1. Jehovah miphun nih zei bantuk a ṭhami lungput dah an ngeih?

PATHIAN miphun nih Jesuh lamhruainak tangah Jehovah rian kha “anmah lungtho tein” an ṭuan lai tiah Baibal nih hlanliopi in a rak chimchung. (Salm 110:3) Mah chimchungbia cu tuchan ah a tling. Kum fatin Jehovah salle nih lungtho tein phungchim rian caah suimilam nuai tampi an hman. Mah rian an ṭuan caah tangka an hmu lo nain cutin ṭuan kha an duh. Zumtukhat unau pawl kha pumsalei, lungthinlei le thlaraulei bawmhnak ca zongah an caan kha an hman. Khrihfa upa le bu rianṭuantu hna nih pumhnak ca i timhnak le tuukhal lennak caah an caan tampi kha an hman. Jehovah miphun nih cutin an tuahnak a ruang cu zeidah a si? Jehovah le an minunghawi kha an dawt hna caah a si.—Matt. 22:37-39.

2. Rom 15:1-3 nih a langhter bantukin Jesuh nih zei zohchunh awk dah a chiah?

² Jesuh nih amah ca nakin midang ca ṭhatnak biapi deuh ah a chiah kha a rak langhter. A keneh kha kan si khawh chungin zulh awkah kan i zuam. (Rom 15:1-3 rel.) Jesuh aa zohchunhmi nih ṭhatnak an zun lai. Jesuh nih hitin a ti: “Peklei ah hin hmuhlei nakin lunglawmhnak a um deuh.”—Lamkaltu 20:35.

3. Hi capar ah zei kong dah kan i ruah hna lai?

³ Hi capar ah Jesuh nih midang bawmhnak caah mahca  ṭhatnak a hlawtmi le kan i zohchunh khawh ning kong hna kan i ruah lai. Cun midang bawmh duhnak lungthin ṭhanter khawh ning kong zong kan i ruah lai.

4. Jesuh nih amah ca nakin midang ṭhatnak ca biapi deuh ah a chiah kha zeitindah a rak langhter?

⁴Jesuh nih a tha a bat lio hmanhah midang kha a bawmh hna. Mi tampi nih Kapernuam khua pawng i tlang cungah Jesuh an rak ton lioah a tuahmi kong kha ruathmanh. Jesuh cu zan khuadei thla a rak cam. A tha a rak ba tuk ko lai nain mibu lakah a si a fakmi le a dam lomi a hmuh hna tikah a zaang an fak tuk. Cucaah a rak damter hna i Tlang Cung Cawnpiaknak tiah a min a thangmi, thazaang a pemi phungchimnak kha a rak chim.—Luka 6:12-20.

5. Chungkharlu nih an tha a bat caan ah Jesuh i mahca ṭhatnak hlawtnak lungput kha zeitindah an i zohchunh khawh?

⁵Chungkharlu nih Jesuh an i zohchunh khawh ning. Mah tahchunhnak hi na mitthlam ah cuanter hmanh. Chungkharlu pakhat cu chun nitlak rian a ṭuan hnuah thaba ngaiin inn ah a rak ṭin. Mah zan ah Chungkhar Pumhnak tuah lo a duh men lai nain Jehovah sinah chungkhar pumhnak tuah khawhnak caah thazaang a hal. Jehovah nih a thlacamnak a leh caah voidang bantukin chungkhar pumhnak an tuah khawh. Cucaah an fale nih an nu le an pa caah Jehovah biaknak cu a biapi bikmi a si ti kha mah zan ah an cawn khawh.

6. Jesuh nih mahca ṭhatnak hlaw in midang bawmhnak caah amah pumpak caan a hman ning kha tahchunhnak pe.

⁶Jesuh nih amah pumpak caan kha siang ngaiin a hman. Jesuh cu a hawi, Tipil Petu Johan thah a si ti thawng a theih tikah zeitindah a um lai ti kha na mitthlam ah na cuanter kho maw? Jesuh cu a ngaih a chia tuk ko lai. Baibal nih hitin a ti: “Cu thawng [Johan thihnak kong] cu Jesuh nih a theih tikah cuka cun lawng in hmunking ah amah lawng tein a kal.” (Matt. 14:10-13) Jesuh nih amah lawng tein um a duhnak a ruang kha kan hngalhthiam khawh. Mi tam deuh nih kan ngaihchiat caan ah kanmah lawngin um kha kan duh. Asinain Jesuh cu amah  te lawngin a um kho lo. Mibu cu Jesuh a phanh hlanin mah hmun ah an rak phan cang. Jesuh nih zeitindah a rak lehrulh hna? Mibu nih an herhmi kha a hngalh caah “a zaang an fak ngaingai.” Jesuh nih Pathian sinin bawmhnak le hnemhnak an herh ti a hngalh caah khulrang in a rak bawmh hna. Cucaah “thil [tlawmpal si loin] tampi a cawnpiak hna.”—Marka 6:31-34; Luka 9:10, 11.

