1, 2. Na nunnak ah thimnak na tuah tikah Sertu bia ngaih cu zeicah fim a si? (A hramthawknak hmanthlak zoh.)

MINO na si ahcun hmailei kong he aa tlaiin ruahnak cheuhnak tampi na hmuh ko lai. Sayale, ruahnak cheutu pawl asiloah midang nih a sangmi fimcawnnak na kai a hau asiloah tangka tampi na hmuh khawh nakhnga rianṭha na ngeih a hau tiah an in ti men lai. Asinain Jehovah nih cun mah he aa lo lomi ruahnak aan cheuh. Nangmah tein khua na sak khawh i naa zohkhenh khawh nakhnga sianginn ah i zuam seh ti aan duh. (Kol. 3:23) Asinain na ngakchiat lioin hmailei na nunnak caah ṭhatnak aan pe dingmi, a biapimi biahkhiahnak na tuah a hau ti zong a hngalh. Cucaah lam an hruai i hi donghnak caan chungah amah duhnak lam in nun awkah aan bawmmi phunglam aan pek.—Matt. 24:14.

² Jehovah nih zei paoh a hngalh dih ti kha i cinken. Hmailei ah zeidah a cang lai ti kha a hngalh i hi chan ṭhalo donghnak cu zeitluk in dah a naih cang ti kha a hngalh. (Isa. 46:10; Matt. 24:3, 36) Jehovah nih nangmah zong aan hngalh. Zeinihdah  aan nuamhter lai i zeinihdah aan nuamhter lai lo ti kha a hngalh. Minung ruahnak cheuhnak cu a ṭhami a lo ko lai nain mah cu Baibal ah hram aa bunhmi a si lo ahcun fimnak taktak a si lo.—Ptb. 19:21.

3, 4. A ṭhalomi ruahnak cheuhnak ngaihnak nih Adam le Evi le an fale kha zeitindah a hnorsuan hna?

³ A ṭhalomi ruahnak cheuhnak a umnak hi caan saupi a si cang. Minung kha a ṭhalomi ruahnak cheuhnak a pe hmasa biktu cu Satan a si. Zeitindah kan nun lai timi kong ah nanmah tein biakhiahnak nan tuah ahcun nan i nuam deuh lai tiah Evi sinah a ti. (Gen. 3:1-6) Asinain Satan cu amah zawn lawng aa ruatmi a si. Adam le Evi telin hmailei an fale vialte nih Jehovah si loin amah nawl kha ka ngai hna sehlaw ka bia hna seh ti a duh. Asinain Satan nih minung caah zeithil hmanh a tuah lo. An ngeihmi thil vialte a petu cu Jehovah a si. Hawi le bawmtu, aa dawh tukmi umnak hmun, a tlingmi pum le zungzal nunnak a pek hna.

⁴ Ngaihchiat awk ngai a simi cu Adam le Evi nih Pathian nawl an ngai lo. Cutin an tuahnak thawngin nunnak a petu he an i pehthlaihnak kha anmah tein an chah. A phichuak cu ngaihchiat awk ngai a si. Pangpar cu a kung in a ṭilh bantukin Adam le Evi cu duhsah duhsah in an tar i an thi. An fale zong nih harnak an tong i mah ah kan dihlak in kan i tel ve. (Rom 5:12) Tuchan ah mi tampi nih Pathian chimmi kha zei ah an rel lo i anmah duhmi kha an tuah. (Efe. 2:1-3) A phichuak cu zeidah a si? Mi nih Jehovah an ralchanhmi cu ‘fimnak an ngeih lo’ a si tiah Baibal nih a ti.—Ptb. 21:30.

5. Pathian nih minung he aa tlaiin zei zumhnak dah a ngeih, mah cu a hmaan maw?

⁵ Jehovah nih mino tampi telin amah hngalh a duhmi le biak a duhmi an um lai tiah a zumh. (Salm 103:17, 18; 110:3) Mah mino pawl cu Jehovah caah an sunglawi tuk. An lak ah naa tel ve maw? Pathian sinin “thilṭha” tampi na hmuh i mah nih na nunnak ah nuamhnak aan pek. (Salm 103:5 rel; Ptb. 10:22) Mah thil lakin pali kha kan i ruah hna lai. Mah cu thlarau rawl, hawikom ṭha, sullam a ngeimi hmuitinh le zalonnak taktak kha an si.

