DIANA cu kum 80 leng a si cang i a luancia kum tlawmpal lioah harnak tampi a rak tong. A vapa cu Alzheimer zawtnak a ngei i tar zohkhenhnak inn ah a thi. A fapale pahnih zong nih an thihtak i amah zong hnuk cancer a ngei. Asinain Diana cu pumhnak le phungchimnak ah aa nuamh zungzalmi kha unau pawl nih an hmuh.

John cu kum 43 leng khualtlawng rianṭuantu a rak ṭuan. A rian kha a nunnak tluk in a sunsak. Asinain a dam lomi a chungkhat pakhat zohkhenh awkah khualtlawng rian in aa din. Civui ah amah a rak hngalmi unau pawl he an i ton tikah zeihmanh aa thleng lo ti kha an hmuh. Atu tiang aa nuam rih ko.

Diana le John cu zeitindah an i nuamh khawh? Harnak a tongmi mi pakhat cu zeitindah aa nuamh khawh? Mi pakhat nih a sunsak tukmi rian a sungh tikah zeitindah aa nuamh khawh? Baibal nih a phi a kan chimh. Hitin a ti: “BAWIPA nih a tuahmi thil ruangah khan miding mi vialte cu an i lawm lai.” (Salm 64:10) Zeinihdah a hmunmi nuamhnak a kan pek i zeinihdah a kan pek lo ti kha kan hngalh ahcun mah biatak kha ṭha deuh in kan hun hngalhthiam lai.

Thil cheukhat nih a kan nuamhter zungzal men lai. Tahchunhnak ah, aa duh i aa ṭhiummi nuva hna kha ruathmanh. Nulepa a hung simi asiloah Jehovah rian ah rian thar pek a simi mi pakhat kong kha ruathmanh. Mah thil hna cu Jehovah sinin hmuhmi laksawng an si caah mah nih nuamhnak a chuahter. Chungkhar, fa ngeih khawhnak le a bupi ah rianṭuan khawhnak a kan pek.—Gen. 2:18, 22; Salm 127:3; 1 Tim. 3:1.

Asinain thil cheukhat nih cun chikkhat ca lawng ah nuamhnak a chuahter. Ngaihchiat awk ngai a simi cu innchunghawile cu zumhawktlak loin an um kho asiloah an thi kho. (Ezek. 24:18; Hos. 3:1) Fale cu nulepa le Pathian nawl an ngai men lai lo i buchung hmanhin chuah an si men lai. Tahchunhnak ah, Samuel fapale nih cohlan awktlakmi lam in Jehovah rian an ṭuan lo, David nih Bath-sheba he nupa sualnak an  tuah caah a chungkhar ah buaibainak tampi a chuak. (1 Sam. 8:1-3; 2 Sam. 12:11) Cu bantuk thil hna a um tikah nuamhnak si loin ngaihchiatnak le lungfahnak hna a chuak.

Cu bantukin kan dam lo ca, kan chungkhar zohkhenh a herh ca asiloah bupi ah thlennawnnak hna a um caah Jehovah rian kha kan ṭuan kho ti men lai lo. An rian a sungmi mi tampi nih an rian in an hmuhmi nuamhnak hna kha kan ngai tiah an ti.

Cu bantuk a kong hna ruangah nuamhnak cu a hmun lo ti kha hmuh khawh a si. Nunnak ah harnak ton hmanhah a hmun zungzalmi nuamhnak a um maw? A um. Samuel, David le a dang cu a fakmi harnak lakah an i nuamh zungzal caah a si.

Jesuh nih nuamhnak taktak cu zeidah a si ti kha a hngalh. Vawleicung a rat hlanah Jesuh cu ‘[Jehovah] hmaiah khan aa lawm zungzal’ tiah Baibal nih a ti. (Ptb. 8:30) Asinain vawlei a rat tikah a caan ah a har tukmi thil sining hna a tong. Asinain a Pa duhnak tuahnak ah aa lawm. (Johan 4:34) A thih lai te i fahnak a in lioah tah zeitin? Hitin a ti: “Hmailei lunglawmhnak aa ruahchanmi ruangah khan vailamcung i thih ningzahnak cu zeihmanh ah a rel lo.” (Heb. 12:2) Cucaah nuamhnak taktak he aa tlaiin Jesuh chimmi thil pahnih in tampi kan cawn khawh.

Voikhat cu zultu 70 cu phung an chim dih hnuah Jesuh sinah an rak kir. Thil tampi an tuah i khuachia hmanh an tei khawh caah an i nuam tuk. Asinain Jesuh nih hitin a ti hna: “Thlarau ṭhalo nih nan nawl an in ngaih hna caah khan i lawm hlah u, vancung i nan min ṭial a si ca tu ah khan i lawm tuah u.” (Luka 10:1-9, 17, 20) Jehovah mithmai ṭha hmuh cu zei bantuk rian nakhmanh in a biapi deuhmi le lawmhnak tam deuh a chuahtertu a si.