7-8. Unau pakhatkhat bawmh a herh tikah Khrihfa upa nih Jesuh an i zohchunh khawh ning kha tahchunhnak pe.

⁷Dawtnak a ngeimi Khrihfa upa nih Jesuh an i zohchunh khawh ning. Kan caah Khrihfa upa nih mahzawn ruat loin rian an ṭuanmi kha kan sunsak tuk. Khrihfabu caah an ṭuanmi rian tampi cu unau tampi nih hngalh a si lo. Tahchunhnak ah, siilei kong he aa tlaiin lakhruak in thil pakhatkhat a can tikah Siizung Pehtlaihnak Kawmiṭi nih zumtukhat unau pawl kha khulrang in an bawmh colh hna. Cu bantuk thil cu zanṭim ah a cang kho. Asinain Khrihfa upa le an chungkhar pawl nih lungretheihnak a tongmi unau pawl cungah zaangfahnak an langhter i anmah ca nakin unau pawl ṭhatnak tu kha biapi deuh ah an chiah.

⁸ Khrihfa upa cu Biakinn le a dang innsaknak, har tongmi hna bawmhnak rian ti bantuk zongah an i tel. Cun an caan tampi kha unau pawl cawnpiaknak, thazaang peknak le bawmhnak caah an hman. Cucaah mah unaupa hna le an chungkhar pawl cu lungtak in thangṭhat awkah an i tlak. Jehovah nih thluachuah pe ko hna seh! Khrihfa upa zong midang bantukin a tlarimi an si a hau. An innchungkhar zohkhenh khawh lo tiangin  Khrihfabu rian caah a caan tam tuk an pek awk a si lo.

9. Filipi 2:4, 5 ningin Khrihfa a simi nih zei lungput dah kan ngeih awk a si?

⁹ Filipi 2:4, 5 rel. Khrihfa upa lawng si loin kan dihlak in Jesuh langhtermi mahca ṭhatnak hlawt duhnak lungput kha kan i zohchunh khawh. Baibal nih “sal sinak tu kha aa lak” tiah a ti. (Fil. 2:7) Mah in kan cawn khawhmi kong kha ruathmanh. San a tlaimi sal asiloah sinum pakhat nih cun a bawipa mithmai ṭha hmuh awkah caanṭha a kawl. Jehovah sal kan si ca le unau pawl ca rian a ṭuanmi kan si caah Jehovah le unau caah man a ngei tukmi si kan duh. A tanglei i langhtermi ruahnak cheuhnak hna zulhnak thawngin cutin na tuah khawh.

10. Zei biahalnak dah kan i hal khawh?

¹⁰Na lungput kha i dothlat. Hitin i hal: ‘Midang bawmhnak caah zeitindah mahca ṭhatnak hlawt duhnak lungput ka langhter khawh? Tahchunhnak ah, tar zohkhenhnak inn ah a ummi unaupa pakhat sin va len ding asiloah pumhnak ah kum upa unaunu pakhat kha va don dingin bawmhnak hal ka si tikah zeitindah ka lehrulh? Civui tuahnak inn thianhhlimhnak asiloah Biakinn zohkhenhnak ah bawmh a herh tikah khulrang in kaa pe maw?’ Midang bawmh awkah Pathian sinah aa pechanmi kan dihlak in kan caan le kan ngeihmi thilri kha mahca ṭhatnak hlaw in kan pek tikah Jehovah cu aa lawm. Ṭhancho kan herh ti kan hngalh ahcun zeidah kan tuah khawh?

11. Mahca ṭhatnak hlawt duhnak lungput ngeih awkah thlacamnak nih zeitindah a kan bawmh khawh?

¹¹Jehovah sinah lungtak tein thlacam. Mahca ṭhatnak tam deuh in hlawt ka hau ti na hngalh ko nain cutin tuah a hau lem lo tiah na ruah men lai. Cutin na si ahcun Jehovah sinah lungtak tein thlacam. Dingfel tein um. Na intuar ning kha Jehovah sinah chim law na ‘zulh khawh nakhnga le cutin tuah duhnak lungthin ngeih’ awkah hal.—Fil. 2:13.

12. Tipil a ing cangmi, mino unaupa hna nih bupi kha zeitindah an bawmh khawh?

¹² Tipil a ing cangmi mino unaupa na si ahcun Khrihfabu ah rian tam deuh in ṭuan na duh nakhnga Jehovah sinah bawmhnak hal. Ram cheukhat ah bu rianṭuantu nakin Khrihfa upa an tam deuh i bu rianṭuantu tam deuh cu kum upa an si. Bupi cu a ṭhancho thluahmah caah Jehovah miphun zohkhenhnak ah bawmtu mino unaupa tampi kan herh hna. A herhnak zei bantuk hmun paohah ṭuan duhnak lungput na ngeih ahcun naa nuam lai. Zeicah? Jehovah lung na nuamhter lai, minṭha na hmu lai i midang bawmhnak in lungsinak na hmu lai.