6. Thlaraulei na chambaunak kha zeicah biapi ah na chiah awk a si, nangmah bawmh awkah Jehovah nih zeidah aan pek?

⁶ Saram nih thlarau rawl an herh lo, phundang cun Sertu hngalh a hau timi ruahnak an ngei lo. Asinain kannih cu kan ngei. (Matt. 4:4) Pathian bia kan ngaih tikah hngalhnak, fimnak le nuamhnak kan hmu. Jesuh nih “thlarau ah michambau kan si ti aa hngalmi cu, lunglawmmi nan va si dah” tiah a ti. (Matt. 5:3) Pathian nih Baibal a kan pek i kan zumhnak a feh nakhnga a bawmmi cauk pawl chuah awkah “zumh awk a tlakmi le a fimmi sal” kha a hman hna. (Matt. 24:45) Mah cauk hna nih kan zumhnak le Jehovah he kan i pehtlaihnak kha a fehter caah thlarau rawl tiah kan auh. Thlarau rawl tampi kan ngei.—Isa. 65:13, 14.

7. Pathian sinin hmuhmi thlarau rawl nih zeitindah aan bawmh lai?

⁷ Thlarau rawl nih fimnak le ṭha tein khuaruah khawhnak an pek khawh, mah nih lam tampi in an huhphenh lai. (Phungthlukbia 2:10-14 rel.) Tahchunhnak ah, mah sining  hna nih Sertu a um lo asiloah tangka le thilri chawva nih nuamhnak aan pek khawh timi lihbia hna kha hngalh awkah aan bawmh lai. Cun harnak aan tonter khomi duhnak le tuahsernak hna zong hrial awkah aan bawmh lai. Cucaah a fimmi le ṭha tein khua a ruat khomi si awkah fakpi in i zuam. Mah tikah Jehovah nih aan dawtmi le na caah a ṭha bikmi a duh ti kha na hun hngalh lai.

8. Zeicah atu ah Pathian na naih awk a si, mah nih hmailei ah zeitindah ṭhatnak aan hmuhter lai?

⁸ A rauhhlan ah Satan vawlei ah aa telmi vialte cu hrawh an si cang lai. Jehovah lawnglawng nih a kan huhphenh khawh lai i kan herhmi thil kha a kan pek lai. Mah ah nifa ei dingmi rawl zong aa tel men lai. (Hab. 3:2, 12-19) Cucaah atu caan cu Pathian naih caan le amah kan i bochannak ṭhawnter caan a si. (2 Pet. 2:9) Cutin na tuah ahcun na pawngkam ah zei bantuk thil a can hmanhah hitin a chimmi David bantukin na intuar lai: “BAWIPA ka sinah a um cu ka hngalh zungzal, amah cu keimah he naihte ah a um i zeihmanh nih an ka hnin kho lo.” —Salm 16:8.

9. (a) Johan 6:44 ah kan hmuh bantukin Jehovah nih zeidah a tuah? (b) Jehovah Tehte Hna he kan i ton tikah zeidah aa thleidang?

⁹ Biatak a hngal lomi pakhat he a hmasa bik nan i ton lioah a kong kha zeitluk in dah na hngalh? A min le a muisam cu na hngalh men ko lai nain a kong tampi kha cu na hngal men lai lo. Asinain mah cu biatak a hngal cangmi pakhat a hmasa bik na hmuh lio he cun aa dang tuk. Jehovah a dawt ti kha na hngalh. Jehovah nih a ngeihmi thilṭha pakhatkhat kha a hmuh i amah a biatu a chungkhar ah i tel ve dingin a sawm ti kha na hngalh. (Johan 6:44 rel.) Khoika hmun in a rami asiloah zeitin a ṭhangmi a si hmanhah a kong tampi kha na hngalh cang i amah zong nih aan hngalh ve.

10, 11. Jehovah miphun an i lawhnak cu zeidah a si, mah cu na cungah zeitindah huham a ngeih?

¹⁰ Jehovah Tehte Hna he nan i ton tik  zongah nan dihlak in a biapi bikmi thil hna kan ngei ti kha na hngalh. Nan hmanmi holh cu aa dan hmanhah nan pahnih in biatak a simi “a thiangmi holh” nan hmanmi kha na hngalh. (Zef. 3:9, NW) Mah cu nan pahnih in Pathian nan zum, aa khatmi ziaza lei phunglam ningin nan nung i aa khatmi hmailei ruahchannak nan ngei tinak a si. Mah nih pakhat le pakhat i zumh awkah aan bawmh hna lai i zungzal in a hmunmi nan i hawikomhnak kha a fehter chin lai.

¹¹ Cucaah Jehovah na biak tikah a ṭha bikmi hawikom ka ngei hna tiah na chim khawh. Anmah he nan i ton lo hmanhah vawleicung pumpi ah hawikom na ngei. Mah a sunglawi tukmi laksawng a hmumi Jehovah miphun nakin a ṭha deuhmi an um lai tiah na ruat maw?

