Jehovah nih Israel mi hna kha a thiangmi miphun si awkah a forh hna. Thiang tein an um khawh nakhnga hitin a ti hna: “Na mi hna lakah mi kong thang ceih in vak len ko hlah, na innpa nunnak hrawh awkah dir hlah, keimah hi BAWIPA cu ka si.”—Lev. 19:2, 16.

“Hrawh awkah dir hlah” timi biafang kha a hrampi Hebru cauk ahcun a ṭhami thil in langhter a si nain mah cu zei sullam dah a si? Levitikas Baibal i Judah cherhchanhmi cauk pakhat ah hitin a ti: “Mah Baibal caang chung . . . [mah ah hmuhmi] Hebru biafang i a sullam cu hngalhthiam awkah a har tuk caah a chim duhmi cu ‘a pawngah dir lo le um lo’ kha a si.”

Baibal lei mifim cheukhat nih mah biafang kha a hmailei Baibal caang he an pehtlaihter i hitin an ti: “Biaceihnak ah dinlonak nan tuah lai lo; sifak mi kha na duhdanh hna lai lo, mi ngan zong kha na hmaizah hlei lai lo, sihmanhselaw dinnak in na innpa bia kha na ceih lai.” (Lev. 19:15) Cun caang 16 ah hmuhmi nawlbia nih mi pakhat “doh” kha si loin Israel miphun pawl nih upadi kongkau asiloah chawlehnak kongkau ah a ding loin thil an tuah awk a si lo timi tu kha a chim duhmi a si. Mah lengah Israel mi pakhat nih amah ṭhatnak caah a ding lomi zei thil hmanh a tuah awk a si lo. Kannih cu cutin kan tuah lai lo ti cu a hmaan ko, asinain caang 16 ah a hmanmi biafang kha ṭha tein hngalhthiam khawh ning lam a um.

Mah Baibal caang i a hramthawk ṭhen kha zohhmanh. Pathian nih a miphun pawl kha mi kong nan ceih lai lo tiah nawlbia a pek hna. Mi pakhat nih midang kong a ceih tikah buaibainak a sermi a si. Asinain mi pakhat nih midang thang a chiat ahcun mah cu a ṭha lo chinchinmi a si. (Ptb. 10:19; Pct. 10:12-14; 1 Tim. 5:11-15; Jeim 3:6) Mi kong ceih a hmangmi nih cun midang minchiatter awkah lih hna a chim tawn. Cun mi kong ceih a hmangmi nih midang nunnak caah ṭih a nungmi a si hmanhah a hmaan loin tehte a khaan men lai. Mi kong ceih a hmangmi hna nih Naboth kong he aa tlaiin lihbia an chim ruangah Noboth cu a ding loin thi lak in lung in cheh a rak si. (1 Si. 21:8-13) Cucaah Levitikas 19:16 i a donghnaklei ah a chim bantukin mikong ceih a hmangmi cu midang nunnak hrawh awkah a dir kho.

Cun mi pakhat nih a dang mi pakhat kha a huat ca zongah a kong a ceih khawh. 1 Johan 3:15 ah hitin a ti: “A unau a huami paoh cu lainawng a si i lainawng mi nih cun an chungah zungzal nunnak an ngei lo ti kha nan hngalh.” Pathian nih “na innpa nunnak hrawh awkah dir hlah” tiah a ti hnuah hitin a ti chap: “Na unau cu na lungchung in na hua lai lo.”—Lev. 19:17.

Cucaah Levitikas 19:16 ah a chimmi bia cu Khrihfa pawl caah a biapi tukmi ralrin peknak a si. Cucaah a ṭhalomi ruahnak le midang kong ceih kha kan hrial a hau. Mi pakhat kha kan rem lo asiloah kan nahchuah caah a kong kan ceih ahcun amah “hrawh awkah” kan dirmi a si i mah nih amah kan huat kha a langhter. Cucaah Khrihfa hna nih midang huat kha kan hrial hrimhrim awk a si.—Matt. 12:36, 37.