13-14. Unau pawl bawmh awkah zeidah kan tuah khawh? (A phaw hmanthlak zoh.)

¹³Midang herhmi bawmh awkah hliphlau tein um. Lamkaltu Paul nih Judea ah a ummi Khrihfa hna kha hitin a ti hna: “Pakhat le pakhat i bawmh le pakhat le pakhat cung i ṭhatnak tuah kha philh hlah u; hihi Pathian lung a tongmi raithawinak a si.” (Heb. 13:16) Mah cu a ṭha tukmi ruahnak cheuhnak a si. Mah cakuat an hmuh hnu tlawmpal ah Judea ram i Khrihfa hna nih an inn, an rian le zumlotu an chungkhat pawl kha an kaltak hna a hau i “tlang cungah” zam zong a hau. (Matt. 24:16) Mah lio caan ah pakhat le pakhat bawmh an rak herh tuk ti cu a fiang ko. Paul ruahnak cheuhnak kha zul in an ngeihmi thil pawl pakhat le pakhat  an i hrawm ahcun nunnak thar i nun kha an i fawih deuh lai.

¹⁴ Unau pawl nih an herhmi kha a zungzal in cun an kan chim men lai lo. Tahchunhnak ah, unaupa pakhat cu a nupi nih a thihtak men lai. Unaupa cu rawl chuannak, umkalnak asiloah inn rian ah bawmh a hau maw? Unaupa nih midang hnahnawh a duh lo caah bawmhnak a kan hal men lai lo. Cucaah bawmhnak a kan hal lo hmanhah kanmahlei in kan bawmh hmasa ahcun aa lawm tuk ko lai. A herhmi kha pakhatkhat nih an bawmh te ko lai asiloah a herhmi cu a kan chimh te ko lai tiah kan ruah awk a si lo. Hitin i hal: ‘Amah sining ah hei um ning law zei bawmhnak dah ka sunsak lai?’

15. Midang bawmh kan duh ahcun zeidah kan tuah awk a si?

¹⁵Naih a fawimi si. Unau pawl cu midang bawmh awkah timhcia tein an um zungzal ti cu lunghrin awk a um lo. Bawmh kan hal hna tikah hna kan hnawh hna timi ruahnak an kan ngeihter lo. Kan herhmi a um tikah anmah kan i bochan khawh hna ti kha kan hngalh i anmah bantuk si kan duh ve. Kum 45 a simi Khrihfa upa Alan nih naih a fawi si kha a duh. Jesuh kong he aa tlaiin Alan nih hitin a ti: “Jesuh cu a rian a tam tuk ko nain mikip nih an naih ngam i zalong tein bawmhnak an hal ngam. An zawn a ruat taktakmi pa pakhat in an hmuh. Cucaah Jesuh bantukin naih a fawimi, komh a nuammmi le zawnruahnak a ngeimi pakhat in hngalhmi si ka duh.”

16. Jesuh keneh naih tein zulh khawh awkah Salm 119:59, 60 kha zeitindah kan zulh khawh?

¹⁶ Jesuh kha tling tein kan i zohchunh khawh lo caah kan lung a dongh awk a si lo. (Jeim 3:2) Zuk suai a cawngmi siangngakchia pakhat nih a saya suaimi ning tein  aa zohchunh kho lo. Asinain a palhnak in a cawn i a si khawh chungin a saya suaimi ningin suai aa zuam tikah a ṭhangcho ko lai. Cu bantukin Baibal hlathlainak ah kan cawnmi ningin kan zulh i ṭhancho awkah kan i zuam peng ahcun Jesuh keneh kha naih tein kan zulh khawh lai.—Salm 119:59, 60 rel.

17-18. Jesuh langhtermi mahca ṭhatnak hlawt duhnak lungput kha kan i zohchunh tikah zei ṭhatnak dah kan hmuh lai?

¹⁷ Midang bawmh kan duh ahcun midang zong cutin tuah an duh ve lai. Khrihfa upa Tim nih hitin a ti: “Mino unaupa cheukhat cu bu rianṭuantu an hung si. Cutin an sinak a ruang pakhat cu midang nih bawmh duhnak lungthin an ngeihmi kha an hmuh i anmah bantuk si an duh ve caah a si. Mah unaupa hna nih Khrihfabu le Khrihfa upa kha an bawmh hna.”

¹⁸ Tuchan vawlei mi tampi cu mahzawn lawng aa ruatmi an si. Asinain Jehovah miphun cu an i thleidang. Jesuh langhtermi mahca ṭhatnak hlawt duhnak nih kan lung a kan suk caah a nunning i zohchunh awkah bia kan khiah. Jesuh keneh kha tling tein cun kan zul kho lai lo nain naih tein kan zulh khawh. (1 Pet. 2:21) Jesuh i zohchunh awkah kan si khawh chungin kan i zuam ahcun Pathian mithmai ṭha kan hmu lai i kan i nuam lai.