12. Sullam a ngeimi zei bantuk hmuitinh dah na chiah khawh?

¹² Phungchimtu 11:9–12:1 rel. Phanh awkah naa zuammi hmuitinh pakhatkhat na ngei maw? Nifatin Baibal rel awk, hmualngei tein a phi pek awk le cawnpiaknak i ṭhancho awkah hmuitinh na chiah men lai. Asiloah phungchimnak ah hmualngei tein Baibal hman thiam awkah naa zuam men lai. Na ṭhanchomi naa hngalh tik asiloah midang nih na sining an in chimh tikah zeitindah na um? Naa nuam tuk lai i kaa zuam awk a si tiah na ruah men lai. Zeicah? Zeicahtiah Jesuh bantukin Jehovah nih tuahter aan duhmi na tuah caah a si.—Salm 40:8; Ptb. 27:11.

13. Hi vawlei lei hmuitinh nakin Pathian rian biapi chiah cu zeitindah a ṭhat deuh?

¹³ Jehovah rianṭuannak ah na lungthin na chiah tikah na rian nih nuamhnak aan pek lai i sullam a ngeimi nunnak na ngei lai. Paul nih hitin ruahnak a kan cheuh: “Fek tein dir u law zeihmanh nih in ṭhial kho hna hlah seh. Bawipa rian teimak tein nan ṭuannak ah cun i manh lo ngaiin um zungzal ko u, Bawipa rian nan ṭuanmi cu a lak a si bal lo ti kha nan hngalh” (1 Kor. 15:58) Asinain mi nih tangka tampi hmuhnak asiloah minthannak ti bantuk vawlei lei hmuitinh kha biapi an chiah tikah nuamhnak taktak an hmu lo. Hlawhtlinnak an hmuh hmanhah pakpalawng a si tiah an ruah tawn. (Luka 9:25) Mah kha Siangpahrang Solomon kong in kan hngalh khawh.—Rom 15:4.

14. Solomon hmuhtonnak in zeidah na cawn khawh?

¹⁴ A nung balmi lakah a rum bikmi le ṭhawnnak a ngei bikmi Solomon nih a rak hneksak. Hitin a ti: “Kaa nuam tuah lai, lunglawmhnak timi hi a sullam zeidah a si.” (Pct. 2:1-10) Cucaah Solomon nih inn ṭhaṭha a sak, aa dawh tukmi pangpar dum hna a ser i a duhmi paoh a tuah. Mah tikah lungsinak le nuamhnak a hmu maw? Solomon nih a tuahmi thil vialte a hun ruah ṭhan tikah “zeihmanh an rak si lo ti kha ka vun hngalh” tiah a ti. Cun “zeihmanh ṭhathnemnak a um lo” tiah a ti chap. (Pct. 2:11) Solomon hmuhtonnak in mah kong kha naa hngal maw?

15. Zeicah zumhnak na herh, mah nih Salm 32:8 ah kan hmuh bantukin zeitindah aan bawmh lai?

¹⁵ Mi cheukhat nih palhnak an tuah i mah ruangah a chuakmi harnak an ton hnu lawngah fimnak an i lak. Jehovah nih cu bantuk thil kha tonter aan duh lo. Ka bia ngai sehlaw ka nawl zul seh ti aan duh. Cutin tuah khawh awkah zumhnak a herh. Mah zumhnak cu a sunglawi tukmi a si i mah nih  zeitikhmanh ah na ngaih aan chiatter lai lo. Cun Jehovah nih zeitikhmanh ah “nan langhtermi amah nan dawtnak kha a philh lai lo.” (Heb. 6:10) Cucaah zumhnak fehter awkah fakpi in i zuam. Mah tikah na nunnak ah a ṭhami thimnak na tuah lai i vancung na Pa nih na caah a ṭha bikmi a duh ti kha na hngalh lai.—Salm 32:8 rel.

16. Zeicah zalonnak kha kan sunsak awk le a ṭhami lam in kan hman awk a si?

¹⁶ Paul nih “Bawipa thlarau umnak hmun paohah luatnak a um” tiah a ti. (2 Kor. 3:17) Jehovah nih zalonnak kha a duh i kannih zong duh ve awkah a kan ser. Asinain mah zalonnak kha nangmah aan huppheng hngami, a ṭhami lam in hmanter aan duh. Na ṭhirual cheukhat cu a thurhnawmmi hmanthlak an zoh men lai, nupa sualnak an tuah men lai, an nunnak caah ṭih a nungmi zaang-lentecelhnak hna an tuah men lai asiloah ritnak sii le zu kha ningcang loin an hman men lai. A hmasa ahcun mah thil hna cu a nuammi le lungthawh awk ngai a simi thil an lo men lai nain mah nih zawtnak, ritnak sii nih lemnak asiloah thihnak hmanh a chuahter khawh. (Gal. 6:7, 8) Cu bantuk thil tuahnak ah aa telmi mino hna nih zalonnak kan hmu tiah an ruah men lai nain an hmu lo.—Titas 3:3.