Voikhat cu Jesuh nih mibu a cawnpiak hna lioah Judah minu pakhat cu a cawnpiaknak nih a lung a suk tuk i hi bantuk fapa a ngeimi nu cu aa lawm tuk lai tiah a ti. Asinain Jesuh nih hitin a leh: “Pathian bia kha a thei i a ngaimi caah  cun zeitluk in dik lunglawmhnak a si chinchin.” (Luka 11:27, 28) Kan lung a kan lawmhtermi kan fale caah kan i uangthlar. Asinain a hmunmi lawmhnak a kan petu cu Jehovah nawl kan ngaihmi le amah he pehtlaihnak ṭha kan ngeihmi hi a si.

Jehovah lung kan lawmhter ti kan hngalhmi nih lawmhnak nganpi a kan pek. Hneksaknak ruangah kan i nuamh ti lo hmanhah mah nih kan i lawmhnak kha a tlauter lo. A tak ti ahcun hneksaknak kan ton lioah zumhfek tein kan um tikah kan i lawmhnak cu a karh chinchin. (Rom 5:3-5) Jehovah nih amah aa bochanmi hna kha thiang thlarau zong a pek hna. Lawmhnak cu thiang thlarau nih a chuahtermi ziaza lakah aa tel ve. (Gal. 5:22) Mah nih Salm 64:10 ah “BAWIPA nih a tuahmi thil ruangah khan miding mi vialte cu an i lawm lai” timi bia kha hngalhthiam awkah a kan bawmh.

Cun Diana le John nih harnak an ton bu hmanhin an i lawmh zungzalnak a ruang kha a fianter. Diana nih hitin a ti: “Ngakchia nih a nu le a pa an i bochan hna bantukin Jehovah kha kaa bochan.” Cun hitin a ti chap: “Hmaipanh tein phung ka chim khawh zungzal nakhnga Jehovah nih thluachuah a ka pek tiah ka ruah.” John cu a rian in aa dinh hnuah aa nuamh zungzal nakhnga le phungchimnak ah a rian a tam zungzal nakhnga zeinihdah a bawmh? Hitin a ti: “1998 thawkin Bu Rianṭuantu Tinṭan a kaimi hna cawnpiak awkah rian pek ka si tikah a hlan nakin hlathlainak tam deuh in ka tuah khawh.” Jehovah rian ah pek kan simi zei rian paoh kha ka nupi he lungtho tein ṭuan kan duh zungzal caah fawi tein thlennak kan tuah khawh tiah a ti. Cun “kan tuahmi thil ruangah kan i ngaichih bal lo” tiah a ti chap.

Salm 64:10 bia a hmaan kha a dang mi tampi zong nih an hmuh. Tahchunhnak ah, nuva tuahkhat cu United States i Bethel ah rian an ṭuannak hi kum 30 leng a si cang. A hnuah special hmaikal in rian pek an si. Hitin an ti: “Na duh tukmi thil pakhat na sungh tikah na ngaih a chiatmi cu a phung a si ko.” Asinain hitin an hi chap: “A zungzal in cun na ngaih a chia kho lai lo.” Rian thar pek an sinak Khrihfabu ah phung an chim colh. Hihin an ti: “Thil cheukhat he aa tlaiin cu set kha set tiin thla kan cam. Kan thlacamnak leh kan simi kan hmuh tikah thazaang kan hun ngei i lawmhnak a kan pek. Kan phanh hnu tlawmpal ah, kan Khrihfabu in midang zong hmaikal an hun ṭuan i a ṭhangchomi Baibal cawnpiaknak pahnih kan ngei.”

I lawmh zungzal ding cu a fawi lo. Kan ngaih a chiat caan hna a um lai. Asinain Salm 64:10 bia in Jehovah nih a kan hnemh. Kan lung a dongh tik hmanhah zumhfek tein kan um zungzal ahcun ‘Jehovah ruangah kan i lawm lai’ ti kha kan zumh khawh. Jehovah biakam a simi “van thar le vawlei thar” a tlin lai caan kha kan i ngaih kho. Mi vialte cu mitling an si cang lai. Jehovah miphun vialte nih “sermi thil kha zungzal in” an i nuamhpi cang lai.—Isa. 65:17, 18.

Mah nih a chim duhmi kha ruathmanh. A tlingmi ngandamnak kan ngei lai i zing fatin thazaang ṭhawng in kan tho lai. Hlanah kan ngaih a chiattermi zei bantuk thil a um hmanhah mah nih lungfahnak a kan pe ti lai lo. Jehovah nih “hlanlio thil cu a philh in philh an si cang lai” tiah bia a kan kamh. Kan dawtmi a thimi hna kha kan don hna lai. Jesuh nih a thawhtermi kum 12 ngakchia nute i a nu le a pa bantukin kan in lawm tuk ve lai. (Mar. 5:42) A donghnak ah vawleicung ah a ummi, mi vialte cu a dingmi an si cang lai i ‘BAWIPA nih a tuahmi thil ruangah khan an i lawm lai.’