7:21-25 rel. Paul nih a ṭhalomi duhnak le derthawmnak hna doh cu zeitluk in dah a har ti kha amah theng nih a hngalh. Asinain Jehovah sinah bochannak he thla ka cam i Jesuh tlanhnak man ka zumh ahcun ka tei khawh ko lai tiah a zumh. Kannih tah zeitin? Kan derthawmnak kan dohmi kha kan tei kho lai maw? Paul kha kan i zohchunh i kanmah thazaang si loin Jehovah kan i bochan, cun tlanhnak man kan zumh ahcun kan tei khawh ko.

15. Zumhfek tein um zungzal awk le hneksaknak hna inkhawh awkah thlacamnak nih zeitindah a kan bawmh khawh?

¹⁵ A caan ah thil pakhat he aa tlaiin zeitluk in dah kan lungre a theih ti kha langhter awkah Pathian nih a awnh men lai. Tahchunhnak ah, kan innchungkharmi pakhatkhat nih a zual ngaimi zawtnak asiloah dinlonak hna a ton tikah zeitindah kan lehrulh lai? Jehovah kha lungthin dihlak in kan i bochan ahcun zumhfek tein kan um khawh nakhnga, kan i nuamh khawh zungzal nakhnga le amah he kan i pehtlaihnak a feh zungzal nakhnga thazaang pek awkah kan nawl lai. (Fil. 4:13) Hlanlio le tuchan i zumhfekmi Pathian salle kong nih thlacamnak nih thazaang, inkhawhnak le ralṭhatnak a kan pek khawh ti kha an langhter.

16, 17. Zei tuah awkah dah bia na khiah?

¹⁶ Satan nih na lung a donghmi le na kut tha a dorhmi kha hmuh a duh tuk. Cucaah ‘a ṭhami kha i tlaih’ awkah biakhiak. (1 Thes. 5:21, NW) Satan, hi chan ṭhalo le a ṭhalomi duhnak hna na doh tikah na tei khawh ko. Pathian nih thazaang a ka pek lai i a ka bawmh lai ti na zumh ahcun na tei khawh ko.—2 Kor. 4:7-9; Gal. 6:9.

¹⁷ Cucaah fakpi in i zuam zungzal law do zungzal ko. Jehovah nih ‘thluachuah vanluhnak aan thlet hnawh’ lai kha na zumh khawh.—Mal. 3:10.