BAIBAL chan ah mopa le a chungkhar nih monu a chungkhar sinah man an pek, mah nih an chungkhar hnih in mah ṭhitumnak caah an hna a tla ti kha a langhter. Man pekmi ah a man a sungmi thil, saram asiloah tangka hna aa tel. A caan ah rianṭuan man in an pek. Tahchunhnak ah, Jakob nih Rachel a ṭhit khawh nakhnga a pa sinah kum sarih chung rian a ṭuanpiak. (Gen. 29:17, 18, 20) Mah nunphung i aa tinhnak cu zeidah a si?

Baibal lei mifim Carol Meyers nih hitin a ti: “Monu chungkhar nih an fanu a rianṭuan man an sungh caah rulhnak in man an pekmi a si kho men, a hleiin [lo a tuahmi] chungkhar caah mah cu a biapimi a si.” Mah lengah man pekmi nih ṭhitumnak thawngin aa tlaimi chungkhar pahnih an i pehtlaihnak kha a fehter chin khawh. Harnak an ton tikah pakhat le pakhat an i bawm kho. Cun mah minu cu hammi a si cang i a pa zohkhenhnak le huhphenhnak in a vapa kut ah aa ṭhial cang lai ti kha mah man pekmi nih a langhter.

Man pekmi nih nupile cu cawk khawhmi asiloah zuar khawhmi thil an si tinak a si lo. Cauk (Ancient Israel—Its Life and Institutions) pakhat nih hitin a ti: “Monu chungkhar sinah pek dingmi tangka zat asiloah mah he a man aa tlukmi thilri nih Israel mi hna ṭhitumnak cu thil i cawkmi bantuk a lawhter. Asinain man cu monu sinah si loin a chungkhar sinah pekmi rulhnak phun in hmuh dawh a rak si.”

Tuchan zongah ram cheukhat ahcun man peknak nunphung an ngei rih. Khrihfa nulepa a simi nih man an hal hna tikah tam tuk an hal hna lonak thawngin ‘a tlarimi an sinak kha mikip nih an hmuh’ nakhnga an langhter. (Fil. 4:5; 1 Kor. 10:32, 33) Cuticun “a hak a kaumi” asiloah tangka a duh tukmi an si lonak kha an langhter. (2 Tim. 3:2) Mah lengah Khrihfa nulepa nih a tlari loin man tam tuk an hauh hna lo tikah mopa nih man a pek khawh hlan tiang ṭhitumnak kha thawn a hau ti lai lo. Asiloah man tam tuk an hauh ahcun mopa nih man a pek khawh nakhnga vawlei lei rian caantling in ṭuan a hauh lai caah hmaikal a ṭuanmi kha kaa dinh a hau timi ruahnak a ngei kho men, asinain man tam tuk hauh a si lo ahcun mah ruahnak kha a ngei ti lai lo.

Vawleicung i hmun cheukhat ahcun man pekmi cu upadi he aa tlaimi a si. Cutin a sinak hmun ah Khrihfa nulepa nih mah upadi hna kha an zulh. Zeicah? Baibal nih Khrihfa hna kha ‘ram uktu bawi an nawl ngaih’ awk le Pathian nawlbia he aa ralkah lomi nawlbia pawl zulh awkah a hal hna.—Rom 13:1; Lam. 5:29.