17, 18. (a) Pathian nawlngaihnak nih zalonnak taktak kha zeitindah a kan pek? (b) Adam le Evi cu tuchan minung nakin zeiti lam in dah zalonnak tam deuh an hmuh?

¹⁷ Phundang in cun Jehovah nawl ngaih cu kan caah a ṭha. Kan ngandamnak caah a ṭha i mah nih zalonnak taktak a kan pek. (Salm 19:7-11) Zalonnak kha a ṭhami lam in na hman, phundang cun a tlingmi Pathian nawlbia le phunglam na zulh tikah Pathian le na nu le na pa hmaiah zumhawktlakmi na si kha na langhter a si. Mah tikah na nu le na pa nih an i zumh deuh lai i zalonnak tam deuh an in pek lai. Jehovah nih a rauhhlan ah zumhfekmi a salle vialte kha a tlingmi zalonnak ka pek hna lai tiah bia aa kam. Mah kha Baibal nih “Pathian fale hna luatnak a sunglawimi” tiah a auh.—Rom 8:21.

¹⁸ Mah cu Adam le Evi nih an rak hmuhmi zalonnak phun kha a si. Eden dum ah Pathian nih a thlauhmi hna thil pakhat lawng a um. Thingkung pakhat i a thei kha an ei awk a si lo. (Gen. 2:9, 17) Mah nawlbia a pek hna caah Pathian cu a dinglo asiloah mi a khengkham tukmi a si tiah na ruat maw? Na ruat lo. Minung nih cun nawlbia zeizah dah an ser i midang kha zulh awkah zeitluk in dah an hnek hna ti kha ruat. Asinain Jehovah nih cun Adam le Evi kha nawlbia pakhat lawng a pek hna.

19. Jehovah le Jesuh nih zalonnak hmuh awkah a kan bawmmi zeidah a kan cawnpiak?

¹⁹ Jehovah nih a kan pehtlaihning cu a ṭha tuk. Nawlbia tampi pek canah dawtnak nawlbia kha zulh awkah lungsau tein a kan cawnpiak. A phunglam ningin nun awk le a ṭhalomi thil kha huat awkah a kan cawnpiak. (Rom 12:9) A Fapa, Jesuh nih Thlangcung Cawnpiaknak ah zeicah mi nih thilṭhalo an tuah ti kha hngalhthiam awkah  a kan bawmh. (Matt. 5:27, 28) Pathian Pennak Siangpahrang a simi Jesuh nih vawlei thar ah a hmaan, hmaanlo kong he aa tlaiin amah bantukin hmuhnak ngeih awkah a kan cawnpiak rih lai. (Heb. 1:9) Kan ruahnak le kan pum zong a tlingmi a siter lai. Thilṭhalo tuah awkah lemsoi kan si ti lo tik le mitlinglo si ruangah harnak ton ti lo tikah zeidah a lawh lai ti khi na mitthlam ah cuanter hmanh. Cun a donghnak ah Jehovah biakam a simi “luatnak a sunglawimi” kha kan hmu lai.

20. (a) Jehovah nih a ngeihmi zalonnak kha zeitindah a hman? (b) Jehovah kha zeitindah kan i zohchunh khawh?

²⁰ Vawlei thar zongah kan zalonnak cu ri a um rih lai. Zeiti lam in dah? Pathian le midang kan dawtnak nih a uk lai. Dawtnak kha lam kan i hruaiter tikah Jehovah kan i zohchunhmi a si. Jehovah cu zalonnak tling a ngeimi a si ko nain a kan pehthlaih ning telin a tuahmi kip ah dawtnak kha lam aa hruaiter. (1 Johan 4:7, 8) Cucaah Pathian kan i zohchunh tik lawngah zalonnak taktak kan hmu kho ti kha mah nih a langhter.

21. (a) David nih Jehovah kong he aa tlaiin zeitindah a intuar? (b) A hnu capar ah zei kong dah kan i ruah hna lai?

²¹ Jehovah nih aan pekmi thilṭha vialte caah naa lawm maw? Pathian nih thlarau rawl, hawikom ṭha, sullam a ngeimi hmuitinh, hmailei ah a tlingmi zalonnak ruahchannak le a dang a sunglawi tukmi laksawng tampi aan pek. (Salm 103:5) Salm 16:11 ah hmuhmi bia in thla a cammi David bantukin na intuar ve men lai: “Nunnak lei kalnak lam cu na ka hmuhsak lai; ka sinah na um caah lawmhnak in ka khat i na ka bawmh caah nuamhnak ka hmu zungzal.” A hnu capar ah Salm 16 i a sunglawimi a dang biatak kong kha kan i ruah hna lai. Mah nih zeitindah a ṭha bikmi nunnak na ngeih khawh ti kha hngalh awkah aan bawmh lai.